য়োর এক্সিলেন্সী, রাস্ত্রপতি বাইদেন; লৈবাক অনিমক্কী দেলিগেৎশিং; মীদিয়াগী মরুপশিং!

খুরুমজরি!

অহানবদা ঐহাক্না রাস্ত্রপতি বাইদেনবু ভারত-য়ু.এস.কী মরীশিংদা থমখিবা মহাক্কী মমল য়াম্লবা ৱাহৈশিং অমসুং পুক্নিং থৌগৎনীংঙাই ওইবা ৱাখল্লোনশিং অদুগীদমক থাগৎচরি।

মরুপশিং,

নুমিৎ অসি ভারত-য়ু.এস.কী মরীশিংগী পুৱারীদা অখন্ননা মরু ওইহৌরগনি। ঙসি ঐখোয়না খন্ন-নৈনখিবশিং, অমসুং লৌখিবা ৱারেপশিং অসিনা ঐখোয়গী কমপ্রিহেন্সিব গ্লোবেল স্ত্রেতেজিক পার্তনরশিপকী অনৌবা পন্দুপ অমা ওইরগনি অমসুং অনৌবা মাইকৈ অমসুং অনৌবা ইথিল অমা পীরগনি।

মরুপশিং,

ভারত-য়ু.এস.কী ত্রেদ অমসুং ইনভেস্তমেন্ত পার্তনরশিপ অসি লৈবাক অনিগীদমক মরু ওইবা খক্তা নত্তনা মালেমগী ইকনোমীগীদমক্তসু মরু ওই। ঙসি অমেরিকা অসি ভারতকী খ্বাইদগী চাউবা ত্রেদ পার্তনর ওইরি। ঐখোয়না ত্রেদকা মরী লৈনবা পন্দুনা লৈরিবা সমস্যাশিং লোইশিন্নবা অমসুং নৌবা হৌনবা ৱারেপ লৌখি। আই.সি.ই.তি. হায়বদি ইনিসিএতিব ফোর ক্রিতিকেল এন্দ ইমর্জিং তেক্নোলোজীজ অসি ঐখোয়গী তেক্নিকেল কোওপরেসনগীদমক মরু ওইবা ফ্রেমৱার্ক অমা ওইরকখি। আর্তিফিসিএল ইন্তেলিজেন্স, সেমিকন্দক্তরশিং, স্পেস, ক্বান্তম, অমসুং তেলিকোমগুম্বা লমশিংদা ঐখোয়না তেংবাং পীনবা হেনগৎহন্দুনা ঐখোয়না মপাঙ্গল কনবা অমসুং তুংদা কান্নগদবা পার্তনরশিপ অমা শেমগৎলি। মাইক্রোন, গুগল অমসুং এপ্লাইদ মেতরিএল্সগুম্বা অমেরিকাগী কম্পনীশিংনা ভারত্তা ইনভেস্ত তৌনবা লৌখিবা ৱারেপ অসি মসিগী তুংদা কান্নগদবা পার্তনরশিপ অসিগী খুদম অমনি।

খোঙচৎ অসিদা ঐহাক্না য়ু.এস.তগী অতোপ্পা সি.ই.ও. খরা উনবগী খুদোংচাবসু ফংখি। মখোয়গা লোয়ননা ঐহাক্না ৱারী-ৱাতাই শাবদা মখোয়না থৱায় য়াওবা অমসুং ভারতকীদমক ফাওরিবা পোজিতিব ওইবা ৱাখল্লোন অদু ঐহাক্না উবা ফংখি। ঐখোয়গী স্ত্রেতেজিক তেক্নোলোজী পার্তনরশিপ অসি মহৈ য়ানবা ওইনবগীদমক সরকারশিং, বিজিনেসশিং অমসুং একাদেমিক ইন্সতিত্যুসনশিং পুনশিনবা অসি য়াম্না মরু ওই হায়না ঐখোয় অনিমক্না য়ান্নখি। ঐখোয়না ভারত অমসুং অমেরিকাগী ক্লীন ইনর্জী ত্রাঞ্জিসনগী অপুনবা বিজন ইমপ্লিমেন্ত তৌনবা মরু ওইবা থৌশিল কয়ামরুম পাইখৎখি। মসিদা গ্রীন হাইদ্রোজেন, ৱিন্দ ইনর্জী, বেত্তরী স্তোরেজ অমসুং কার্বোন কেপচরগুম্বা লমশিং য়াওখি।

মালেমগী তম্বা ঙমদ্রবা ফীভমশংগী চৈরক্তা ভারত অমসুং য়ু.এস.না থাজবা থম্নরিবা খোঙলোইশিং ওইনা থাজবা য়াবা, শাফবা অমসুং মপাঙ্গল কনবা সপ্লাই চেনশিং অমসুং ভেল্যু চেনশিং শেম্নবা ৱারেপসু লৌখি। ভারত অমসুং য়ুনাইতেদ স্তেৎসকী মরক্তা লৈরিবা অচেৎপা দিফেন্স কোওপরেসন অসিনা ঐখোয়না অমনা অমবু থাজবা অমসুং অপুনবা স্ত্রেতেজিক প্রাইওরিতীশিংগী খুদম অমা ওইরি। অরিবা মতমগী বায়র-সেল্লর মরীশিং তুংওইনরম্লগা ঙসি ঐখোয়না ত্রান্সফর ওফ তেক্নোলোজী, কো-দিবেলপমেন্ত অমসুং কো-প্রদক্সনগী মাইকৈদা চংশিনখি। জেনরেল ইলেক্ত্রিক্না ভারত্তা তেক্নোলোজী ত্রান্সফরগী খুত্থাংদা ইঞ্জিনশিং মেন্যুফেকচর তৌনবা ৱারেপ অসি মরু ওইবা এগ্রীমেন্ত অমনি। মসিনা লৈবাক অনিমক্তা অনৌবা থবক্কী খুদোংচাবশিংসু পীরগনি। মসিনা তুংদা লাক্কদবা মতমশিংদা ঐখোয়গী দিফেন্স কোওপরেসন্দা অনৌবা মশক অমা পীবা ঙম্লগনি। লৈবাক অনিমক্কী দিফেন্স ইন্দস্ত্রীশিং অমসুং স্তার্ত-অপ অনিমক অসি কোওপরেসন অসিগী মরু ওইবা খোঙলোইশিংনি। মখোয়বু অমত্তা ওইনা পুনশিনবা অসি ঐখোয়গী দিফেন্স ইন্দস্ত্রিএল রোদমেপকী মপুং ওইবা পান্দমনি। ঐখোয়না স্পেস সাইন্স অমসুং তেক্নোলোজীদা অচেৎপা অমসুং চহি কয়া শুরবা মরী থম্মি। ঙসি ঐখোয়না “আর্তিমিস একোর্দস” চংনবা ৱারেপ লৌবদা ঐখোয়গী স্পেস কোওপরেসন্দা চাউনা খুমাং চাউশিনখি। শম্না হায়রবদা ভারত-য়ু.এস.কী পার্তনরশিপ অসিগী ওইনা পনখৈ লৈত্রে।

মরুপশিং,

ঐখোয়গী মরীশিংগী খ্বাইদগী মরু ওইবা য়ুম্বী অসি ঐখোয়গী পীপল-তু-পীপল তাইজনা ওইরি। ঙসি অমেরিকা চাউখৎহনবদা ইন্দিয়ন ওরিজিন ওইবা মীওই লাখ ৪০ হেনবনা চাউনা শরুক তমখি। ঙসি অয়ুক হ্বাইৎ হাউসতা য়াম্লবা ভারত মচা য়াওখিবা অদুনা ঐখোয়গী মরী অসিগী দ্রাইবিং ফোর্স অসি ইন্দিয়ন অমেরিকনশিংনা ওই হায়বগী খুদম ওইখি। মরীশিং অসি হেন্না চেৎশিনহন্নবা বেঙ্গলুরু অমসুং অহমদাবাদতা কন্সুলেৎশিং হাংনবা য়ু.এস.কী ৱারেপ অদুবু ঐখোয়না তরাম্না ওকই। মতৌ অসুম্না সীএতলদসু ভারতকী অনৌবা কন্সুলেৎ অমা হাংলগনি।

মরুপশিং,

ঙসিগী মীফমদা ঐখোয়না রিজনেল অমসুং গ্লোবেলগী ওইবা সমস্যা কয়ামরুম খন্নখি। ইন্দো-পেসিফিক্তা শান্তি লৈহনবা অমসুং শাফনা থম্বা হায়বা অসি ঐখোয়গী খ্বাইদগী মরু ওইবনি। ঐখোয়না রিজন অসিগী চাউখৎপা অমসুং মাইপাকপা হায়বা অসি মালেম পুম্বগীদমক মরু ওই হায়না য়ান্নখি। ক্বাদ পার্তনরশিংগা পুন্না ঐখোয়না রিজন অসিদা লৈরিবা লৈবাক পুম্বগা লোয়ননা খুৎশম্নবা হেনগৎহন্নবা ঐখোয়গী অপুনবা ৱাখল্লোন ফোঙদোকখি। ঐখোয়না ক্রোস-বোর্দর তেরোরিজম লোইশিন্নবা অকনবা খোঙথাং লৌখৎপা মথৌ তাই হায়না য়ান্নখি। গ্লোবেল সাউথতা লৈরিবা লৈবাকশিং অসু মরু ওইনা কোবিদ লাইচৎ অমসুং য়ুক্রেনগী লান্না চাউনা শাফু পীখি। ঐখোয়না সমস্যাশিং অসি কোকহন্নবা লৈবাক পুম্নমক্না অমত্তা ওইনা পুনশিনবা তঙাই ফদে হায়বা ৱাখল্লোন থমখি। য়ুক্রেন্দা ওইরক্লিবা ফীভম অসি হেক হৌরকপদগী হৌনা ভারতনা দাইলোগ অমসুং দিপ্লোমেসীগী লম্বীদা চংশিন্দুনা লান অসি লোইশিন্নবা ফোঙদোক্তুনা লাকখি। শান্তি পুরক্নবা হোৎনবদা ঐখোয়না অঙম্বা শরুক তম্নবা মপুং ফানা শেম-শাদুনা লৈ। ভারতকী জি২০ প্রসিদেন্সীগী মখাদা ঐখোয়না ‘ৱান আর্থ, ৱান ফেমিলী, ৱান ফ্যুচর’দা মীৎয়েং চংলি অমসুং গ্লোবেল সাউথকী মরু ওইবশিং খঙহন্নবা হোৎনরি। অফ্রিকন য়ুনিয়নবু জি২০গী ফুল মেম্বর ওইনবা ঐহাক্কী প্রপোজেলবু রাস্ত্রপতি বাইদেন্না শৌগৎপীরকপদা ঐহাক্না থাগৎপা ফোঙদোকচরি।

মরুপশিং,

ঐখোয়গী অচৌবা খোঙথাংশিংগী মপুং ওইবা মন্ত্র অসি দেমোক্রেসী অমসুং দেমোক্রেতিক ভেল্যুশিং অমদি সিস্তেমশিং মপাঙ্গল কনখৎহনবনি। মালেমগী খ্বাইদগী চাউবা দেমোক্রেসী অনি – ভারত অমসুং অমেরিকা – অসিনা মালেমদা শান্তি, তংদু-লৈতানা অমসুং চাউখৎপা পুরকপদা পুন্না শরুক তম্বা ঙমগনি। ভেল্যুশিং অসিদা য়ুম্ফম ওইরগা ঐখোয়না লৈবাক অনিগী মীয়াম খক্তা নত্তনা মালেম পুম্বগী অনীংবা-অপাম্বশিং থুংহনবা ঙমগনি।

রাস্ত্রপতি বাইদেন,

ঙসিগী মহৈ য়াল্লবা খন্ন-নৈনবশিং অসিগীদমক অদোমবু ঐহাক্না থমোয় শেংনা থাগৎপা ফোঙদোকচরি। ঐহাক্না হকথেংননা অমদি ভারত মীয়াম্না চহি অসিগী জি২০ সম্মিৎতা অদোমবু তরাম্না ওকনবা ভারত পুম্বনা খৌরাংনা ঙাইরি। অমসুং রাস্ত্রপতিনা হায়বীখিবগী মতুং ইন্না ঐহাক্না মখা তারকপা ওইনা কোংগ্রেস্তা চৎতুনা ৱা ঙাংগনি মরম অসিনা ঐহাক্না মতম শাংনা লৌবা তৌদনা ঐহাক্কী ৱারোল অসি মতাং অসিদা লোইশিনজরি। অমুক হন্না ঐহাক্না রাস্ত্রপতিবু থাগৎপা ফোঙদোকচরি।

***