“লাইচৎশিংগী অকিবা লোইদ্রি। হেল্থ-বেজ সর্ভিলিয়েন্স সিস্তেমশিং পুনশিনবা অমসুং মপাঙ্গল কনখৎহনবা দরকার ওই”। ৱাফম অসি ঙসি তেলঙ্গানাগী হায়দ্রবাত্তা পাংথোকপা ৩শুবা জি-২০ হেল্থ ৱার্কিং গ্রুপকী মীফম হৌদোকপদা হেল্থ অমসুং ফেমিলি ৱেলফিয়ারগী রাজ্য মন্ত্রী দোক্তর ভারতি প্রভিন পৱারনা ফোঙদোকখিবনি। থৌরম অদুদা তুরিজমগী য়ুনিয়ন মিনিস্তর শ্রী জি কিসন রেদ্দি, হেল্থ অমসুং ফেমিলি ৱেলফিয়ারগী রাজ্য মন্ত্রী প্রোফেসার এস.পি বাঘেল অমসুং নিতি অয়োগকী মেম্বর (হেল্থ) দোক্তর ভি.কে পাউলশু শরুক য়াখি।

মালেমগী ওইনা মতেং পাংনবগী মরুওইবা পল্লদুনা, দোক্তর ভারতি প্রভিন পৱারনা হায়খি হৌজিক থেংনরিবা লাইচৎ মনুংদা নত্তনা, শান্তি মতমদা পুন্না থবক তৌমিন্নবা খক্তনা খ্বাইদগী কান্নৈ হায়বা কোবিদ-১৯ লাইচৎনা তাক্লে। প্রাইমারি হেল্থনা মরুওইনা লৌদুনা অৱা-অনা থেংবা ঙম্বা হেল্থ সিস্তেম অমা শেমগৎপা ঐখোয়না দরকার ওইরে। জি-২০গী মেম্বরশিং ওইনা ঐখোয়না মতেং পাংনরিবা অসি মরুওই অমসুং কান্নবা ফলশিং ফংনবা থাজনবা লৈহনবা, লৌশিং পীথোক-পীশিন তৌনবা অমসুং নেতৱার্কশিং শেম্বা অমসুং পুন্না থবক তৌমিন্নবগী খুদোংচাবশিং শেমগৎলি।

দোক্তর পৱারনা হায়খি অশোই-অঙাম লৈতবা, মতিক চাবা অমসুং মগুন লৈবা মেদিকেলগী থবকশিং ফংহনবা দরকার ওই। গ্লোবেল মেদিকেল কাউন্তরমিজর (এম সি এম) ইকোসিস্তেম অমা শেমগৎনবা ভারতনা জি-২০গী মেম্বর ওইরিঙৈদা থবক পায়খৎলি। ইন্তরগভর্নমেন্তেল নেগোসিএতিং বোদি (আই এন বি)গী থবক্না লমজিংদুনা মরক্কী ওইবা প্লেতফোর্ম অমা শেম্নবা দোক্তর পৱারনা জি-২০ লৈবাকশিংগী লুচিংবশিংদা তকশিনখি।

জপানগী জি-৭ প্রসিদেন্ত মনুংদা খন্নখিবা এম.সি.এম দেলিভরি পার্তনর্সিপ য়াওনা জি-৭ অমসুং জি-২০গী মরুওইবশিং পুনশিনবগী ৱাফম পল্লদুনা দোক্তর পৱারনা হায়খি মাইকৈ অসিদা হৌজিক পায়খৎলিবা থবকশিং মালেমগী লৈবাকশিংনা মপাঙ্গল কনখৎহনগদবন। লাইচৎকী ত্রিতিশিং ৱারেপ লৌবা লাইচৎশিনা ঙাইবীরোই, মরম অদুনা হৌজিকমক থবক তৌবা মতম্নি।

দোক্তর পৱারনা হায়খি মালেমগী ওইনা হৌজিক হকশেলগী লমদা শীজিন্নরিবা তেক্নোলোজি অমতা ওইনা পুনশিন্দুনা ৱার্ল্দ হেল্থ ওর্গনাইজেসন্না শেন্নবা মালেমগী দিজিতিল হেল্থ অমগী থবক পায়খৎপা মথৌ তারে। থবক অসিনা লৈবাকশিংগী মরক্তা দিজিতেলগী থোং মান্নদবা অদু মেনখৎপা ঙমগনি অমসুং মালেমগী নাগরিক খুদিংমক্তা তেক্নোলোজিগী কান্নবশিং ফংহনবা ঙমগনি।

অনা-লায়য়েংগী থবকশিংদা ভারতকী মমাংঙৈগী লৌশিংনা পীরিবা কান্নবগী মতাংদা শ্রী জি কিসন রেদ্দিনা হায়খি ভারতকী মমাংঙৈগী লৌশিংনা মীওই খুদিংমক নুংঙাই-য়াইফনা হিংনবা শীজিন্নরি। মালেম শীনবা থুংনা অয়ুর্বেদা অমসুং য়োগগী কান্নবা খঙলে। ভারতকী সভেত্য অমসুং কলচরগী পুক্কৈনা ঐখোয়দদা চহি লিশিং ৫ শুরবা অরিবা অনা-লায়য়েংগী থবক অয়ুর্বেদা পীরে। মসিগা মান্নবা মওংদা, হকচাং অমসুং পুক্নিং-ৱাখল অনিমক ফনবা য়োগা অসি খ্বাইদগী পাম্নবা শাজেল অমা ওইরে।

ভারত অসি মেদিকেগী ত্রাভেলগী মফম অমা ওইনা শেমগৎনবা প্রধান মন্ত্রী শ্রী নরেন্দ্র মোদীগী পান্দম পল্লদুনা মহাক্না হায়খি ভারত অসি মমল হোঙবা, মতিক চাবা অমসুং অফবা অনা-লায়য়েংগী মফম অমনি অমসুং মসিনা লৈবাক অসি মেদিকেল ভেলু ত্রাভেলগী মফম অমা ওইহল্লে। হকশেল অমসুং নুংঙাই-য়াইফনা হিংনবা মালেমগী মীয়াম্না খ্বাইদগী পাম্নবা লৈবাক ১০গী মনুংদা ভারত য়াওরে।

শ্রী কিসন রেদ্দিনা হায়খি পুন্সি কয়া কন্নবা অমসুং হিংনবা লম্বীশিং ফংহনবদা থাজবা য়াবা মরুপ অমা ওইবদা ভারতনা চাউথোকচবা ফাওরি। ভারত অসি মালেমগী ফার্মাসি হায়না শক খঙনরে। হায়দ্রবাত্তা লৈবা জেনোম ভেলি খক্তনা মালেমগী অপুনবা ভেক্সিনগী চাদা ৩৩ রোম পুথোক্লি। মশা ফবা অমসুং পুক্নিং থৌগৎপা মালেম অমা শেমগৎনবা জি-২০দগী হেন্না ফবা মফম অমা লৈতে।

প্রোফেসার এস.পি বাঘেলনা হায়খি লাইচৎ মাঙজৌন্না ঙাকথোকপা, শেম-শাবা অমসুং থেংনবদা লৈবাক কয়াগী হোৎনবা দরকার ওই। তুংকোইনা চৎনবা য়াগদবা হকশেলগী থবক্না তুংকোইনা চৎনবা য়াবা ইকোনোমি অমা শেমগৎপা ঙমগনি হায়বা হৌজিক থেংনরিবা কোবিদ-১৯ লাইচৎ অসিনা ঐখোয়দা তাক্লে। রিজনেল, নেসনেল অমসুং মালেমগী থাক্তশিংদা হকশেলগী লমদা লেপ্তনা মতেং পাংনদুনা মপুংফানা লাইচৎ মাঙজৌন্না ঙাকথোকপা, থৌরাং তৌবা অমসুং থেংনবা ঙমগনি।

য়ুনিয়ন মিনিস্তরনা হায়খি জি-২০ প্লেতফোর্মগী খুৎথাংদা খ্বাইদগী ফবা হকশেলগী খুদোংচাবশিং, তিকাশিং, থেরাপিউতিকশিং অমসুং দাইগ্নোস্তিক্স মীওই খুদিংমক্তা ফংহন্নবা ভারতনা পান্দম থম্লি। খুদোংথিবা অমা মায়োক্নবা মতমদা হকশেলগী থবকশিং অমসুং খুন্নাইশিংদা শেন থাদনবা জি-২০ জোইন্ত ফাইনান্স অমসুং হেল্থ তাক্স ফোর্স অমসুং জি-৭গী থবকশিং পায়খৎপা দরকার ওই। লায়রবা লৈবাকশিংদা মীয়ামগী ওইবা মচাক-মথুমশিং অমসুং সরকারগী তৌবা ঙম্বা হেনগৎহন্নবা মতেং পাংবদা মালেমগী ফাইনান্সিএল ইন্সতিতুৎশিং অমসুং দিবলপমেন্ত বেঙ্কশিং অমসুং গ্লোবেল ফন্দ অমসুং পেন্দেমিক ফন্দনা মরুওইবা থৌদাং অমা লৌগনি।

য়ুনিয়ন হেল্থ সেক্রেতরি শ্রী রাজেস ভুসন্না হায়খি ‘মীওই খুদিংমক হকশেলগী খুদোংচাবা ফংহনবা’ হায়বসি এস.দি.জিগী মরুওইবা এজেন্দা অমনি। ভারতনা জি-২০গী প্রসিদেন্ত ওইবগী পান্দম হায়বদি “মালেম অমা, ইমুং অমা, তুংলমচৎ অমা’ হায়বা অসিদা মীওই খুদিংমক হকশেলগী খুদোংচাবা ফংহনবা হায়বসি য়াওরি।

মীফম অদুদা হেল্থ রিছার্স দিপার্তমেন্ত অমসুং আই.সি.এম.আরগী দি.জি দোক্তর রজিব বাহল, মপান থৌরম মন্ত্রলয়গী এদিসনেল সেক্রেতরি অমসুং ভারতকী জি-২০ সাওস সের্পপা শ্রী অভে থাকুর,  হেল্থ অমসুং ফেমিল ৱেলফিয়ারগী  এদিসনেল সেক্রেতরি শ্রী লভ অগরৱাল অমসুং দব্লিউ.ঐচ.ও, ৱার্ল্দ বেঙ্ক, য়ু.এস.এদ, দব্লিউ.ই.এফকী মীহুৎশিং অমসুং কেন্দ্র সরকারগী সেনিয়র ওফিসারশিং শরুক য়াখি।

***