নমস্কাৰ!

উত্তৰাখণ্ডৰ ৰাজ্যপাল শ্ৰী গুৰমীত সিং জী, উত্তৰাখণ্ডৰ জনপ্ৰিয় মুখ্যমন্ত্ৰী শ্ৰী পুষ্কৰ সিং ধামী, ৰেলৱে মন্ত্ৰী অশ্বিনী বৈষ্ণৱ, উত্তৰাখণ্ড চৰকাৰৰ মন্ত্ৰী, বিভিন্ন সাংসদ, বিধায়ক, মেয়ৰ, জিলা পৰিষদৰ সদস্য, অন্যান্য বিশিষ্ট ব্যক্তি, আৰু উত্তৰাখণ্ডৰ মোৰ মৰমৰ ভাই-ভনীসকল! বন্দে ভাৰত এক্সপ্ৰেছ ৰেলৰ বাবে উত্তৰাখণ্ডৰ সকলো ৰাইজলৈ অশেষ অভিনন্দন জ্ঞাপন কৰিছো।

দিল্লী আৰু ডেৰাডুনৰ মাজৰ এই ৰেলখনে দেশৰ ৰাজধানীক দেৱভূমিৰ সৈতে অধিক গতিৰে সংযোগ কৰিব। এতিয়া এই বন্দে ভাৰত ৰেলৰ বাবে দিল্লী-ডেৰাডুনৰ মাজত যাত্ৰাৰ সময়ো যথেষ্ট হ্ৰাস পাব। এই ৰেলখনৰ গতিবেগৰ লগতে ইয়াত উপলব্ধ সুবিধাবোৰেও যাত্ৰা অধিক উপভোগ্য কৰি তুলিব।

বন্ধুসকল,

কেইঘণ্টামান আগতে মই তিনিখন দেশ ভ্ৰমণ কৰি দেশলৈ উভতি আহিছোহে মাত্ৰ। আজি সমগ্ৰ বিশ্বই ভাৰতৰ ফালে বহু আশাৰে চাই আছে। ভাৰতীয়সকলে যিদৰে আমাৰ অৰ্থনীতি শক্তিশালী কৰিছে, আমি যিদৰে দৰিদ্ৰতাৰ বিৰুদ্ধে যুঁজিছো, ই আমাৰ ওপৰত সমগ্ৰ বিশ্বৰ আস্থা জগাই তুলিছে। আমি একেলগে ক’ৰোনাৰ প্ৰত্যাহ্বান মোকাবিলা কৰাত সফল হ’লোঁ, আনহাতে বহু ডাঙৰ দেশে ইয়াৰ সৈতে যুঁজি আছে। আমি আৰম্ভ কৰিলোঁ বিশ্বৰ সৰ্ববৃহৎ টিকাকৰণ অভিযান। আজি সমগ্ৰ বিশ্বতে ভাৰতৰ চৰ্চা চলি আছে। সমগ্ৰ বিশ্বৰ মানুহে ভাৰত দৰ্শন কৰিবলৈ আৰু ইয়াক বুজিবলৈ ভাৰতলৈ আহিব বিচাৰে। এনে পৰিস্থিতিত উত্তৰাখণ্ডৰ দৰে সুন্দৰ ৰাজ্যৰ বাবে এয়া এক ডাঙৰ সুযোগ। এই সুযোগৰ সম্পূৰ্ণ সুবিধা লোৱাত উত্তৰাখণ্ডক সহায় কৰিবলৈ গৈ আছে এই বন্দে ভাৰত ৰেলে।

বন্ধুসকল,

উত্তৰাখণ্ড হৈছে দেৱভূমি। মনত আছে বাবা কেদাৰৰ ওচৰলৈ যাওঁতে মনৰ মাজত স্বতঃস্ফূৰ্তভাৱে কিবা এটা আওৰাইছিলোঁ। এইবোৰ বাবা কেদাৰৰ আশীৰ্বাদ আছিল আৰু মই তেতিয়াই কৈছিলোঁ যে এই দশকটোৱেই হ’ব উত্তৰাখণ্ডৰ দশক। আইন-শৃংখলাক সৰ্বোচ্চ কৰি ৰাখি উত্তৰাখণ্ডে যি ধৰণে উন্নয়নৰ অভিযান আগবঢ়াই নিছে, সেয়া প্ৰশংসনীয়। এই দেৱভূমিৰ পৰিচয় সংৰক্ষণ কৰাটোও গুৰুত্বপূৰ্ণ। আৰু এই দেৱভূমি অদূৰ ভৱিষ্যতে সমগ্ৰ বিশ্বৰ আধ্যাত্মিক চেতনাৰ কেন্দ্ৰবিন্দু হৈ পৰিব বুলি মোৰ বিশ্বাস আছে। এই সম্ভাৱনা অনুসৰিও আমি উত্তৰাখণ্ডৰ বিকাশ কৰিব লাগিব।

প্ৰতি বছৰে চৰ ধাম যাত্ৰালৈ অহা তীৰ্থযাত্ৰীৰ সংখ্যাই পূৰ্বৰ সকলো অভিলেখ ভংগ কৰি নতুন অভিলেখ গঢ়িবলৈ সক্ষম হৈছে। এই মুহূৰ্তত আমি দেখিবলৈ পাওঁ বাবা কেদাৰৰ দৰ্শন কৰিবলৈ ভক্তৰ ভিৰ। হৰিদ্বাৰত অনুষ্ঠিত কুম্ভ আৰু অৰ্ধ কুম্ভলৈ সমগ্ৰ বিশ্বৰ পৰা কোটি কোটি ভক্ত আহে। প্ৰতি বছৰে অনুষ্ঠিত হোৱা কাঁৱাৰ যাত্ৰাৰ সময়ত উত্তৰাখণ্ডত উপস্থিত হয় লাখ লাখ লোক। দেশৰ ভিতৰতে এনে বৃহৎ সংখ্যক ভক্তক আকৰ্ষণ কৰা ৰাজ্যৰ সংখ্যা অতি কম। এই সংখ্যক ভক্তৰ সংখ্যাও উপহাৰ আৰু ইমান বৃহৎ সংখ্যক ভক্ত চম্ভালিব পৰাটোও এক প্ৰত্যাহ্বানজনক কাম। এই কাম সহজ কৰি তুলিবলৈ ডাবল ইঞ্জিন চৰকাৰে দুগুণ গতি আৰু দুগুণ শক্তিৰে কাম কৰি আছে।

বিজেপি চৰকাৰে উন্নয়নৰ নৱৰত্নৰ ওপৰত বিশেষ গুৰুত্ব আৰোপ কৰিছে। প্ৰথমটো হ'ল ১৩০০ কোটি টকাৰ আনুমানিক ব্যয়সাপেক্ষে কেদাৰনাথ-বদ্ৰীনাথ ধামৰ পুনৰ নিৰ্মাণ, দ্বিতীয়টো হৈছে গৌৰীকুণ্ড-কেদাৰনাথ আৰু গোবিন্দঘাট-হেমকুন্ত চাহিবৰ ২৫০০ কোটি টকা ব্যয়েৰে নিৰ্মাণ কৰা ৰ'পৱেৰ কাম, তৃতীয়টো হ'ল কুমান গ্ৰেণ্ডৰ পৌৰাণিক মন্দিৰসমূহৰ উন্নয়নৰ বাবে মনস্কন্দ মন্দিৰ মালা মিছন, চতুৰ্থটো হৈছে সমগ্ৰ ৰাজ্যত থকা হোম ষ্টে ব্যৱস্থাৰ প্ৰচাৰ। মোক কোৱা হৈছে যে ৰাজ্যখনত ৪০০০ তকৈও অধিক ঘৰৰ আৱাস পঞ্জীয়ন কৰা হৈছে। পঞ্চমটো হৈছে ১৬টা পৰিৱেশ-পৰ্যটন গন্তব্যস্থানৰ বিকাশ, ষষ্ঠটো হৈছে উত্তৰাখণ্ডত স্বাস্থ্য সেৱাৰ সম্প্ৰসাৰণ। উধম সিং নগৰতো এইমছৰ এটা চেটেলাইট চেণ্টাৰ নিৰ্মাণৰ কাম চলি আছে। সপ্তমটো হৈছে প্ৰায় ২০০০ কোটি টকা ব্যয় সাপেক্ষে তেহৰী হ্ৰদ উন্নয়ন প্ৰকল্প, অষ্টমটো হৈছে ঋষিকেশ-হৰিদ্বাৰক দুঃসাহসিক পৰ্যটন আৰু যোগৰ ৰাজধানী হিচাপে বিকশিত কৰা আৰু নৱমটো হৈছে তনকপুৰ-বাগেশ্বৰ ৰেল লাইন। এই ৰেলপথৰ কামো শীঘ্ৰে আৰম্ভ হ’ব। ১২,০০০ কোটি টকাৰ চৰ ধাম মেগা প্ৰকল্পৰ কাম দ্ৰুত গতিত চলি আছে। দিল্লী-ডেৰাডুন এক্সপ্ৰেছৱে সম্পূৰ্ণ হোৱাৰ লগে লগে ডেৰাডুন আৰু দিল্লীৰ মাজৰ যাত্ৰা সহজ হৈ পৰিব। পথ সংযোগৰ লগতে উত্তৰাখণ্ডত ৰ'পৱে সংযোগো বৃহৎ পৰিসৰত বিকশিত কৰা হৈছে। পৰ্বত মালা যোজনাই অদূৰ ভৱিষ্যতে উত্তৰাখণ্ডৰ ভাগ্য সলনি কৰিবলৈ গৈ আছে। ইয়াৰ বাবে আমাৰ চৰকাৰে বছৰ বছৰ ধৰি এই সংযোগৰ বাবে উত্তৰাখণ্ডৰ জনসাধাৰণৰ অপেক্ষাৰ অৱসান ঘটাইছে।

হৃষীকেশ-কৰ্ণপ্ৰয়াগ ৰে'ল প্ৰকল্পটো দুই-তিনি বছৰৰ ভিতৰত সম্পূৰ্ণ হ'ব। এই প্ৰকল্পটোত ১৬,০০০ কোটি টকাতকৈও অধিক ব্যয় কৰা হৈছে। হৃষীকেশ কৰ্ণপ্ৰয়াগ ৰে'ল প্ৰকল্প সম্পূৰ্ণ হোৱাৰ পিছত, উত্তৰাখণ্ডৰ এক বৃহৎ অংশ ৰাজ্যখনৰ জনসাধাৰণ আৰু পৰ্যটকসকলৰ বাবে উপলব্ধ হ'ব। ইয়াৰ ফলস্বৰূপে ইয়াত বিনিয়োগ, উদ্যোগৰ বিকাশ আৰু নিযুক্তিৰ বাবে নতুন সুযোগ সৃষ্টি কৰা হ'ব। আৰু দেৱভূমিৰ উন্নয়নৰ এই বিশাল অভিযানৰ মাজতে এই বন্দে ভাৰত ৰে'লখন উত্তৰাখণ্ডৰ জনসাধাৰণৰ বাবে এক বিশাল উপহাৰ হিচাপে প্ৰমাণিত হ'ব।

বন্ধুসকল,

আজি উত্তৰাখণ্ড ৰাজ্য চৰকাৰৰ প্ৰচেষ্টাত এক পৰ্যটন কেন্দ্ৰ, দুঃসাহসিক পৰ্যটন কেন্দ্ৰ, চলচ্চিত্ৰ শ্বুটিং গন্তব্য স্থান আৰু বিবাহৰ গন্তব্য স্থান হিচাপে দ্ৰুতগতিত বিকশিত হৈছে। আজি উত্তৰাখণ্ডৰ নতুন ঠাই আৰু পৰ্যটন কেন্দ্ৰই ভাৰত আৰু বিদেশৰ পৰ্যটকসকলক আকৰ্ষিত কৰিছে। তেওঁলোকে বন্দে ভাৰত ৰেলৰ পৰাও যথেষ্ট সহায় পাব। এতিয়া বন্দে ভাৰত ৰেলসমূহ দেশৰ প্ৰতিটো কোণত চলিবলৈ আৰম্ভ কৰিছে। পৰিয়ালৰ সৈতে দীঘলীয়া দূৰত্ব ভ্ৰমণ কৰিব বিচৰা লোকসকলৰ ৰেলহৈছে প্ৰথম পছন্দ। এনে পৰিস্থিতিত, বন্দে ভাৰত এতিয়া ভাৰতৰ সাধাৰণ পৰিয়ালৰ প্ৰথম পছন্দ হৈ পৰিছে।

ভাই-ভনীসকল,

একবিংশ শতিকাৰ ভাৰতৰ আন্তঃগাঁথনি আধুনিকীকৰণ কৰি অধিক ক্ষীপ্ৰতাৰে বিকশিত হ’ব পাৰে। আগতে বহুদিন ক্ষমতাত থকা দলবোৰে দেশৰ এই প্ৰয়োজনীয়তা কেতিয়াও বুজি পোৱা নাছিল। সেই দলসমূহৰ কেন্দ্ৰবিন্দু আছিল কেলেংকাৰী আৰু দুৰ্নীতি। তেওঁলোক আত্মীয়তাবাদৰ মাজতে আবদ্ধ হৈ আছিল। পৰিয়ালবাদৰ পৰা ওলাই আহিবলৈ তেওঁলোকৰ শক্তি নাছিল। পূৰ্বৰ চৰকাৰসমূহেও ভাৰতৰ তীব্ৰবেগী ৰে’লৰ সন্দৰ্ভত উচ্চ দাবী উত্থাপন কৰিছিল। তেওঁলোকে এই দাবী কৰা বহু বছৰ পাৰ হৈ গ’ল। তীব্ৰবেগী ৰে’লবোৰ বাদ দিয়ক; আনকি তেওঁলোকে ৰেল নেটৱৰ্কৰ পৰা মানৱবিহীন লেভেল ক্ৰছিং আঁতৰাব পৰা নাছিল। ৰেলৱেৰ বিদ্যুৎকৰণৰ পৰিস্থিতি আৰু ভয়াৱহ হৈ পৰিছিল। ২০১৪ চনলৈকে দেশৰ ৰেল নেটৱৰ্কৰ এক তৃতীয়াংশহে বিদ্যুৎ সংযোগ হৈছিল। এনে পৰিস্থিতিত বেগী ৰে’ল চলোৱাৰ কথাও ভাবিব পৰা নাছিল। আমি ২০১৪ চনৰ পিছত ৰে’লৱেৰ ৰূপান্তৰৰ বাবে সৰ্বাংগীন কাম আৰম্ভ কৰিলোঁ।এফালে আমি দেশৰ প্ৰথমখন তীব্ৰবেগী ৰে’লৰ সপোন কাৰ্যকৰী কৰিবলৈ আৰম্ভ কৰিলোঁ, আনফালে আমি সমগ্ৰ দেশক অৰ্ধ-উচ্চবেগী ৰে’লৰ বাবে প্ৰস্তুত কৰিবলৈ আৰম্ভ কৰিলোঁ। ২০১৪ চনৰ আগতে যেতিয়া গড়ে প্ৰতি বছৰে ৬০০ কিলোমিটাৰ ৰেল লাইনত বিদ্যুৎ সংযোগ কৰা হৈছিল, এতিয়া প্ৰতি বছৰে ৬,০০০ কিলোমিটাৰ ৰেল লাইনত বিদ্যুৎ সংযোগ কৰা হৈছে। ৬০০ কিলোমিটাৰ আৰু ৬০০০ কিলোমিটাৰৰ মাজৰ পাৰ্থক্য চাওক। ফলত দেশৰ ৯০ শতাংশতকৈও অধিক ৰে’ল নেটৱৰ্কত বিদ্যুৎ সংযোগ হৈছে। উত্তৰাখণ্ডত সমগ্ৰ ৰেল নেটৱৰ্কৰ ১০০ শতাংশ বিদ্যুৎকৰণ সম্ভৱ হৈছে।

ভাই-ভনীসকল,

এইটো সম্ভৱ হৈছে কাৰণ আজি উন্নয়ন, নীতি আৰু বিশ্বাসৰ সঠিক উদ্দেশ্য আছে। ২০১৪ চনৰ তুলনাত ৰে’ল বাজেট বৃদ্ধিয়ে উত্তৰাখণ্ডকো প্ৰত্যক্ষভাৱে লাভৱান কৰিছে। ২০১৪ চনৰ আগৰ পাঁচ বছৰত গড়ে উত্তৰাখণ্ডৰ বাবে ২০০ কোটিতকৈও কম টকা আবণ্টন দিয়া হৈছিল। অলপ আগতে অশ্বিনী জীয়ে ইয়াৰ বিষয়ে বিতংভাৱে বুজাই দিলে। এনে দুৰ্গম পাহাৰীয়া অঞ্চল আৰু ৰেলপথৰ বাবে ২০০ কোটি টকাতকৈও কম! উত্তৰাখণ্ডৰ ৰে’ল বাজেট চলিত বৰ্ষত ৫ হাজাৰ কোটি টকা। ই ২৫গুণ বেছি। এই কাৰণেই আজি উত্তৰাখণ্ডৰ নতুন নতুন অঞ্চললৈ ৰেলপথৰ সম্প্ৰসাৰণ ঘটিছে। কেৱল ৰেলপথেই নহয়, আধুনিক ঘাইপথৰো উত্তৰাখণ্ডত অভূতপূৰ্ব সম্প্ৰসাৰণ ঘটিছে। উত্তৰাখণ্ডৰ দৰে পাহাৰীয়া ৰাজ্যৰ বাবে এই সংযোগ কিমান গুৰুত্বপূৰ্ণ আমি বুজি পাওঁ। অতীতত সংযোগৰ অভাৱত গাঁওবোৰ কেনেকৈ জনশূন্য হৈ পৰিছিল তাৰ বেদনা আমি বুজি পাওঁ। আমি আগন্তুক প্ৰজন্মক সেই দুখ-কষ্টৰ পৰা উদ্ধাৰ কৰিব বিচাৰো। আমি আজি কঠোৰ পৰিশ্ৰম কৰিছো যাতে উত্তৰাখণ্ডতেই পৰ্যটন, কৃষি আৰু উদ্যোগৰ জৰিয়তে কৰ্মসংস্থাপনৰ সুযোগ সৃষ্টি হয়। আমাৰ সীমান্তলৈ সহজে প্ৰৱেশ আৰু জাতি ৰক্ষাৰ কামত নিয়োজিত আমাৰ সৈনিকসকলৰ সুবিধাৰ বাবেও এই আধুনিক সংযোগ অতি উপযোগী হ’ব।

ভাই-ভনীসকল,

আমাৰ ডাবল ইঞ্জিনৰ চৰকাৰ উত্তৰাখণ্ডৰ উন্নয়নৰ বাবে দায়বদ্ধ। উত্তৰাখণ্ডৰ দ্রুত উন্নয়নে ভাৰতৰ দ্রুত উন্নয়নতো সহায় কৰিব৷ দেশে এতিয়া কোনো পৰিস্থিতিত থমকি নৰয়৷ সমগ্ৰ দেশ বন্দে ভাৰতৰ গতিৰে আগবাঢ়িছে আৰু আগুৱাই যাব। পুনৰবাৰ উত্তৰাখণ্ডৰ প্ৰথমখন বন্দে ভাৰত এক্সপ্ৰেছ ৰেলৰ বাবে আপোনালোক সকলোকে আন্তৰিক অভিনন্দন আৰু শুভেচ্ছা জ্ঞাপন কৰিলোঁ। আৰু আজিকালি দেশৰ বিভিন্ন প্ৰান্তৰ পৰা বাবা কেদাৰ, বদ্ৰী বিশাল, যমুনোত্ৰী আৰু গংগোত্ৰী দৰ্শন কৰি আহিছে। একে সময়তে বন্দে ভাৰত এক্সপ্ৰেছ মুকলি কৰাটো তেওঁলোকৰ বাবেও অতি সুখকৰ অভিজ্ঞতা হ’ব। আকৌ এবাৰ বাবা কেদাৰৰ চৰণত প্ৰণাম কৰি দেৱভূমিক শুভেচ্ছা জনাই আপোনালোকলৈ আন্তৰিক শুভেচ্ছা জনালোঁ। ধন্যবাদ!

***