قومی مشن برائے صاف گنگا (این ایم سی جی ) نے ویبنار سیریز ‘نوجوان ذہنوں کو روشن کرنا : دریاؤں کی بحالی’ عالمی سطح پر انجام دیا ہے۔ ویبنار سیریز کا 13 واں ایڈیشن، جس کا اب عنوان ہے، ‘نوجوان ذہنوں کو روشنی  بخشنا : ایک عالمی مہم’ ورچوئل طور پر 8 جولائی 2023 کو اے پی اے سی نیوز نیٹ ورک کے تعاون سے منعقد کیا گیا ، جس کا مقصد ‘ مستقبل کے عالمی ہمہ گیر قائدین سازی کے لئے نوجوان آبی بقا کاروں کوشرکت کی دعوت دینا  ہے۔ ویبنار کا موضوع پانی کا تحفظ تھا۔ اس خصوصی سیشن میں بارش کے پانی کے تحفظ کی فوری ضرورت، یونیورسٹیوں کے ساتھ اشتراک اور پانی کے پائیدار انتظام اور دریا کی بحالی کو یقینی بنانے کے لیے کمیونٹی کی شمولیت پر تبادلہ خیال کیا گیا۔

جناب جی اسوک کمار، ڈائرکٹر جنرل، این ایم سی جی نے ویبینار کی صدارت کی۔ پینلسٹ میں جناب بی ایس یادو، چانسلر، آئی ای ایس یونیورسٹی، ڈاکٹر۔ نارائنا شینائے ایس، وائس چانسلر، منی پال اکیڈمی آف ہائر ایجوکیشن، ڈاکٹر۔ نینا سنگھ زوتشی، پروفیسر اور ڈین اکیڈمکس، ورلڈ یونیورسٹی آف ڈیزائن، اور  جناب ارپن اسٹیفن، مملکت بحرین، ای لرننگ ایکسپرٹ، عربین گلف یونیورسٹی شامل تھے۔

کلیدی خطبہ دیتے ہوئے، ڈی جی، این ایم سی جی نے پانی کے تحفظ اور دریا کی بحالی میں تیز تر کوششوں کی اہم ضرورت پر روشنی ڈالی۔ انہوں نے پانی کے وسائل کی پائیداری اور احترام کو یقینی بنانے کے لیے ایک اجتماعی تحریک اور شہریوں کی ذمہ داری پر زور دیتے ہوئے عوامی شرکت کے لازمی کردار کے بارے میں بات کی۔ انہوں نے ملک میں بارشوں میں مقامی اور وقتی تغیرات کو استعمال کرنے کے لیے آبی وسائل کے موثر انتظام پر زور دیا۔انہوں نے کہا ‘‘نمامی گنگا کا دائرہ دریائے گنگا اور اس کی معاون ندیوں تک پھیلا ہوا ہے اور گنگا طاس میں کیے گئے کام کا اثر پانی کے معیار اور حیاتیاتی تنوع میں نمایاں بہتری کی صورت میں ظاہر ہو رہا ہے، جس کی مثال گینگیٹک ڈولفنز، اوٹرس وغیرہ جیسے آبی انواع کے بڑھتے ہوئے نظارے میں ملتی ہے’’۔ انہوں نے مزید کہا، ‘‘اقوام متحدہ کی طرف سے این ایم سی جی  کی کوششوں کا اعتراف پانی کے تحفظ کے لیے اس کے منفرد مقام اور عزم کو مزید تقویت دیتا ہے۔ بین الاقوامی اسٹیک ہولڈرز کی جانب سے موصول ہونے والا مثبت اعتراف  نمامی گنگے کے اثرات کو واضح کرتا ہے۔ کمبھ میلہ 2019 میں 20 کروڑ سے زیادہ لوگوں کی شرکت، توقع سے کہیں زیادہ، ملک میں دریا کی بحالی کی کوششوں میں بڑھتی ہوئی بیداری اور مصروفیت کی نشاندہی کرتی ہے۔’’

انہوں نے کہا کہ 5 آر  ریڈیوس ، ری یوز ، ری سائیکل ،ری چارج اور ریسپیکٹ  کی اہمیت  پانی کی کمی سے نمٹنے کے لیےکلیدی ہے، خاص طور پر زرعی شعبے، جہاں پانی کے استعمال کی کارکردگی ایک بنیادی تشویش ہے۔ انہوں نے کسانوں کی طرف سے زمینی پانی کے ضرورت سے زیادہ استعمال پر روشنی ڈالی، جس کو نہ صرف پمپنگ کے لیے خاصی توانائی کی ضرورت ہوتی ہے، بلکہ آبپاشی کے زیادہ موثر طریقوں کی بھی طلب  ہوتی ہے۔ انہوں نے کہا کہ پانی کی بچت کو زندگی کے تمام پہلوؤں میں شامل کیا جانا چاہیے، پانی کے دوبارہ استعمال کی حوصلہ افزائی کی جانی چاہیے، جیسے کہ سبزیوں، پھلوں اور پودوں کو دھونے کے لیے آر او سسٹمز سے مسترد شدہ پانی کا استعمال۔ مزید برآں، سیوریج ٹریٹمنٹ پلانٹس (ایس ٹی پیز) سے ٹریٹ شدہ پانی کو آبپاشی اور دیگر مقاصد کے لیے استعمال کیا جا سکتا ہے، جس سے دوسرے ذرائع سے پانی کے اخراج کو کم کیا جا سکتا ہے۔ انہوں نے کہا کہ پانی کی مدوّر معیشت  کو اپناکر ، جہاں پانی کو مزید ضائع نہیں کیا جاتا بلکہ اسے دوبارہ استعمال کیا جاتا ہے، دنیا پانی کے پائیدار انتظام کو حاصل کر سکتی ہے۔

انہوں نے نوجوان نسلوں کو تعلیم دینے، طلباء میں بیداری پیدا کرنے اور پانی کے پائیدار استعمال کے طریقوں کو فروغ دینے کے لیے ذمہ داری کا احساس پیدا کرنے کی ضرورت پر توجہ مرکوز کی۔ انہوں نے سیوریج کے پانی کو دوبارہ استعمال کرنے کی اہمیت کو بھی اجاگر کیا، سیوریج کو محفوظ طریقے سے ٹھکانے لگانے کے تکنیکی پہلوؤں پر توجہ مرکوز کی۔ انہوں نے کہا‘‘سیوریج کو غلط طریقے سے ٹھکانے لگانے سے تازہ پانی کے ذرائع آلودہ ہو سکتے ہیں، جس سے صحت عامہ کو خطرات لاحق ہو سکتے ہیں۔ این ایم سی جی نرمل  جل کیندروں کے قیام کے ذریعے سیوریج کے پانی کو صاف  کرنے کے عمل میں فعال طور پر مصروف  ہے،جس کا مقصد سیوریج کے پانی کو محفوظ طریقے سے ٹھکانے لگانے اور اسے غیر پینے کے مقاصد کے لیے استعمال کرنے کو یقینی بنانا ہے۔’’

ڈی جی، این ایم سی جی نے بارش کے پانی کو محفوظ کرنے کی ضرورت پر زور دیا اور کیچ دی رین "بارش پکڑو" مہم پر تبادلہ خیال کیا، جو بارش کے پانی کو لا مرکزیت کے ساتھ ذخیرہ کرنے کی حوصلہ افزائی کرتی ہے۔ مہم، کمیونٹیز پر زور دیتی ہے کہ وہ اپنے علاقوں میں بارش کے پانی کو جمع کریں، پانی کی میز کی سطح کو بلند کرنے اور توانائی سے بھرپور واٹر پمپنگ میں کمی میں اپنا حصہ ڈالیں۔ "بارش کے پانی کو محفوظ کرنا گرمی کے موسم کے لیے پانی کو محفوظ کرنے میں اہم کردار ادا کرتا ہے"۔ مزید برآں، انہوں نے طلباء کے لیے بارش کے پانی کے تحفظ کی اہمیت کی نشاندہی کی،  کیونکہ یہ آنے والی نسلوں کے مستقبل کو براہ راست متاثر کرتا ہے۔ انہوں نے کہا، "اس علم کو طلباء میں ڈالنا، ذمہ داری کے احساس کو فروغ دینا اور پانی کے استعمال کے محتاط  طریقوں کو فروغ دینا ناگزیر ہے۔’’

انہوں نے اس اہم کردار کو تسلیم کیا، جو یونیورسٹیاں دریاؤں کے تحفظ اور بحالی میں ادا کر سکتی ہیں اور یونیورسٹیوں پر زور دیا کہ وہ دریاؤں کی بحالی میں فعال طور پر تعاون اور حمایت کریں۔

آئی ای ایس یونیورسٹی کے چانسلر مسٹر بی ایس یادو نے ملک کی لائف لائن کے طور پر دریائے گنگا کے کردار کے بارے میں بات کی اور پانی کے وسائل کے زیادہ سے زیادہ استعمال اور تحفظ کو فروغ دینے کے لیے یونیورسٹیوں کے اندر بیداری مہم چلانے کی ضرورت پر زور دیا۔ انہوں نے صاف پانی کی ضرورت کو پورا کرنے میں ایک قابل ذکر پہل کے طور پر تسلیم کرتے ہوئے جل جیون مشن کی بھی تعریف کی۔ مزید برآں، انہوں نے حکومت ہند کی طرف سے شروع کیے گئے اُنّت بھارت ابھیان پر روشنی ڈالی، جس میں 10 قریبی گاؤں کو کمیونٹی کی ترقی کے لیے گود لیا جانا ہے۔ مسٹر یادو نے پانی کو ایک بنیادی ضرورت کے طور پر تسلیم کرتے ہوئے اور صاف پانی کے حصول کے لیے درکار اہم اخراجات پر زور دیتے ہوئے ان اقدامات کی حمایت کے لیے اپنے جوش و جذبے اور تیاری کا اظہار کیا۔ انہوں نے بیداری پیدا کرنے اور دریاؤں کی بحالی اور آلودگی کو ختم کرنے کے لیے دنیا کی سب سے بڑی مہم کو نافذ کرنے کے لیے قومی مشن برائے کلین گنگا (این ایم سی جی ) کی کوششوں کی ستائش کی۔

ڈاکٹر نارائن شینا ئے ایس نے پانی کے تحفظ اور دریاؤں کے حفاظت کی ضرورت پر روشنی ڈالی۔ اعداد و شمار کا حوالہ دیتے ہوئے، انہوں نے نوٹ کیا کہ ہندوستان کے پاس ندیوں کی کثافت زیادہ ہے اور یہاں وافر بارش ہوتی ہے۔ ڈاکٹر شینائے نے کہا کہ گنگا ندی ملک کی 11 ریاستوں سے بہتی ہے، جو تقریباً 30 فیصد آبادی اور 40 فیصد زرعی اراضی پر محیط ہے۔ انہوں نے کہا "منیپال اکیڈمی آف ہائر ایجوکیشن دریا کی بحالی کی کوششوں میں سرگرم عمل ہے، سورنا آرادھنا پروجیکٹ جیسے پروگرام شروع کر رہی ہے، جس میں دریا کو ایک زندہ قدرتی وسائل کے طور پر دیکھا جاتا ہے جو نوجوان نسل کو ایک مکمل تناظر فراہم کرتا ہے،" ڈاکٹر شینائے نے مزید  کہا، "یہاں تک کہ چھوٹے اقدامات بھی پانی کے وسائل کی حفاظت اور پائیدار مستقبل کو یقینی بنانے کے بڑے مقصد میں حصہ ڈال کر ایک اہم اثر پیدا کر سکتے ہیں۔"

ڈاکٹر نینا سنگھ زوتشی نے یونیورسٹیز کنیکٹ پروگرام میں این ایم سی جی کے ساتھ یونیورسٹی کے تعاون پر تبادلہ خیال کیا۔ موسمیاتی تبدیلی کے عالمی چیلنج اور معاشرے پر اس کے فوری اثرات  کے بارے میں  خطاب کرتے ہوئے، ڈاکٹر زوتشی نے پانی کی ایک زندہ ہستی کے طور پر اہمیت اور اس چیلنج سے مؤثر طریقے سے نمٹنے کے لیے نوجوانوں کی شمولیت کی فوری ضرورت پر زور دیا۔ انہوں نے کہا کہ اس تعاون کا مقصد پانی کے تحفظ کے اصولوں کو ،ا سکول آف آرکیٹیکچر اینڈ پلاننگ کیمپس میں تحفظ کی کوششوں پر توجہ مرکوز کر تے ہوئے یونیورسٹی کے نصاب میں شامل کرنا ہے۔ انہوں نے کہا کہ اسکول آف کمیونیکیشن متاثر کن ویڈیوز کے ذریعے بیداری پیدا کرنے کی کوشش کر رہا ہے، جبکہ اسکول آف فیشن پائیدار طریقوں کو ترجیح دے رہا ہے۔ مزید برآں، انہوں نے نوٹ کیا کہ اسکول آف پرفارمنگ آرٹس کا مقصد پانی کے تحفظ کو فروغ دینے والی پرفارمنس کے ذریعے طلبا کی حوصلہ افزائی کرنا ہے۔ انہوں نے کہا کہ تمام مضامین کے نصاب کے ڈیزائن میں پانی سے متعلق مسائل کو حل کرنا چاہیے اور پانی کے اہم مسئلے سے نمٹنے کے لیے ٹیکنالوجی اورمصنوعی ذہانت سے فائدہ اٹھانے کی اہمیت پر زور دیتے ہوئے اپنے خطاب کا اختتام کیا۔

عربین گلف یونیورسٹی کے ایک معزز ای لرننگ ماہر مسٹر ارپن اسٹیفن نے بحرین میں پانی سے متعلق درپیش چیلنجوں پر اپنی بصیرتیں شیئر کیں جن میں قدرتی دریاؤں یا جھیلوں کی عدم موجودگی اور سمندری پانی کو پینے کے پانی میں تبدیل کرنے پر بہت زیادہ انحصار شامل ہے۔ انہوں نے زیر زمین پانی کی کمی کے اہم مسئلے پر زور دیا، جسے تعلیمی شعبے میں اکثر نظر انداز کیا جاتا ہےاورنصاب میں اس کے انضمام کی ضرورت پر زور دیا۔جناب ا سٹیفن نے پانی کے وسائل کی کمی کو دور کرنے کی فوری ضرورت پر زور دیااور اس مسئلے کو وسیع پیمانے پر قبول کرنے پر زور دیا۔ انہوں نے زور دیا کہ  کے 12 کی سطح سے شروع ہونے والے نوجوانوں کو تعلیم دینا سب سے مؤثر طریقہ ہے۔ گہرائی سے معلومات فراہم کرنے اور اپنے تعلیمی سفر کے دوران پانی کے تحفظ پر توجہ مرکوز کرنے سے، طلباء کو صرف پیشہ ورانہ ڈگری حاصل کرنے کی بجائے ترجیح دینے کی ترغیب دی جا سکتی ہے۔ جناب اسٹیفن نے ماحولیاتی طور پر باشعور شہریوں کے پروان چڑھانے اور ہندوستان کے تعلیمی نظام کے اندر پائیدار طریقوں کو فروغ دینے کی ضرورت کی بڑھتی ہوئی شناخت کے ساتھ پانی کے تحفظ کی تعلیم کو ہم آہنگ کرنے کی وکالت کی۔

*************

ش ح۔اک۔ رم

U-6883