ভারতকী রাস্ত্রপতি, শ্রীমতি দ্রৌপদি মুর্মুনা ঙসি (জুন 17, 2023) হাইদ্রবাদকী দুন্দিগলদা লৈবা এয়র ফোর্স একাদমীদা কম্বাইন্দ গ্রেজুএসন পেরেদ য়েংশিনখ্রে।  

রাস্ত্রপতিনা কেদেতশিংদা ৱাঙাঙবদা মখোয়গী কেরিয়র অসি শিংনবনা থল্লবা, নিংথীনা মনা ফংবা অমসুং ইকায় খুম্ননিংঙাই ওইবনি হায়খ্রে। মখোয়গী মমাংদা ইন্দিয়ন এয়র ফোর্সকীদমক্তা মথৌদাং পাংথোক্লম্বশিংগী চৎনবী মখোয়না ঙাক্কদবনি। ইন্দিয়ন এয়র ফোর্সকী য়াম্না ইথিল পীনিংঙাই ওইবা মোত্তো লৈ, মদুদি “তচ দি স্কাই ৱিথ গ্লোরী”, “নভ স্প্রিশম দীপ্তম” হায়বসিনি হায়না মহাক্না মখা তাখি। কেদেতশিংনা মোত্তো অসিগী ইথিল ইনগনি অমসুং লৈবাক্না মখোয়গী মফমদা থম্লিবা থাজবা পুম্নমক ঙাক্কনি হায়বগী থাজবা লৈ হায়না মহাক্না ফোংদোকখি।  

লৈবাক অসিনা য়ুম্লোন্নবা লৈবাক্কী মাইয়োক্তগী লৈবাক ঙাক্নবগীদমক্তা ইং 1948, 1965 অমসুং 1971দা শোক্নখিবা লানশিংদা ইন্দিয়ন এয়র ফোর্সকী থৌনা লৈরবা লান্মীশিংনা লৌখিবা থৌদাং পুম্নমক সনাগী ময়েক্তা হক্তুনা ঙসিসু পুৱারীনা নিংশিংলি হায়না রাস্ত্রপতিনা হায়খি। মসিগুম্বা চপ মান্নবা মথৌ খঙবা অমসুং হৈথোই শিংথোইবগী মতৌবু কার্গিলদা অমুক হন্না উৎখি অমসুং বালাকোত্তা লৈবা লালহৌবশিংগী লোৎফমসু মতুং তারকপা মতমদা পাক শন্না থুগায়খি। ইন্দিয়ন এয়র ফোর্সনা মতৌ অসুম্না প্রোফেস্নেলিজম, ৱাখল চেৎপা অমসুং ইশাবু লৈবাক্কীদমক্তা কত্থোকপগী তুং কোইনা নিংশিংদুনা লৈনহৌরগদবা মিংচৎ অমা তানশিল্লবনি।

IAF না মীওইবা খুন্নাইবু তেংবাংবা অমসুং অৱা-অনা তাবা মতমদা তেংবাংবগী থৌদাং কয়াসু পাংথোকই হায়না রাস্ত্রপতিনা হায়খি। হন্দক্তসু, IAF না তর্কী অমসুং সিরিয়াদা য়ুহা হাখিবগী থৌদোক্তা মেদিকেল তেংবাং অমসুং দিজাজতর রিলিফকীদমক্তা অইং-অশাগী খুদোংচাদবা কয়া মাইয়োক্নদুনা তেংবাংখি। মসিগী মমাংদা, খুদোংথীবা অমসুং য়েক্নবনা থনবা মফমদা এরোপ্লেন পায়দুনা কাবুলদা পন্দুনা লৈখ্রবা ভারত মচা 600 অমসুং অতোপ্পা লৈবাক্কী মীয়াম কয়াবু মায় পাক্না অমসুং তেক্ত কায়দবা পুথোকখিবা থৌওংনা ইন্দিয়ন এয়র ফোর্সকী তৌবা ঙম্বগী মতিক্কী খুদম অমসু ওইরি।  

কংফাল, সমুদ্র অমসুং নোংথক্তা দিফেন্সকী লমদা নিংথীনা শেম শাদুনা লৈনবগীদমক্তা তেক্নোলোজী নিংথীনা শিজিন্নবা ঙম্বগী মতিক লৈবা হায়বসি য়াম্না তঙাই ফদবা অমা ওইরি হায়না রাস্ত্রপতিনা হায়খি। আর্ম্দ ফোর্সকী ওফিসর খুদিংমক্না দিফেন্সকীদমক্তা শেম শাদুনা লৈবগী অপুনবা মিৎয়েং অসি মতম পুম্বদা খঙনা লৈগদবনি হায়না মহাক্না হায়খি। নেতৱর্ক্তা য়ুম্ফম ওইদুনা তুংগী মতমদা স্পেস্তা থেংনরক্কদৌরিবা লানফমগুম্বা শিংনবা কয়া য়াওনা সেক্যুরিতীগী হীরম কয়াদা ফ্যুচর রেদী ওইনবগীদমক্তা ইন্দিয়ন এয়র ফোর্সনা শেম শাদুনা লৈনবা খোঙ্কাপ কয়া পায়খৎপা অসিদা মহাক্না নুংঙাইবা ফোংদোকখি।

রাস্ত্রপতিগী ৱারোল পানবগীদমক্তা মফমসিদা নম্বীয়ু

***