সাইরাম, আন্ধ্র প্রদেশকী রাজ্যপাল শ্রীমান অব্দুল নজীরজী, শ্রী সত্য সাই সেন্ত্রেল ত্রস্তকী মেনেজিং ত্রস্তী শ্রী আর.জে. রত্নাকরজী, শ্রী কে. চক্রবর্তীজী, ঐহাক্কী অরিবা মরুপ শ্রী র‍্য্যুকী হিরোজী, দাঃ বি. মোহনজী, শ্রী এম.এস. নাগনন্দজী, শ্রী নিমিশ পান্দ্যাজী, অতোপ্পী মীথুংলেন, ইবেম্মা অমসুং ইবুংঙো পুম্নমকপু, ঐহাক্না অমুক্কা হন্না সাইরাম হায়না নোল্লুকচরি।

ঐহাক্না পুত্তপার্তীদা লাকপগী খুদোংচাবা কয়ারক হন্না ফংখ্রে। হন্দক্কী মতাং অসিদসু, ঐহাক্না অদোমগী মরক্তা লৈদুনা, অদোমগা উন্নদুনা, মফমদুদা লৈদুনা থৌরম অসিদা শরুক য়াবা পামজবনি। অদুবু, মফমসিদা ওইরিবা ফিভম অসিনা ঐহাক লাকপা ঙমদ্রে। ভাই রত্নাকরজীনা ঐহাক্কী ইফমদা লাকপীনবা পাউজেল পীবা মতমদা ঐহাক্না মফমসিদা লাক্তুনা থৌজাল পীনবীয়ু হায়বীরকখিবনি। রত্নাকরজীগী ৱাহৈ অসি ঐহাক্না চুমহনগদবনি হায়না খল্লি। ঐহাক শোইদনা লাক্কনি, থৌজাল পীনবা নত্তেকো, থৌজাল লৌবা ওইনা লাক্কনি। ঐহাক্না তেক্নোলোজীগী মতেংদগী অদোম পুম্নমক্কী নাক্তা লৈবা ঙমজরি। ঐহাক্না শ্রী সত্যা সাই সেন্ত্রেল ত্রস্তকা মরী লৈনবা মীহুৎ খুদিং, অদুগা সত্যা সাই বাবাগী ভক্ত খুদিংবু থৌরম অসিগীদমক্তা থাগৎচবা পামজৈ। থৌরম অসিদা শ্রী সত্যা সাইগী থৌজাল লৈবীরি। ঙসিগী য়াইফরবা থৌরমসিদা শ্রী সত্যা সাই বাবাগী থৌজাল অমসুং ইথিলনা ঐখোয়গী নাক্তা লৈবসিদা ঐহাক্না য়াম্না নুংঙাইবা ফাওই। শ্রী হিরা গ্লোবেল কনভেন্সন সেন্তরগী মওংদা লৈবাক্না ৱারী ৱাতাই খন্ন-নৈনবগী মপুং ওইবা মফম অমা ফংলে। ঐহাক্না সেন্তর অসিগী ফোতো উরে অদুগা অদোম্না থারকপা অতেনবা ফিল্ম অসিদা সেন্তর অসিগী মমি কয়াসু উবা ফংলে। সেন্তর অসিদা অরিবা মওং-মতৌবুসু য়োকখৎপা অমসুং মতমগী চুনবা মতৌসু পুন্না লৈমিন্নরি। সেন্তর অসিনা স্পিরিচুএল কনফরেন্স অমসুং একাদমিক প্রোগ্রামশিংগী কেন্দ্র অমা ওইরগনি। মসিদা তোঙান-তোঙানবা হীরমগী অখঙ-অহৈ কয়ানা অমত্তা ওইনা পুনগনি। সেন্তর অসিনা নহারোলশিংদা মতেং য়াম্না পাংগনি হায়বগী ঐহাক্না থাজবা থমজরি। 

মরুপশিং,

ৱাখল্লোন অমনা খুমাং চাউশিনবা, থবক অমগা লোয়ননা তুংলমচত্তা চঙশিনবা মতমদা ৱাখল্লোন অদুগী মগুন লাকপনি। ঙসি কনভেন্সন সেন্তর শঙ্গাবা অসিগা লোয়ননা শ্রী সত্য সাই গ্লোবেল কাউন্সিলগী লুচিংবশিংগী কনফরেন্স অমা হৌখ্রে। কনফরেন্স অসিদা লৈবাক অমসুং মালেমগী দেলিগেত কয়া মফমসিদা তিন্দুনা লৈরি। মরু ওইবা ৱাফম অমনা, ঙসিগী থৌরম অসিগী থীম –“প্রেক্তিস এন্দ ইন্সপাইয়র” অসিমকসু ইথিল য়াম্না পীবনি। ঐখোয়গী মফমসিদা হায়নবা অমা লৈ – য়ত য়ত আচরিত শ্রেস্থ; তত-তত এব ইতরঃ জনঃ ।। হায়বদি, মমিং লৈবা মীওইনা পাংথোকপা থবক খুদিংমক, খুন্নাইনা খুদম ওইনা ইল্লি হায়বনি।

মরম অদুনা, ঐখোয়গী থবক-থৌরম্না অতোপ্পগী ইথিল ওইগদৌরিবনি। সত্যা সাই বাবাগী পুন্সিনা অহিঙবা খুদম অমা ওইরি। ভারতনা ঙসিদি মশাগী থৌদাংবু খ্বাইদগী মাঙদা থমদুনা তুংলমচত্তা খোঙদারি। নিংতম্বগী চহি 100কী পান্দমগা লোয়ননা ঐখোয়না মাঙজিল থানা চঙশিল্লি, ঐখোয়না অমৃত কালবু ইশাগী থৌদাং পাংথোক্কদবা য়ুগ হায়না খন্দুনা চৎলি। ঐখোয়গী থৌদাংশিং অসিদা হৌজিক মতমগী তঙাই ফদবা য়াওরি, তুংগী মতমগী পান্দম অমসু য়াওরি। মসিদা চাউখৎ থোঙথাংসু য়াওরি, হেরিতেজসু য়াওরি। লৈবাক অসিদা মীয়াম পুনবগী মফম অমা শেম্বআ মতমদা, নাকল অমদনা ভারতনা তেক্নোলোজী অমসুং শেন্মিৎলোনগী হীরমদসু লুচিংদুনা চৎলি। ঙসিদি ভারতনা মালেমগী খ্বাইদগী মঙাশুবা চাউবা শেন্মিৎলোন ওইরি। মালেমগী স্তার্তঅপকী খ্বাইদগী অহুমশুবা চাউবা ইকোসীস্তেমসু ওইরি। দিজিতেল তেক্নোলোজী অমসুং 5G গুম্বা লমশিংদা ঐখোয়না চাউর-চাউরবা লৈবাক কয়াগা চাংয়েংনরি। মালেমদা রিএল তাইম ওনলাইন ত্রাঞ্জেক্সন তৌরিবা খুদিংদা ভারত মথন্তনা চাদা 40গী শরুক তম্লি। ঐহাক্না রত্নাকর অমসুং ঐখোয়গী সাইগী ভক্তশিংদা হায়নীংবদি, ঐখোয়না সাই বাবাগী মিংদা শেম্লিবা জিলা, অমসুং মসিগী পুত্তপর্তীগী অপুনবা জিলা অসিবু ঐখোয়না চাদা 100দিজিতেল ওইহনবা য়াগদরা হায়বসিনি। ত্রাঞ্জেক্সন খুদিং দিজিতেল ওইবা, অমুক্তা য়েংবীয়ু, মসিদগী মালেমদা অনৌবা শক্তাক অমা ফংবা ঙমগনি অমসুং বাবাগী থৌজালদগী রত্নাকরজীগুম্বা ঐহাক্কী মরুপনা মসিবু মশাগী থৌদাংনি খল্লবদি, বাবাগী মথংগী মপোক নুমিত্তা জিলা অসিবু মপুং ফানা দিজিতেল ওইহনবা য়াগনি। কেশকী তঙাই ফদবা শুক্লৈ লৈতবা মফম অমা ওইহনবা য়ানবা হোৎনবা য়াগনি।

মরুপশিং,

খুন্নাইগী মীপুম খুদিংনা শরুক য়াবদগী অহোংবা পুরকপা ঙম্লিবনি। মরম অদুনা, গ্লোবেল কাউন্সিলগুম্বা থৌরম অসিদি ভারতকী মতাংদা খঙবা অমসুং মালেমগী অতোপ্পা লৈবাকশিংনা ভারতকা পুনবগী পাম্বৈ অমা ওইগনি।

মরুপশিং,

ঐখোয়গী লৈবাক অসিদা লাইনীংবা মীওইশিংবু অচেনবা ঈশিং ইচেলগুম্না খন্নৈ। মরমদি, লাইনীংবশিং অসিদি ভাখলনা লেপহনবা ঙমদে, অদুগা লিচৎ শাজৎনসু থিংবা ঙমদে। লেপ্তনা হোৎনবা অমসুং লেপ্তনা চঙশিনবা হায়বসিনা লাইনীংবশিংগী পুন্সিনি। লাইনীংবশিং অসিগী পোক্নফম লমদম অসি কদাইদনো হায়বা ভারতকী মীচম মীয়াম্না থোইদোক্না খন্নদে। অশেংবা নাইনীংববু মশামক্কী লমগীনি খল্লি, ঐখোয়গী সংস্কৃতীগী মীহুৎনি হায়না খন্নৈ। মরম অদুনা ঐখোয়গী লাইনীংবশিংনা চহি লিশিং কয়াদগী ‘ভারত অমা, অপুনবা ভারত’ হায়বগী ৱাখল্লোনবু মশাগী ফিজোল ওইহন্দুনা লাক্লি। সত্যা সাই বাবাসু আন্ধ্র প্রদেশকী পুত্তপর্তীদা পোকখি, অদুবু মহাকপু নীংজবা মীওইশিংদি মালেমগী তোঙান-তোঙানবা মফমদা লৈরি। ঙসিদি, সত্যা সাই বাবাগা মরী লৈনবা মফমমসুং আশ্রম কয়া লৈবাক্কী মফম খুদিংদা লৈরি। লোল খেন্নবা, চৎনবী খেন্নবা মীওই কয়া প্রশান্তি নিলয়মগা ৱাখল্লোন অমগী মখাদা অমত্তা ওইতি। মসিমক ভারতকী ইথিলনি অমসুং মসিনা ঐখোয়বু অমত্তা ওইনা পুন্সিন্দুনা থম্বীরিবনি।

মরুপশিং,

শ্রী সত্যা সাইনা হায়বীরম্মি – সেবা অনে, রেন্দু অক্সরাল-লোনে, অনন্ত-মহন শক্তি ইমিদি উন্দে। হায়বদি, সেবা হায়বসি ৱাহৈ অনিদা ফোংদোকপা য়াই। সত্যা সাই বাবাগী পুন্সি অসিমক মসিমক্কী অহিংবা খুদম্নি। শ্রী সত্যা সাই বাবাগী পুন্সিবু য়াম্না নক্না উবা ফংজবা, মহাক্কী মফমদগী তমজবা ফংবা অদুগা মহাক্কী থৌজালগী মখাদা হিংবগী তাঞ্জা ফংবসি ঐহাক্কী লাইবক ফবনি হায়না ঐহাক খঞ্জৈ। ঐহাক্না মহাকপু মতম পুম্বদা য়াম্না অখন্ননা খঞ্জৈ, মহাক্তি য়াম্না লুবা ৱাহৈবুসু য়াম্না লায়না হায়বী। ঐহাক্না মহাক্কা ৱারী শাবা খুদিংদা মহাক্না অরুবা ৱাফম কয়াবু য়াম্না লায়না অদুমক তাকপীবনি। ঐহাক অমসুং মহাক্কী ভক্তশিংদা শ্রী সত্যা সাইনা হায়বীরম্বা মন্ত্রা অমা ঐহাক্না ঙসিসি অদুম নীংশিংলি। “পুম্নমকপু নুংশিয়ু-পুম্নমক্কী সেবা তৌ”, “মতম পুম্বদা মতেং পাংউ, কৈদৌনুংদা অতোপ্পদা কায়গনু”, “য়াম্না ঙাঙগনু, থবক হেন্না তৌ”, “থেংনবা খুদিংমক পারা অমনি। মাঙজবা খুদিংমক তোংজবনি”। মসিগুম্বা পুন্সিগী পাউতাক কয়া মহাক্না ঐখোয়দা তম্বীরম্লে। মসিদা চমথোকপা অমসু য়াওই, পুন্সিবুসু য়াম্না কুপ্না নৈনৈ। গুজরাত্তা য়ুহা হাখিবা মতমদা মহাক্না ঐঙোন্দা ফোন তৌরকখিববু ঐহাক্না ঙসিসু নীংশিংলি। মহাক মশামক য়াওদুনা মাইকৈ খুদিংদগী তেংবাং লৌবীখি। সংস্থাগী মীওই লিশিং কয়ানা ভুজকী লমদমদা অহিং নুংথিল নাইদনা থবক তৌখি। মীওই খুদিংগী মতাংদা মহাক্না মশামক্কী মীওইনি খন্দুনা সেবা তৌখি। সত্যা সাইগী ওইনদি ‘মীওইবগী সেবা অসিমক ঈশ্বরগী সেবানি”। “মীপুম খুদিংদা নরায়ন লৈ”, “জিব খুদিংদা শিব লৈ” হায়না উবগী মহাক্কী মসিগুম্বা ৱাখল্লোন অসিনা মীয়াম্বু অমত্তা ওইহল্লি।   

মরুপশিং,

ভারতকুম্বা লৈবাক অসিদা ধর্ম অমসুং ধর্মগী নত্তবা লুপ খুদিংনা মতম পুম্বদা চাউখৎ থৌরাংগী কেন্দ্র ওইনা লৈবনি। ঙসিদি, লৈবাক অসিনা নিংতম্বগী চহি 75 মপুং ফারে, মথংগী চহি 25কী মিৎয়েং অমগা লোয়ননা অমৃত কালগী মাইকৈদা চঙশিল্লি। ঐখোয়না চাউখৎ থৌরাং অমসুং হেরিতেজতা অনৌবা পাঙ্গল হাপ্লি, মসিদা সত্যা সাই ত্রস্তকুম্বা লুপশিংনা অচৌবা থৌদাং য়ারি। অদোমগী স্পিরিচুএল ৱিংনা বাল বিকাসকুম্বা থৌরমগী খুত্থাংদা নৌনা হৌরক্লিবা চারোন শুরোনশিংগী মফমদা ভারতকী সংস্কৃতীগী ৱাখল্লোন হাপ্লি। সত্যা সাইন বাবানা মীওইবা সেবাগীদমক্তা হোস্পিতাল কয়া হাংদোক্লি, প্রসান্তী নলিয়মদা হাই তেক হোস্পিতাল শারে। সত্যা সাই বাবা ত্রস্তনা অফবা অমসুং মগুন লৈবা এজুকেসন পীনবগীদমক্তা অফবা স্কুল অমসুং কোলেজ কয়া শারি। লৈবাক চাউখৎ থৌরাং, খুন্নাইগী মপাঙ্গল হাপ্পগী থবকশিংদা অদোমগী লুপ্না হোৎনরিবা কয়া অসি তসেংনা থাগৎনীংঙাইনি। লৈবাক্না পায়খৎলিবা খোঙথাং খুদিংদা সত্যা সাইগা মরী লৈনবা লুপ পুম্নমক্না কত্থোকপগী ৱাখল্লোনগা লোয়ননা থবক তৌরি। লৈবাক্না ‘জল জীবন মিসন’গী খুত্থাংদা খুঙ্গং খুদিংদা অফবা থক্নবা ঈশিং পীনবা থবক তৌরি। সত্যা সাই সেন্ত্রেল ত্রস্তনসু অথাপ্পা খুঙ্গংশিংদা অশেংবা ঈশিং ফংহন্দুনা মীওইবা খুন্নাইগী মফমদা মশক থোক্লবা তেংবাং পীরি।  

মরুপশিং,

21শুবা চহি চাগী শিংনবশিং য়েংলুবা মতমদা মালেম পুম্বগী মাঙদা ক্লাইমেত চেঞ্জকী অচৌবা খুদোংচাদবা অমা লৈবা উরি। ভারতনা মালেমগী ফম্বাক্তা মিসন LiFEকুম্বা খোঙথাং পুথোক্লি। মালেম্না ভারতকী লুচিং থৌদাং অসিদা থাজবা থম্নরি। হন্দক্কী চহিগী G20গী প্রসিদেন্সীসু ভারতনা ওইরি হায়বা মীয়াম্না খঙনরে। “ৱান আর্থ, ভান ফেমিলী, ৱান ফ্যুচর”গুম্বা ভারতনা য়াম্না লুনা খঞ্জবা ৱাফম অমনা থৌরম অসিমক্কী থীমসু ওইরিবনি। মালেম্না ভারতকী মিৎয়েংদা অপেনবা ফাওনরি, মসিমক্না মালেমগী পুক্নিংসু চীংশিল্লি। মমাংগী থাগী জুন 21দা পাংথোকপা মালেমগী য়োগ নুমিত্তা য়ুনাইতেদ নেসন্সকী ময়াই লোইশঙদা ৱর্ল্দ রেকোর্দ থমখিবগী থৌওংসু মীয়াম্না উনরবনি। মালেমগী মীহুৎ মশিং খ্বাইদগী য়াম্বনা মতম অমত্তদা মফম অমত্তদা পুনমিন্নখি। য়োগনা ঙসিদি মালেমগী মীপুম খুদিংগী পুন্সিগী শরুক অমা ওইরবনি।     

মীয়াম্না ঙসিদি অয়ুর্বেদবু মশাগী পুন্সিগী শরুক ওইহন্নরি। ভারতকী সস্তেনেবল ওইবা পুন্সি মহিং তম্বগী ৱারী শারি। ঐখোয়গী সংস্কৃতী, হেরিতেজ, হৌখ্রবা মতমশিং, ঐখোয়গী চৎনবীবু শীংথানবগী মতৌ হেনগৎলক্লি। হৌখিবা চহি খরদা মালেমগী লৈবাক কয়ানা ভারত্তগী লৌখিবা মুর্তীশিং হন্দোক্নরক্লি, হায়রিবা মুর্তীশিং অসি চহি 100-100গী মমাঙদা অমসুং চহি 50 কয়াগী মমাঙদা ভারত্তগী হুরান্দুনা মীরমদা পুখিবনি। ভারতকী মসিগুম্বা থৌওং অমসুং লুচিং পুরেল অসিগী মরুমদা লৈরিবা খ্বাইদগী চাউবা পাঙ্গলদি ভারতকী সংস্কৃতীগা শাগোন্নবা ৱাখল্লোন অসিনি। মরম অদুনা, মসিগুম্বা থৌওং কয়া অসিদা সত্যা সাই ত্রস্তকুম্বা সংস্কৃতী অমসুং খুন্নাইগী ওইবা লুপশিং অসিনা অচৌবা থৌদাংসু য়ারি। অদোম্না মথংগী চহি 2 অসিদা ‘প্রেম তারু’গী মিং থোন্দুনা উ করোর 1 থাবগী পান্দম অমসু থমখ্রে। থৌওং অসিমকপু মালেম্না শীংথানবা অমা ওইহনবা হায়বসি ঐহাক্কী অপাম্বনি, অদুগা জাপানগী উমং মচা-মচা শেম্বগী মিয়াৱাকী থৌওং অসিমক পাংথোকপসু ঐহাক্না পামজৈ। ঐখোয়গী ত্রস্ত অসিনা উ থাবা খক নত্তনা লৈবাক্কী তোঙান-তোঙানবা মফমশিংদা অপীক-অপীকপা উমং শাবগী খুদম অমসু লৈবাক্কী মমাংদা উৎহন্নিংই। মসিনা অমনা অমবু হিংহনবা ঙম্বগী পাঙ্গল লৈ। পাম্বী অমবু হিংহনবগী পাঙ্গল অসি অতোপ্পা পাম্বী অমদা লৈবনি। মসিবু হৌদোকপীরম্বা হিরোজীসু মফমসিদা লৈরে, অদুনা ঐহাক্না য়াম্না হক লৈনা হিরোজীদা ৱাফম থমজবা ঙম্মি। অদুনা ঐহাক্না ঙসি মহাক্কী মফমদসু হায়খ্রবনি। অদুগা প্লাস্তিক ফ্রী ইন্দিয়াগী পান্দম অমসু ঐখোয়গী লৈরি, মসিদা মীপুম খুদিংনা শরুক য়াহন্নিংই।

সোলর ইনর্জী ক্লীন ইনর্জীগী মতাংদা মীয়ামদা পাক শন্না খঙহনবগী মথৌসু তারি। সত্যা সাই সেন্ত্রেল ত্রস্তনা আন্ধ্রগী চাউরাকপা মহৈরোই লাক্ষ 40দা শ্রী অন্ন রাগী জোৱারগী চিঞ্জাক থোংদুনা পীজরি হায়না ঐহাক্কী ইফমদা পাউদম্লে অদুগা ঐহাক্না অদোম্না থারকপা ভিদিওদসু উজরে। মসিগুম্বা খোঙথাং অসি অতোপ্পা রাজ্যদসু পাংথোক্লবদি, লৈবাক্না য়াম্না কান্নবা ফংগনি। শ্রী অন্ন অসি হকশেলদসু য়াম্না কান্নৈ, মসিগী খুদোংচাবা কয়াসু লৈ। ঐখোয়গী মসিগুম্বা থবকশিং অসিনা মালেমগী থাক্তা লৈরিবা ভারতকী থাক হেন্না ৱাংখৎহনগনি, ভারতকী শক্তাক্কী মপাঙ্গল হেন্না হাপকনি।

মরুপশিং,

সত্যা সাইনা ঐখোয় পুম্নমকপু থৌজানবীরি। মসিগী শক্তি অসিনা ঐখোয়না চাউখৎপা ভারতকী মঙলান মঙফাওনহনবা ঙমগনি, অদুগা মালেম পুম্বগী সেবা তৌবগী পান্দমসু ফংবা ঙমগনি। ঙসিদি অদোমগা শক-মায় উন্নবা ফংদ্রে, অদুবু তুংগী মতমদা ঐহাক শোইদনা লাক্কনি, হৌখ্রবা মতমগী ৱারী নীংশিংদুনা অদোমগা নুংঙাইরবা মতম লেনখিগনি। হিরোজীদি মরক-মরক্তা অদুম উন্নৈ, অদুবু ঙসি লাকপা ঙমদ্রবসু, নোংমদি ঐহাক শোইদনা লাক্কনি হায়বগী থাজবা পীজবগা লোয়ননা ঐহাক্না অদোম পুম্নমকপু অমুক্কা হন্না থাগৎচরি অমসুং য়াইফ পাউজেল পীজরি। অদোমগী মফমদা ঐহাক্না ইকোক নোঞ্জরি। সাইরাম।

***