Ka Tnat ki kam pynroi ia ki jaka nongkyndong
Yn seng ia ka Task Force na ka bynta ki kam kiba iadei bad ka khyndew ka shyiap ha ki jylla ka thain shatei lammihngi
Posted On:
10 MAY 2023 11:23AM by PIB Shillong
Ha ka National Conference halor ka “Land Governance in North Eastern States” ba la pynlong ha ka 3 bad 4 tarik u Jymmang, 2023 ha Guwahati, ki Territorial bad Autonomous District Council ha ki jylla Assam, Tripura, Mizoram bad Meghalaya ki la ong ba ka jingpynkylla digital ia ki kot ki sla kiba iadei bad ki jaka puta ka long kaba donkam bha na ka bynta ka roi ka par. Ia ka National Conference la pynlong da ka Lal Bahadur Shastri National Academy of Administration, Mussoorie bad ka tnat Land Resources ha ka jingkyrshan jong ka tnat Revenue jong ka Sorkar Assam.
U Ajay Tirkey, Secretary ka tnat Land Resources u la pyniaid ia kane ka National Conference. U Sonmoni Borah, Joint Secretary ka tnat Land Resources; u Gyanendra Dev Tripathi, Principal Secretary, Revenue, Sorkar Assam; ka Anandhi, Deputy Director, Lal Bahadur Shastri National Academy of Administration, Mussoorie; u P.V. Rajasekhar, Additional Surveyor General, Survey of India; ka Mridula Singh, Sr. Social Development Specialist, World Bank bad kiwei kiwei ki ophisar ki la iadon lang. Ki nongmihkhmat na ka Bodoland Territorial Council, Karbi Anglong Autonomous District Council, Dima Hasao Autonomous District Council (kiba ha Assam); Tripura Tribal Areas Autonomous Council, Tripura; Lai Autonomous District Council, Mizoram; Khasi Hills Autonomous District Council, Garo Hills Autonomous District Council, Jaintia Hills Autonomous District Council (kiba ha Meghalaya) ki la iashim bynta ha kane ka National Conference.
Ki jingiamir jingmut ha kane ka National Conference kaba nyngkong eh ki kynthup ia ki rukom treikam ha ki jylla mynta bad ka rukom pynthymmai ia ka jingbuh ia ki jingtip shaphang ki jaka puta, ka rukom peit bad pyniaid ia ki kam kiba iadei bad ki jaka puta bad sa kawei ka bynta halor ki ain bad ki dustur tynrai, ki rukom treikam mynta bad ki sienjam ba thymmai bad ruh ka bynta jong ka Survey of India ha ka jingpynthymmai ia ka rukom buh jingtip shaphang ki jaka puta.
Katba ki kam pyndonkam da ki kor computer bad ki lad digital ban buh jingtip shaphang ki jaka puta ki la iaid shaphrang ha katto katne ki bynta jong ka Assam, la shem ba kane ka dang duna bha ha ki jaka ba hap hapoh ka Bodoland Territorial Council, Karbi Anglong Autonomous District Council bad Dima Hasao Autonomous District Council. Dang thaw ia ka Bodoland Land Policy bad la kyrmen ban pyndep shen ia kane. Ka khana samari ha ki jaka Karbi Anglong ka dei ka bym pat leh. Katba ka Dima Hasao Autonomous District Council ka la pdiang ia ka ain Assam Land Regulation Act, ki don ki jaka kiba heh ki bym biang u pud u sam bad kumta la sngew ba ka long kaba donkam bha ban don ka jingpeit bniah ia kine ki jaka. Ka Tripura Tribal Areas Autonomous Council ka don phra tylli ki Distrik bad kumba 10,000 sq.km. hapoh ka Sixth Schedule bad 10 tylli ki ain tynrai. Ha ki jaka Lai Autonomous District Council jong ka Sixth Schedule, la sngew ba dei ban don ka jingpeit bniah ia kine. Ha ki jaka ba hap hapoh ka Khasi Hills Autonomous District Council jong ka Meghalaya, ki jaka puta ki dei kiba long trai da ki briew. Ka Garo Hills Autonomous District Council ka don ka rukom treikam ha kaba ka District Council ka ai ia ki patta na u snem sha u snem. Katba ka Jaintia Hills Autonomous District Council, Meghalaya ka bud ia ka Meghalaya Land Survey and Records Preparation Act 1980.
U Ajay Tirkey, Secretary ka tnat Land Resources u la ai jingiaroh ia ki jingpyrshang jong ka Anandhi, Deputy Director, LBSNAA ban pynlong ia kane ka Conference bad u la pynshai ba katba ka jingkwah jong ki Autonomous District Council ha ka thain shatei lammihngi ban pynkylla digital bad pynthymmai ia ki rukom buh jingtip shaphang ki jaka puta ka dei ka sienjam shakhmat, yn shim lut ia ki lad ban ai jingkyrshan ia ki Council katkum ki kyndon ka Riti Synshar bad ki ain kiba don.
Kum ka sienjam na ka bynta kane, ka Bodoland Territorial Council ka la tyrwa ban don ka jingpynkylla digital bad pynthymmai ia ki rukom buh jingtip shaphang ki jaka puta bad ka tnat Land Resources ka la ai jingmynjur ia kane. U Secretary ka tnat Land Resources haba u la peit ia ka jingiar jong kane ka kam kaba hap leh ha ki jylla ka thain shatei lammihngi u la iathuh ba yn seng ia ka Task Force na ka bynta ki kam kiba iadei bad ka khyndew ka shyiap ha ki jylla ka thain shatei lammihngi da ka jingioh jingmynjur na ki bor kiba dei ban peit ia kane bad ruh hadien ka jingiakren bad ki Autonomous District Council. U Sonmoni Borah, Joint Secretary u la kyntu ia ki Autonomous District Council ba kin phah ia ki jingtyrwa jong ki na ka bynta ka jingpynkylla digital bad ka jingpynthymmai ia ka rukom buh ia ki jingtip shaphang ki jaka puta hapoh ka Digital India Land Records Modernization Programme(DILRMP). U la ai jingsngewnguh ruh ia ka Anandhi, Deputy Director, LBSNAA bad Principal Secretary, ka tnat Revenue jong ka Sorkar Assam kiba la pynlong ia kane ka National Conference.
(Release ID: 1923357)
Visitor Counter : 132