প্রধান মন্ত্রী, শ্রী নরেন্দ্র মোদীনা ঙসি ভিদিও মেসেসকী থোংদা ছত্রপতি শিবাজী মহারাজকী ফম্বান কাখিবা চহী ৩৫০ শুরকপগী নুমিৎকী পালন থৌরমদা ৱা ঙাংখ্রে।

থৌরম অসিদা প্রধান মন্ত্রীনা হায়খি মদুদি আজাদী কা অমৃত মহোৎসবতা ছত্রপতি শিবাজী মহারাজকী ফম্বান কাবা নুমিৎ অসিনা মীপুম খুদিংমক্কীদমক অনৌবা ৱাখল্লোন অমসুং অনৌবা শক্তি পুরকখি। মহাক্না হায়খি ছত্রপতি শিবাজী মহারাজকী ফম্বান কাবা অসি চহী চহুম য়াইখৈগী মমাংদা পুৱারীগী মরু ওইরবা পন্দুপ অমা ওইখি অমসধং সেল্ফ-গভর্নান্স, গুদ গভর্নান্স অমসুং চাউখৎপগী ফজরবা ৱারীশিংনা ঙসিসু মীপুম খুদিংমক্তা ইথিল পীখি। প্রধান মন্ত্রীনা হায়খি, “জাতিগী য়াইফবা অমসুং মীয়ামগী য়াইফবা হায়বা অসিনা শিবাজী মহারাজকী গভর্নান্সকী মরু ওইবা মচাক ওইখি”। মহাক্না হায়খি স্বারাজ্যগী অহানবা কোনুংদা রাইগার ফোর্তকী শুমাংদা অচৌবা থৌরম অমা পাঙথোকখি অমসুং নুমিৎ অসিবু মহারাস্ত্র পুম্বদা হরাও তয়াম্না পাঙথোকপা কুহ্মৈ অমা ওইরি। প্রধান মন্ত্রীনা হায়খি অসিগুম্বা থৌরমশিং অসি মহারাস্ত্রদা চহী চুপ্পা পাঙথোক্লগনি অমসুং মহারাস্ত্র সরকারনা মসিবু শেম-শাবা অমদি পাঙথোকপগীদমক থাগৎপা ফোঙদোকখি।

প্রধান মন্ত্রীনা হায়খি ছত্রপতি শিবাজী মহারাজকী ফম্বান কাবগী থৌরম চহী চহুম য়াইখৈগী মমাংদা পাঙথোকপা মতমদা স্বারাজ্য অমসুং লৈবাক নীংবগী ৱাখল্লোন অসি মসিদা য়াওখি। মহাক্না হায়খি শিবাজী মহারাজনা মতম চুপ্পদা ভারতকী অপুনবা শক্তম ঙাকপদা মরু ওইবা মীৎয়েং চংদুনা লাকখি। প্রধান মন্ত্রীনা হায়খি ঙসি এক ভারত, শ্রেস্থ ভারতকী বিজন্দা ছত্রপতি শিবাজী মহারাজকী ৱাখল্লোনশিংগী মমি তাবা উবা ফংখি।

প্রজাশিংবু ইথিল পীদুনা অমসুং থাজবা পোকহন্দুনা থম্বগী লুচিংবগী থৌদাংগী মতাংদা প্রধান মন্ত্রীনা হায়খি কনাগুম্বা অমনা ছত্রপতি শিবাজী মহারাজকী মতমদা লৈবাক অসিগী মশানা মশাদা থাজবা থমজবগী থাকশিং অদু নীংশিংবীয়ু। মহাক্না হায়খি লোইলম শন্দোকপশিংনা লম লৌশিনবা অমদি মসিগা লায়রবগা পুনশিন্দুনা খুন্নাই অসিবু শোত্থনা থমখিবা মীখা পোনবগী চহী কয়া অদুনা মরম ওইদুনা প্রজাশিংগী মশাদা থাজবগী চাং অসি য়াম্না নেম্না লৈরমখি। ছত্রপতি শিবাজী মহারাজনা লোইলম শন্দোকপশিংগা লান্থেংনবা খক্তা নত্তনা মীয়ামদা সেল্ফ-গভর্নান্স হায়বা অসি ওইথোকপা য়াই হায়না থাজবসু পোকহনখি হায়না ফোঙদোক্লদুনা প্রধান মন্ত্রীনা হায়খি “ঐখোয়গী কলচরেল সেন্তরশিংদা এতেক চত্থদুনা মীয়ামগী মোরেল নমথনবা হোৎনখি”। শ্রী মোদীনা হায়খি, “শিবাজী মহারাজনা মীখা পোনবগী ৱাখল্লোন মাংহন্দুনা মীয়ামদা জাতি শেমগৎপগী ৱাখল্লোন্না ইথিল পীখি”।

প্রধান মন্ত্রীনা হায়খি পুৱারীদা মিলিতরীদা মখোয়গী মতিক-ময়াইগীদমক খঙনবা লৈঙাকপা কয়া লৈখি অদুবু মখোয়গী লৈঙাকপগী মতিক ময়াই অদুদি শোনখি অমসুং মতৌ অসুম্না মখোয়গী অফবা লৈঙাক্কীদমক খঙনবা অদুবু মখোয়গী মিলিতরীগী লুচিংবা মতৌ অদুদি শোনবা কয়া অমসু লৈখি। প্রধান মন্ত্রীনা হায়খি অদুম ওইনমক ‘স্বারাজ’ লোয়ননা ‘সুরজ’ অনিমক্তা ছত্রপতি শিবাজী মহারাজকী মতৌ অসি শীংথানীংঙাই ওইখি। প্রধান মন্ত্রীনা হায়খি শিবাজী মহারাজনা য়াম্না চহী নৌনা লানবনশিং খুদুম চন্দুনা অমসুং য়েকনববু মাইথীবা পীদুনা মহাক্কী মিলিতরীগী লুচিংবগী মতৌ অদুগী খুদম পীখি অমরোমদা মহাক্না নীংথৌ অমা ওইনা পব্লিক এদমিনিস্ত্রেসন্দা রিফোর্মশিং পুরক্তুনা গুদ গভর্নান্সকী লম্বীসু তাকখি। প্রধান মন্ত্রীনা মখা তারদুনা হায়খি নাকল অমদা মহাক্না লোইলম শন্দোকপশিংদগী মহাক্কী লমদম অমসুং নাৎপু ঙাকথোকখি অমরোমদনা মহাক্না জাতি শেমগৎপগী পুম্নমক শুনা য়াওরবা বিজন অমা পুথোকখি। প্রধান মন্ত্রীনা মীয়ামদা মশানা মশাবু ইকাই খুম্নবগা লোয়ননা হিংনবা থাজবা পীখিবা গভর্নান্সকী মহাক্কী মীয়ামগী য়াইফনবা খনবা মতৌ অদুগী মতাংদা ফোঙদোক্লদুনা হায়খি, “ছত্রপতি শিবাজী মহারাজ অসি মহাক্কী বিজন্না মরম ওইদুনা অতোপ্পা অথৌবা মীওইশিংদগী পুংতোপ-তোপ্পা অমা ওইখি”। প্রধান মন্ত্রীনা মখা তারদুনা হায়খি মসিগা লোয়ননা ছত্রপতি শিবাজী মহারাজনা স্বারাজ, ধর্ম, নাৎ অমসুং হেরিতেজ শোকহন্নবা হোৎনখিবা মীওইশিংদা অকনবা পাউজেল অমা পীখি মসিনা মীয়ামগী মরক্তা থাজবা পোকহনখি অমসুং আত্মনির্ভর ওইবগী ৱাখল্লোন পোকহনখি। প্রধান মন্ত্রীনা মখা তারদুনা হায়খি মদুদি মসিনা জাতিগীদমক ইকাই খুম্নবা হেন্না হেনগৎহনখি। লৌমীগী য়াইফনবা, নুপীবু শক্তি পীনবা নত্ত্রগা মীচমগীদমক গভর্নান্স এক্সেসিবল ওইহনবা ওইরবসু মহাক্কী গভর্নান্সকী সিস্তেম অমসুং মহাক্কী পোলিসীশিং অসি ঙসিমকসু চপ মান্ননা মরু ওই হায়না প্রধান মন্ত্রীনা ফোঙদোকখি।

প্রধান মন্ত্রীনা হায়খি ছত্রপতি শিবাজী মহারাজকী মওং মতৌনা ঙসি ঐখোয়দা হীরম অমা নত্ত্রগা অমদা ইথিল পীরি। মহাক্না হায়খি ভারতকী সমুদ্রগী লৈরিবা মতিক ময়াই অসিবু শকখঙলদুনা নেভী পাকথোক-চাউথোকহনবা অমসুং মহাক্কী মেনেজমেন্ত স্কিলশিং অসিনা ঙসিসু মীপুম খুদিংমক্তা ইথিল পীনবগী হৌরকফম ওইরি। প্রধান মন্ত্রীনা হায়খি মহাক্না শারমখিবা লানবনশিং অসি ঙসিবু শক্তি লৈরবা ইথৎ অমসুং ইরৈ কয়া লাক্লবসু সমুদ্র ময়াইদা মতিক ময়াই লৈনা লেপ্পি।প্রধান মন্ত্রীনা ছত্রপতি শিবাজীনা মহাক্কী লমদম পাকথোক-চাউথোকহনবা অমসুং সমুদ্র তোর্বানশিংদগী হৌরগা চীং ফাওবদা লানবনশিং শাখিবগী মতৌ অদুগী মতাংদা পনখি। মতম অদুদা ৱাতর মেনেজমেন্তগা মরী লৈননা মহাক্না শিল-লাংখিবা অদুনা এক্সপর্তশিংবু অঙকপা পোকহনখি। শিবাজী মহারাজতগী ফংখিবা ইথিলগী মতাংদা পল্লদুনা প্রধান মন্ত্রীনা হায়খি ব্রিতিশ লৈঙাক শক্তাকপা ইন্দিয়ন নেভীগী ফিরাল অসিবু মমাং চহীদা শিবাজী মহারাজকী এমব্লেমনা মহুৎ শিন্দুনা মীখা পোল্লম্বগী মমি নেভীদগী ভারতনা মাংহনখিবা অদুগী মতাংদা পনখি। শ্রী মোদীনা হায়খি, “হৌজিক ফিরাল অসিনা সমুদ্র অমসুং অতিয়াদা অনৌবা ভারতকী মতিক ময়াই অদু তাক্লি”।

প্রধান মন্ত্রীনা হায়খি, “ছত্রপতি শিবাজী মহারাজী থৌনা, ৱাখল্লোন অমসুং জস্তিসনা মীরোল কয়াবু ইথিল পীখি। মহাক্কী থবক পাইখৎপা, লালোং য়াৎপা হৈবা অমসুং শান্তি লৈবা পোলিতিকেল সিস্তেমগী থৌনা ফরবা মওং-মতৌ অসিনা ঙসিসু ঐখোয় পুম্নমক্তা ইথিল পীরি”। ৱারোল পীবা লোইশিনবা প্রধান মন্ত্রীনা হায়খি ছত্রপতি শিবাজী মহারাজকী পোলিসীশিং অসি মালেমগী লৈবাক কয়াদা খন্নরি অমসুং মসিদা রিসর্চ কয়া তৌরি। শ্রী মোদীনা হায়খি মদুদি ছত্রপতি শিবাজী মহারাজকী মীতম থা অমগী মমাংদা মোরিসিয়স্তা খিনখি। অমৃত কালগী চহী ২৫গী খোঙচৎ অসি ভেল্যুশিং অসিদা য়ুম্ফম ওইরগা মপুং ফাহন্নবগী মতাংদা ফোঙদোক্লদুনা প্রধান মন্ত্রীনা লোইশিনবা হায়খি মদুদি, “আজাদী কা অমৃত কালদা ছত্রপতি শিবাজী মহারাজনা ফম্বান কাবগী চহী ৩৫০ মপুং ফাবা অসিমক ইথিল পীরিবা থৌরম অমনি। চহী কয়াগী মতুংদা ফাওবা মহাক্না তাকপীরম্বা ভেল্যুশিং অসিনা ঐখোয়দা মাংদা চংশিন্নবা লম্বী তাক্লি”। লোইশিনবদা প্রধান মন্ত্রীনা হায়খি, “খোঙচৎ অসি ছত্রপতি শিবজী মহারাজনা মঙলমখিবা মঙলানগী ভারত অদু শেমগৎনবা ওইরগনি, স্বারাজ, গুদ গভর্নান্স অমসুং মীপাল তাংদবগী খোঙচৎ ওইরগনি। মসি চাউখৎপা ভারত অমগী খোঙচৎ ওইরগনি”।

*****