ইনফোর্মেসন অমসুং ব্রোদকাস্তিং মন্ত্রালয়
নুপীগী মতিক ফুদোরক্লি: দোক্তর এল. মুরুগন
নুপীশিং হান্ননা তরং তরংনা ঙাল্লি অমদি মখা তানা ঙানখিগনি: দোক্র এল. মুরুগন
Posted On:
19 MAY 2023 5:30PM by PIB Imphal
হৌজিক চত্থরিবা কেন্স ফিল্ম ফেস্তিবেলগী ইন্দিয়া পেভিলিয়নগী ৪নি চনবা নুমিৎ মেদিয়া অমদি এন্তরতেন্মেন্তকী লমদা নুপীশিংগা লৌরিবা শক্লোন হায়বা হীরমদা মতিক লৈবা সেসন অমা পাঙথোক্তুনা হৌখি। ‘সি সাইন্স’ হায়না মরম চানা মিংথোনবা সেসন অদু এক্তর প্রদ্যুসর খুস্বু সুন্দরনা ৱাতেম্লগা এক্তর ইসা গুপ্তা, গ্রীক-অমেরিকান দাইরেক্তর দাফনে স্কমোন লোয়ননা নুপীদা য়ুম্ফম ওইবা ফিল্মশিং পুথোকপগীদমক মমিং চৎপা ফিল্মমেকর মধুর ভন্দারকর অমদি সুধির মিস্রানা স্পীকর ওইনা শরুক য়াখি।
ৱারী ৱাতায় অদু হৌদোক্লদুনা “নুপীশিংনা এক্তরখক্তা নত্তনা প্রদ্যুসর, দাইরেক্তর অমদি তেক্নিসিয়ন ওইনা সিনেমাদা মরুওইবা শক্লোন লৌদুনা ভারতকী সিনেমানা মশক মচু থোক্লবা তাঙ্কক অমদা চৎলি,” হায়না ভেতেরন খুসবু সুন্দরনা হায়খি।
![](https://static.pib.gov.in/WriteReadData/userfiles/image/image001F1CD.jpg)
“নুপী অমনা ফিল্মগী হিরো ওইবা মতমদা ফন্দ খোমগৎপা ৱায়, অদুবু ঐগীদমক্তদি লাইবক ফবনা বোক্স ওফিসতা নীংথিনা পর্ফোর্ম তৌবা ফিল্মশিং পুথোকপা ঙম্লি, নেস্নেল এৱার্দশিংসু ফংলি। নুপীদা য়ুম্ফম ওইবা ফিল্মশিংদা অদোম্না পাম্বা বজেৎ ফংবা ঙমদে অদুবু মদু মালেম পুম্বদা থেংনরিবা ফীভম্নি,” হায়না নুপীগী মতিক্কা লোয়নবা ক্রিএতিব ইকনমীগী মতাঙদা ৱা ঙাঙলদুনা ভন্দারকরনা হায়খি।
অদু ওইরবদি করিগীদমক খুদোংথিবা অদু মায়োং য়ারিবনো? হায়না হংলকপদা, ভন্দারকরনা “ঐ মখোয়গী (নুপীগী) মীৎয়েঙদগী ফিল্ম পুথোকপদা নুংঙাইজবা ফাওই। মসিনা ৱারীদুদা তোঙানবা মীৎয়েঙ অমা পী” হায়খি।
“ঐনা চান্দনি বার পুদুনা প্রদ্যুসরগী মনাক্তা চৎপা মতমদা, মীয়াম্না মদুদা শেল থাদবা পাম্লমদে। মতমদুদা ঐনা ত্রিশক্তী কৌবা হিরো মশিং য়াম্না য়াওবা ফিল্ম অমা পুথোকপা তাখি। ফিল্ম অদু ফজবা ওইখিদে। অদুদগী ঐনা চান্দনি বার পুথোক্লগে হায়না ফিরেপ লৌখি অমদি মমৈথংদা প্রদ্যুসর অমা ফংখি। লাইবক ফবনা চান্দনি বার কম্মর্সিএল ওইনা অমদি ক্রিতিকেল ওইনা মীয়াম্না পাম্নখি। ঐনা খনবদা মদুনা ঐঙোন্দা নুপীনা ঐগী সেন্ত্রেল করেক্তর ওইবা মুভী হেন্না পুথোক্নবা থৌনা হাপখি। মসি ওইদুনসু ঙসি ফাওবা, মীয়াম্না ঐঙোন্দা করিগুম্বা ঐনা হিরো অমগা লোয়ননা ফিল্ম পুথোক্লবদি ঐনা ফংলিবা ফিল্মগী বজেৎ হেনগৎলক্কনি হায়রি। অদুবু ঐদি ঐনা পুথোক্লিবা সিনেমা মখলশিং অসি পুথোকপদা নুংঙাইবা ফাওরি। অদুবু হৌজিক্তি ফীভম হোংলক্লি, মরুওইনা ও.তি.তি.দা, মসিনা মীপুম খুদিংমকপু খুদোংথিবা মায়োং য়ানবগী তাঞ্জা পীরি,” হায়না মহাক্না হায়খি।
“চহি অসিদা ঐ ইন্দস্ত্রী অসিদা লৈরকপা দেকেদ অমা ফারে অমদি ২০১৯ ফাওবদা ফিল্ম অমদা মরুওইবা রোল অমা ফংবা হায়বসি ঐগী মঙলান অমা অদুমক ওইদুনা লাকখি। ঐখোয়না অনুপম খের অমদি কুমুদ মিস্রাগা লোয়ননা ঐনা নুপী পুলিস অমা ওইনা সেন্ত্রেল করেক্তর লৌবা ফিল্ম অমা পুথোক্নবা হোৎনরম্মি, অদুবু ফিল্ম অদুগী ফন্দ ফংবা য়াম্না ৱাআরম্মি। ফিল্ম অদুনা থিএতর য়ৌরকপদা, নীংথিনা পাম্নবা ওইখিদে, অদুবু নেতফ্লিকতা য়ৌরকপদদি মদুবু পাক শন্না য়েংনখি। মসিনা অয়েংবা মীওইশিংনা নুপীগী ওইবা ৱারীশিং য়েংবা পাম্মি হায়বা উৎলি। হৌজিক্তি ফীভম হোংলক্লে অদুবু ঐখোয়না ঐখোয়গী ৱারীদা থাজবা দাইরেক্তর মশিং হেন্না মথৌ তারি,” হায়না ইসা গুপ্তনা মহাক্না থেংনরকপশিং পাউদম্লদুনা হায়খি।
“মুভী য়েংবা চৎলিবা মীওইশিংগী মনুংদা চাদা ৫১ দি নুপীশিংনি হায়বসি খঙজিনবা মরুওই। ঐখোয়না ঐখোয়গী ৱারীশিং স্ক্রীন্দা য়েংবা মথৌ তাই। ঐখোয়না মাঙজিন থাবা মফমশিংদা নুপী দাইরেক্তর অমদি এক্তরশিংদা মীৎয়েঙ থম্বা মথৌ তাই। ঐখোয়না চহি খুদিংগী নুপী ১০রোম খনগত্তুনা মখোয়গী ফিল্মশিংগীদমক শেল ফংহনবদা মতেং পাংলি। ঐখোয়না নুপা অমসুং নুপীবু আর্তিস্ত ওইনা চপ মান্নবা মীৎয়েঙদা য়েংবা মরুওই,” হায়না স্রুতি হসনগা লোয়ননা ‘দি আই’ হায়বা ফিল্ম দাইরেক্ত তৌখিবা দাফনে স্কমোন্না ফোঙদোকখি।
“ৱন্দর ৱুমেনগী মশিং (বোক্স ওফিস কল্লেক্সন) অসিনা করিগুম্বা ফিলম অমা নীংথিনা পুথোক্লবদি, নুপী অমনা মরুওইবা করেক্তর লৌরবসু মদু নীংথিনা চৎকনি হায়বা উৎলি। অসিগুম্বা ফিল্মশিং ঐখোয়না মার্কেৎ তৌবসু মথৌ তাই,” হায়না স্কমোন্না মখা তাখি।
প্রদ্যুসরশিংনা মখোয়না ফিল্মদা হিরো অমা পাম্লকপদা কমদৌনা অফবা ওপনিং অমা মখোয়না পাম্বগে হায়বগী মতাঙদা ভন্দারকরনা ঙাঙলকপদা, ফিল্ম ফেস্তিবেল অসি শরুক য়াদুনা ফ্রেন্স রিবেরাদা য়াওরিবা ফিল্মমেকর সুধির মিস্রানা ৱারী অদুদা শরুক য়াদুনা, “হৌজিক্তি কনাগুম্বা অমত্তনা বোক্স ওফিস ওপনিং অমত্তবু পীদ্রে” হায়খি।
“অয়েংবশিংসু হোংলক্লি। মখোয়না ফিল্মশিং ও.তি.তি. দা থাদোরকপা ঙাইনরি। ইন্দস্ত্রী অসিগী ফীভম খোঙলৈ থুনা হোংলক্লি। করিগুম্বা ঐখোয়না ফিল্মগী সেত অমদা চৎপদা, ক্রুগী চাদা ৫০দি নুপীশিংনা ওইরি। ঐ নুপী ফিল্মমেকর মশিং হেন্না লৈরকপা পাম্মি অমদি মকোয়না ঐখোয়গী (নুপাশিংগী) মীৎয়েঙদগী ৱারী লিরকপসু পাম্মি।”
“ফ্রান্স অসি ঐনা খনবদা নুপাশিংদগী নহা ওইবা নুপী দাইরেক্তর মশিং হেন্না লৈবা লৈবাক অমনি খল্লি। তপ্না তপ্না ফীভমশিং হোংলক্লি, ঐখোয়গীদসু জোয়া অমদি রীমা লৈরি অমদি খারোমদা অতৈ কয়া অমসু লৈরি। ঐখোয় মাঙদা চঙশিনগদবা য়াম্না ৱাৎলি, অদুবু ঐখোয় খুমাঙদি চাওশিল্লি,” হায়না মহাক্না মখা তাখি।
তোঙান তোঙানবা লমশিংদা নুপীশিংগী মপাঙ্গল হাপ্নবগীদমক কমদৌনা লৈঙাক্না থৌদাং য়ারিবগে হায়বগী মতাঙদা ৱা ঙাঙলদুনা, ভারত লৈঙাক্কী ইনফোর্মেসন অমদি ব্রোদকাস্তিং মন্ত্রালয়গী ইকায়খুম্নরবা রাজ্য মন্ত্রী, দোক্তর এল. মুরুগন্না, “সিনামেদা নুপীশিংনা তরং তরংবা মঙাল ফুদোক্লি অমদি মখা তানা তরং তরং ঙানখিগনি। ঐদি সিনেমাবু নুপাদা নৎত্রগা নুপীদা য়ুম্ফম ওইবা সিনেমা ওইনা উদে। নুপীনা মরুওইবা করেক্তর লৌবা মগলির মত্তুম (নুপীশিংখক্তমক) কৌবা তামিল ফিল্ম অমা লৈ অমদি মসি ফজনা চৎখি। ভিদ্যা বলন ফজনা থবক তৌরি। নুপীশিংনা থেংনরিবা ৱাফমশিংদা মীৎয়েঙ থম্বা পেদমেন্নচিংবা ফিল্মশিং লৈরি। নুপী ক্রিএতরশিংদা কত্থোকদা সি সোর্ত ফিল্ম ফেস্তিবেল কৌবা ফিল্ম ফেস্তিবেল অমা লৈরি, ঐস্বর্য়া সুন্দরনা নেস্নেল এৱার্দ ফংবা এনিমেসন ফিল্ম অমা পুথোকখি অমদি গুনীৎনা ওস্কার অমা ফংখি। ঐনা খনবদা সিনেমাগী লমদা ঐখোয়গী নুপীশিংনা মায় পাক্না ফজরবা মফম কল্লি খল্লি।
ইকায়খুম্নরবা প্রধান মন্ত্রী নরেন্দ্র মোদীগী মখাদা নুপীগী মতিক ফুদোরক্লি।”
দোক্তর মুরুগন্না ফিল্ম ইন্দস্ত্রীদা লৈরিবা নুপী ক্রিএতর অমদি তেক্নিসিয়ন ১০০ হেনববু এন.দি.এফ.সি.না ত্রেন তৌরিবা হায়বগী মতাঙদা ৱাফম কয়া ফোঙদোকখি অমদি ৭৫ ক্রিএতিব মাইন্দ্স ওফ তুমোরো হায়রিবা থৌরাং অসিদা চহি অসিগী ওইনা নুপীগী মশিং চাদা ৭০ হেন্না য়াওরি হায়খি।
“লৈঙাক্না নুপীগী মতিক্তা কত্থোকপা স্কীম কয়ামরুম পায়খৎলি,” হায়বা ৱাফম ফোঙদোক্তুনা মহাক্কী ৱারোল লোইশিনখি।
![](https://static.pib.gov.in/WriteReadData/userfiles/image/image002ZNJS.jpg)
******
(Release ID: 1926613)
Visitor Counter : 111