কেন্দ্র সরকারনা প্রিভেন্সন ওফ ক্রুএলতী তু এনিমেল এক্ত, 1960গী মখাদা অমসুং এনিমেল বর্থ কন্ত্রোল (দোগ) রুল, 2001গী মহুৎ শিনবা ওইনা G.S.R. 193(E) মতুং ইন্না তাং মার্চ 10, 2023 থাবা এনিমেল বর্থ কন্ত্রোল রুল, 2023 নোতিফাই তৌখ্রে। ইকায় খুম্ননিংঙাই ওইরবা সুপ্রীম কোর্তনা ইং 2009গী রিত নম্বর 691গী এনিমেল ৱেলফিয়র বোর্দ ওফ ইন্দিয়া অমসুং পীপল ফোর ইলিমিনেসন ওফ স্ত্রে ত্রৌবলগা মরী লৈনবা তাখিবা কাঙলোনশিং রুল অসিনা ইল্লি। ইকায় খুম্ননিংঙাই ওইরবা সুপ্রীম কোর্তনা থোকখিবা তোঙান-তোঙানবা ওর্দর কয়াদা হুইশিংগী মফম হোংদোকপীবগী অয়াবা পীদে হায়না অখন্ননা পল্লি।   

হৌজিক চৎনরিবা রুলগী মখা পোন্না, লম্বীদা লৈবা মপু পান্দবা হুইশিংবু স্তেরিলাইজ অমসুং তীকা থাবগী থবকশিং পাংথোক্না এনিমেল বর্থ কন্ত্রোল প্রোগ্রামশিং অসি মরী লৈনবা লোকেল বোদী/ম্যুনিসিপালিতী/ম্যুনিসিপাল কোর্পোরেসন অমসুং পঞ্চায়তশিংনা পায়খৎকদবনি। মসিগা লোয়ননা, ABC প্রোগ্রাম পাংথোকপা মতমদা চত্থবা তাথী তাওই তৌবগী থৌওংশিং য়েংশিনবগী থৌদাংসু মখোয়গীনি। লোকেল বোদীশিংনা রুলশিং অসি নিংথীনা চৎনহন্দুনা এনিমেল বর্থ কন্ত্রোল প্রোগ্রাম পায়খৎপা য়াই অমসুং মসিনা এনিমেল ৱেলফিয়রগী হীরমগী ৱারোইশিন পুরকপগী শরুক অমা ওইনা লম্বীদা লৈবা মপু পান্দবা হুইশিংগী মশিং হন্থহনবদা তেংবাংগনি।

ম্যুনিসিপাল কোর্পোরেসনশিংনা ABC অমসুং এন্তি রেবিজ প্রোগ্রাম পুন্না পাংথোকমিন্নবগী মথৌ তাই। রুল অসিনা হুইশিংবু অতোপ্পা মফম অমদা হোংদোক্তবীদা মীওইবা অমসুং লম্বীদা লৈবা হুইশিংগী মরক্তা পামদবা থৌদোকশিং করম্না মাইয়োক্নগদগে হায়বগী কাঙলোনশিং পীরি।

রুল অসিগী মখাদা লৈবা তঙাই ফদবা থৌওং অমদি এনিমেল বর্থ কন্ত্রোল প্রোগ্রাম অসি থৌওং অসিগীদমক্তা অখন্ননা খল্লবা AWBIনা শকখঙলবা ওর্গনাইজেসন্না পাংথোক্কদবনি হায়বসিনি। মসিগুম্বা ওর্গনাইজেসনশিংগী লিস্ত অসি মতম মতমগী মতুং ইন্না বোর্দনা ৱেবসাইত্তা ফংহনগনি। কেন্দ্র সরকারনা রাজ্য পুম্নমক্কী চীফ সেক্রেতরী, এনিমেল হসবেন্দরী অমসুং অর্বান দিভেলপমেন্ত বিভাগকী প্রিন্সিপাল সেক্রেতরীশিংদা হান্ননা চিথী থাখ্রবনি। মরম অদুনা, লোকেল বোদীশিংনা রুলশিং অসি নিংথেনা ইনবীনবা অমসুং ABC প্রোগ্রামগীদমক্তা অয়াবা পীদবা অমসুং AWBIনা শকখঙদবা ওর্গনাজেসন নত্ত্রগা রুলশিংদা পল্লিবা ৱারোলগী ৱাংমদা প্রোগ্রাম অসি পায়খৎপগী অয়াবা পীদনবা খঙহল্লি।

**********