প্রধানমন্ত্রীগী লোইশঙ
মে ১১দা নিউ দিল্লিদা প্রধান মন্ত্রীনা নেসনেল তেক্নোলোজি দে ২০২৩গী থৌরম হৌদোকখ্রে
লুপা করোর ৫৮০০ হেনবগী তোঙান-তোঙানবা সাইন্তিফিক প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে
হোমি ভাভা কেন্সর হোস্পিতাল এন্দ রিছার্স সেন্তর, ভিশাখাপত্নম অমসুং ৱুমেন এন্দ চিন্দ্রেন কেন্সর হোস্পিতাল বিল্দিং, নবি মুম্বাই মীয়ামদা কৎথোকখ্রে
নেসনেল হেদ্রোন বিম থেরাপি ফেসিলিতি অমসুং রেদিওলোজিকেল রিছার্স য়ুনিত, নবি মুম্বাই মীয়ামদা কৎথোকখ্রে
ফিজন মোলিবদেনম-৯৯ প্রদক্সন ফেসিলিতি, মুম্বাই অমসুং রিয়ার আর্থ পর্মনেন্ত মেগ্নেত প্লান্ত, ভিশাখাপত্নম মীয়ামদা কৎথোকখ্রে
হোমি ভাভা কেন্সর হোস্পিতাল এন্দ রিছার্স সেন্তর, জাতনি, তাতা মেমোরিএল হোস্পিতাল,মুম্বাইগী প্লাতিনম জুব্লি ব্লোক শানবা উরেপ-উয়ুং তমখ্রে
লেজর ইন্তরফেরোমিতর গ্রেভিতেসনেল-ৱেব ওবজার্বেতোরি ইন্দিয়া(লিগো-ইন্দিয়া)গী উরেপ-উয়ুং তমখ্রে
২৫শুবা নেসনেল তেক্নোলোজি দেদা কম্মেমোরেতিপ স্তাম্প অমসুং শেনয়েক ফোঙখ্রে
“ভারতনা মাইপাক্না নিউক্লিয়ার চাংয়েং তৌখিবগী মতাংদা অতল জিনা লাউথোকখিবা নুমিৎ অদু ঐ কৈদৌঙৈদা কাউবা ঙম্লোই”
“অতল জিগী ৱাহৈশিংদা, ঐখোয় কৈদৌঙৈদা ঐখোয়গী খোঙচৎ লেপ্লোই অমসুং ঐখোয়গী লম্বীদা থেংনবা শিংনবা অমতা কৈদৌঙৈদা নোঞ্জ
Posted On:
11 MAY 2023 12:57PM by PIB Imphal
ঙসি নিউ দিল্লিদা প্রগাতি মৈদান্দা প্রধান মন্ত্রী শ্রী নরেন্দ্র মোদীনা নেসনেল তেক্নোলোজি দে ২০২৩গী থৌরম হৌদোকখ্রে। থৌরম অসিদা মে ১১দগী মে ১৪ ফাওবা পাংথোক্কদবা নেসনেল তেক্নোলোজি দে চহি ২৫ মপুংফারকপগী থৌরমসু হৌদোকখি। মরুওইবা থৌরম অসিদা, প্রধান মন্ত্রীনা লৈবাক অসিদা সাইন্তিফিক অমসুং তেক্নোলোজি চাউখৎহন্নবা লুপা করোর ৫৮০০ হেনবগী তোঙান-তোঙানবা সাইন্তিফিক প্রোজেকশিং উরেপ-উয়ুং তমখি অমসুং মীয়ামদা কৎথোকখি। মসি লৈবাক অসিদা সাইন্তিফিক ইন্সতিতুসনশিং মপাঙ্গল কনখৎহন্দুনা প্রধান মন্ত্রীগী অত্মানির্ভর ভারতকী মঙলান মঙফাওন্নবা পায়খৎপনি।
উরেপ-উয়ুং তমগদৌরিবা প্রোজেকশিংগী মনুংদা লেজর ইন্তরফেরোমিতর গ্রেভিতেসনেল ৱেব ওজার্বেতোরি-ইন্দিয়া(লিগো-ইন্দিয়া),হিঙ্গোলি; হোমি ভাবা কেন্সর হোস্পিতাল এন্দ রিছার্স সেন্তর, জাতনি, ওরিসা অমসুং তাতা মেমোরিএল হোস্পিতাল, মুম্বাইগী প্লাতিনম জুব্লি ব্লোক য়াওরি।
লৈবাক্কী মীয়ামদা কৎথোক্কদবা প্রোজেকশিংগী মনুংদা ফিজন মোলিবদেনম-৯৯ প্রদক্সন ফেসিলিতি, মুম্বাই; রিয়ার আর্থ পর্মনেন্ত মেগ্নেত প্লান্ত, ভিশাখাপত্নম; নেসনেল হেদ্রোন বিম থেরাপি ফেসিলিতি,নবি মুম্বাই; রেদিওলোজিকেল রিছার্স য়ুনিত, নবি মুম্বাই; হোমি ভাবা কেন্সর হোস্পিতাল এন্দ রিছার্স সেন্তর, ভিশাখাপত্নম; অমসুং ৱুমেন এন্দ চিন্দ্রেন কেন্দর হোস্পিতাল বিল্দিং, নবি মুম্বাই য়াওরি।
থৌরম মনুংদা, হৌখিবা চহি খর অসিদা সাইন্স অমসুং তেক্নোলোজিগী লমদা ভারতকী খুমাংচাউশিনবগী উৎপা এক্সপো অমা প্রধান মন্ত্রীনা হৌদোকখি অমসুং য়েংখি। মহাক্না থৌরম অদুদা কম্মেমোরেতিপ স্তাম্প অমা অমসুং শেনয়েক অমা ফোঙখি।
থৌরম অদুদা প্রধান মন্ত্রীনা হায়খি মে ১১ অসি ভারতকী পুৱারিদা খ্বাইদগী মরুওইবা নুমিৎশিংগী মনুংদা নুমিৎ অমনি। ভারতকী সাইন্তিস্তশিংনা পোখ্রান্দা অচৌবা মাইপাকপা অমা পাংথোকপা ঙমদুনা লৈবাক অসি চাউথোকচবা পোকহনখিবা নুমিৎ অদু নিংশিংবা ওইনা ঙসি নুমিৎ অসি পাংথোকপনি। ভারতনা মাইপাক্না নিউক্লিয়ার চাংয়েং তৌখিবগী মতাংদা অতল জিনা লাউথোকখিবা নুমিৎ অদু ঐ কৈদৌঙৈদা কাউবা ঙম্লোই। পোখ্রানগী নিউক্লিয়ার চাংয়েং অসিনা ভারতকী সাইন্সকী তৌবা ঙম্বশিং উৎপা খক নত্তনা মালেমদা লৈবাক অসিগী থাক ৱাখৎহনখি। ঐখোয় কৈদৌঙৈদা ঐখোয়গী খোঙচৎ লেপ্লোই অমসুং ঐখোয়গী লম্বীদা থেংনবা শিংনবা অমতা কৈদৌঙৈদা নোঞ্জরোই হায়না অতল জিনা ফোঙদোক্লমখি। নেসনেল তেক্নোলোজি দে থৌরমদা প্রধান মন্ত্রীনা লৈবাক অসিগী মীওই খুদিংমক্তা য়াইফ-পাউজেল পীখি।
প্রধান মন্ত্রীনা হায়খি ঙসি শঙ্গারিবা প্রোজেকশিং অসিনা লৈবাক অসিদা নিউক্লিয়ার তেক্নোলোজি চাউখৎহনবদা মতেং পাংগনি। লিগো-ইন্দিয়া অসি ২১শুবা চহিচাদা সাইন্স অমসুং তেক্নোলোজিগী খ্বাইদগী ফবা থবকশিংগী মনুংদা অমনি। ওজার্বেতোরি অসিনা মহৈরোয়শিং অমসুং সাইন্তিস্তশিংদা থিজিনবগী অনৌবা খুদোংচাবশিং পীরগনি।
প্রধান মন্ত্রীনা হায়খি অমৃত কালগী অহৌবা তাঙ্কক অসিদা, ২০৪৭গী পান্দমশিং ঐখোয়গী মাঙদা নাখৈ শেংনা লৈরে। ঐখোয়না লৈবাক অসি চাউখৎপা অমসুং অত্মানির্ভর ওইহনগদবনি। খোঙথাং খুদিংমক্তা তেক্নোলোজি য়াম্না মরুওই অমসুং হিরম অসিগী মতাংদা ভারতনা ৩৬০-দিগ্রিদা থবক পায়খৎলি। তেক্নোলোজি অসি লৈবাক চাউখৎনবা খুৎলায় অমনি, মসি অকন-অরিং শিংনবা পাম্বৈ অমা নত্তে হায়না ভারতনা খল্লি।
ঙসিগী থৌরম অসিগী থিম ‘স্কুলদগী স্তার্দঅপশিং ফাওবদা-অনৌবা পুথোক্নবা নহারোলশিংগী ৱাখলদা মঙাল পীবা’ হায়রিবা অসি থাগৎলদুনা প্রধান মন্ত্রীনা হায়খি ঙসিগী নহারোলশিংনা ভারতকী তুংগী মরাইবক লেপকনি। ঙসিগী অঙাংশিং অমসুং নহারোলগী পামজবা, মপাঙ্গল অমসুং থৌনা অসি ভারতকী অচৌবা মপাঙ্গলনি। দোক্তর এ.পি.জে অব্দুল কলামগী ৱাহৈ লৌখৎলদুনা, প্রধান মন্ত্রীনা হায়খি ভারত অসি লৌশিংগী খুন্নাই অমা ওইনা চাউখৎলক্লি। নহারোলশিংগী ৱাখলদা মঙাল অমা পীনবা হৌখিবা চহি ৯ অসিদা লৈবাক অসিদা অকনবা য়ুম্ফম থোল্লে।
প্রধান মন্ত্রীনা হায়খি জিলা ৭০০দা লৈরিবা অতল তিঙ্করিং লেব লিশিং ১০ হেনবা অসি ইন্নোবেসন নর্সরিশিং ওইরে। হায়রিবা লেবশিং অসিগী চাদা ৬০ সরকার অমসুং খুঙ্গংগী স্কুলশিংদা লৈরি। অতল তিঙ্করিং লেবশিংদা মহৈরোয় লাখ ৭৫ হেনবনা অনৌবা প্রোজেক লাখ ১২ হেনবদা কন্না থবক তৌরি। মসি স্কুলশিংদগী নহা ওইরিবা সাইন্তিস্তশিং থোরকপগী খুদম অমনি অমসুং মখোয়গী অনৌবা ৱাখল্লোনশিং থবক ওইনা পাংথোক্নবা মখোয়গা লোয়ন্না চৎমিন্নবা অমসুং মখোয়গী লৌশিং য়োকখৎপা অমসুং মতেং পাংবা হায়বসি মীওই খুদিংমক্কী থৌদাংনি। অতল ইন্নোবেসন সেন্তরশিংদা স্তার্দঅপ কয়া কয়া শেমগৎলি অমসুং অনৌবা ভারতকী অনৌবা লেবোরেতোরিশিং ওইনা মসি থোরক্লি। ভারতকী তিঙ্কর-প্রেনিউয়রশিং অথুবদা মালেমগী মাঙজিল থাবা ওন্ত্রেপ্রেনিউয়রশিং ওইরগনি।
থবক কন্নবা শুবগী মরুওইবগী মতাংদা মহারিসি পতাঞ্জালি পল্লদুনা প্রধান মন্ত্রীনা হায়খি ২০১৪গী মতুংদা পায়খৎপা থবকশিংগী মহৈনা মরম ওইদুনা সাইন্স অমসুং তেক্নোলোজিগী লমদা অচৌবা অহোংবশিং লাক্লে। স্তার্দঅপ ইন্দিয়া কেম্পেন, দিজিতেল ইন্দিয়া অমসুং নেসনেল ইজুকেসন পোলোসিনা ভারত অনৌবা থাকশিং য়ৌবদা মতেং পাংলি। লাইরিকশিংদগী সাইন্স থোরকপনি অমসুং চাংয়েংশিংগী খুৎথাংদা পেতেন্তশিং ওন্থোক্লি। চহি ১০গী মমাঙদা চহি অমদা পেতেন্ত ৪০০০ লৈরম্বা অদু হৌজিক ৩০০০০ হেল্লে। হায়রিবা মতম অসিদা লৈরম্বা দিজাইনশিং রেজিস্তার তৌবা মশিং ১০,০০০দগী ১৫,০০০দা হেনগৎলে। ত্রেদমার্ক মশিং ৭০,০০০গী মখাদা লৈরম্বদগী ২,৫০,০০০দা হেনগৎলে।
শ্রী মোদীনা হায়খি তেক লিদর অমা ওইনবা দরকার ওইবা মাইকৈ খুদিংমক্তা ঙসি ভারতনা মাঙলোমদা চঙশিল্লি। ২০১৪দা লৈবাক অসিদা তেক ইনকুবেসন সেন্তর চাউরাক্না ১৫০ লৈরম্বদগী হৌজিক ৬৫০ হেন্না লৈরে। ভারতকী গ্লোভেল ইন্নোবেসন ইন্দেক্স রেঙ্ক ৮১দগী ৪০শুবা পোজিসন্দা হাইগৎলক্লে। লৈবাক অসিদা স্তার্দঅপ মশিং ১০০ লৈরম্বদগী হেনগৎলক্তুনা হৌজিক মশক খঙলবা স্তার্দঅপ লাখ ১ হেন্না লৈরে অমসুং মালেমদা ভারত স্তার্দঅপ খ্বাইদগী য়াম্না লৈবা অহুমশুবা লৈবাক অমা ওইরে। মালেমগী ওইনা শেন-থুমগী নাতৈ চাদবা ফিবমদা লৈরিঙৈদা ভারতনা চাউখৎলকপা মতম অমা ওইখি। হৌজিক্কী মতম অসি থৌশিল শেম্লিবশিং, সাইন্সকী লমদা থবক তৌরিবশিং, লৈবাক শীনবা থুংনা লৈরিবা রিছার্স লেবশিং অমসুং লনাই সেক্তরশিংগী য়াম্না মরুওইবা মতম্নি। স্কুলদগী হৌরগা স্তার্দঅপ ফাওবদা মরী লৈনবশিংনা মখোয় লমজিংবীগদবনি।
প্রধান মন্ত্রীনা হায়খি তেক্নোলোজি অসি মীয়াম থৌনা হাপ্না অফবা খুৎলায় অমা ওইরক্লে। মসি থোঙ মান্দবা লৌথোক্নবা অমসুং খুন্নাইগী অচুম্বা পুরক্নবা খুৎলায় অমা ওইরক্লে। তেক্নোলোজি অসি মীচম মীয়াম্না লাম্বা ফংদবা মফম অমা লৈরমখি অমসুং দেবিদ, ক্রেদিৎ কার্দশিং অসি অৱাং থাক্কী খুদম অমা ওইরমখি। অদুবু তেক্নোলোজিনা লাইহনবদগী ঙসিদি য়ু.পি.আই অসি অনৌবা চৎনবী অমা ওইরে। ঙসিদি ভারত দেতা খ্বাইদগী য়াম্না শীজিন্নবা লৈবাকশিংগী মরক্তা য়াওরে। সহরগী ইন্তরনেত শীজিন্নবা মশিংদগী খুঙ্গংদা ইন্তরনেত শীজিন্নবা মশিংনা হেল্লে। জাম ত্রিনিতি, জি.ই.এম পোর্তেল, কোৱিন পোর্তেল, ই-নামনা মীয়াম পুন্না খুদোংচাবা পীনবা তেক্নোলোজিগী এজেন্ত অমা ওইরে।
প্রধান মন্ত্রীনা হায়খি তেক্নোলোজি মরম চানা শীজিন্নবা অসিনা খুন্নাইদা অনৌবা থৌনা পীরে, পুন্সিগী তাঙ্কক খুদিংমক্তা থবক কয়া পাংথোক্নবা ঙসিদি সরকারনা তেক্নোলোজি শীজিন্নরে। ওনলাইন বার্থ সর্তিফিগেদশিং, ই-পাথসাল অমসুং দিক্ষা ই-লার্নিং প্লেতফোর্মশিং, স্কোলারসিপ পোর্তেল, থবক তৌরিঙৈ মনুংগী য়ুনিভর্সেল এসেস নম্বর, অনা-লায়য়েংগী ই-সঞ্জিবিনি অমসুং অহলশিংগী জিবন প্রমাননা থবক খুদিংমক্তা মীয়ামগী মতেং পাংলি। খুন্নাইগী অচুম্বা পুরক্নবা অমসুং হিংবদা লাইবা হেনগৎহন্নবা ইজি পাসপোর্ত, দিজি যাত্রা অমসুং দিজিলোক্কর পায়খৎলি।
তেক্নোলোজিগী লমদা খোঙজেল য়াংনা অহোংবা লাক্লিবা অসিগী মতাংদা প্রধান মন্ত্রীনা হায়খি মসিগী খোঙজেল অসিগা চুন্না চেনবা ঙম্নবা ভারতকী নহারোলশিংনা লৈবাক অসি লমজিংগনি। এ.আই খুৎলায়শিংনা অনা-লায়য়েং অমসুং অনৌবা থবকশিংদা মপান নাইদ্রবা খুদোংচাবা কয়া পীরে। অসিগুম্বা অওনবা পুরকপা ঙম্বা তেক্নোলোজি অসিদা ভারতনা মাঙজিল থাগদবনি। দিফেন্স সেক্তরদা ভারতনা মশাগী ওক্নবা পুথোক্নবা থবক পায়খৎলি। দিফেন্স মিনিস্ত্রিনা লুপা করোর ৩৫০ হেনবগী ইন্নোবেসন ১৪ আইদেক্স(ইন্নোবেসন ফোর দিফেন্স এক্সলেন্স)দগী লৈরে।
প্রধান মন্ত্রীনা হায়খি আই-ক্রিয়েত অমসুং দি.আর.দি.ও য়ং সাইন্তিস্ত লেবশিংগী থবকশিংনা অনৌবা মাইকৈ অমদা থাংজিল্লি। স্পেসকী লমদা ভারত মালেমগী ওইনা অহোংবা পুরকপা লৈবাক অমা ওইরক্লি অমসুং এস.এস.এল.ভি অমসুং পি.এস.এল.ভিগুম্বা তেক্নোলোজিশিং লৈবাক অসিদা লৈজরে। স্পেস সেক্তরদা নহারোলশিং অমসুং স্তার্দঅপশিংদা অনৌবা খুদোংচাবশিং পীবা দরকার ওইরে। কোদিং, গেমিং অমসুং প্রোগ্রাম্মিংগী হিরমশিংদা মাঙজিল থানবা হোৎনবা মতম ওইরে। সেমিকন্দক্তরশিংগুম্বা অনৌবা হিরমশিংদা ভারতনা শরুক য়াবা হেনগৎলক্নবা পি.এল.আই স্কিমগুম্বা থৌরাং কয়া পায়খৎলে।
ইন্নোবেসন অমসুং সেকুরিতিগী লমদা হেক্কাথোনশিংগী মরুওইবা পল্লদুনা, প্রধান মন্ত্রীনা হায়খি মহৈরোয়শিংনা অনৌবা শিংনবশিং পায়খৎনবা অমসুং মসিগীদমক দরকার ওইবা মতেং পাংনবা সরকারনা মখা তানা হেক্কাথোন কলচর য়োকখৎলি। অতল তিঙ্করিং লেবশিংদগী থোরকপা নহারোলশিং থবক পীনবা থৌরাং অমা পায়খৎপা দরকার ওই। নহারোলশিং লমজিংবা ঙমগদবা, তোঙান-তোঙানবা হিরমশিংদা লৈবাক অসিদা মসিগা চপ মান্নবা লেব ১০০ ঐখোয়না মশক খঙদোকপা ঙমগদরা? হায়না প্রধান মন্ত্রীনা হংখি। মৈখু চেন্দবা ইনর্জি অমসুং মহৌশাগী লৌউ-পথাপকী মতাংদা মীৎয়েং চঙনবা প্রধান মন্ত্রীনা তকশিনখি। হায়রিবা মঙলানশিং অসি থবক ওইনা পাংথোকপদা নেসনেল তেক্নোলোজি ৱিক্না মরুওইবা থৌদাং অমা লৌগনি হায়বগী থাজবা থম্লি হায়না অরোইবদা প্রধান মন্ত্রীনা ফোঙদোকখি।
থৌরম অদুদা দিফেন্স মিনিস্তর শ্রী রাজনাথ সিংহ অমসুং পর্সোনেল, পব্লিক গ্রিভান্সেস অমসুং পেন্সনগী রাজ্য মন্ত্রী শ্রী জিতেন্দ্র সিংহশু শরুক য়াখি।
নুঙগীৱারোল
মহারাস্ত্রাগী হিঙ্গোলিদা পায়খৎকদৌরিবা লিগো-ইন্দিয়া অসি মালেমদা মতিক চারবা লেজর ইন্তরফেরোমিতর গ্রেভিতেসনেল ৱেব ওজার্বেতোরি অমা ওইরগনি। মসি অচৌবা এস্ত্রোফিজিকেল ওবজেকশিং হায়বদি ব্লেক হোলশিং অমসুং নিউত্রোন স্তারশিং পুনশিনবা মতমদা থোরকপা কিলোমিতর ৪ গী সেন্তিতিপ ইন্তরফেরোমিতরগী গ্রেভিতেসনগী ৱেবশিং খঙবা ঙম্বা অফবা সিস্তম অমনি। লিগো-ইন্দিয়ানা য়ু.এস.এগী হেনফোর্দ, ৱাশিংতন অমসুং লিভিংস্তোন, লুইসিয়ানাদা লৈবা অসিগুম্বা লেবেরেতোরি অনিগা পুন্না থবক তৌমিন্নগনি।
রিয়ার আর্থ পর্মনেন্ত মেগ্নেত অসি মরুওইনা চাউখৎলবা লৈবাকশিংনা পুথোকই। রিয়ার আর্থ পর্মনেন্ত মেগ্নেত পুথোক্নবা খুদোংচাবা অসি ভিশাখাপত্নমদা লৈবা ভাবা এতোমিক রিছার্স সেন্তরদা শেমগৎলে। লৈবাক অসিনা মশানা শেমগৎজবা তেক্নোলোজি অমসুং লৈবাক অসিদা ফংবা রিয়ার আর্থ মেতরিএলশিং শীজিন্নদুনা ফেসিলিতি অসি শেমগৎপনি। মসিগী খুদোংচাবা অসি লৈবদগী, রিয়ার আর্থ পর্মনেন্ত মেগ্নেতশিং পুথোকপা ঙম্বা মালেমগী অখন্নবা লৈবাকশিংগী মনুংদা ভারত য়াওরগনি।
তাতা মেমোরিএল সেন্তর, নবি মুম্বাইদা লৈবা নেসনেল হেদ্রোন বিম থেরাপি অসি অপীকপা চাংদা তুউমরশিংদা নিংথিনা রেদিএসন পাংথোকপা ঙমহনবা খ্বাইদগী নৌবা তেক্নোলোজিগী খুদোংচাবা লৈবা মফম অমনি। মসিনা রেদিএসন থেরাপিদা অতোপ্পা মফমশিংদা শোকহনবগী চাং য়াম্না হন্থহল্লি।
ত্রোম্বে কেম্পসতা লৈবা ভাবা এতোমিক রিছার্স সেন্তরদা ফিজন মোলিবদেনম-৯৯ পুথোক্নবা খুদোংচাবা লৈরি। মোলিবদেনম-৯৯ অসি ঙল্লিঙৈদা কেন্সর অমসুং থম্মোয়গী লায়নাশিং খঙদোক্নবা ইমেজিংগী থবকশিংদা চাদা ৮৫ হেন্না শীজিন্নরিবা তেক্নেতিয়ম-৯৯গী হৌরকফম্নি। মসিগী খুদোংচাবা অসিনা চহি অমদা অনাবা মীওই লাখ ৯-১০ স্কেন তৌবা ঙমগনি হায়না পানরি।
প্রধান মন্ত্রীনা মীয়ামদা তোঙান-তোঙানবা কেন্সর হোস্পিতালশিং উরেপ-উয়ুং তমগনি অমসুং মীয়ামদা কৎথোক্কনি অমসুং খুদোংচাবশিং অসিনা লৈবাক অসিগী মফম কয়াদা মালেম থাক্কী কেন্সর লায়য়েংগী খুদোংচাবশিং ফংবা হেনগৎহল্লগনি।
নেসনেল তেক্নোলোজি দে ২০২৩ পাংথোকপা অসিদা অতল ইন্নোবেসন মিসন্দা অখন্নবা মীৎয়েং থম্লি। চহি অসিগী নেসনেল তেক্নোলোজি দেগী থিম অসিদা, অতল ইন্নোবেসন মিসন পেভিলিয়ন্দা তোঙান-তোঙানবা ইন্নোবেসন প্রোজেকশিং উৎকনি অমসুং মীয়াম্না লাইভ তিনকরিং সেসনশিং, তিনকরিংগী থবকশিং, অনৌবা থবকশিং অমসুং স্তার্দ-অপশিংগী অনৌবা পোৎথোকশিং য়েংবা য়াগনি। মসিগা লোয়ন্না এ.আর/ভি.আর, দিফেন্স তেক্নোলোজি, দিতিযাত্রা, তেক্সতাইল অমসুং লাইফ সাইন্সসকী তোঙান-তোঙানবা মফমশিং হাংদোক্কনি।
থৌরম মনুংদা, হৌখিবা চহি খর অসিদা সাইন্স অমসুং তেক্নোলোজিগী লমদা ভারতকী খুমাংচাউশিনবগী উৎপা এক্সপো অমা প্রধান মন্ত্রীনা হৌদোকখি। মহাক্না থৌরম অদুদা কম্মেমোরেতিপ স্তাম্প অমসুং শেনয়েক ফোঙখি।
মে ১৯৯৮দা পোখ্রান তেস্ত মাইপাক্না পাংথোকখিবা অমসুং ভারতকী সাইন্স অমসুং তেক্নোলোজি চাউখৎনবা থবক তৌরিবা ভারতকী সাইন্তিস্তশিং, ইঞ্জিনিয়ারশিং অমসুং তেক্নোলোজিস্তশিং ইকায়খুম্নবা উৎনবা হান্নগী প্রধান মন্ত্রী শ্রী অতল বিহারি বাজপায়না ১৯৯৯দগী নেসনেল তেক্নোলোজি দে পাংথোকপা হৌখি। মতম অদুদগী হৌনা, চহি খুদিংগী মে ১১ অসি নেসনেল তেক্নোলোজি দে হায়না থৌরম পাংথোক্তুনা লাক্লি। নুমিৎ অসি চহি খুদিংগী অনৌবা অমসুং তোঙান-তোঙানবা থিমদা পাংথোক্লি। চহি অসিগী থিম অসি ‘স্কুল তু স্তার্দঅপস-ইগ্নিতিং য়ং মাইন্দস তু ইন্নোবেদ’ হায়বনি।
*****
(Release ID: 1923579)
Visitor Counter : 121
Read this release in:
Malayalam
,
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada