খুরুমজরি ওস্ত্রেলিয়া!

ওস্ত্রেলিয়াগী প্রধান মন্ত্রী অমসুং ঐহাক্কী নুংশিরবা মরুপ, হিস এক্সিলেন্সী, এন্থোনী অলবানিজ, হান্নগী ওস্ত্রেলিয়াগী প্রধান মন্ত্রী, হিস এক্সিলেন্সী স্কোৎ মোরিসন, ন্যু সাউথ ৱেল্সকী প্রিমিয়র খৃস মিন্স, মপাল থৌরম মন্ত্রী পেন্নী ৱোং, কম্ম্যুনিকেসন মন্ত্রী মিচেল রোলেন্দ, ইনর্জী মন্ত্রী খৃস বোৱেন, বিরোধীগী লুচিংবা পিতর দুত্তন, এসিস্তেন্ত ফোরেন মিনিস্তর তিম ৱাতস, ন্যু সাউথ ৱেল্স কেবিনেৎকী ইকাই খুম্নরবা মেম্বর দা এন্দ্রিয়ু চার্লতন, পারামত্তাগী মেম্বর ওফ পার্লিয়ামেন্ত, ওস্ত্রেলিয়াগী মেম্বর ওফ পার্লিয়ামেন্ত, মেয়রশিং, দিপুতী মেয়রশিং, কাউন্সিলরশিং অমসুং ওস্ত্রেলিয়াদা লৈরবা ওভরসীস ইন্দিয়নশিং। ঙসি মশিং য়াম্লবা মীয়াম্না মফম অসিদা তিনবীরি, পুম্নমকপু ঐহাক্না খুরুমজরি!

অহানবদা ঐহাক্না ঙসি মফম অসিদা ঐখোয়না উনবা ফংবগা ইরোইননা লমদম অসিগী ত্রেদিস্নেল কস্তদিয়নশিংবু ইকাই খুম্নবা উৎচরি। ঐহাক্না অহল-লমনশিং, হৌখ্রবা, হৌরক্লিবা অমসুং হৌরক্কদবশিংদা ইকাই খুম্নবা উৎচরি। ঙসি ঐখোয়গী ইরক্তা য়াওরিবা মীওই পুম্নমক্কা লোয়ননা পালন তৌরি।

মরুপশিং,

ঐহাক্না ২০১৪দা লাকপা মতমদা ঐহাক্না নখোয়দা ৱাশক অমা শকখি, ৱাশক অদুদি নখোয়না ভারতকী প্রধান মন্ত্রী অমা হেক্তনা অমুক হন্না লাক্নবগীদমক চহি ২৮ ঙাইবগী মথৌ তাহল্লোই হায়বা অসিনি। অদুনা ঙসি সিদনীগী এরেনা অসিদা ঐহাক্না ঙসি অমুক হন্না লেপ্লরে অমসুং ঐহাক ইথন্থা লাকপা নত্তে। প্রধান মন্ত্রী অলবানিজসু ঐহাক্কা লোয়ননা লাকই। প্রধান মন্ত্রীনা মহাক্কী চিল্লবা মতম কাইথোকপীদুনা নখোয়গীদমক লাক্লিবা অসিনা ভারত মচা ঐখোয়গীদমক মহাক্কী মীনুংশি অদু উৎলি। অদোম্না হৌজিক্তা ফোঙদোকখিবা অদুনা ভারতকীদমক ওস্ত্রেলিয়ানা ফাওরিবা নুংশিবা অদু উৎলি। চহি অমত্তদা ঐহাক্না ভারতকী লমদম অহমদাবাদতা প্রধান মন্ত্রীবু ওকচবগী খুদোংচাবা ফংখি। ঙসি মহাক্না মফম অসিদা লিত্তল ইন্দিয়া উরেপ-উয়ুং তম্বদা ঐহাক্কী মতেং পাংবীখি। ঐহাক্না মঙোন্দা তৌবীমল খঙবা উৎচরি, থাগৎচরি ঐগী মরুপ এন্থোনী।

মসি লিত্তল ইন্দিয়া ওস্ত্রেলিয়া চাউখৎহনবদা ভারতকী ফুরুপনা শরুক তম্মিবা অদুবু শকখঙবনি। ঐহাক্না অখন্ননা ইকাই খুম্নবীবা অসিগীদমক ন্যু সাউথ ৱেল্সকী প্রিমিয়র, সিতী ওফ পারামত্তাগী মেয়র, দিপুতী মেয়র অমসুং কাউন্সিলরশিংবু থাগৎচনীংই।

মরুপশিং,

ওভরসীস ইন্দিয়ন কম্ম্যুনিতীগী মীওই কয়ানা ন্যু সাউথ ৱেল্সকী পব্লিক লাইফতা থৱায় য়াওনা শরুক য়ারিবা অসিদা ঐহাক্না নুংঙাইবা পোকই। নখোয়গী শক্তাক শেম্মি। হৌজিক্কী ন্যু সাউথ ৱেল্সকী সরকারদা দিপুতী প্রিমিয়র প্রু কার য়াওরি, ত্রেজরর দেনিএল মোখেনা চাউনা শরুক তম্মি অমসুং ঙরাংমকসু ইনাও সমীর পান্দে অসি পারামত্তাগী লোর্দ মেয়র ওইনা খনখি। ঐহাক্না পুম্নমকপু নুংঙাইবা ফোঙদোকচরি।

মরুপশিং,

ঙসি পারামত্তাদা পুম্নমক অসি থোক্লিঙৈ চৈরক্তা সাইলানি এভেন্যু অসি ভারতকী লান্মী নায়ন সিংহ সাইলানিগী মমিং লৌদুনা ৱেস্তর্ন ওস্ত্রেলিয়াগী পর্থ সিতীদা শেমগৎলি হায়বগী পাউসু ফংই। মহাক্না ফার্স্ত ৱর্ল্দ ৱারদা ওস্ত্রেলিয়ন আর্মীগীদমক লান শোক্নদুনা থৱায়না পোন্থা পীখি। ঐহাক্না ইকাই খুম্নবা অসিগীদমক ৱেস্তর্ন ওস্ত্রেলিয়াগী লুচিংবশীংবু থাগৎচরি।

মরুপশিং,

মমাংদা ভারত অমসুং ওস্ত্রেলিবাগী মরক্তা লৈরিবা মরী অসি ৩সি না মশক তাকই হায়নবা মতম অমা লৈরমখি। ৩ সি অসি কম্মনৱেল্থ, ক্রিকেৎ অমসুং করীনি, মসিগী মতুংদা ভারত ওস্ত্রেলিয়াগী মরীশিং অসি ৩ দিদা য়ুম্ফম ওই হায়খি মদুদি দেমোক্রেসী, দাইস্পোরা অমসুং দোস্তিনি, মীওই খরনা হায়খি ভারত ওস্ত্রেলিয়াগী মরীশিং অসি ৩ ই হায়বদি ইনর্জী, ইকনোমী অমসুং এজুকেসন্দা য়ুম্ফম ওই হায়খি, হায়বদি করিগুম্বা মতমদা সি, করিগুম্বা মতমদা দি, করিগুম্বা মতমদা ই, ৱাফমশিং অসি তোঙান-তোঙানবা মতমশিংদা অচুম্বনি হায়বা উবা ফংখি। ভারত অমসুং ওস্ত্রেলিয়াগী মরক্তা লৈরিবা পুৱারী ওইরবা মরীশিং অসি মসিদগী হেন্না চাউই অমসুং মরী পুম্নমক অসিগী খ্বাইদগী চাউবা য়ুম্ফম অসি করিনো হায়বা অদোম খঙলব্রা? খ্বাইদগী চাউবা য়ুম্ফম অসি অমনা অমবু থাজবা অমসুং অমনা অমবু ইকাই খুম্নবা অসিনা ওইরি, মসিগী অমনা অমবু থাজবা অমসুং অমনা অমবু ইকাই খুম্নবা অসি ভারত অমসুং ওস্ত্রেলিয়াগী দিপ্লোমেতিক ওইবা মরীশিং খক্তদগী হৌরকখিবা নত্তে। মসিগী তশেংবা মরম, মসিগী তশেংবা শক্তি অসি ওস্ত্রেলিয়াদা লৈরিবা ভারত মচা খুদিংমক্না ওইরি, নখোয়না তশেংবা শক্তি ওইরি। মসিগী তশেংবা মরম অসি ওস্ত্রেলিয়াগী মিলিয়ন ২৫ হেনবা প্রজাশিংনা ওইরি।

মরুপশিং,

ঐখোয়গী মরক্তা জিওগ্রাফিকেল দিস্তেন্স লৈ অদুবু ইন্দিয়ন ওসীন্না ঐখোয়বু শম্নহল্লি। ঐখোয়গী পুন্সি মহিং খেন্নরবসু হৌজিক্তি য়োগনা ঐখোয়বু শম্নহল্লি। করম্বা মতমদগী ঐখোয়না ক্রিকেৎনা শম্নহল্লকখি খঙদে অদুবু হৌজিক তেন্নিস অমসুং ফিল্মশিংনা ঐখোয়বু শম্নহল্লি। মফম অসিদা থোং-থাকপগী তোখাইবা মওংশিং লৈ অদুবু হৌজিক মাস্তরচেফনা ঐখোয়বু অমত্তা ওইনা পুনশিল্লি। ঐখোয়গী লৈবাক্তা তোঙান-তোঙানবাবা হরাও কুহ্মৈশিং পালন তৌজরবসু ঐখোয়বু দিৱালীগী মৈঙাল অমসুং বাইশখি পালন তৌবনা শম্নহল্লি। মফম অসিদা তোঙান-তোঙানবা লোলশিং ঙাংলি অদুবু ঐখোয় পুম্নমক মালায়ালম, তামিল, তেলেগু, পঞ্জাবী, হিন্দী লোলশিং তাকপীরিবা স্কুল কয়াগা লোয়ননা এফিলিএৎ তৌরি।

মরুপশিং,

ওস্ত্রেলিয়াগী মীয়াম, মফম অসিদা লৈরিবা মীওইশিং অসি থমোয় চাওই, য়াম্না ফৈ অমসুং থমোয় শেংই মদুনা মখোয়না ভারতকী দাইভর্সিতী অসিবু তরাম্না ওকখি অমসুং পারামত্তা স্ক্বের অসিনা কনাগুম্বা অমগী দিভাইন স্ক্বের ওইবা ঙমখি। ৱিগ্রাম স্ত্রীৎ অসি বিক্রম স্ত্রীৎ ওনখি অমসুং হরিস পার্ক অসি মীওই কয়াগী হরিস পার্ক ওইখি। অমরোমদা ঐহাক্না হরিস পার্ক্তা চাৎকাজকী চাৎ, জয়পরগী অথুম্বা জলেবী ফংই হায়না তাই। ঐহাক্না পুম্নমক্তা ৱাফম অমা হায়জগে মফম অদুদা পি.এম. অলবানিজপু পুবীয়ু। অমসুং মরুপশিং, চানবা অমসুং চাৎকী মতাংদা লাকপদদি মহৌশানা লখনৌগী মমিং অসি শোন্নরকই। ঐহাক্না তাবদা সিদনীগী মনাক্তা লখনৌ কৌবা মফম অমা লৈ হায়নৈ। অদুবু মফম অদুদা চাৎ ফংব্রা ফংদব্রা হায়বদি ঐহাক্না খঙদে। মফম অসিদা দিল্লী স্ত্রীৎ, বোম্বে স্ত্রীৎ, কাশ্মির এভেন্যু, মালাবার এভেন্যুগুম্বা লম্বী কয়া লৈ, মসিনা ওস্ত্রেলিয়াদা লৈরিবা নখোয়বু ভারতকা শম্নহল্লি। গ্রেতর সিদনীদা হৌজিক ইন্দিয়া পারেদসু হৌরগনি হায়না ঐহাক্না তাজৈ। ধুম-ধামদা মফম অসিদা নখোয়না আজাদী কা অমৃত মহোৎসব পাঙথোক্লগনি খঙবদা ঐহাক্না য়াম্না নুংঙাইবা পোকই। সিতী কাউন্সিল কয়াদা মফম অসিদা থৌরম কয়া পাঙথোকখি। সিদনী ওপরেস হাউসপু মচু অহুমগী ফিরাল মচুনা লৈতেংবা  মতমদা ভারত মচাগী থমোয়দা অপেনবা পোকই। ভারত্তগীসু নুংঙাইবা ফোঙদোকখি অমসুং মসিগীদমক ঐহাক্না ন্যু সাউথ ৱেল্স সরকারবু অখন্ননা তৌবীমল খঙবা উৎচরি।

মরুপশিং,

ঐখোয়গী ক্রিকেতিংগী মরী অসি চহি ৭৫ শুরক্লে। হেন্না পুক্নিং চীংশিন্নীংঙাই ওইরিবা ৱাফমদি ক্রিকেৎকী লম্পাক্তা অথোই-অহেন তানবা অসিনি, লম্পাক্তনা হেন্না ঐখোয়গী মরুপ ওইবগী মরী চেৎশিল্লি। হন্দক্তা ওস্ত্রেলিয়াদগী নুপী ক্রিকেৎ শান্নরোয় কয়ানা ভারত্তা অহানবা ওইনা আই.পি.এল. শান্নবা লাকখি, মরুপশিং অফবা মরুপ অমা হায়বা অসি হরাওবগী মপাং ওইবতা নত্তনা অৱাবদসু মপাং ওইবা অদুনি। মমাং চহিদা শেন ৱার্ননা লৈখিদবদা ভারত মচা করোর কয়ানা নুংঙাইতবা ফোঙদোকখি।

মরুপশিং,

ময়াম্না ওস্ত্রেলিয়াদা লৈবীরি। মফম অসিগী চাউখৎ-থৌরাং য়েংলি। নখোয় ময়ামনা ভারতসু চাউখৎপা লৈবাক অমা ওইহনবগী মঙলান লৈ। মসি নখোয়গী মঙলান নত্ত্রা? মসি নখোয়গী মঙলান নত্ত্রা? মসি নখোয়গী মঙলান নত্ত্রা? নখোয়গী থমোয়দা মংজরিবা মঙলান অমনি, মসি ঐহাক্কী মঙলানসু ওইরি। মসি ভারত মচা করোর ১৪০গী মঙলান্নি।

মরুপশিং,

ভারত্তা তৌবা ঙম্বগী অৱাৎপা লৈতে। ভারত্তা রিসোর্সশিংগী অৱাৎপসু লৈতে। ঙসি মালেমগী খ্বাইদগী চাউবা অমসুং হৌগৎলক্লিবা তেলেন্ত ফেক্তরী লৈবা লৈবাক অদু ভারতনা ওইরি। অচুম্বা পাউখুম অসি ভারতনি। ঐহাক্না মসি অমুক হন্না ফোঙদোকচগে। ঙসি মালেমগী খ্বাইদগী চাউবা অমসুং হৌগৎলক্লিবা তেলেন্ত ফেক্তরী লৈবা লৈবাক অদু ভারতনা ওইরি। অমসুং হৌজিক নখোয়গী মাংদা মসিগী ৱাফম খরা ঐহাক্না থমজগে। অমসুং অদোমদগী অচুম্বা পাউখুম ঐহাক্না তাবা পাম্মি, কোরোনাগী মালেমগী লাইচৎ অসিদা মালেমদা খ্বাইদগী খোঙজেল য়াংনা ভেক্সিনেসন প্রোগ্রাম হৌখিবা লৈবাক অদু ভারতনি, লৈবাক অদু ভারতনি, লৈবাক অদু ভারতনি। ঙসি মালেমদা খ্বাইদগী খোঙজেল য়াংনা চাউখৎলক্লিবা ইকনোমী অদু ভারতনি, লৈবাক অদু ভারতনি। লৈবাক অদু ভারতনি। ঙসি মালেমগী নম্বর ১ স্মার্তফোন দেতা কঞ্জুমর ওইরিবা লৈবাক অদু ভারতনি। লৈবাক অদু ভারতনি। লৈবাক অদু ভারতনি। ঙসি ফিনতেক এদোপ্সন রেৎতা নম্বর ১ ওইরিবা লৈবাক অদু ভারতনি। ঙসি মালেমগী ওইনা শঙ্গোম পুথোকপদা নম্বর ১ ওইরিবা লৈবাক অদু ভারতনি। ঙসি মালেমগী ওইনা ইন্তর্নেৎ য়ুজরশিংগী মশিংদা নম্বর ২ ওইরিবা লৈবাক অদু ভারতনি। ঙসি মালেমগী ওইনা অনিশুবা খ্বাইদগী চাউবা মোবাইল মেন্যুফেকচর্র ওইরিবা লৈবাক অদু ভারতনি। লৈবাক অদু ভারতনি। লৈবাক অদু ভারতনি। ঙসি মালেমগী ওইনা চেং, গেহু, চিনি পুথোকপদা মালেমগী নম্বর ২ ওইরিবা লৈবাক অদু ভারতনি। ঙসি মালেমগী ওইনা উহৈ-ৱাহৈ অমসুং মনা-মশিং পুথোকপদা নম্বর ২ ওইরিবা লৈবাক অদু ভারতনি। লৈবাক অদু ভারতনি। ঙসি মালেমগী ওইনা অহুমশুবা খ্বাইদগী চাউবা স্তার্তঅপ ইকোসিস্তেম ওইরিবা লৈবাক অদু ভারতনি। লৈবাক অদু ভারতনি। মালেমগী ওইনা অহুমশুবা খ্বাইদগী চাউবা ওতোমোবাইল মার্কেৎ অসি ভারত্তা লৈ। লৈবাক অদু ভারতনি। মালেমগী ওইনা অহুমশুবা খ্বাইদগী চাউবা সিভিল এভিএসন মার্কেৎ ওইরিবা লৈবাক অদু ভারতনি। লৈবাক অদু ভারতনি। অমসুং মথংগী চহি ২৫দা চাউখৎপগী পান্দমগা লোয়ননাং মাংদা চংশিল্লিবা লৈবাক অদু ভারতনি। লৈবাক অদু ভারতনি।

মরুপশিং,

ঙসি আই.এম.এফ.না ভারত অসি গ্লোবেল ইকনোমীদা অচৌবা মফম অমা কল্লি হায়না লৌই, ৱর্ল্দ বেঙ্কনা থাজৈ মদুদি গ্লোবেল হেদৱাইন্দশিংবু শীংনবা কনাগুম্বা অমা লৈরিবদি অদু ভারতনি হায়না থাজৈ। ঙসি মালেমগী লৈবাক কয়াদা বেঙ্কিং সিস্তেমদা ক্রাইসিস থোক্লি অদুবু নাকল অমরোমদা ভারতকী বেঙ্কশিংগী শক্তি অসি মফম শিনবা থুংবদা থাগৎনরি। চহি ১০০দা থোকপা খ্বাইদগী চাউবা খুদোংথিবগী মরক্তা ভারতনা মমাং চহিদা রেকোর্দ ওইনা এক্সপোর্ত তৌখি। ঙসি ঐখোয়গী ফোরেক্স রিজর্বনা নৌবা পনখৈশিং য়ৌরি।

মরুপশিং,

ঐখোয়গী দিজিতেল স্তেক অসি ভারতনা করম্না মালেমগী বাইফনবা থবক তৌই হায়বগী খুদম অমনি। ময়াম্না ভারতকী ফিনতেক রিভোল্যুসনগী মরমদা খনরি। ২০১৪দা ঐহাক্না লাকখিবা মতমদা নখোয়দা মঙলান অমগী মরমদা হায়রমখিবা অদু নখোয়না নীংশিলম্বা য়াই। ঐহাক্কী মঙলান অদুদি ভারত্তা লৈরিবা লায়রবশিংগী মরক্তা খ্বাইদগী লায়রবশিংগী মখোয়গী মশাগী বেঙ্ক একাউন্তশিং লৈহনবনি। হৌখিবা চহি ৯ অসিদা ঐখোয়না ভারত মচা করোর ৫০ হায়বদি ৫০০ মিলিয়নগী বেঙ্ক একাউন্তশিং হাংহনখি তাবদা মরুপশিংনা চাউথোকচবা পোক্কনি। অমসুং ঐখোয়গী মাইপাকপা অসি শুপ্নগী বেঙ্ক একাউন্ত হাংবা খক্তা নত্তে, ঐখোয়না মসিদা লোইশিনখিদে, মসিবু ভারতকী পব্লিক সর্ভিস দেলিবরীগী অপুনবা ইকোসিস্তেম অমদা ওন্থোকখি। ঐখোয়না জেম ত্রিনিতী, জন ধন বেঙ্ক একাউন্ত, মোবাইল ফোন অমসুং আধার আই.দি.গী জেম ত্রিনিতী অমা শেমখি। মসিনা ক্লিক অমদা ইরৈবাকচা করোর কয়াদা দাইরেক্ত বেনিফিৎ ত্রান্সফর দি.বি.তি. ওইথোকহনখি তাবদা নখোয়না হেন্না নুংঙাইগনি। হৌখিবা চহি ৯দা ফংখিবা মশিং অসিনা নখোয়দা নুংঙাইবা পোকহনগনি, হৌখিবা চহি ৯দা লুপা করোর লাখ ২৮ হায়বদি ওস্ত্রেলিয়ন দোলরগী বিলিয়নদগী ৫০০ হেনবা অসি মথৌ তাবশিংদা বেঙ্ক একাউন্তশিংগী খুত্থাংদা হকথেংননা থাখি। অদুবু ভারত অসি ক্লিক অমদা মীৎনা কুপ্পা মীৎকুপ অমদা থবক অসি তৌবা লৈবাকশিংগী মনুংদা অমা ওইখি। য়ুনিভর্সেল পব্লিক ইন্তর্ফেস হায়বদি য়ু.পি.আই.না ফাইনান্সিএল ইনক্লুজন অসিবু ভারত্তা অনৌবা পনখৈ তম্না পুখৎখি। ঙসি চাদা ৪০, মালেমগী রিএল তাইম দিজিতেল পেমেন্তশিংগী চাদা ৪০ ভারত খক্তদা তৌরি। করিগুম্বা অদোমনা ভারত্তা লাকপা তারবদি মফম খুদিংমক্তা, উহৈ-ৱাহৈ, মনা-মশিং নত্ত্রগা পানিপুরি কার্তশিং নত্ত্রগা চাগী স্তোলশিং ওইরবসু দিজিতেল ত্রাঞ্জেক্সনশিং তৌবা উবা ফংখি।

মরুপশিং,

ভারতকী দিজিতেল রিভোল্যুসন অসি ফিনতেক খক্তগী নত্তে। ভারতনা মোদর্ন এরেঞ্জমেন্তশিং তৌরি। মীয়ামগী ইজ ওফ লিবিং হেনগৎলক্লি। মসিগী খুদম ভারতকী দিজিলোক্করনি, দ্রাইবিং লাইসেন্সতগী দিগ্রী অমসুং প্রোপর্তী পেপরশিং, সরকারনা পীবা চেচাংশিং অসি দিজিতেল লোক্করদা জেনরেৎ তৌখি। চেচাং মখল চামাগী ময়া দিজিতেল লোক্করদা য়াওরি। নখোয়না মসি ফিজিকেল কোপী ওইনা স্তোর তৌবগী মথৌ তাররোই। পাসৱার্দ অমনা পুম্নমক য়ারে। হৌজিক ভারত মচা করোর ১৫ হায়বদি মিলিয়ন ১৫০ হেনবনা মসিদা য়াওশিনখ্রে। অসিগুম্বা দিজিতেল প্লেৎফোর্মশিংনা ভারতপু ঙসি হেন্না শক্তি লৈহল্লি।

মরুপশিং,

ঙসি মালেমনা ভারতকী খোঙথাং খুদিংমক অমসুং মাইপাকপা খুদিংমক খঙবা পাম্মি। ভারত অসি চহি লিশিং কয়াদগী লৈরক্লবা সভ্যতা অমনি। ভারত অসি দেমোক্রেসীগী মমানি। ঐখোয়না মতমগা ইরোইননা ঐখোয় ইশাবু শেমজখি অদুবু ঐখোয়গী হৌরকফমদি কাউথোকপা তৌখিদে। ঐখোয়না লৈবাক অসি ইমুং অমগুম্না খল্লি অমসুং মালেমবুসু ইমুং অমা ওইনা খল্লি, বসুধৈব কুতুম্বকম, মরম অসিনা ভারতনা মাগী জি-২০ প্রসিদেন্দীগী থিম অসি মসি ওইহনখি। ভারতনা হায়খি ৱান আর্থ, ৱান ফেমিলী,ৱান ফ্যুচর। ভারতনা অকোইববু ঙাকশে্নবা সোলর ইনর্জীগীদমক অচৌবা পান্দমশিং থম্বা মতমদা মানা হায়খি ৱান সন, ৱান ৱর্ল্দ, ৱান গ্রীদ। ভারতনা মালেমগী মীয়ামবু মশা মউ ফনা লৈনবা হায়খি ৱান আর্থ, ৱান এল্থ। ভারত অসি কোরোনাগী মতমদা মালেমগী লৈবাক 150 হেনবদা হীদাক লাংথক থাখিবা লৈবাক্নি। ভারত অসি লৈবাক ১০০ হেনবদা লেম্না ভেক্সিনশিং পীদুনা মীওই করোর কয়াগী পুন্সি কনখি। মফম অসিদা থবক তৌরিবা সর্ভিস স্পিরিৎ অসিনা ঐখোয়গী কলচরগী অখন্নবা মগুন ওইখি। ঙসি মঙাশুবা সিখ গুরু শ্রী গুরু অর্জুন দেবজীগী থৱায় থাখিবা নুমিৎনি। দাসাবন্ধা সিস্তেম হৌদোকখিবা অসি গুরু অর্জুন দেবজীননি। মসিগী ইথিল অসিগা লোয়ননা কোরোনা মনুংদসু গুরুদ্বারা কয়াগী লঙ্গরনা মীয়ামগী মতেং পাংখি। মসিগী মতম অসিদা লাইশঙ কয়াগী চাকশঙ বিক্তিমশিংগীদমক হাংখি। ওস্ত্রেলিয়াদা লৈরিবা অমসুং মহৈ তম্লিবা মহৈরোয়শিংনা মীশিং য়াম্লবা মীয়ামবু মতেং পাংনবা মাংদা থোরকখি। তোঙান-তোঙানবা সোসিএল ওর্গনাইজেসনশিংনা মতম অসিদা মীওই কয়াগী মতেং পাংখি।

মরুপশিং,

মীওইবা খুন্নাইগীদমক তৌখিবা অসিগুম্বা থবকশিং অসিনা মরম ওইদুনা ঙসি ভারতপু ফোর্স ওফ গ্লোবেল গুদ হায়না খঙনরি। খুদোংথিবা থোকপা খুদিংদা ভারতনা মতেং পাংনবা থোরকখি। খুদোংথিবা থোরকপা খুদিংদা ভারতনা মদু কোকহনখি। ঙসি ইন্তর্নেস্নেল সোলর এলাইন্সকী খুত্থাংদা সোলর ইনর্জী শীজিন্নবা হেনগৎলকপা ওইরবসু, ম্যুচুএল কোওপরেসনগী খুত্থাংদা দিজাস্তর রেজিলিএন্ত ইনফ্রাস্ত্রকচর শেম্বা ওইবদি, ইন্তর্নেস্নেল বিগ কেৎ এলাইন্স লমজিংবা ওইরবসু, ভারতনা তোঙান-তোঙানবা লৈবাকশিং পুনশিন্নবা লিপুন অমা ওইদুনা লাকখি। হন্দক্তা তর্কীদা অমাং অতা থোকহনখিবা য়ুহার হাবদা ভারতনা ওপরেসন দোস্তকী খুত্থাংদা মতেং পাংখি।

মরুপশিং,

ঙসি ভারত অমসুং ওস্ত্রেলিবাগী স্ত্রেতেজিক পার্তনরশিপ অসি হেন্না চেৎশিল্লি। হন্দক্তা ঐখোয়না ইকনোমিক কোওপরেসন এন্দ ত্রেদ এগ্রীমেন্ত ই.সি.তি.এ. খুৎয়েক পীখি। লৈবাক অসনিগী মরক্তা ত্রেদ অসি মথংগী চহি মঙাদা শরুক অনি হেন্না হেনগৎলগনি হায়না পান্নরি। হৌজিক ঐখোয়না কমপ্রিহেন্সিব ইকোনোমিক কোওপরেসন এগ্রীমেন্তদা থবক পাইখৎলি। ঐখোয়না মপাঙ্গল কনবা অমসুং থাজবা য়াবা সপ্লাই চেন শেমগৎলি। মসিনা লৈবাক অনিগী বিজিনেস্তা শাহৌ পীবা খক্তা নত্তনা মালেমনা অনৌবা থাজবা অমা ফংলগনি। ঙসি ভারত অমসুং ওস্ত্রেলিয়াগী মরক্তা দাইরেক্ত ফ্লাইৎ কয়া লৈরে। চহি কয়া অসিদা ফ্লাইৎশিংগী মশিংসু হেনগৎলকখি। মখোয়গী মশিং অসি লাক্কদৌরিবা নুমিৎশিংদা হেন্না হেনগৎলগনি। লৈবাক অনিমক্না অমনা অমগী দিগ্রীশিং শকখঙলি অমসুং মসিনা ঐখোয়গী মহৈরোয়শিংদা চাউনা কান্নবা পীগনি। মাইগ্রেসন এন্দ মোবিলিতী পার্তনরশিপ এগ্রীমেন্তদা য়ান্ন-ৱারোল অমসু পীনখি। মসিনা ঐখোয়গী স্কিল লৈবা প্রোফেস্নেলশিংবু ওস্ত্রেলিয়াদা লাকপা অমদি মফম অসিদা থবক শুবদা লাইহল্লি। মরুপশিং ঐহাক্না মফম অসিদা লাকপা অসিদা ৱাফম অমা লাউথোকচগে। ব্রিসবেন্দা লৈবা ইন্দিয়ন কম্ম্যুনিতিগী দিমান্দ অমা হৌজিক থুংহল্লগনি। অথুবদা ব্রিসবেন্দআ অনৌবা কন্সুলেৎ ওফ ইন্দিয়া হাংলগনি।

মরুপশিং,

ভারত অমসুং ওস্ত্রেলিয়াগী চেৎশিল্লক্লিবা পার্তনরশিপ অসিনা মা ভারতিদা থাজবা থম্বা মীপুম খুদিংমকপু শক্তি পীরগনি। নখোয়দা তেলেন্ত লৈ, নখোয়গী স্কিলশিংগী শক্তি নখোয়দা লৈ, নখোয়দা কলচরেল ভেল্যুশিং য়াওই। ভেল্যুশিং অসিনা ওস্ত্রেলিয়াগী মীয়ামগা লোয়ননা পুনবদা অচৌবা থৌদাং অমা লৌখি। ঐহাক্না ঙরাং পাপুৱা ন্যু গীদিদগী লাকখি। মফম অদুদা ঐহাক্না মখোয়গী লোলদা তামিল সহিতা তিরুক্কুরল  ফোঙখি। মসি ঐখোয়না মাপন্দা লৈজরবসু ঐখোয়গী হৌরকফমবু কাউথোক্তে হায়বগী খুদম অমনি। ওস্ত্রেলিয়াদা নখোয়না ভারতকী কলচরগী লৈনম শন্দোক্লি। অদোমনা ভারতকী কলচরেল এম্বেসেদর ওইরি। ভারতকী ব্রান্দ এম্বেসেদর ওইরি।

মরুপশিং,

ঐহাক্না ৱা ঙাংবা লোইশিন্দ্রিঙৈ মমাংদা ঐহাক্না নখোয়দা ৱাফম অমা হায়জনীংই। ঐহাক্না হায়নীংবদি নখোয়না ভারতকী মফম অমা হেক্তদা চৎপা মতমদা, নখোয়না ভারত্তা লাকপা মতমদা অদোমগী ওস্ত্রেলিয়াগী মরুপ অমা অমসুং মহাক্কী ইমুং মনুং পুদুনা লাকপীয়ু। মসিনা মখোয়দা ভারতকী মরমদা হেন্না খঙনবা খুদোংচাবা অমা ওঈগনি। মতম শাংলবা মতুংদা নখোয়গী উনবা ফংজরে। ময়াম ইশা-ইউ ফনা নুংঙাইনা লৈবীয়ু। ঐহাক্না ময়ামবু অমুক হন্না থাগৎচরি!

ঐহাক্কা লোয়ননা হায়বীয়ু ভারত মাতাকী জয়!

ভারত মাতাকী জয়!

ভারত মাতাকী জয়!

হন্না-হন্না থাগৎচরি!

*****