কেন্দ্রগী গৃহ মন্ত্রী অমদি কোওপরেসন মন্ত্রী, শ্রী অমিত সাহনা ঙসি নই দিল্লীদা পাঙথোকপা স্তেত অমদি য়ুনিয়ন তেরিতরীশিংগী এন্তি-নার্কোতিক্স তাক্স ফোর্সকী মকোকশিংগী ওইবা ১বা নেস্নেল কন্ফরেন্সতা অথোইবা মীথুং ওইনা শরুক য়াখ্রে‍। শ্রী অমিত সাহনা এনুএল রিপোর্ত (স্পিসিএল ইদিসন), ২০২২ অমদি দ্রগ ফ্রী ইন্দিয়া, নেস্নেল রিজোলুসন বুকলেৎ ওফ নার্কোতিক্স কন্ত্রোল ব্যুরো (এন.সি.বি.)সু ফোঙখি‍। শ্রী সাহনা লৈবাকসিদা আইন্না য়াদবা ফার্মিংশিং খঙদোকপদা অমদি থুগাইবদা মতেং পাংগদবা ‘মেপ দ্রগ’ কৌবা মোবাইল এপ অমদি ৱেব পোর্তেল অমসু লোঞ্চ তৌখি‍। কেন্দ্রগী গৃহ মন্ত্রীনা এন.সি.বি., ইন্দোর রীজনেল য়ুনিৎকী ওফিস কম্প্লেক্স ভর্চুএল ওইনা শঙ্গাখি‍। থৌরম অসিদা সোসিএল জস্তিস এন্দ ইম্পৱারমেন্তকী কেন্দ্র মন্ত্রী, দোক্তর বিরেন্দ্র কুমার, গৃহ রাজ্য মন্ত্রী, আ্রী নিত্যানন্দ রাই, কেন্দ্রগী হোম সেক্রেতরী, অমদি এন.সি.বি.গী দাইরেক্তর জেনেরেল, শ্রী এস.এন. প্রধানসু অতৈ মীথুংশিংগা লোয়ননা শরুক য়াখি‍।

শ্রী অমিত সাহনা মহাক্কী ৱারোলদা, প্রধান মন্ত্রী শ্রী নরেন্দ্র মোদীগী লমজিং মখাদা, ঐখোয়না ২০৪৭ ফাওবদা দ্রগ-ফ্রী ওইবা ভারত অমা শেমগৎনবগীদমক অচেৎপা ফিরেপকা লোয়ননা থবক তৌগনি হায়খি‍। দ্রগ-ফ্রী ইন্দিয়া হায়বসি তুংদা লাক্কদৌরিবা মীরোলশিং অমদি তুংলমচৎকীদমক য়াম্না মরুওই, অমদি অসিগুম্লবা মরুওইরবা তানফমসিদা ঐখোয়না অচেৎপা ফিরেপকা লোয়ননা, পুন্না হোৎনমিন্নদুনা তীম ইন্দিয়া অমদি লৈঙাক পুম্বনা পুন্না চঙশিনমিন্নরবদি দ্রগকী মায়োক্তা চঙশিল্লিবা লান্থেং অসি শোয়দনা মায় পাক্কনি হায়না মহাক্না হায়খি‍।

কেন্দ্রগী গৃহ মন্ত্রীনা ঙসি ইলিগেল ফার্মিং খঙদোক্নবা এপ অমা লোঞ্চ তৌরে, এন.সি.বি.গী এনুএল রিপোর্ত ফোঙলে অমদি এন.সি.বি.গী রীজনেল ওফিসসু ইন্দোরদা শঙ্গারে‍ হায়খি‍। লৌখৎলিবা খোঙথাঙশিং অসিনা নার্কোতিক্সকী মায়োক্তা ঐখোয়না চঙশিল্লিবা লান্থেং অসিদা ইনোৎ হাপ্লগনি হায়না মহাক্না হায়খি‍। নহা মীরোলশিং অসি ঐখোয়গী লৈবাক অসি চাওখৎলক্নবগী য়ুম্ফমনি, অদুবু নার্কোতিক্সনা হায়রিবা নহা মীরোলশিং অসিবু মাঙহন্দুনা, লৈবাক চাওখৎনবগী য়ুম্ফম মপাঙ্গল শোন্থহল্লি, অমদি অসিগুম্বা অশোনবা য়ুম্ফমদা মপাঙ্গল কনবা লৈবাক অমা শেমগৎপা ঙম্লোই হায়না শ্রী সাহনা ফোঙদোকখি‍। লৈবাকসিগী নহাশিং মাঙহনবতা নত্তনা, নার্কোতিক্স লোন্না পুথোক পুশিন তৌবনা লৈবাক্কী শেন্মিৎলোন্দসু চৈথেং পীরি‍। নার্কোতিক্স লোন্না পুথোক পুশিন তৌবনা লৈবাক্কী শেন্মিৎলোন্দা চৈথেং পীবতা নত্তনা, নার্কো-তেররগী খুত্থাঙদা নেস্নেল সিক্যুরিতী অমদি ঙমখৈবুসু মপাঙ্গল শোন্থহল্লি হায়না মহাক্না ফোঙদোকখি‍।

মালেম শিনবা থুংনা লৈরিবা লৈবাক কয়ানা নার্কোতিক্সকী মায়োক্তা থেংনরিবা লান্থেং অসিদা মায় পাকপা ঙমদ্রবসু, ঙসি ভারতনা মীওই করোর ১৩০গী অচেৎপা ফিরেপকা লোয়ননা মাঙদা চঙশিনমিন্নদুনা লান্থেং অসি মায় পাকপা ঙমগদবা তানফম অদুদা লৈরি হায়না শ্রী অমিত সাহনা হায়খি‍। লান্থেং অসিদা মায় পাকপা ঙমদবগী মরম অহুম লৈবা য়াই হায়না মহাক্না হায়খি: মসি লৈঙাকখক্তনা থেংনগদবা লান্থেং নত্তে, মীয়াম্নসু থেংনগদবনি, মসি দিপার্তমেন্ত অমখক্তনা থেংনগদবা নত্তে, পুম্নমক্না চপ মান্নবা খোঙজেলদা থেংনমিন্নগদবনি‍। চঙশিল্লিবা খোঙজঙ অসিদা অশোয়বা অমত্তা লৈহল্লোইদবনি অমদি দ্রগ শীজিন্নরিবা মীওই অদুনা ভিক্তিমনি অদুগা দ্রগ করবার তৌরিবশিং অদুনা ক্রিমিনেলনি, অমদি মখোয়গী মথক্তা মতিক চাবা থবক লৌখৎপা হায়রিবা পান্দম অসি ময়েক শেংনা থমগদবনি‍। ঐখোয়না মসিদা থবক পায়খৎলবদি ঐখোয় শোয়দনা মায় পাকপা ঙমগনি হায়না শ্রী সাহনা হায়খি‍। প্রধান মন্ত্রী শ্রী নরেন্দ্র মোদীগী লুচিং মখাদা গৃহ মন্ত্রালয়না ইনস্তিত্যুস্নেল স্ত্রকচর মপাঙ্গল কনখৎহনবা, নার্কো এজেন্সী পুম্নমক্কী মরক্তা খুৎশম্ননা চৎমিন্নবা অমদি মীয়ামদা পাক শন্না ৱাখল তাহন্নবা কেম্পেন – হায়রিবা মমায় ৩ লোংবা লাল্লোং অমা শেম্লে‍। ঐখোয়না পি.এম. মোদীগী “তীম ইন্দিয়া অমদি হোল ওফ গভর্নমেন্ত এপ্রোচ” হায়বা লাল্লোং অসিদা পুন্না চঙশিনমিন্নদুনা দ্রগকী মায়োক্তা থেংনগদবনি হায়না মহাক্না হায়খি‍। মহাক্না নার্কোতিক্সকী মায়োক্তা লান্থেংননবগীদমক মীওই অমনা পার্তী পোলিতিক্স অমদি পোলিতিকেল আইদিএলোজীদগী ৱাংমা লান্থোরকপা তাই হায়খি‍। লান্থেং অসি পার্তী পোলিতিক্স অমদি পোলিতিকেল আইদিওলোজীগী ৱাংমদা থোরক্তুনা থেংনগদবনি হায়না মহাক্না হায়খি‍। স্তেত লৈঙাক পুম্নমক্না জিরো তোলেরেন্সকী পরিংদা দ্রগ-ফ্রী ইন্দিয়াগী পান্দম ফংনবা চঙশিনগদবনি হায়না মহাক্না ফোঙদোকখি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা হৌখিবা চহি অহুমসিদা দ্রগকী মায়োক্তা চত্থরিবা লান্থেং অসিগী মহৈ পুক্নিং থৌগৎনিংঙাই ওই হায়খি‍। ইং ২০০৬-২০১৩গী মরক্তা কেস ১,২৫৭খক্তমক রেজিস্তর তৌখি, অদুগা ২০১৪-২০২২ মনুংদনা মশিং অসি চাদা ১৮১গী চাংদা হেনগৎলক্তুনা কেস ৩,৫৪৪ রেজিস্তৌ তৌরকখি হায়না শ্রী সাহনা পাউদমখি‍। হায়রিবা মতমসিদা, ফাখিবা অপুনবা মীশিংসু হান্না ১,৩৬৩ ওইরম্বদগী ৫,৪০৮ ওইরক্তুনা চাদা ৩০০গী চাংদা হেনগৎলকখি‍। ২০০৬-২০১৩ মনুংদা দ্রগ কিলোগ্রাম লাখ ১.৫২ ফাগৎখি অদুগা ২০১৪-২০২২ মনুংদনা দ্রগ কিলোগ্রাম লাখ ৩.৭৩ ফাগৎখি‍। ২০০৬-২০১৩ মনুংদা লুপা করোর ৭৬৮ লোমগী দ্রগ ফাগৎখি, অদুগা ২০১৪-২০২২গী মনুংদনা শরুক ২৫ হেনগৎলক্তুনা লুপা করোর ২২,০০০গী দ্রগ ফাগৎখি‍।

ঐখোয়না ‘বতম তু তোপ’ অমদি ‘তোপ তু বতম’ মওংদা মাঙদা চঙশিন্দুনা দ্রগ নেতৱর্ক পুম্বা থুগাইগদবনি হায়না শ্রী অমিত সাহনা হায়খি‍। ইন্তরস্তেত অমদি ইন্তরনেস্নেল কেস খরদা মওং চুম্না থিগৎনবগীদমক কেসশিং অদু এন.সি.বি.দা শিন্নদুনা হায়রিবা এপ্রোচ অসিদা চঙশিনগদবনি হায়খি‍। এন্তি-নার্কোতিক্স তাক্স ফোর্স অমদি কন্ফরেন্স অসিগী মরুওইবা পান্দমদি ‘সোলুসন ওরিএন্তেদ থিঙ্কিং’ হায়বসিনি হায়না মহাক্না ফোঙদোকখি‍। দ্রগকী মায়োক্তা চত্থরিবা লান্থেং অসিদা স্তেকহোল্দর পুম্নমক পুন্না চৎমিন্ননবগীদমক ভারত লৈঙাক্না জোইন্ত কোওর্দিনেসন কম্মিতী অমসু শেম্লে হায়না মহাক্না মখা তাখি‍। স্তেত পুম্নমক্না এন.সি.বি.না শেমগৎপা এনকোর্দ অমদি নিদান পোর্তেলশিং মপুং ফানা শীজিন্নবা মথৌ তাই হায়না শ্রী সাহনা ফোঙদোকখি‍।

দ্রগকী মায়োক্তা লান্থেংনবদা ঐখোয়দা – পি.আই.দি.এন.দি.পি.এস. অমদি লনথুম ফাজিনবা – হায়রিবা মরুওইবা খুৎলায় অনি অসি লৈরি হায়না কেন্দ্রগী গৃহ মন্ত্রীনা হায়খি‍। দ্রগ দীলরশিংগী মায়োক্তা মিনুংশি লৈতনা থবক লৌখৎপা তাই, মদুতদা লান্থেং অসি খুমাঙ চাওশিনবা ঙমগদৌরিবনি হায়না মহাক্না হায়খি‍। দার্ক নেৎ অমদি ক্রিপ্তোকরেন্সী শীজিন্নবা থিংনবগীদমক স্তেতশিংনা কেন্দ্রগী এজেন্সীশিংগা খুৎশম্ননা চৎমিন্নবা তাই হায়না শ্রী সাহনা হায়খি‍। মসিগা লোয়ননা, স্তেত পুম্নমক্না ব্লোক চেন এনালাইসিস, মেপ ইন্তলিজেন্স অমদি দিজিতেল ফোরেন্সিকনচিংবা মতমসিগী তেক্নোলোজীশিং শীজিন্ননবগীদমক নেস্নেল ফোরেন্সিক সাইন্স য়ুনিভর্সিতীগা পুন্না থবক তৌমিন্নগদবনি‍। হায়রিবা তেক্নিকশিং অসিগা লোয়ননা ঐখোয়না থবক পায়খৎলবদি, লান্থেং অসিদা ঐখোয়না খোঙফম অনি মাঙদা চঙশিনবা ঙমগদৌরিবনি হায়না মহাক্না ফোঙদোকখি‍।

দ্রগশিং থৌওং চুম্না মাঙহন তাকহনবা মথৌ তাই, মদু নৎত্রবদি, শেঞ্জা থুমজানা মরম ওইরগা দ্রগশিং অমুক শীজিন্নরকপগী ওইথোকপা লৈ হায়না শ্রী অমিত সাহনা ফোঙদোকখি‍। দ্রগ মাঙহন তাকহনবগী থবক থৌরমশিং মীয়াম মাঙদা পাঙথোক্কদবনি, অমদি মসিনা মীয়ামদা ৱাখল তাহনবা হেনগৎহনগনি হায়না মহা্না এজেন্সী পুম্নমক্কী মফমদা হায়খি‍। স্তেত পুম্নমক্না কেসশিং থুনা লোইশিন্নবগীদমক এন.দি.পি.এস. অমদি ফাস্ত ত্রেক কোর্তশিং লিংখৎননবা স্তেত হায় কোর্তশিংগা পুন্না থবক তৌমিন্নবা তাই হায়না শ্রী সাহনা ফোঙদোকখি‍। পুলিস মোদর্নাইজেসন অমদি ফোরেন্সিক সাইন্স লেবোরেতরী (এফ.এস.এল.)শিং অপগ্রেদ তৌনবগীদমক লৈরিবা কেন্দ্রগী ফন্দশিং নার্কোগা মরী লৈনবা এফ.এস.এল. অপগ্রেদ তৌবদা শীজিন্নবা তাই‍ হায়না মহাক্না হায়খি‍। এন.দি.পি.এস.কী কম্মর্সিএল এফ্যার্সকী মতাঙদা থিজিন হুমজিনবগী থবকশিং ই.দি. অমদি অতৈ এজেন্সীশিংদা শীন্নগদবনি‍। ঐখোয়গী মীৎয়েঙদি নেতৱর্ক পুম্বসিবু থুগাইবদা থমগদবনি‍। মসিগী মথক্তা, ঐখোয়না রিহেবিলিতেসন অমদি মীয়ামদা ৱাখল তাহনবগী থবকশিংসু পায়খৎকদবনি, মসিনা ঐখোয়না চাউনা কান্নহনগনি, হায়না শ্রী সাহনা ফোঙদোকখি‍।

কেন্দ্রগী গৃহ মন্ত্রী অমদি কোওপরেসন মন্ত্রীনা, পুলিস তেক্নোলোজী মিসনগী মখাদা ভারত লৈঙাক্না পীরিবা ফেসিলিতীশিংগী মরক্তা নার্কোতিক্সতা অহানবা প্রাইওরিতী পীগদবনি হায়খি‍। এনকোর্দকী থাক মরিমক্কী মীফমশিং, - কেন্দ্রদা অনি অমদি স্তেতকী থাক্তা অনি, চাং নাইনা পাঙথোক্কদবনি‍। দিস্ত্রিক্তকী থাক্তা পাঙথোকপা এনকোর্দ মীফম খ্বায়দগী মরুওইবনি‍। স্তেত খুদিংমক্না দিস্ত্রিক্তকী থাক্কী এনকোর্দ মীফমশিং পাঙথোকপদা চপ মান্ননা হোৎনগদবনি‍। ইনফোর্মেসন পুম্নমক সেন্ত্রেলাইজ এনকোর্দ পোর্তেলদা অপলোদ তৌগদবনি, মসিনা পুম্নমক্তা নোলেজ মেনেজমেন্ত সিস্তেমগী মওংদা মতেং ওইগনি‍। ঐখোয়গী ইনভেস্তিগেসন অসি ইন্তরনেস্নেল দ্রগ ত্রাফিক্কিং নেতৱর্ক য়ৌহনবা তাই অমদি লৈবাক্কী মফম অমা হেক্তদা লৈরিবা নেতৱর্ক্কী মরী পুম্নমক থদৎপা হায়বসি এন্তি-নার্কোতিক্স তাস্ক ফোর্সশিংগী মকোকশিংগী থৌদাংনি‍। দ্রগকী প্রোব্লেম অসিগী মরমদা ঈ-পাউ ফংনবগীদমক অমদি ঐখোয়গী লান্থেংদা পুক্নিং চঙনবগীদমক দিস্ত্রিক্ত অমদি স্তেতকী ওইবা দ্রগ নেতৱর্ক চার্ত শেমগৎকদবনি‍। সিস্তেম অসিবু মায় পাকপদা ওন্থোক্নবগীদমক, মসিদা ঐখোয়গী সেন্সিতিবিতীবু পুশিনবা তাই‍। সমুদ্রগী লম্বীদা দ্রগ লোন্না পুথোক পুশিন তৌবা থিংনবগীদমক কেন্দ্রগী এজেন্সীশিং, সমুদ্র খোঙবালগী স্তেতশিং অমদি লমদমদুগী মীওইশিংগগী মরক্তা য়াম্না ফবা মওংনা খুৎশম্ননা চৎমিন্নবা মথৌ তাই হায়না শ্রী সাহনা ফোঙদোকখি‍।

শ্রী অমিত সাহনা, দ্রগকী মায়োক্তা চত্থরিবা লান্থেং অসি তশেংনমকা খুদোংথিনিংঙাইনি অদুবু ২০৪৭ ফাওবদা দ্রগ-ফ্রী ইন্দিয়া পুরক্নবগী থম্লিবা প্রধান মন্ত্রী শ্রী নরেন্দ্র মোদীগী পান্দম অসি ফংহন্নবগীদমক ঐখোয় অচেৎপা ফিরেপকা লোয়ননা মাঙদা চঙশিনবা তাই হায়খি‍।

****