ওর্গান দোনেসন অমদি ওর্গান ত্রান্সপ্লান্ত সেক্তরদা অওনবা পুরক্নবগদীমক মীৎয়েঙ শানবা স্ত্রকচরেল চেঞ্জশিং লাক্লগনি‍। হায়রিবা ফীভম অসি পুরক্নবগীমক কেন্দ্রগী হকশেল মন্ত্রী দোক্তর মনসুখ মন্দাবিয়ান ঙসি মফমসিদা এম.ও.এস. (হকশেল) দোক্তর ভার্তী প্রবিন পৱার য়াওনা হকশেল মন্ত্রালয়গী মকোক থোংবা ওফিসরশিংগা লোয়ননা ওর্গান দোনেসন অমদি ওর্গান ত্রান্সপ্লান্তকী লৈরিবা ফীভম য়েংশিল্লদুনা মরী লৈনবা পাউতাক পীখ্রে‍।

ইকায়খুম্নরবা প্রধান মন্ত্রী শ্রী নরেন্দ্র মোদীনা লৈবাক মীয়ামগী মফমদা “মন কী বাত”কী ৯৯শুবা তাঙ্কক্তা মীওইবগী পুন্সিবু কন্নবগীদমক ওর্গান দোনেসন তৌনবা ৱাফম ফোঙদোকখি‍। লৈবাকসিগী অপুনবা ওর্গান ত্রান্সপ্লান্ত মশিং ২০১৩দা ৫০০০গী মখাদা লৈরম্বদগী ২০২২দা ১৫,০০০ হেন্না লৈদুনা মশক থোক্না হেনগৎলকখ্রে‍। ওর্গান এন্দ তিসুস ত্রান্সপ্লান্ত ওর্গনাইজেসন এৎ নেস্নেল (এন.ও.তি.তি.ও.), রিজনেল (আর.ও.তি.তি.ও.) অমদি স্তেতকী থাক (এস.ও.তি.তি.ও.)গী নেৎৱর্ক্কী খুত্থাঙদা হেন্না ফবা মওংদা খুৎশম্ননা চৎমিন্নবনা মরম ওইরগা লৈখিদ্রবা মীওই অমমমদগী কয়াৎ হেন্না শীজিন্নবা ঙম্লি, খুদম ওইনা ২০১৬দা লৈখিদ্রবা দোনর ৯৩০দগী কয়াৎ ২২৬৫ শীজিন্নখি অদুগা ২০২২দনা লৈখিদ্রবা দোনর ৯০৪দগী কয়াৎ ২৭৬৫ শীজিন্নবা ঙমখি‍।

এন.ও.তি.তি.ও.না লায়েংশঙশিংদা ওর্গান দোনেসন অমদি ত্রান্সপ্লান্তেসন প্রোগ্রামগী তাঙ্কক নাইবা লমজিং অমা ওইনা ত্রান্সপ্লান্ত মেনুএল অমা শেমগৎনবা থবক পায়খৎলি অমদি ত্রান্সপ্লান্ত কোওর্দিনেতরশিংগী ত্রেনিংগী স্তেন্দর্ত কোর্স অমসু হাংদোক্নবা তৌরি‍। হায়রিবা দোকুমেন্ত অনিমক অথুবদা লোইশিন্দুনা ফোঙদোক্লগনি‍। হায়রিবা প্রোগ্রাম অসি হেন্না ফবা মওংদা পায়খৎনবগীদমক এন.ও.তি.তি.ও.দা কোওর্দিনেসন, আই.ই.সি., ত্রেনিং অমদি ঐচ.আর./একাউন্তকী ভর্তিকেল মরীসু শেম্লে‍। হন্দক্তা ভারত লৈঙাক্না মীয়ামগী ইন্তরেস্ততা পায়খৎপা অখন্নবা য়াইফ-থৌরাং অমা ওইনা অতোপ্পা মীওইদা কয়াৎ কত্থোকপা কেন্দ্র লৈঙাক্কী ইম্প্লোয়ীশিংদা নুমিৎ ৪২গী অখন্নবা কেজুএল লীব পীখ্রে‍।

কেন্দ্রগী হকশেল মন্ত্রীগী লমজিং মখাদা, হকশেল অমদি য়াইফ-য়ুম্পাল মন্ত্রালয়নসু লৈবাকসিদা ওর্গান দোনেসন অমদি ত্রান্সপ্লান্তেসনগী ফীভম ফগৎহন্নবগীদমক মখা তানা পোলিসীদা অওনবা পুরক্নবগীদমক মালেমগী ওইনা চৎনরিবা খ্বায়দগী ফবা থৌওংশিংদগী তমশিনবা য়াবশিং লৌশিন্নবা থবকসু পায়খৎলি‍।

****