জুন ৩০,২০২৩দা দিল্লি কেন্তদা লৈবা মনেকসো সেন্তরদা পাংথোকপা থৌরম অমদা ভারতকী খ্বাইদগী লিরবা ফুতবোল তুর্নামেন্ত দুরান্ত কপগী ১৩২শুবা ইদিসনগী “ত্রোফি তুর” চীফ ওফ আর্মি স্তাফ জেনেরেল মনোজ পান্দে, চীফ ওফ এয়র স্তাফ, এয়র চীফ মার্সেল ভি.আর চৌধুরি অমসুং ওল ইন্দিয়া ফুতবোল ফেদেরেসনগী প্রসিদেন্ত কলয়ান চৌবেনা লমথাখ্রে। তুর্নামেন্ত অসি ওগস্ত ৩ দগী সেপ্তেম্বর ৩, ২০২৩ ফাওবা কোলকাতাদা পাংথোক্লগনি। থৌরম অদুদা নহা ওইরিবা ফুতবোল পামজবশিং অমসুং শক্নাইরবা শান্ন-খোৎনবগী মীওই কয়া শরুক য়াখি।

দুরান্দ কপ অসি এসিয়াদা খ্বাইদগী লিরবা অমসুং মালেমদা অহুমশুবা খ্বাইদগী লিরবা ফুতবোল তুর্নামেন্তনি অমসুং মসিদা লৈবাক অসিগী মকোক থোংবা ক্লবশিং শরুক য়ারি। ভারত লান্মীনা শীনবা দুরান্ত কপ অসি চহি লৈবাক অসিগী ফুতবোলগী খ্বাইদগী হৈথোই-শিংথোইবা শান্নরোয়শিং পুথোকপা অমা ওইদুনা লাক্লি। কপ অসিগী অহানবা ইদিসন ১৮৮৮তা সিমলাদা আর্মি কপ হায়না হৌদোকখি অমসুং মদুদা ভারত্তা লৈবা বৃতিস ইন্দিয়ান আর্মি ত্রুপশিং খক্তা শরুক য়াখি, অদুবু অথুবা মতমদা মীচম মীয়ামগী তিমশিংশু শরুক য়াখি।

দুরান্দ কপ তুর্নামেন্ত অসি মাইপাক্লবা তিম অদুনা ত্রোফি অহুম ফংবা অখন্নবা ত্রোফি অমনি। মাইপাক্লবা তিম্না ত্রোফি অহুম হায়বদি দুরান্দ কপ (রোল্লিং ত্রোফি অমা অমসুং ওরিজিনেল প্রাইজ), সিমলা ত্রোফি (রোল্লিং ত্রোফি অমা অমসুং ১৯০৪দা সিমলাগী মীয়াম্না অহানবা ওইনা পীখিবা) অমসুং প্রসিদেন্ত কপ (লেংদনা থম্নবা অমসুং ১৯৫৬তা ভারতকী অহানবা রাস্ত্রপতি দোক্তর রাজেন্দ্র প্রাসাদনা অহানবা ওইনা পীখিবা) ফংগনি। মথং থা অমদা ত্রোফি তুরগী শরুক অমা ওইনা ত্রোফি অহুম অসি লৈবাক্কী মফম শীনবা থুংনা পুগনি অমসুং অচৌবা থৌরমগী কোলকাতাদা থুংলদ্রিঙৈ মমাংদা মরুওইবা সহরশিং সিমলা, উধামপুর, জয়পুর, মুম্বাই, পুনে, বেঙ্গালুরু, ভুবনেশ্বর, কোক্রাঝার, গুৱাহাতি অমসুং শিল্লোংদা পুগনি।

তুর্নামেন্ত অসিগী ১২৩শুবা ইদিসন্দা নেপাল, ভুতান অমসুং বাংলাদেসকী তিমশিং য়াওনা পু্ন্না তিম ২৪ শরুক য়াগনি অমসুং চহি ২৭গী মতুংদা তুর্নামেন্ত অসিদা মপান লৈবাকশিংগী তিমশিং শরুক য়ারি। তুর্নামেন্ত অসিদা তিম খুদিংমক শরুক য়াবা য়াগনি অমসুং ওল ইন্দিয়া ফুতবোল ফেদেরেসনগী লমজিং মখাদা দুরান্দ ফুতবোল  তুর্নামেন্ত সোসাইতিনা শীনবনি। মতম পুম্নমক্তা তুর্নামেন্ত অসিনা শান্নবগী লমদা মাংজিল থাবা, শান্নবগী ৱাখল্লোন অমসুং চাংদম্নবগী অৱাংবা থাক অদু খুদম ওইনা উৎলি।

****