નમસ્કારમ!

કેરળ અને થ્રિસુરના મારા તમામ ભાઈઓ અને બહેનોને ત્રિશૂર પૂરમ તહેવાર નિમિત્તે ખૂબ ખૂબ અભિનંદન. થ્રિસુરને કેરળની સાંસ્કૃતિક રાજધાની તરીકે ઓળખવામાં આવે છે. જ્યાં સંસ્કૃતિ છે, પરંપરાઓ છે, ત્યાં કળા પણ છે. આધ્યાત્મિકતાની સાથે સાથે ફિલસૂફી પણ છે. તહેવારો છે તેમ ઉલ્લાસ પણ છે. મને ખુશી છે કે ત્રિશૂર આ વારસા અને ઓળખને જીવંત રાખી રહ્યું છે. શ્રી સીતા રામા સ્વામી મંદિર વર્ષોથી આ દિશામાં ગતિશીલ કેન્દ્ર તરીકે કામ કરી રહ્યું છે. મને કહેવામાં આવ્યું છે કે આ મંદિર હવે વધુ દિવ્ય અને ભવ્ય બનાવવામાં આવ્યું છે. આ પ્રસંગે સોનાથી જડેલું ગર્ભગૃહ ભગવાન શ્રી સીતા રામ, ભગવાન અયપ્પા અને ભગવાન શિવને પણ સમર્પિત કરવામાં આવી રહ્યું છે.

અને મિત્રો,

જ્યાં શ્રીસીતા રામ હોય ત્યાં શ્રી હનુમાન ન હોય તે અશક્ય છે. આથી 55 ફૂટ ઉંચી હનુમાનજીની ભવ્ય પ્રતિમા ભક્તો પર તેમના આશીર્વાદ વરસાવશે. આ અવસર પર હું તમામ ભક્તોને કુંભાભિષેકની શુભેચ્છા પાઠવું છું. ખાસ કરીને, હું શ્રી ટી.એસ. કલ્યાણરામન જી અને કલ્યાણ પરિવારના તમામ સભ્યોને અભિનંદન આપવા માંગુ છું. મને યાદ છે કે ઘણા વર્ષો પહેલા તમે મને ગુજરાતમાં મળવા આવ્યા હતા ત્યારે તમે મને આ મંદિરની અસર અને પ્રકાશ વિશે વિગતવાર જણાવ્યું હતું. આજે, ભગવાન શ્રી સીતા રામાજીના આશીર્વાદથી, હું આ શુભ અવસરનો ભાગ બની રહ્યો છું. મન, હૃદય અને ચેતનાથી, હું અનુભવું છું કે હું તમારી વચ્ચે મંદિરમાં જ છું અને હું આધ્યાત્મિક આનંદ પણ અનુભવી રહ્યો છું.

મિત્રો,

થ્રિસુર અને શ્રી સીતા રામા સ્વામી મંદિર માત્ર વિશ્વાસનું શિખર નથી, તેઓ ભારતની ચેતના અને આત્માનું પ્રતિબિંબ પણ છે. મધ્યયુગીન સમયમાં જ્યારે વિદેશી આક્રમણકારો આપણા મંદિરો અને પ્રતીકોને નષ્ટ કરી રહ્યા હતા ત્યારે તેઓ વિચારતા હતા કે તેઓ આતંક દ્વારા ભારતની ઓળખને ખતમ કરી દેશે. પરંતુ તેઓ અજાણ હતા કે ભારત ભલે પ્રતીકોમાં દેખાય છે, પરંતુ તે તેના જ્ઞાન અને વિચારમાં વસે છે. ભારત શાશ્વતની શોધમાં રહે છે. આ જ કારણ છે કે દરેક પડકારનો સામનો કર્યા પછી પણ ભારત જીવંત રહ્યું છે. તેથી જ ભારતની આત્મા શ્રી સીતા રામા સ્વામી અને ભગવાન અયપ્પાના રૂપમાં તેની અમરતાની ઘોષણા કરી રહી છે. તે સમયના આ મંદિરો જાહેર કરે છે કે 'એક ભારત શ્રેષ્ઠ ભારત'નો વિચાર હજારો વર્ષોનો અમર વિચાર છે. આજે આપણે આઝાદીના ‘અમૃત કાળ’માં આપણા વારસા પર ગર્વ કરવાનો સંકલ્પ લઈને આ વિચારને આગળ લઈ જઈ રહ્યા છીએ.

મિત્રો,

આપણા મંદિરો અને તીર્થસ્થાનો સદીઓથી આપણા સમાજના મૂલ્યો અને સમૃદ્ધિના પ્રતીકો છે. મને આનંદ છે કે શ્રી સીતા રામા સ્વામી મંદિર પ્રાચીન ભારતની ભવ્યતા અને વૈભવ જાળવી રહ્યું છે. તમે મંદિરોની પરંપરાને પણ આગળ લઈ રહ્યા છો જ્યાં સમાજ પાસેથી મળેલા સંસાધનોને સેવા તરીકે પરત કરવાની વ્યવસ્થા હતી. મને કહેવામાં આવ્યું છે કે આ મંદિર દ્વારા ઘણા લોક કલ્યાણના કાર્યક્રમો ચલાવવામાં આવે છે. હું ઈચ્છું છું કે મંદિર આ પ્રયાસોમાં દેશના વધુ સંકલ્પો ઉમેરે. શ્રી અન્ન અભિયાન હોય, સ્વચ્છતા અભિયાન હોય કે કુદરતી ખેતી પ્રત્યે જનજાગૃતિ, તમે આ પ્રયાસોને વધુ વેગ આપી શકો છો. મને ખાતરી છે કે શ્રીસીતા રામા સ્વામીજીના આશીર્વાદ દરેક પર વરસશે અને અમે દેશના સંકલ્પો માટે કામ કરવાનું ચાલુ રાખીશું. ફરી એકવાર આ શુભ અવસર પર આપ સૌને ખૂબ ખૂબ અભિનંદન.

ખુબ ખુબ આભાર.

અસ્વીકરણ: આ પ્રધાનમંત્રીના ભાષણનો અંદાજિત અનુવાદ છે. મૂળ ભાષણ હિન્દીમાં આપવામાં આવ્યું હતું.

YP/GP/NP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com