জুন ২৬,২০২৩ দা জম্মুদা পাংথোকপা ‘ জাতিগী ঙাক-শেনগী মীফম’ অমদা ৱা ঙাংবদা রক্ষ মন্ত্রী শ্রী রাজনাথ সিংহ

হায়খি লৈবাক্কী ঙাক-শেনগী থবক ঐখোয়গী খ্বাইদগী মরুওইবনি অমসুং  লৈবাক অসিগী মমিং মখা তম্বা, অপুনবা অমসুং ঙমখৈ ঙাক্নবা সরকারনা থবক পায়খৎলি। হৌখিবা চহি ৯ অসিদা লৈবাক অসিগী ঙাক-শেনগী থবকশিংদা অচৌবা অহোংবা অমা পুরকপা ভারতনা উবা ফংলে। ২০১৩-১৪ দা  ভারতকী শক্তম অসি অশোনবা লৈবাক অমা ওইনা উখি অমসুং মসিনা মরম ওইদুনা য়েক্নবশিং খুদোংচাদবা কয়া থোকহনখি, অদুবু ঙসিদি লৈবাক অসিনা শিংনবা খুদিংমক থেংনবা ঙম্বগী থৌনা লৈরে।

লৈবাক্কী ঙাক-শেনগী থৌরাং তৌরিবশিং শন্দোক্না ফোঙদোক্লদুনা রক্ষ মন্ত্রীনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা, লৈবাক অসিদা শিংনরকপশিং থেংননবা পান্দম মরিদা থবক তৌরি;  লৈবাক ঙাক্নবা থবক খুদিংমক পাংথোকপা; চাউখৎপা ঙম্নবা লৈবাক মনুংদা অশোই-অঙাম থোকহন্দনবা ফিবমশিং লৈহনবা; মীয়ামগী পুন্সি মহিং ফগৎহনবা অমসুং মখোয়গী অনিংবশিং থুংহনবা অমসুং তেরোরিজম য়াওনা মালেমগী শিংনরকপশিং অমতা ওইনা থেংন্নবা মরুপ-মপাং ওইরিবা লৈবাকশিংগী ফিবম অমা শেমগৎপা।

শ্রী রাজনাথ সিংহনা হায়খি লান্মীদা খ্বাইদগী নৌবা খুৎলায় অমসুং মতমগী অনৌবা তেক্নোলোজি ফংহন্নবা পায়খৎপা য়াবা থবকশিং পায়খৎলি। আর্মদ ফোর্সশিংনা ঙমখৈশিং অমসুং সমুদ্রশিং ঙাকথোকপা ঙম্লে। ঐখোয়গী পান্দমদি ঐখোয়গী আর্মদ ফোর্সশিং মতমগী অনৌবা মিলিতরিশিংগী মাংজিল থাহনবনি।

শ্রী রাজনাথ সিংহনা মখা তানা হায়খি মতম কয়াগী মমাঙদগী, ঙমখৈ লান্না তেরোরিজমগী থবকশিংগী খুৎথাংদা লৈবাক অসিদা শান্তি অমসুং নুংশিনবা লৈহন্দনবা পাকিস্তান্না হোৎনদুনা লাক্লি। অদুবু ঐখোয়না সরকার পায়রকপদগী, ঐখোয়না তেরোরিজমগী মায়োক্তা অকনবা থবক পায়খৎলে। ‘তেরোরিজমগী মায়োক্তা খাংদুনা লৈথোক্তবা’ হায়বগী ৱাহন্থোক অদু ঐখোয়না মালেমদা উৎলে। ভারতকী ‘তেরোরিজমগী মায়োক্তা খাংদুনা লৈথোক্তবা’ অমসুং আর্মদ ফোর্সশিংগী লাম্বা লৈতবা থৌনা অদু উরি অমসুং পুলৱামাগী থৌদোকশিংনা খুদম অমা ওইরে। প্রধান মন্ত্রীনা য়ু.এস.এগী রাস্ত্রপতি জো বাইদেন উরনবা মতুংদা থোকখিবা অপুনবা ৱারোল অদুনা তেরোরিজমগী মতাংদা লৈরিবা ভারতকী ৱাখল্লোন অদু কয়া য়াম্না হোংলবগে হায়বা মালেমদা উৎপা অমনি।

শ্রী রাজনাথ সিংহনা মখা তানা হায়খি অকনবা থবকশিং পায়খৎপদগী হৌখিবা চহি খর অসিদা জম্মু অমসুং কাস্মিরদা তেরোরিজমগী নেতৱার্ক য়াম্না শোন্থরে। তেরোরিজমগী থবকশিংদা শেন থাদবা লাকশিল্লে। তেরোরিস্তশিংদা খুৎলায়শিং অমসুং দ্রগশিং ফংহনবা থিংলে। তেরোরিস্তশিং হাৎপগা লোয়ননা, অন্দর গ্রাউন্দ ৱার্করশিংগী নেতৱার্ক থদৎনবা থবকশিং পায়খৎলে।

জম্মু অমসুং কাস্মিরদগী আর্তিকল ৩৭০ লৌথোকপগী মতাংদা শ্রী রাজনাথনা হায়খি ৱারেপ অসিনা য়ুনিয়ন তেরিতোরি অসিগী মীয়ামগা লৈবাক অসিগা শম্নহল্লে অমসুং শান্তি অমসুং চাউখৎপগী অনৌবা যুগ অমা চঙশিনবদা মখোয়গী মতেং পাংলে।

পি.ও.কেগী মতাংদা শ্রী রাজনাথ সিংহনা হায়খি মফম অদুদা পাকিস্তানগী হক লৈতে, মফম অদু মখোয়না আইন্না য়াদনা লৌশিনখিবনি। পি.ও.কে অসি ভারতকী শরুক অমনি হায়না ভারত সংবিধান্না য়ামদ্রবদা ৱারেপ অহুম লৌখ্রে।

শ্রী রাজনাথ সিংহনা হায়খি চাইনাগা ঙমখৈগী মতাংদা লৈরিবা ৱাথোক অসি মীৎয়েং খেন্নবগী মতাং অমনি, অদুবু এগ্রিমেন্তশিং অমসুং প্রোতোগোলশিংদা য়ুম্ফম ওইরগা লৈবাক অনিমক্কী লান্মীশিংনা পেত্রোল্লিং পাংথোক্লি। ২০২০ দা ইস্ত লাদাখতা মুক্নবা থোকখিবা অদু চাইনাগী লান্মীনা য়ানখিবা ৱাফমশিং থওইদবা অমসুং এল.এ.সিগী ফিবম হোংদোক্নবা হোৎনরকপদগী থোকখিবনি। হান্নগী লৈরিবা ফিবম হোংদোক্নবা পি.এল.এনা হোৎনরকপদা ঙাকথোকখিবা ভারত লান্মীগী কৎথোকপা অমসুং থৌনা অদু মহাক্না থাগৎখি।

শ্রী রাজনাথ সিংহনা হায়খি ঙমখৈগী ৱাথোকশিং ৱারি শানদুনা অমসুং শান্তি ওইবা মওংদা ৱারোইশিন পুরক্নবা সরকারনা লেপ্লি। য়ানদবশিং ৱারোইশিন পুরক্নবা মিলিতরি অমসুং দিপ্লোমেতিক্কী থাক্তা মখা তানা ৱারি শানরি। ভারতকী ঙমখে, লৈবাক অসিগী ইকায়খুম্নবা অমসুং মশানা মশাবু ইকায়খুম্নবদা সরকারনা কৈদৌঙৈদা শন্তাইনবা পুরক্লোই। সরকারনা কৈদৌঙৈদা ঐখোয়গী ঙমখৈশিংগী অশেংবা শক্তম মাংহল্লোই।

লৈবাক্কী ঙাক-শেন হেনগৎনবা, ঙমখৈগী মচাক-মথুমশিং মপাঙ্গল কনখৎহন্নবা অমসুং ঙাক-শেনগী লমদা অত্মানির্ভরতা ফংহনবা সরকারনা পায়খৎলিবা থবকশিংগী মতাংদা রক্ষ মন্ত্রীনা হায়খি শেনবা চহি ২০২৩-২৪দা ঙাক-শেনগী খুৎলায়শিং লৈবগী অপুনবা শেনফমগী চাদা ৭৫ লৈবাক মনুংগী ইন্দস্ত্রিদগী লৈনবা খাক্তুনা থম্লে। মপান লৈবাকশিংদগী লৈবা খুৎলায়শিংগী মখা পোনবা ভারতনা পামদে। দিফেন্স মেনুফেকচরিংদা ইশাগী ওক্নবা পুথোকপা ঙম্লবা মতম খক্তা ঐখোয়গী লৈবাক্কী ঙাক-শেন মপাঙ্গল কনখৎকনি। ঐখোয়গী পান্দমদি ‘মেক ইন ইন্দিয়া,  মেক ফোর ৱার্ল্দ’ নি। ঐখোয়গী থবকশিংগী মহৈ চাবা হৌরে। ঙসি ঐখোয়না তেঙ্কশিং, এয়রক্রাফ কেরিয়রশিং, সবমেরিনশিং অমসুং তোঙান-তোঙানবা খুৎলায়শিং শারে। ২০১৪গী মমাঙদা ঙাকশেনগী খুৎলায় মপান্দা থাদোকপা লুপা করোর ৯০০ ওইরম্বা অদু হৌজিক লুপা করোর ১৬,০০০ হেল্লে। অথুবা মতমদা মপান্দা থাদোকপা লুপা করোর ২০,০০০ য়ৌরগনি।

শ্রী রাজনাথ সিংহনা হায়খি চীফ ওফ দিফেন্স স্তাফ হাপ্পা অমসুং মিলিতরি  এফেয়ার্স দিপার্তমেন্ত লিংখৎপা য়াওনা সরকারনা অওনবা কয়া পুরক্লে। মখা তানা সরকার মাঙলোমদা চঙশিল্লি অমসুং অতোপ্পা অওনবা অমা ওইনা, থিয়েতর কমান্দ লিংখৎনবা থবক পায়খৎলে।

রক্ষ মন্ত্রীনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা মালেমগী থাক্তা ভারকী শক্তম অওনবা পুরক্লে। মালেমগী থাক্তা প্রধান মন্ত্রীগী থবক তৌবা ঙম্বনা মরম ওইদুনা ঙসিদি মালেমগী লুপশিংনা ভারতকী ৱাফমশিংনা নিংথিনা তারে। হৌজিক্কী মালেম অসিদা ভারতকী ঙাক-শেনগী দরকার ওইবশিং ফংনবা মালেমগী অচৌবা লৈবাকশিং হায়বদি য়ু.এস অমসুং রুসিয়াগা পুন্না চৎমিন্নবা য়াম্না মরুওই। ভারত অমসুং য়ু.এস মহৌশাগী লৈরক্লবা মরুপনি অমসুং লৈবাক অনিগী অচেৎপা মরী অসি হেন্না কনশিল্লে।

রক্ষ মন্ত্রীনা হায়খি লান্মীগা লান্মীগা থবক তৌমিন্নবা হেনগৎতুনা, আর্তিফিসিএল ইন্তিলিজেন্স, সাইবর সেকুরিতি অমসুং স্পেসকী লমদা মতেং পীনদুনা অমসুং ই-পাউ শরুক পীনদুনা ভারত অমসুং য়ু.এস ঙাক-শেনগী মতেং পীনবা হেনগৎলক্লে। প্রধান মন্ত্রীগী হন্দক্কী য়ু.এস খোঙচৎ অসি শিংথানিঙাই ওইবা থৌদোক অমনি অমসুং মসিনা লৈবাক অনিগী ঙাক-শেনগী মতেং পীনবা অনৌবা তাঙ্কক অমদা খোঙ থাংজিল্লে।

শ্রী রাজনাথ সিংহনা হায়খি মালেমগী শিংনরকপশিং অমসুং খুদোংচাদবশিং অপুনবা ওইনা থেংনমিন্নবা মথৌ তাই। মরম অদুনা ঐখোয়গী ঙাক-শেনগী থবকশিং ঐখোয়গা মরুপ-মপাং ওইরিবা লৈবাকশিংগা পায়খৎমিন্নবা দরকার ওই। জেনেরেল ইলেক্ত্রিক( জি ই) এরোস্পেস- হিন্দুস্থান এরোনাউতিক্স লিমিতেদ য়াদুনা ভারত্তা এফ-৪১৪ ফাইত্তর জেৎ ইঞ্জিনশিং পুথোক্লগনি। য়ানবা অসিনা, ঐখোয় লৈবাক অসি জেৎ ইঞ্জিন শাবা মরিশুবা লৈবাক ওইরগনি। ভারত্তা শাবা ইঞ্জিনশিং অসি তেজাস এয়রক্রাফশিংদা পাল্লগনি।

য়ু.এসতগী এম.ক্বিউ-৯বি দ্রোনশিং লৈবগী মমল অমসুং অতোপ্পা ৱাফমশিংগী মতাংদা ফোঙনরিবা পাউশিং য়ানিংদবা ফোঙদোক্লদুনা রক্ষ মন্ত্রীনা হায়খি দ্রোনশিং লৈবগী মমল অসি জেনেরেল এতোমিক্স( জি এ)না অতোপ্পা লৈবাকশিংদা পীরিবা মমল অদুগা চাংদম্নগদবনি। য়ানরবা পোৎ-চৈ লৈবগী চৎন-কাংলোনশিং ঙাক্লবা মতুংদা লৈবগী থবক পাংথোক্কনি।

****