جمہوریہ اروگوے کی پارلیمنٹ کے ایوان نمائندگان (ایوان زیریں) کے صدر کی دعوت پر، پارلیمانی امور، کوئلہ اور کانوں کے وزیر جناب پرہلاد جوشی نے 14-17 جون 2023 تک 10 رکنی پارلیمانی خیر سگالی وفد کی قیادت کی۔اس دورے کا مقصد  دو نوں جمہوریتوں کے درمیان دوطرفہ تعلقات کو مضبوط اور گہرا کرنا ہے ۔

کثیر جماعتی وفد میں دونوں ایوانوں کے کل نو ارکان پارلیمنٹ شامل تھے۔اس وفد  میں جناب سنجے سیٹھ،محترمہ  گومتی سائی، جناب ہیمنت پاٹل، جناب سی این انادورائی، ڈاکٹر گرومورتی مڈیلا اور محترمہ چندرانی مرمو سمیت چھ  لوک سبھا  رکن پارلیمنٹ  کے ساتھ ساتھ راجیہ سبھا سے محترمہ اندو بالا گوسوامی، جناب دنیش چندر اووادیہ اور جناب نیرج ڈانگی شامل تھے۔ اس میں پارلیمانی امور کی وزارت کے سکریٹری جناب جی سرینواس بھی شامل تھے۔ 14 جون کو ارجنٹائن اورارگوے میں ہندوستان کے سفیر جناب دنیش بھاٹیہ نے وفد کا استقبال کیا  اور وفد کواروگوے  اور ہندوستان کے دو طرفہ تعلقات کی بڑھتی ہوئی اہمیت کے بارے میں آگاہ کیا۔

ہندوستان سے اس سے قبل اس وقت کے لوک سبھا اسپیکرکی قیادت میں 2012 میں  پارلیمانی وفد اروگوے کا دورہ کیا تھا۔ یہ دورہ مارچ 2023 میں نئی دہلی میں منعقدہ دونوں ممالک کے درمیان دفتر خارجہ کی مشاورت کے نتیجے میں انجام پذیر ہوا تھا ۔

اس دورے کا باضابطہ آغاز 15 جون کو وزیر موصوف  کے ساتھ ، وفد کے ارکان کے ہمراہ، دارالحکومت مونٹیویڈیو میں بابائے قوم مہاتما گاندھی کے مجسمے پر گلہائے عقیدت پیش کرنے سے ہوا تھا۔ دار الحکومت مجسمہ کے پاس ساحلی سڑک کے اس حصے  رمبالا کو  مہاتما گاندھی کے نام سے جانا جاتا ہے۔

وفد کا استقبال 15 جون کو ایوان نمائندگان کے صدر مسٹر سیباسٹین ایندوجر نے کیا۔ وفد کی سطح پر بات چیت  میں اروگوے کی پارلیمنٹ کے دونوں ایوانوں کے ممبران نے بھی شرکت کی۔ جناب پرہلاد جوشی اور مسٹر ایندوجار نے  اروگوے کی پارلیمنٹ میں'ہند – اروگوے پارلیمانی  دوستی گروپ' کا آغاز کیا۔ بات چیت کے دوران خاص طور پر  پارلیمانی سفارت کاری کے ذریعہ دوطرفہ تعلقات مزید گہرا کرنے پر توجہ مرکوز کی گئی۔

مرکزی وزیر جناب جوشی نے مسٹر ایندوجار کو ایک پارلیمانی وفد کے ساتھ ہندوستان آنے کی دعوت دی جسے انہوں نے قبول کر لیا۔ اس بات پر اتفاق کیا گیا کہ اروگوے کے اراکین پارلیمنٹ  کے ذریعہ ہندوستان کا دورہ 2023 کے اختتام سے پہلے  ہوگا، جس کی تاریخوں کو سفارتی ذرائع سے حتمی شکل دی جائے گی۔

وفد اور سفیر بھاٹیہ کے ہمراہ وزیر موصوف نے  اروگوے کے نائب صدر اور سینیٹ (ایوان بالا) کی صدر محترمہ بیٹریز ارگیمون سے بھی ملاقات کی، جو اس عہدے پر منتخب ہونے والی پہلی خاتون ہیں۔ اروگوے کے صدر لوئس لیکلے پو کے غیر ملکی دورے کے باعث وہ جمہوریہ  اروگوے کی قائم مقام صدر بھی ہیں۔ وفد کا خیرمقدم کرتے ہوئے، انہوں نے چند سال قبل ہندوستان کے اپنے نتیجہ خیز اور یادگار دورے کو یاد کیا۔ انہوں نے دو متحرک جمہوریتوں کے درمیان تعلقات کو وسعت دینے کی ضرورت پر زور دیا۔

دونوں اجلاس میں، مرکزی وزیر جناب پرہلاد جوشی نے خاص طور پر وزیر اعظم جناب نریندر مودی کی قیادت میں حکومت ہند کےذریعہ اٹھائے گئے  مختلف پالیسی اقدامات  کی وجہ سے ہندوستان کی تیز رفتار سماجی و اقتصادی ترقی  پر روشنی ڈالی ۔

وفد نےاروگوے میں مقیم ہندوستانیوں کی  ایک انجمن ' اروگوے کا ہندوستانی ثقافتی ادارہ' کے زیر اہتمام یوگا کے عالمی دن کی تقریبات میں شرکت کی۔ اروگوے کے ایک مقامی یوگا ٹیچر کی رہنمائی میں مراقبہ کے سیشن کے علاوہ، تقریبات میں اروگوے کے ایک مقامی فنکار کی جانب سے کلاسیکی اوڈیسی رقص کی پیش کش بھی دیکھی گئی۔ مختلف ہندوستانی یوگا اور روحانی اداروں کے ہزاروں پیروکاروں کے ساتھ اروگوے میں ہندوستانی ثقافت، فلسفہ، روحانیت، یوگا اور مراقبہ کی وسیع پیمانے پر ستائش کی جاتی ہے۔

وزیر موصوف اور وفد کو  مونٹیویڈیو میں ہندوستانی برادری اور ہندوستان کے بہی خواہوں سے بات چیت کرنے کا موقع  بھی ملا۔ اروگوے میں تقریباً 800 سے زیادہ ہندوستانی رہتے ہیں۔

اروگوے XXI ، اروگوے کی حکومت کے تحت برآمدات، سرمایہ کاری اور ملک کی شبیہ کو فروغ دینے کے لیے ذمہ دار ہے، نے 16 جون کو دو طرفہ تجارت، سرمایہ کاری اور اقتصادی تعلقات کو فروغ دینے کے مقصد سے پورے وفد کو ایک پریزنٹیشن دی۔ وفد نے اروگوے میں ٹاٹا کنسلٹنسی سروسز (ٹی سی ایس)کے دفتر کا بھی دورہ کیا، جس نے 2022 میں اپنے کام کے 20 سال مکمل کر لیے۔ آج ٹی سی ایس اروگوے  میں افرادی قوت کا سب سے بڑا نجی شعبے کا آجر ہے۔

ایک طرف، ہندوستان اوراروگوے نے 2020 میں سفارتی تعلقات کے 60 سال کا جشن منایا اور دوسری طرف، دو طرفہ تجارت میں گزشتہ چند سالوں میں زبردست اضافہ دیکھا گیا ہے، جسے 2022-23  میں 350 ملین امریکی ڈالر 350 ملین سے زیادہ ریکارڈ کیاگیا ہے۔ دونوں جمہوری ممالک تجارت اور سرمایہ کاری کے فروغ کے لیے پرعزم ہیں۔

وزارت پارلیمانی امور کے سکریٹری، جناب جی سرینواس نے اس دورے کو انتہائی کامیاب قرار دیتے ہوئے کہا کہ اس  دورے سے اقتصادی تعلقات کے علاوہ اروگوے جیسے دور دراز دوست ملک میں ہندوستانی تنوع اور بھرپور ثقافت کو بھی پیش  کرنے کا موقع ملا ۔ سفیر بھاٹیہ نے بتایا کہ جناب پرہلاد جوشی کی قیادت میں خیر سگالی وفد کا  یہ دورہ لاطینی امریکی ممالک میں اروگوے کے لیے خاص رہا ہے اور وہ اس دورے سے دونوں ملکوں کے مابین دوطرفہ تعلقات کو مزید مستحکم کرنے کے ساتھ ساتھ اس طرح کے مزید تبادلوں کے منتظر ہیں۔

۔۔۔۔۔۔۔۔۔۔۔۔۔۔۔۔۔۔۔۔۔ 

(ش ح ۔ رض  ۔ ج ا  (

6230