প্রধান মন্ত্রী শ্রী নরেন্দ্র মোদীগী লুচিং মখাদা লৌবা মশক নাইবা ৱারেপ অমা ওইদুনা, দিপার্তমেন্ত ওফ পর্সোন্নেল অমসুং ত্রেনিং (DoPT)না স্তাফ সেলেক্সন কম্মিসন মলতিতাস্কিং স্তাফ (SSC MTS) পরিক্ষা 2022 অমসুং CHSLE পরিক্ষা 2022বু হিন্দি অমসুং ইংলিশকী মথক্তা রিজনেল লোল 13দা পাংথোকপগী অয়াবা পীখ্রে হায়না দাঃ জিতেন্দ্র সিংহনা হায়খ্রে। প্রধান মন্ত্রী শ্রী নরেন্দ্র মোদীগী য়াথংগী মতুং ইন্না লেপখিবা পুৱারী ওইরবা ৱারেপ অসিনা লোকেলগী নহাশিংনা লৈবাক্কী পথাপ কয়াদা শরুক য়াহন্নিংবগী শাফু পীগনি অমসুং লোকেলগী লোলবুসু পুক্নিং থৌগৎলগনি।

ৱাহং চেশিং হিন্দি অমসুং ইংলিশকী মথক্তা অসি অসামীজ, বেঙ্গালী, গুজরাতী, মরাথী, মলায়ালম, কন্নর, তমিল, তেলেগু, ওরিয়া, উর্দু, পঞ্জাবী, মনিপুরী অমসুং কোঙ্কানী লোলদা শেমগনি

ৱারেপ অসিনা মীওই কয়া অমনা মমা/রিজনেল লোলদা পরিক্ষা থাহল্লগনি অমসুং থবক খনবগী চাংসু হেনগৎহনগনি

SSCগী পরিক্ষাশিংবু হিন্দি অমসুং ইংলিশকী মথক্তা অতোপ্পা লোলশিংদসু পাংথোক্নবা তোঙান-তোঙানবা রাজ্যশিংনা লেপ্তনা তকশিন্দুনা লাক্লিবনি। অতোপ্পা হীরম কয়া (কম্মিসন অসিনা পাংথোকপা পরিক্ষাশিং অসিগী স্কিম অমসুং সীলেবস)গী মনুংদগী মসিগী মতাং অসিদসু কুপ্না য়েংশিন্নবা হায়দুনা সরকারনা এক্সপর্ত কম্মিত্তী অমা শেমখ্রবনি।

এক্সপর্ত কম্মিত্তী অসিনা মখোয়গী রিপোর্ত্তা অসুম্না রিকম্মেন্দেসন পীখি, “SSCগী ফম, মরু ওইনা গ্রুপ-Cগী, নৈনবা মতমদা মসিগী ফমশিং অসিদি সরকার অমসুং মীয়ামগী মরক্তা তত্তনা পাউ ফাওনবগী থাক্তা লৈ হায়না তাকখি। মখল কয়াগী লোল ঙাঙবা লৈবাক অমা ওইরিবা ভারত্তা 10 অমসুং 12কী পরিক্ষা অসি তোঙান-তোঙানবা লোলদা থাবা য়াহনবা হায়বসিনা কান্নবা কয়া পুরক্কনি। রেলৱে রিক্রুতমেন্ত বোর্দ (RRB)/ইন্সতিত্যুত ওফ বেঙ্কিং পর্সোন্নেল সেলেক্সন (IBPS)না মখোয়গী পরিক্ষাশিংদা লোল 14 শিজিন্নবগুম্না SSCসু থৌওং অসি হৌদোকপা য়াই অমসুং সংবিধানগী সেদ্যুল VIIদা য়াওরিবা লোল খুদিংবু মতুং তারকপদা হাপচিল্লকপা য়াই”।

এক্সপর্ত কম্মিত্তী অসিগী রিকম্মেন্দেসনবু সরকারনা য়াখ্রে অমসুং SSCগী মফমদা তঙাই ফদবা কাঙলোন য়াৎনবা হায়খ্রে।

থৌওং অসি পাংথোকপা হৌবা ওইনা, কম্মিসন অসিনা MTS পরিক্ষা 2022 অমসুং CHSLE পরিক্ষা 2022বু রেলৱে রিক্রুতমেন্ত বোর্দ (RRB)/ইন্সতিত্যুত ওফ বেঙ্কিং পর্সোন্নেল সেলেক্সন (IBPS)না মখোয়গী পরিক্ষাশিংদা শিজিন্নবগুম্বা লোল 15দা (রিজনেল লোল 13+হিন্দি+ইংলিশ) পাংথোক্নবা ৱারেপ লৌখ্রে। MTS পরিক্ষাগী নোতিস অসি হান্ননা থোকখ্রে। CHSL পরিক্ষা অসি তোঙান-তোঙানবা লোলদা পাংথোক্কনি হায়বগী নোতিস অসি মে-জুন 2023দা থোক্লগনি।

পর্সোন্নেল, পব্লিক গ্রাইবেন্স অমসুং পেন্সনগী কেন্দ্রগী রাজ্য মন্ত্রী, দাঃ জিতেন্দ্র সিংহনা সংবিধানগী নিপানশুবা সেদ্যুলদা চনবা লোল খুদিংসু মতুং তারকপা মতমশিংদা মনুং চলহন্নবা হোৎনরি হায়খ্রে। ঐখোয়গী লৈবাক্কী লোল মখল কয়াবু মশক খঙবা অমসুং ইকায় খুম্নবগী মথক্তা মীওই কাঙলুপ খুদিংনা চপ মান্নবা খুদোংচাবা ফংহন্দুনা রিজনেল ওইবা খেন্নবা লৈহন্দনবা অমসুং সংবিধানগী ৱাখল্লোন মপুং ফাহনবা ঙম্নবা SSCনা লেপ্তনা হোৎনরি হায়না মহাক্না মখা তাখি।

হায়রিবা থবকশিং অসি থবক চঙনবা হোৎনবদা মীপুম খুদিংনা চপ মান্নবা খুদোংচাবা ফংবা অমসুং লোলগী পলনা মরম ওইরগা মীওই অমত্তনা খুদোংচাদবা নংদবা হায়বা প্রধান মন্ত্রীগী মঙলানগা মরী লৈনৈ হায়না মন্ত্রীনা হায়খি। থৌওং অসিনা ইংলিশ অমসুং হিন্দিদা পাংথোক্লম্বা পরিক্ষাশিংগী ওইনা তোঙান-তোঙানবা রাজ্যশিং, মরু ওইনা খা ভারতকী রাজ্যশিংগী মফমদগী লাকখিবা য়াম্লবা ৱাকৎশিংগী ৱারোইশিন পুরক্লগনি হায়না মন্ত্রীনা হায়খি।

MTS পরিক্ষা 2022গী নোতিস অসি সোসিএল মীদিয়া অমসুং কেন্দিদেৎশিংনা, মরু ওইনা খা ভারতকী কেন্দিদেৎনা য়াম্না হরাওনা লৌশিনখি হায়না মন্ত্রীনা হায়খি। লোল অমদগী হেনবা অহানবা পরিক্ষা (MTS 2022) অসি মে 2দগী হৌগনি।

মমশাগী মমা লোলদা পরিক্ষা থাবগী খুদোংচাবা লৌনবা অমসুং লৈবাক সেবা তৌববু মশাগী কেরিয়র ওইহন্নবা মীওই মশিং য়াম্না পরিক্ষা থাহন্নবা পুক্নিং থৌগৎপগী অচৌবা কেম্পেন অমা রাজ্য/UT সরকারনা পাংথোকপা য়াবগী ওইথোকপা লৈ হায়না দাঃ জিতেন্দ্র সিংহনা হায়খি।

প্রধান মন্ত্রী শ্রী নরেন্দ্র মোদীগী লুচিং মখা অমসুং পর্সোন্নেল, পব্লিক গ্রাইবেন্স অমসুং পেন্সনগী কেন্দ্রগী রাজ্য মন্ত্রী, দাঃ জিতেন্দ্র সিংহগী পাউতাক্কী মখা পোন্না, পর্সোনেল অমসুং ত্রেনিং বিভাগনা বিভাগনা রিজনেল লোল শিজিন্নবা অমসুং চাউখৎহনবগী থৌওংবু পুক্নিং থৌগৎনবা খোঙফম চেৎলি।

*****