কম্মর্স অমসুং ইন্দস্ত্রী, কঞ্জ্যুমর এফিয়র্স, ফুদ অমসুং পব্লিক দস্ত্রিব্যুসন অমসুং তেক্সতাইলগী কেন্দ্র মন্ত্রী, শ্রী পিয়ুশ গোয়লনা মালেম্না ভারত্তা হীরম খুদিংগী মতাংদা থাজবগা লোয়ননা য়েংলি হায়খ্রে। ভারতনা ফ্রান্সকা লৈনরা চহি 25কী স্ত্রেতজিক পার্ত্নরশিপ অমসুং চহি 75কী মরুপ-মপাং ওইবগী মরীবু য়াম্না লুনা লৌই হায়না মহাক্না হায়খি। ফ্রান্স অসিদি ঙাক-শেল, শেন্মিৎলোন, ইনভেস্তমেন্তনচিংবা হীরম কয়াগী অপাম্বা খোঙলোয়নি অমসুং মসিগী চহি 25কী খোঙচৎ অসিনা ভারতকী চাউখৎ-থৌরাংগী খোঙচৎকী শক্তমসু উৎলি হায়না মহাক্না হায়খি। ভারতনা ফ্রান্সকা লৈনরিবা মসিগী মরী অসিবু মপাঙ্গল হেন্না কনখৎহনবা পাম্মি হায়না মহাক্না হায়খি। লৈবাক অনিগী মরক্তা অহিংবা থোং অমগী থৌদাং লৌরিবা ফ্রান্সতা লৈরিবা মতিক লৈরবা ভারতকী খুন্নাইনা ভারত অমসুং ফ্রান্সকী তেক্নোলোজী, ইনভেস্তমেন্ত অমসুং তুরিজম্নচিংবা হীরম কয়াগী মরীবু হেন্না চেৎশিলহন্নবা মাইকৈদা লেপ্পা লৈতনা চঙশিল্লি হায়না মহাক্না মখা তাখি।

ভারতকী দাইস্পোরাগা ফ্রান্সকী পেরিস্তা ঙরাং উন্নদুনা ৱারী শাবগী থৌরমদা মন্ত্রীনা ভারতকী চাউখৎপগী খোঙচৎকী ৱারী লিখি অমসুং প্রধান মন্ত্রী নরেন্দ্র মোদীগী লুচিং মখাদা ভারতনা মালেমগী ফম্বাক অসিদা মতৌ করম্না তোমথিন ঙানবা মনিগুম্না শক্তাক শেম্বগী থৌওংবুশু শন্দোক্না পাউদমখি।

ভারতনা ইং 1947দা নিংতম্বা হেক ফংখিবগা মালেমদা মশাগী থাক অমুক হন্না ফংবগী থবক হৌখি হায়না মন্ত্রীনা হায়খি। হন্দক্কী চহিসিদা ভারতনা ফ্রান্সকা স্ত্রেতজিক মরী লৈনরকপগী চহি 25 অমসুং মশাগী নিংতম্বগী চহি 75 মপুং ফাবগী নুংঙাইবা ফোংদোক্লি হায়না মহাক্না হায়খি। হৌজিক্কী মতম অসি মমাংগী চহি 75 অসিদা ফংখিবা নিংথীরবা মায় পাকপা কয়া নিংশিংবগী য়াইফরবা মতম অমা ওইবতা নত্তনা ঐখোয়গী লৈবাক অসিনা লাক্কদৌরিবা মতমদা করম্বা মাইকৈদা চৎকদগে হায়বগী মতাংদা ঐখোয় খুদিংনা অনৌবা ৱাখল্লোন পুথোকপগী অফবা খুদোংচাবা অমসু ওইরিবনি হায়না মহাক্না হায়খি।

সরকার অসিনা পাল্লকপদগী মমাংগী চহি 9দা ভারত্তা লাকখিবা অহোংবা কয়াগী মতাংদা মন্ত্রীনা পাউদমখি। লৈবাক্কী মীপুম খুদিং, মরু ওইনা খুন্নাইগী খ্বাইদগী নেম্বা থাক্তা লৈবা মীওইগী তঙাই ফদবা পুম্নমক ফংহনবা হায়বসিদা সরকার অসিনা অকনবা মিৎয়েং চঙই হায়না মহাক্না হায়খি। মীপুম খুদিংগী ময়ুম, হেল্থকেয়র, চিঞ্জাক, ফিরোল, লৈফম্নচিংবা পীবগী থবক-থৌরমশিংবু সরকারনা থাক খুদিংদা য়াম্না হকচিন্না পায়খৎখি হায়না মহাক্না হায়খি। খুন্নাইগী লুচিংবা অমসুং একল বিদ্যালয়ানা ত্রাইবেল খুন্নাইবু শৌগৎপা, তেংবাংবা অমসুং মপাঙ্গল হাপ্পদা য়াখিবা থৌদাংশিংবু মহাক্না থাগৎপা ফোংদোকখি।

ইং 2014গী মমাংদা ভারতকী শরুক তংখায় অমদি অমাংশঙ লৈরমদে, সরকার কয়া অমা লাকখি অমসুং চৎখি, অদুবু, ঐখোয়গী ইমা ইবেল অমসুং ইচে-ইচলশিংনা নুংঙাইবা পুন্সি মহিং অমা হিংফম থোকই হায়বা ৱাফম অসিদি খঙবীরমদে। অমাংশঙগুম্বা তঙাই ফদবা পোৎলম অমদগী মখোয়গী মশাবু ইকায় খুম্নজবগী মতৌ হেনগৎপা য়াই হায়বসি ঐখোয়গী প্রধান মন্ত্রী শ্রী নরেন্দ্র মোদীনা খঙখি অমসুং স্বচ্ছ ভারত মিসনগী মখাদা লৈবাক শিনবা থুংবদা অমাংশঙ শাখি, খুদোংচাদবা অসিবু ময়ুমদা ফংদবা নুপী অমত্তা লৈবাক অসিদা লৈহনখিদে। নুপীশিংগী মপাঙ্গল হাপ্নবগীদমক্তা, সরকারনা লৈবাক্কী য়ুম্থোং খুদিংদা চাক থোংনবা গ্যাস কন্নেক্সন ফংহনখি, লৈবাক্কী নুপীশিংবু শিং, মৈতান্দগী থোকপা মৈখুদগী মনিং তমহনখি।

ভারতনা মালেমগী খ্বাইদগী চাউবা হেল্থকেয়র স্কিম, অয়ুশমান ভারত হৌদোকখি অমসুং মীওই মিলিয়ন 500দা লেম্না লাইয়েংবগী খুদোংচাবা ফংহনখি হায়না মন্ত্রীনা হায়খি। লিবরেল এজুকেসন পুক্নিং থৌগৎপা ন্যু এজুকেসন পোলিসী, দিজিতেল কন্নেক্তিবিতী, স্তার্তঅপ খুমাং চাউশিলহনবা, জল জীবন মিসন্নচিংবা অতোপ্পা খোংথাং কয়াসু সরকারনা হৌদোকখি হায়না মহাক্না হায়খি। মসিগুম্বা খোঙথাংশিং অসিনা লৈবাক্কী থবক তৌবগী মতৌদা অহোংবা পুরক্তুনা লৈবাক অসিবু চাউখৎপা লৈবাক অমা ওইহনবগী মাইকৈদা পুখি হায়না মহাক্না ফোংদোকখি।

কোবিদ-19গী শিংননিংঙাই ওইরবা মতমদা সরকারনা লৈবাক্কী মীয়াম খুদিংদা থক্নবা ঈশিং, চানবা চিঞ্জাক্নচিংবা তঙাই ফদবা পোৎলম খুদিংমক ফংহনখি হায়না মন্ত্রীনা হায়খি। কোবিদ লাকশিন্নবগীদমক্তা মালেমগী খ্বাইদগী অহকপা লোকদাউন থম্লবা ফাওবদা লৈবাক অসিনা ভারত মচা খুদিংবু নিংথীনা শেন্নখিবগী মতৌবু মালেম পুম্বনা থাগৎনখি হায়না মহাক্না মখা তাখি।

মমাংগী চহি 9দা সরকারনা পায়খৎখিবা থৌওংশিংনা ঐখোয়গী মীয়ামদা অফবা পুন্সি মহিং ফংহন্নবা অমসুং হেন্না ফবা হয়েংগী মতম অমা পাম্বা নহা ওইরবা ভারত মচাশিংগী লৈবাক অমা শেম্নবগীদমক্তা তেক্নোলোজীগী হৌজিক্কী অনৌবা য়ুগ অসিদা থবক তৌবা ঙম্নবগীদমক্তা শেম শাবীবগী বিলদিং ব্লোক অমা ওইখি হায়না মহাক্না হায়খি।

ভারত মচা খুদিংবু স্কিল অমসুং তেলেন্ত লৈহন্দুনা মপাঙ্গল লৈহল্লবা অমসুং তঙাই ফদবা হীরম খুদিংমক ফংহল্লবা মতমদা, মশাগী স্মার্তফোন্দা চাউখৎপা মালেমগী শক্তম য়েংলিবা ভারতকী নহাশিংনা মদুদগীসু হেন্না চাউখৎপা ভারত অমা শেম্বা ঙমগদৌরিবনি হায়না মহাক্না হায়খি। নুপীশিংনা লৈবাক্কী ৱর্কফোর্স্তা শরুক য়ারকপা অমসুং সস্তেনেবল ওইবা হায়বসিনা মখোয়গী থবক তৌবগী খ্বাইদগী মরু ওইবা ৱাখল্লোন ওইনা চঙশিল্লক্লিবা, মেন্যুফেকচরিং অমসুং সর্ভিস সেক্তরদা খোঙজেল য়াঙনা চঙশিল্লক্তুনা মায় পাকপা কয়া ফংলক্লিবা অসিনা ভারতপু চাউখৎপা লৈবাক অমা ওইহনবগী অচুম্বা লম্বীদা থম্লবনি, অমসুং ঐখোয়না ঙসিদি লম্বী অসিমক্তা চৎলিবনি হায়না মহাক্না হায়খি।

ভারতনা ঙসিদি মালেমদা অচৌবা খুদোংচাবা কয়া পীরি অমসুং ভারতকী অপুনবা এক্সপোর্তনা ইং 2022-23দা য়ু.এস. দোল্লর বিলিয়ন 765 য়ৌখিবা অসিনা মালেমদা লম্বী তাক্লিবা, মশাদা থজবা অমসুং মতিক মগুন্না থল্লবা অনৌবা ভারতকী খুদম অমনি হায়না মহাক্না হায়খি। ভারতকী দাইস্পোরাগী মেম্বর খুদিংমক ভারতকী এম্বেসেদরনি হায়না মহাক্না হায়খি।

প্রধান মন্ত্রীনা ভারতপু ইং 2047 ফাওবদা চাউখৎপা লৈবাক অমা ওইহনবগী পান্দম থমদুনা চৎলিবা হৌজিক্কী অমৃত কালগী খোঙচৎ অসিদা ফ্রান্সকী ভারতকী খুন্নাইনা তেংবাংবা য়াগনি হায়না মহাক্না হায়খি। ভারতনা লৈবাক ময়াম অসিগী মরক্তা মশাগী চপ চানা লৈফম থোকপা থাক্তা লৈগদবনি অমসুং ঐখোয়গী প্রধান মন্ত্রীনা হায়বগুম্না হৌজিক অসি মদুগী চপ চাবা মতম্নি হায়না মহাক্না মহাক্কী ৱারোল লোইশিনখি।

***