ঙসি হোম অমসুং কোওপরেসনগী য়ুনিয়ন মিনিস্তর শ্রী অমিত সাহনা অরুনাচল প্রদেসতা ঙমখৈদা লৈবা খুঙ্গং কিবিথুদা ‘ভাইব্রেন্ত ভিলেজ প্রোগ্রাম’ হৌদোকখ্রে। শ্রী অমিত সাহনা অরুনাচল প্রদেস সরকারগী মাইক্রো হায়দেল প্রোজেক ৯ অমসুং লুপা করোর ১২০গী ইন্দো-তিবেতান বোর্দর পুলিস(আই তি বি পি)গী ইনফ্রাস্ত্রকচর প্রোজেক ১৪ শঙ্গাখি। থৌরম অদুদা অরুনাচল প্রদেসকী চীফ মিনিস্তর শ্রী পেমা খান্দু, য়ুনিয়ন হোম সেক্রেতরি অমসুং আই.তি.বি.পিগী দিরেক্তর জেনেরেলসু শরুক য়াখি।

মহাক্কী ৱারোলদা, শ্রী অমিত সাহনা হায়খি ঙমখৈদা লৈবা খুঙ্গংশিংদা মীয়াম্না য়েংলম্বা মীৎয়েং প্রধান মন্ত্রী শ্রী নরেন্দ্র মোদীনা হোঙহল্লে, হৌজিক ঙমখৈগী শরুক্তা চৎপা মীওইশিংনা মসি অরোইবা খুঙ্গং নত্তে ভারতকী অহানবা খুঙ্গংনি হায়বা খঙলে। ঙমখৈগী শরুকশিং প্রধান মন্ত্রীনা মরুওইনা লৌরি, ঙমখৈ ঙাক-শেনবা হায়বসি লৈবাক ঙাক-শেনবনি অমসুং মরম অদুনা প্রধান মন্ত্রী শ্রী নরেন্দ্র মোদীনা লুচিংবা সরকারনা ঙমখৈগী ইনফ্রাস্ত্রকচর হেনগৎহন্নবা মখা তানা থবক তৌরি।

য়ুনিয়ন হোম মিনিস্তরনা হায়খি ১৯৬২গী লান্দা মতম অদুগী কুমাউন রেজিমেন্তনা লাম্বা লৈতবা থৌনা উৎখি। আই.তি.বি.পি অমসুং আর্মিগী ঐখোয়গী থৌনা ফরবা লান্মীশিংগী থৌনা অমসুং কৎথোকপনা মরম ওইদুনা ঙসি লৈবাক শীনবা থুংনা শান্তি ওইনা তুম্বা ফংলিবনি, কনা অমতনা ফাওবা ঐখোয়গী ঙমখৈলোমদা য়েংলকপা ঙমদ্রিবনি। মখোয়গী ইমুং-মনুংগী মীওইশিং থাদোক্তুনা অমসুং ফিৎ ১৩,০০০ ৱাংবা মফম অমদা লৈবাক্কী থবক তৌরিবা লান্মীশিংগী কৎথোকপা, থৌনা, মথৌ মশক খঙবা অমসুং মরৈবাক নুংশিবা অদু থাগৎনিঙাইনি।

শ্রী অমিত সাহনা হায়খি অরুনাচল প্রদেসকী মীয়াম্না জয় হিন্দ হায়দুনা অমগা অমগা তরাম্না ওক্নরি অমসুং মসিগী ৱাখল্লোন অসিনা অরুনাচল অসি ভারতকী মনুংদা লৈহল্লে। চহি ১০গী মমাঙদা ঙমখৈদা লৈবা খুঙ্গংশিংদগী য়ুম হোংনরম্মী, অদুবু প্রধান মন্ত্রী শ্রী নরেন্দ্র মোদীনা হায়রিবা খুঙ্গংশিং অদুদা চাউখৎ-থৌরাংগী থবকশিং পায়খৎলে। ‘ভাইব্রেন্ত ভিলেজ প্রোগ্রাম’গী মখাদা চাউখৎ-থৌরাং পায়খৎনবা অরুনাচল প্রদেস, সিক্কিম, উত্তরখান্দ, হিমাচল প্রদেস অমসুং লাদাখতা অৱাংথংবা ঙমখৈ পরিংদা জিলা ১৯গী ব্লোক ৪৬তা লৈবা খুঙ্গং ২৯৬৭ মশক খঙদোক্লে। থৌরম অসিগী অহানবা তাঙ্কক্তা, ব্লোক ৪৬তা খুঙ্গং ৬৬২গী অপুনবা মীশিং লাখ ১.৪২ কোনশিনগনি। স্কিম অসিগী মখাদা, ২০২২দগী ২০২৬ ফাওবদা লুপা করোর ৪৮০০ চাদিং তৌগনি অমসুং অহানবা তাঙ্কক্কী ওইনা জিলা ১১, ব্লোক ২৮ অমসুং খুঙ্গং ১৪৫১ য়াওরে। থৌরম অসিগী মখাদা থাক অহুমদা খুঙ্গংশিংগী চাউখৎ-থৌরাং পায়খৎকনি। থৌরম অসিগী মখাদা খুঙ্গং অমগী মীওই খুদিংগী দরকার ওইবশিং ফংহন্নবা ভারত সরকারনা থবক পায়খৎকনি অমসুং তোঙান-তোঙানবা স্কিমশিংগী কান্নবশিং মীয়ামদা য়ৌহনগনি।

মহাক্না হায়খি ঙমখৈগী খুঙ্গংশিংদা তঙাইফদবা খুদোংচাবশিং ফংদবা য়ুম অমতা লৈহল্লোইদবনি। শেন-থুমগী খুদোংচাবশিং ফংহন্নবা থবক পায়খৎলে। তুরিজম চাউখৎহনবা অমসুং মফম অদুগী নাৎকী চৎনবীশিং অমসুং লোন য়োকখৎপনা হায়রিবা খুঙ্গংশিং অসি চাউখৎকনি। স্কিম অসিগী অনিশুবা মরুওইবা পান্দমদি খুঙ্গং অদুদা থবক ফংনবা খুদোংচাবশিং পীদুনা ঙমখৈগী খু্ঙ্গংশিংদগী য়ুম হোঙখিবা থিংবনি। য়ুম হোঙনখিবদগী ফিবম চাদ্রবা খুঙ্গংশিং মহৌশাগী পুন্সিদা অমুক হল্লক্নবা চহি ৫গী পান্দম অমা থম্লে। থৌরম অসিগী অহুমশুবা পান্দমদি ঙমখৈগী খুঙ্গংশিংদা ইনফ্রাস্ত্রকচর শেমগৎপনি। প্রধান মন্ত্রী নরেন্দ্র মোদীগী লমজিং মখাদা সরকার অসিগী পান্দমদি অৱাংথংবা ঙমখৈ শীনবা থুংনা লৈরিবা খুঙ্গংশিংদগী য়ুম হোঙখিবা তোকহনবা, তুরিজম চাউখৎহনবা অমসুং সহরশিংগুম খুদোংচাবা পুম্নমক ফংহনবনি।

য়ুনিয়ন হোম মিনিস্তরনা হায়খি মিসনগী মওংদা ‘ভাইব্রেন্ত ভিলেজ প্রোগ্রাম’ থবক ওইনা পায়খৎনবা এক্সন প্লান অমা থৌরাং তৌরে। ‘ভাইব্রেন্ত ভিলেজ প্রোগ্রাম’গী মখাদা, কেন্দ্র, রাজ্য, জিলা অমসুং ব্লোক্কী থাক্তা লৈবাক ঙাকপগী থবকশিংদা পঞ্চায়ত অমসুং গ্রাম সভা শোইদনা শরুক য়াহনগনি, চাদা ১০০ থবক ওইনা পায়খৎনবা স্কিম পুম্নমক অপুনবা অমা ওইনা অমসুং খুৎশম্নদুনা থৌরাং তৌরে। প্রধান মন্ত্রী শ্রী নরেন্দ্র মোদীগী লমজিং মখাদা, ভাইব্রেন্ত ভিলেজ’শিংদা লৈরিবা মীয়াম্না হায়রিবা খুঙ্গংশিং অসিদা লৈবগী চাউথোকচবা অমসুং মখোয়না খুদোংচাবা পুম্নমক্ন ফংনবগী থৌদাং অদু অরুনাচল প্রদেসকী চীফ মিনিস্তর শ্রী পেমা খান্দুনা লৌরে।

শ্রী অমিত সাহনা হায়খি মৈ কিলোৱাত ৭২৫ পুথোকপা ঙম্বা লুপা কোরোর ৩০ রোম চঙনা শেমগৎপা মাইক্রো হায়দেল প্রোজেক ৯ ঙসি মফম অসিদা শঙ্গাখ্রে অমসুং হায়রিবা প্রোজেকশিং অসি মপুংফানা লোইশিল্লে। হায়রিবা স্কিমশিং অসিনা রাজ্য অসিগী মনুং হুঞ্জিনবা মফমশিংদা মৈ লেপ্তনা ফংহনবা ঙমগনি। প্রধান মন্ত্রী শ্রী নরেন্দ্র মোদীনা লুচিংবা সরকারনা ঙমখৈদা মথৌ পাংথোক্লিবা থৌনা ফরবা ঐখোয়গী লান্মীশিংদা খুদোংচাবা খুদিংমক ফংহনগনি। ঙসি লুপা করোর ১২০গী ইন্দো-তিবেতান বোর্দর পুলিস(আই তি বি পি)গী ইনফ্রাস্ত্রকচর প্রোজেক ১৪ শঙ্গাখ্রে। অপীকপা রাজ্য অরুনাচল প্রদেসতা সেল্ফ হেল্প গ্রুপ ৬৬০০ হেন্না শেম্লে অমসুং হায়রিবা গ্রুপশিং অসিগী মখাদা নুপী ৫৩,০০০ হেন্না থবক ফংলে।

মহাক্না হায়খি ২০১৪গী মমাঙদা, ২০১৪গী মমাঙদা, অৱাং-নোংপোক পুম্বা ৱাথোক কয়ানা থনবা লমদম অমা ওইনা খঙনরম্মী, অদুবু হৌখিবা চহি ৯দা শ্রী মোদীগী ‘লুক ইস্ত পোলিসি’না মরম ওইদুনা, অৱাং-নোংপোক্তা মখা তানা খুদোংচাদবশিং থেংনদ্রে, নুংঙাই-য়াইফবা অমসুং চাউখৎপগী মফম অমা ওইনা খঙনরে। মতম অমদা দিল্লিদা লৈবা ফম্নাইবশিংগী অরানবা থৌওংনা মরম ওইদুনা লমদম অসি ৱাথোক কয়া অমসুং লালহৌবগী ইরাং লৈবা, শান্তি লৈতবা, চাউখৎপা ৱাৎপা অমসুং লম্বী-থোঙ লৈতবা মফম অমা ওইরমখি।

শ্রী সাহনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা ৱাথোকশিং অমসুং লালহৌবগী ইরাং লোইশিনখ্রে অমসুং চাউখৎপা অমসুং শান্তিগী অনৌবা যুগ অমা হৌরে। প্রধান মন্ত্রী শ্রী নরেন্দ্র মোদীনা মাইকৈ অহুমদা অৱাং-নোংপোক্তা থবক তৌরি- লমদম অসিগী নাৎকী পুক্কৈ ঙাক-শেনবা, ৱাথোকশিং লোইশিন্দুনা শান্তি পুরকপা অমসুং লালহৌ লুপশিংগা য়ানবা পুরকপনি। হায়রিবা থবকশিং অসিনা মরম ওইদুনা ২০১৪গা চাংদম্নবদা ২০২২দা হিংশাগী থবক চাদা ৬৭ হন্থরে, সেকুরিতি ফোর্স শিবা চাদা ৬০ হন্থরে অমসুং মীচম শিবা চাদা ৮৩ হন্থরে।

শ্রী সাহনা হায়খি প্রধান মন্ত্রী শ্রী নরেন্দ্র মোদীনা লুচিংবা সরকারগী মখাদা ব্রু, এন.এল.এফ.তি, বোর, কার্বি-অংলোং একোর্দশিং খুৎয়েক পীনখ্রে অমসুং রাজ্যশিংগী মরক্তা ঙমখৈগী য়ানদবশিং য়ানবা পুরকখ্রে। অৱাং-নোংপোক লমদমগী চাদা ৭০দগী অফস্পা লৌথোক্লে অমসুং মসি অৱাং-নোংপোক শীনবা থুংনা লৌথোক্কদবা নুমিৎ অদু কুইররোই। প্রধান মন্ত্রী শ্রী নরেন্দ্র মোদীনা লুচিংবা সরকারগী থৌশিলশিংনা মরম ওইদুনা, খুৎলায় পায়রম্বা নহারোলশিং হৌজিক মহৌশাগী পুন্সিদা হল্লক্লে অমসুং ভারতকী চাউখৎপদা মতেং পাংলে। 

শ্রী অমিত সাহনা হায়খি মীওই খুদিংমক্তা শান্তি ওইনা হিংমিন্নবা ভারতনা পাম্মী অদুবু কনাগুম্বা মীওই অমতনা ঐখোয়গী লৈবাক্কী লম ইঞ্চি অমা ফাওবা লৌশিনবা ঙম্লোই অমসুং মসি ঐখোয়গী লান্মীগী ইকায়খুম্নবা অমসুং ঙমখৈদা করিগুম্বা মখল অমতগী য়াশিন্নবা পুরক্তবা প্রধান মন্ত্রী শ্রী নরেন্দ্র মোদীনা লুচিংবা সরকারগী থৌশিলনা ওইহনবনি। ঙমখৈগী শরুকশিং প্রধান মন্ত্রীনা মরুওইনা লৌরি, ঙমখৈ ঙাক-শেনবা হায়বসি লৈবাক ঙাক-শেনবনি অমসুং মরম অদুনা প্রধান মন্ত্রী শ্রী নরেন্দ্র মোদীনা লুচিংবা সরকারনা ঙমখৈগী ইনফ্রাস্ত্রকচর হেনগৎহন্নবা মখা তানা থবক তৌরি।

মহাক্না হায়খি ২০১৪দগী ২০২৩ ফাওবদা, কিলোমিতর ৫৪৭ শাংবা ঙমখৈগী শরুক শম্বল খাবা লোইশিনখ্রে, কিলোমিতর ১১০০গী ঙমখৈগী লম্বীশিং শেমগৎলে, কিলোমিতর ১০৫৭ ফ্লদলাইতশিং থাল্লে, বোর্দর ওবজার্বেসন পোস্ত ৪৬৮ লিংখৎলে।ঙমখৈ শেমগৎনবা ওপোজিসন সরকারশিংনা মখোয়গী তার্ম ১২দা পাংথোকপা ঙম্লমদবা থবকশিং, শ্রী মোদীনা শুপ্নগী মহাক্কী তার্ম ২দা শেমগৎলে।

য়ুনিয়ন হোম মিনিস্তরনা হায়খি অরুনাচল প্রদেসকী মালেমগী ঙমখৈগী কিলোমিতর ৫না কোনবা মফমদা লৈবা খুঙ্গং পুম্নমক নোংজু-নুংশা নাইদনা চৎপা য়াবা লম্বীশিংনা শম্নরে। কিলোমিতর ১৮৫৯ শাংবা অরুনাচল ফ্রন্তিয়ার হায়ৱে শেমগৎপা হৌরে অমসুং ঙমখৈগী শরুকশিংদা কিলোমিতর ২৫০০গী লম্বীশিং শেমগৎতুনা হৌখিবা চহি খর অসিদা খুঙ্গং ২৫২ শম্নরে। ইনফ্রাস্ত্রচর শেমগৎনবা কেন্দ্র সরকারনা অরুনাচল প্রদেস সরকারদা লুপা করোর ৪৪০০০ পীখ্রে। খুঙ্গং ৬৪৮ ফোর-জি ফংলে অমসুং ঙমখৈগী খুঙ্গং ১৩২৭ মৈ ফংলে। প্রধান মন্ত্রী শ্রী নরেন্দ্র মোদী অমসুং মহাক্কী সরকারগী মরুওইবদি ঙমখৈগী শরুকশিং অসিনি। প্রধান মন্ত্রী শ্রী নরেন্দ্র মোদীনা লুচিংবা সরকারগী থম্মোয়গী মরী অমসুং নুংশিনবা অসিনা অরাপ্পশিং নকশিন্নহল্লে।

*****