অৱাং-নোংপোক লমদমগী ত্রাইবেলশিংদা খুদোংচাবা পীনবা ভারত সরকারনা ত্রাইবেল এফেয়ার্স মিনিস্ত্রিনা  অনৌবা স্কিম “মার্কেত্তিং এন্দ লোজিস্তিক্স দিবলপমেন্ত ফোর প্রোমোসন ওফ ত্রাইবেল প্রদক্স ফোর্ম নোর্থ-ইস্তর্ন রিজন(পি তি পি-এন ই আর)” হৌদোক্লে। অৱাং-নোংপোক রাজ্যশিংগী ত্রাইবেলশিংগী পোৎথোকসিং লৈশিনবা, পুথোক-পুশিন অমসুং য়োনবগী খুদোংচাবা হেনগৎহন্দুনা ত্রাইবেল খুৎহৈবশিংগী হিংনবগী লম্বী হেন্না মপাঙ্গল কনখৎহন্নবা স্কিম অসিনা পান্দম থম্লি। স্কিম অসি অরুনাচল প্রদেস, অসাম, মনিপুর, মেঘালয়, মিজোরম,নাগালেন্দ, ত্রিপুরা অমসুং সিক্কিমদা চৎনগনি।

হয়েং ইম্ফালগী কোনুং মমাঙদা লৈবা এম.এস.এফ.দি.এস ওদিতোরিয়মদা পাংথোকপা থৌরম অমদা স্কিম অসি ত্রাইবেল এফেয়ার্সকী য়ুনিয়ন মিনিস্তর শ্রী অর্জুন মুন্দানা হৌদোক্কনি অমসুং থৌরম অদুদা মনিপুরগী চীফ মিনিস্তর শ্রী এন বিরেন সিংহ অমসুং অতোপ্পা শক্নাইরবশিং শরুক য়াগনি।

ইনকুবেসনগী মতেং, স্কিল অমসুং ওন্ত্রেপ্রেনিউয়রশিপ হেনগৎহনবা, পোৎথোক লৈশিনবা, য়োনফম শীনবা, পুথোক-পুশিনা অমসুং পব্লিসিতিগী মতেং পীদুনা ত্রাইবেল খুৎহৈবশিংগী শেন্থোক হেনগৎহন্নবা খুদোংচাবশিং পীনবা মার্কেত্তিং এন্দ লোজিস্তিক্স দিবলপমেন্ত ফোর প্রোমোসন ওফ ত্রাইবেল প্রদক্স ফোর্ম নোর্থ-ইস্তর্ন রিজন স্কিম্না পান্দম থম্লি। স্কিম অসিগী শরুক অমা ওইনা, অৱাং-নোংপোক লমদমগী তোঙান-তোঙানবা জিলাশিংদা ২০২৩গী এপ্রিল অমসুং মে থা মনুংদা হয়েংদগী হৌনা ত্রাইবেল আর্তিসান মেলা(তাম) ৬৮ পাংথোক্তুনা অৱাং-নোংপোক লমদমগী ত্রাইবেল খুৎহৈবশিং খনগৎনবা স্কিম অসিনা থৌরাং তৌরে।

মখোয়গী চহি কয়া কুইরবা চৎনবীশিং ঙাক্তুনা থম্বগা লোয়ন্না, ত্রাইবেল মীয়ামগী পুন্সি মহিং ফগৎহন্নবা ত্রাইবেল এফেয়ার্স মিনিস্ত্রিগী নোদেল এজেন্সি ত্রাইফেদনা লেপ্তনা থবক পায়খৎলি।

*******