ঙাক-শেল মন্ত্রী, শ্রী রাজনাথ সিংহনা লুচিংদুনা এপ্রিল 11, 2023দা নই দিল্লীদা কেন্দ্রিয় সাইনিক বোর্দ (KSB)গী 31শুবা মীফম ফমখ্রে। KSB হায়বসি এক্স-সর্ভিসমেনশিংগী য়াইফ য়ুম্বাল অমসুং রিসেত্তলমেন্তকী থৌদাংশিং খুৎশিন্নরবা কেন্দ্র সরকার অমসুং য়ুনিয়ন তেরিতোরী (UT)শিংগী খ্বাইদগী মকোক থোংবা বোদী অমনি। ESMশিংগী য়াইফ য়ুম্বাল অমসুং রিসেত্তলমেন্তকীদমক্তা পোলিসী শেমদুনা মখোয়বু তেংবাংবগী পাম্বৈ কয়া মীফম অদুদা খন্নখি।

শ্রী রাজনাথ সিংহনা মহাক্কী মপুং ওইবা ৱারোল ঙাঙবদা এক্স-সর্ভিসমেনশিংবু লৈবাক্কী লন্নি অমসুং মখোয়গী মমল য়াম্লবা এক্সপেরিএন্সশিংবু লৈবাক্কী কান্ননবগীদমক্তা শিজিন্ননবা অনৌবা পাম্বৈ শেম্নবা রাজ্য/য়ু.তি.শিংগী মফমদা খঙহনখ্রে। তোঙান-তোঙানবা রাজ্য কয়াদা থবক চঙবদা মখোয়গী তোঙানবা ফম খাক্লি অমসুং খুদোংচাবা অসি মখোয়না শোইদনা ফংনবা য়েংশিনবগী মথৌ তাই হায়না মহাক্না ফোংদোকখি।

KSBনা পাংথোক্লিবা থবকশিং অসিবু কোওপরেতিব ফেদেরেলিজমগী মশক নাইরবা খুদম অমনি হায়রদুনা, কেন্দ্র অমসুং রাজ্য/য়ু.তি.শিংনা লান্মীশিংগী য়াইফ থৌরাংগীদমক্তা মতম পুম্বদা খুৎশম্নদুনা থবক পাংথোক্তুনা লাক্লিবশিংবু ঙাক-শেল মন্ত্রীনা থাগৎপা ফোংদোকখি। “রাজ্য নত্ত্রগা রাজনিতী দলশিংগী মরক্তা তোঙান-তোঙানবা হীরম কয়াদা ৱাখল্লোন খেন্নবগী থৌওং লৈ। মসি গনতন্ত্রগী শরুক অমনি। অদুবু, ঐখোয়গী লান্মী অমসুং ভেতেরেনশিংগী য়াইফ থৌরাংগী মতাং লাকপা মতমদা, পুম্নমক্না নাকল অমদা লেপমিন্নৈ। ঐখোয়গী লান্মীশিং অসিগী মতাংদদি খুন্নাই অমসুং রাজনিতীগী মরক্তা চপ মান্নবা ৱাখল্লোন লৈ। ঐখোয়গী আর্ম্দ ফোর্সশিংনা চপ মান্নবা মিৎয়েং য়েংদুনা লৈবাক্কী ঙাক শেনবগুম্না, ঐখোয়গী লান্মীশিংসু মখোয়না থবক্তগী পোত্থারবা মতুংদা খুন্নাইগী নাক্তা অমুক হল্লকপা মতমদা ইকায় খুম্ননিংঙাই ওইবা পুন্সি মহিং অমা হিংহনবা হায়বসি ঐখোয়গী লৈবাক অমসুং মীয়ামগী অপুনবা থৌদাং অমা ওইগদবনি”, মহাক্না হায়খি।

আর্ম্দ ফোর্সশিংবু নহা ওইনা থম্বা হায়বা মিৎয়েং অমগী মতুং ইন্না মশিং য়াম্লবা লান্মীশিংবু মশাগী চহি 35-40 শুরকপা মতমদা মখোয়বু থবক্তগী ইকায় খুম্ননা পোত্থাহল্লি। মসিনা মরম ওইরগা, হৌজিক লৈরিবা এক্স-সর্ভিসমেন লাখ 34 অসিদা চহি খুদিংগী ওইনা চাউরাক্না লান্মী 60,000 হেনগৎহল্লি। শ্রী রাজনাথ সিংহনা ঙাক-শেল মন্ত্রালয়না এক্স-সর্ভিসমেনশিংগী য়াইফ য়ুম্বাল অমসুং চাউখৎ-থৌরাংগীদমক্তা পায়খৎলিবা থবক কয়াগী মমিং পল্লদুনা, ESM ফ্রেতর্নিতীশিংগী য়াইফ য়ুম্বালগীদমক্তা সরকারনা খোঙফম চেৎনা লেপ্লিবা অসিবু নৌহৌননা অমুক নিংশিংখি। “কেন্দ্রিয় সাইনিক বোর্দকী তোঙান-তোঙানবা য়াইফ থৌরাংগী স্কিমশিংগী মখাদা মমাংগী চহি অহুমদা বেনিফিশরী লাখ অহুম হেনবগী মফমদা লুপা করোর 800কী শেলগী তেংবাং পীখি। বেনিফিশরী লাখ 1গী মফমদা মমাংগী শেনবা চহিমক্তদা চাউরাকপা লুপা করোর 240 য়েন্থোকখি। মসিগীদমক্তা মথৌ তাবা বজেৎ খুদিংমক সরকারনা পীরি”, মহাক্না হায়খি।

কির্কীগী পেরাপ্লেজিক রিহেবিলিতেসন সেন্তর; মোহালীগী চেসাইর হোম অমসুং দেহরাদুন, লক্ষনৌ অমসুং দিল্লী য়াওনা লৈবাক শিনবা থুংবদা লৈরিবা ৱার মেমোরিএল হোস্পিতাল 36তা ইন্সতিত্যুস্নেল গ্রান্তশিংসু পীরি হায়না ঙাক-শেল মন্ত্রীনা হায়খি। ESM মরুপশিংগী হেল্থকেয়র অসিদি সরকারগী খ্বাইদগী অহানবা মিৎয়েং চঙবা হীরম্নি অমসুং এক্স-সর্ভিসমেন কন্ত্রিব্যুতরী হেল্থ স্কিম (ECHS) ফেসিলিতী অসিসু চাং নাইনা হঙ্গৎনা য়েংশিল্লি হায়না মহাক্না অমুক্কা হন্না ফোংদোকখি।

রিজনেল সেন্তর 30 অমসুং পোলিক্লিনিক 427না হৌজিক-হৌজিক মথৌ পাংথোক্লি। তাইপ C অমসুং Dগী পোলিক্লিনিক 75কী অয়াবা হান্ননা পীখ্রে অমসুং মখোয়গী মফমদা য়ৌশিনবা হেনগৎহন্নবগীদমক্তা SeHAT OPD ভিদিও প্লেতফোর্মসু হৌদোকখ্রে। তাতা মেমোরিএল হোস্পিতালগুম্বা অনৌবা ক্বালিতী হোস্পিতাল কয়া তোঙান-তোঙানবা মফমশিংদা ইম্পেনেল তৌবগী থবকশিং চত্থখ্রে। বেনিফিশরীশিংনা হিদাল লাংথক ফংবদা হেন্না লাইহন্নবহীদমক্তা হিদাক লৈবগী থোউওংদসু হেন্না নুংঙাইহল্লি।

ESM মরুপশিংদা য়ৌশিনবা ঙম্নবগীদমক্তা অখন্নবা এৱিয়র্নেস অমসুং আউতরিচ প্রোগ্রাম কয়া পাংথোকখিবসু মতাংদসু শ্রী রাজনাথ সিংহনা পনবদা য়াওখি। ভেতেরেনশিংগী য়াইফ য়ুম্বাল অমসুং রিসেত্তলমেন্তকীদমক্তা পুন্না হোৎনরিবা অসিদা মীয়াম অমসুং কোর্পোরেত সেক্তর য়াওহন্নবা অখন্নবা থৌরম কয়াসু পাংথোক্লি। স্কিম পুম্নমক অসিগী এপ্লিকেসন্দগী দিস্ত্রিব্যুসন ফাওবগী থৌওংশিং অসি মপুং ফানা ওতোমেতেদ ওইরবনি হায়না মহাক্না হায়খি।

ঙাক-শেল মন্ত্রীনা আর্ম্দ ফোর্সশিংবু বোর্দর সেক্যুরিতী লৈহনবা অমসুং তঙাই ফদবা লাকপা খুদিংদা, মরু ওইনা, মহৌশাগী অমাঙ-অতা থোকপা মতমদা লৈবাক্কী সেবা তৌবা তৌবগীদমক্তা থাগৎপা ফোংদোকখি। এক্স-সর্ভিসমেনশিংনা থবক্তগী পোত্থারবা ফাওবদা ইমা লৈবাকপু সেবা তৌনিংবগী ইথিল মাঙদনা লৈবগীদমক্তা মহাক্না থাগৎপা ফোংদোকখি। ভেতেরেনশিংনা থৌদোক কয়া অমদা, মরু ওইনা কোবিদ-19গী মাইয়োক্তা লৈবাক্না লান্থেংনবা মতমদা মগুন লৈরবা মতেং কয়া পাংখিবা অদুদা মীয়ামগী পুক্নিং চিংশিনখি। এক্স-সর্ভিসমেনশিংনা সরকারগী থৌওংশিংদা হিদাক লাংথক, ভেন্তিলেতর, ওক্সীজেন সিলিন্দর অমসুং অতোপ্পা তেংবাংগী পোৎলম কয়া লৈবাক্কী তোঙান-তোঙানবা মফমগী তঙাই ফদবা মীওইশিংদা পীদুনা তেংবাংখিবনি।

মীফম অসিগী এজেন্দা পোইন্তশিংদা আর্ম্দ ফোর্স ভেতেরেন্স নুমিৎ পাংথোকপা; ESM খুন্নাই মরক্তা মশাদা চাউথোকচবা হেনগৎহনবা; আর্ম্দ ফোর্স ফ্লেগ দে ফন্দগী মখাদা লৈবা গ্রান্ত হেনগৎহনবা; আর্ম্দ ফোর্স পর্সোনেলশিংদা পীবা স্তেত বেনেফিত/গ্রান্ত মান্নহনবা; রাজ্য খুদিংদা ESM কোর্পোরেসন লিংখৎপা অমসুং থবক খ্বাইদগী নিংথীনা পাংথোকপা রাজ্য সাইনিক বোর্দশিংদা মনা পীবগী থবকশিং হেন্না নিংথীনা পাংথোকপগী পাম্বৈশিং খন্নখি। সীস্তেম ফোর পেন্সন এদমিনিস্ত্রেসন রক্ষা (SPARSH)না এক্স-সর্ভিসমেনশিংনা থেংনরিবা পেন্সনগী খুদোংচাদবশিংগী ৱারোইশিন পুরকপদা তেংবাংগনি হায়বগী থাজবা লৈ হায়না শ্রী রাজনাথ সিংহনা হায়খি। এক্স-সর্ভিসমেনশিংগা লোয়ননা হৌজিক-হৌজিক সর্ভিস্তা লৈরিবা মীওইশিংগী লমগী চয়েৎনবশিংগী ৱারোইশিন পুরকপদা অহেনবা মিৎয়েং চঙবীনবা মহাক্না রাজ্য সরকারশিংগী মফমদা হায়খি।

তোঙান-তোঙানবা রাজ্যশিংগী মন্ত্রী; চীফ ওফ দিফেন্স স্তাফ জেনেরেল অনিল চাউহান; চীফ ওফ নেভেল স্তাফ এদমিরেল আর. হরি কুমার; চীফ ওফ আর্মী স্তাফ জেনেরেল মনোজ পান্দে; সেক্রেতরী (এক্স-সর্ভিসমেন ৱেলফিয়র) শ্রী বিজোয় কুমার সিংহ; KSBগী সেক্রেতরী, কোমোদোর ঐচ.পি. সিংহ; রাজ্য/য়ু.তি.শিংগী মীহুত অমসুং সিভিল অমসুং মিলিতরীগী অতোপ্পা সেনিয়র ওফিসরশিংনা খন্ন-নৈনবা অদুদা শরুক য়াখি।

*****