ଦେଶରେ ନର୍ସିଂ କାର୍ଯ୍ୟ ବଳକୁ ମଜବୁତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଅନୁସାରେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅର୍ଥନୈତିକ ବ୍ୟାପାର ସଂକ୍ରାନ୍ତୀୟ କ୍ୟାବିନେଟ କମିଟି ୨୦୧୪ ରୁ ସ୍ଥାପିତ ମେଡିକାଲ କଲେଜ ସହ - ଅବସ୍ଥାନରେ ୧୫୭ ଟି ନୂତନ ନର୍ସିଂ କଲେଜ ପ୍ରତିଷ୍ଠା କରିବାକୁ ଅନୁମୋଦନ ଦେଇଛନ୍ତି । ଏହି ପଦକ୍ଷେପ ପ୍ରତି ବର୍ଷ ପ୍ରାୟ ୧୫,୭୦୦ ନର୍ସିଂ ସ୍ନାତକଙ୍କୁ ଯୋଗ କରିବ । ଏହା ଭାରତରେ ଗୁଣବତାପୂର୍ଣ୍ଣ, ସୁଲଭ ଏବଂ ଉପଯୁକ୍ତ ନର୍ସିଂ ଶିକ୍ଷାକୁ ନିଶ୍ଚିତ କରିବ, ବିଶେଷ କରି କମ୍ ସେବା ମିଳୁଥିବା ଜିଲ୍ଲା ତଥା ରାଜ୍ୟ / କେନ୍ଦ୍ର ଶାସିତ ଅଞ୍ଚଳରେ ନର୍ସିଂ ଶିକ୍ଷାକୁ ସୁନିଶ୍ଚିତ କରିବ । ଏଥିପାଇଁ ମୋଟ ଆର୍ôଥକ ବ୍ୟୟ ୧୫୭୦ କୋଟି ଟଙ୍କା ହେବ ।

ସ୍ୱାସ୍ଥ୍ୟସେବା କ୍ଷେତ୍ରରେ ନର୍ସିଂ ପେଶାଧାରୀ ମାନଙ୍କ ଉପଲବ୍ଧତା କମ୍ ହେବା ଏବଂ ଏହାର ଅସୁରକ୍ଷିତ ଅଂଚଳରେ ସ୍ୱାସ୍ଥ୍ୟସେବା ଉପରେ ଯେଉଁ ପ୍ରଭାବ ପଡିଛି , ଭୌଗୋଳିକ ଏବଂ ଗ୍ରାମାଂଚଳ - ସହରାଂଚଳ ମଧ୍ୟରେ ରହିଥିବା  ଏହିଭଳି ଅସନ୍ତୁଳନତାକୁ ଦୂର କରିବା ପାଇଁ ଏହି ପଦକ୍ଷେପ ମାଧ୍ୟମରେ ଲକ୍ଷ୍ୟ ରଖାଯାଇଛି, ଯେଉଁ କାରଣରୁ ଏହି ନର୍ସିଂ କଲେଜ ଗୁଡ଼ିକର ପ୍ରତିଷ୍ଠା ସ୍ୱାସ୍ଥ୍ୟ ସେବା କ୍ଷେତ୍ରରେ ଯୋଗ୍ୟ ମାନବ ସମ୍ବଳର ଉପଲବ୍ଧତାକୁ ମହତ୍ତ୍ୱ  ପ୍ରଦାନ କରିବ । ଏହା ୟୁନିଭର୍ସାଲ୍ ହେଲ୍‌ଥ କେୟାର (ୟୁଏଚ୍‌ସି) ପାଇଁ ଜାତୀୟ ଶାସନାଦେଶର ଏକ ଅଂଶ ଭାବରେ ମଧ୍ୟ କରାଯାଉଛି ଏବଂ ସ୍ଥାୟୀ ବିକାଶ ଲକ୍ଷ୍ୟ (ଏସ୍‌ଡିଜି) ହାସଲ କରିବାରେ ଏହା ସାହାଯ୍ୟ କରିବ । ଏହି କ୍ଷେତ୍ରରେ ମୁଣ୍ଡ ଟେକୁଥିବା ଆବଶ୍ୟକତା ଗୁଡିକୁ ପୂରଣ କରିବା ପାଇଁ ନର୍ସିଂ ଶିକ୍ଷା ନିମନ୍ତେ ନିୟାମକ ସଂରଚନାରେ ସଂସ୍କାର ସମ୍ପର୍କରେ ମଧ୍ୟ ବିଚାର କରାଯାଉଛି ।

ଜାତୀୟ ଦକ୍ଷତା ବିକାଶ ନିଗମ (ଏନ୍‌ଏସ୍‌ଡିସି) ମଧ୍ୟ ଦକ୍ଷତା ବିକାଶ ଏବଂ ବିଦେଶୀ ପଦବୀ ପାଇଁ ଯୋଗ୍ୟ ନର୍ସ ମାନଙ୍କୁ ନିଯୁକ୍ତ କରିବା ନିମନ୍ତେ ପ୍ରମୁଖ ଅନ୍ତର୍ଜାତୀୟ ଏବଂ ଜାତୀୟ ଏଜେନ୍ସି ଗୁଡିକ ସହିତ ସହଯୋଗ କରିଥାଏ ।

ପୂର୍ବରୁ ରହିଥିବା ମେଡିକାଲ୍ କଲେଜଗୁଡିକ ସହିତ ଏହି ନର୍ସିଂ କଲେଜ ଗୁଡିକର ସହ- ଅବସ୍ଥାନ ବିଦ୍ୟମାନ ଭିତ୍ତିଭୂମି, କୌଶଳ ପ୍ରୟୋଗଶାଳା, କ୍ଲିନିକାଲ୍ ସୁବିଧା ଏବଂ ଅଧ୍ୟାପକ ମାନଙ୍କର ସର୍ବୋତ୍ତମ ଉପଯୋଗକୁ ଅନୁମତି ଦେବ । ଏହି ପଦକ୍ଷେପ ନର୍ସିଂ ଛାତ୍ରଛାତ୍ରୀ  ମାନଙ୍କୁ ଉନ୍ନତ କ୍ଲିନିକାଲ୍ ଅନୁଭବ ପ୍ରଦାନ କରିବ ଏବଂ ପରିଣାମ ସ୍ୱରୂପ ମେଡିକାଲ୍ କଲେଜ ଗୁଡ଼ିକରେ ରୋଗୀମାନଙ୍କୁ ଉତ୍ତମ ଯତ୍ନ ଏବଂ ସେବା ଯୋଗାଇ ଦେବ ବୋଲି ଆଶା କରାଯାଉଛି । ଏହି ନର୍ସିଂ କଲେଜ ଗୁଡ଼ିକରେ ସବୁଜ ପ୍ରଯୁକ୍ତିର ବ୍ୟବହାର ସମ୍ପର୍କରେ ମଧ୍ୟ ଅନୁଧ୍ୟାନ କରାଯିବ ଏବଂ ଶକ୍ତି ଦକ୍ଷତା ଏବଂ କାର୍ବନ ଫୁଟ୍ ପ୍ରିଂଟ୍‌ରେ ହ୍ରାସକୁ ସୁନିଶ୍ଚିତତା କରିବା ପାଇଁ ପ୍ରାସଙ୍ଗିକତା ଅନୁଯାୟୀ ଗ୍ରହଣ କରାଯିବ ।

ଆସନ୍ତା ଦୁଇ ବର୍ଷ ମଧ୍ୟରେ ସରକାର ଏହି ପ୍ରକଳ୍ପ ସଂପୂର୍ଣ୍ଣ କରିବାକୁ ଯୋଜନା କରିଛନ୍ତି ଏବଂ ଯୋଜନାର ପ୍ରତ୍ୟେକ ପର୍ଯ୍ୟାୟ ସହିତ ପ୍ରକଳ୍ପକୁ ସମ୍ପୂର୍ଣ୍ଣ କରିବା ପାଇଁ ବିସ୍ତୃତ ସମୟସୀମା ନିର୍ଦ୍ଧାରିତ କରିଛନ୍ତି । କେନ୍ଦ୍ରରେ କେନ୍ଦ୍ର ସ୍ୱାସ୍ଥ୍ୟ ସଚିବ ଏବଂ ରାଜ୍ୟ ଗୁଡିକରେ ସ୍ୱାସ୍ଥ୍ୟ / ଚିକିତ୍ସା ଶିକ୍ଷାର ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅଧିକାରପ୍ରାପ୍ତ କମିଟି କାର୍ଯ୍ୟର ଅଗ୍ରଗତି ଉପରେ ନଜର ରଖିବେ । ଏହି ଯୋଜନା ଅଧୀନରେ ନୂତନ ନର୍ସିଂ କଲେଜ ପ୍ରତିଷ୍ଠା ପାଇଁ କରାଯାଉଥିବା କାର୍ଯ୍ୟ ଗୁଡ଼ିକର ଭୌତିକ ଅଗ୍ରଗତି ସମ୍ପର୍କରେ ରାଜ୍ୟ ସରକାର / କେନ୍ଦ୍ର ଶାସିତ ଅଂଚଳ ଗୁଡିକର ସରକାର ନିୟମିତ ଭାବରେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟକୁ ସୂଚିତ କରିବେ ।

ପୃଷ୍ଠଭୂମି:

ଏହି ସରକାର ସେମାନଙ୍କ ସଂଖ୍ୟାରେ ଯଥେଷ୍ଟ ବୃଦ୍ଧି ସହିତ ଗୁଣାତ୍ମକ ସ୍ୱାସ୍ଥ୍ୟ କଲ୍ୟାଣ କାର୍ଯ୍ୟବଳକୁ ସୁନିଶ୍ଚିତ କରିବା ପାଇଁ ଧ୍ୟାନ ଦେଇଛନ୍ତି । ସରକାର ଗତ କିଛି ବର୍ଷ ମଧ୍ୟରେ ମେଡିକାଲ କଲେଜ ଗୁଡିକର ସଂଖ୍ୟା ବୃଦ୍ଧି କରିଛନ୍ତି ଏବଂ ପରବର୍ତ୍ତୀ ସମୟରେ ଏମ୍‌ବିବିଏସ୍ ଆସନ ସଂଖ୍ୟା ମଧ୍ୟ ବୃଦ୍ଧି କରିଛନ୍ତି । ମେଡିକାଲ୍ କଲେଜ ସଂଖ୍ୟା ୨୦୧୪ ପୂର୍ବରୁ ୩୮୭ ଥିବାବେଳେ  ବର୍ତ୍ତମାନ ସୁଦ୍ଧା ୬୬୦ କୁ  ବୃଦ୍ଧି ପାଇଛି, ଅର୍ଥାତ୍ ଏଥିରେ ୭୧% ପର୍ଯ୍ୟାପ୍ତ ବୃଦ୍ଧି ଘଟିଛି ।

ଆହୁରି ମଧ୍ୟ, ୨୦୧୩ - ୧୪ ପରଠାରୁ ଏମ୍‌ବିବିଏସ୍ ଆସନ ସଂଖ୍ୟା ପ୍ରାୟ ଦ୍ୱିଗୁଣିତ ହୋଇଛି ଏବଂ ପୋଷ୍ଟ ଗ୍ରାଜୁଏଟ୍ ଆସନ ସଂଖ୍ୟା ଦୁଇ ଗୁଣାରୁ ଅଧିକ ହୋଇଛି ।

ଭାରତୀୟ ନର୍ସ ମାନଙ୍କର ସେବା ବିଦେଶରେ ଯଥେଷ୍ଟ ମାନ୍ୟତା ପାଇଥାଏ,  ତେଣୁ ସେମାନଙ୍କର ଗତିଶୀଳତା ଏବଂ ଉତ୍ତମ ନିଯୁକ୍ତି ସୁଯୋଗକୁ ସୁବିଧାଜନକ କରିବା ପାଇଁ ଭାରତୀୟ ନର୍ସିଂ ଶିକ୍ଷାକୁ ବିଶ୍ୱ ମାନକ ଅନୁରୂପ ଆଣିବା ଜରୁରୀ ଅଟେ । ସେମାନେ ଉଚ୍ଚ କୁଶଳୀ ବୃତ୍ତିଧାରକ ଭାବରେ ସ୍ୱୀକୃତିପ୍ରାପ୍ତ ହୋଇଥାନ୍ତି ଏବଂ ସ୍ୱାସ୍ଥ୍ୟସେବା ବିତରଣ ପ୍ରଣାଳୀକୁ ଚଳାନ୍ତି, କିନ୍ତୁ ସେମାନଙ୍କର ସାଂଖ୍ୟିକ ଶକ୍ତି ବିଶ୍ୱ ସ୍ତରୀୟ ମାନଦଣ୍ଡ ଠାରୁ କମ୍ ହୋଇଥାଏ ଏବଂ ଏହାକୁ ଯଥେଷ୍ଟ ପରିମାଣରେ ବୃଦ୍ଧି କରାଯିବା ଆବଶ୍ୟକ ।

*****

SSP