এপ্রিল ১০-১১, ২০২৩ দা হোম অমসুং কোওপরেসনগী য়ুনিয়ন মিনিস্তর শ্রী অমিত সাহ অরুনাচল প্রদেসতা চৎকনি। মহাক্কী খোঙচৎকী অহানবা নুমিৎ এপ্রিল ১০দা অরুনাচল প্রদেসকী ঙমখৈদা লৈবা অনজো জিলাগী খুঙ্গং কিবিথোদা ‘ভাইব্রেন্ত ভিলেজেস প্রোগ্রাম’ হৌদোক্কনি।  

প্রধান মন্ত্রী শ্রী নরেন্দ্র মোদীগী লমজিং মখাদা, শেনবা চহি ২০২২-২৩দগী ২০২৫-২৬ ফাওবগী ওইনা লম্বী-থোঙ শেমগৎনবা কেন্দ্রগী শরুক লুপা করোর ৪৮০০ য়াওনা লুপা করোর ২৫০০গী ‘ভাইব্রেন্ত ভিলেজেস প্রোগ্রাম’ সরকারনা অয়াবা পীরে। কেন্দ্রনা শেনফম পুথোকপা থৌরম অসিগী মখাদা অরুনাচল প্রদেস, সিক্কিম, উত্তরখান্দ অমসুং হিমাচল প্রদেস অমসুং লাদাখকী অৱাংবা থংবা ঙমখৈদা লৈবা জিলা ১৯গী ব্লোক ৪৬গী খুঙ্গং ২৯৬৭ চাউখৎ-থৌরাং পায়খৎনবা মশক খঙদোক্লে। অহানবা তাঙ্কক্কী ওইনা খুঙ্গং ৬৬২ লৌখৎপদা অরুনাচল প্রদেসকী খুঙ্গং ৪৫৫ য়াওরে।

মশক খঙদোক্লবা ঙমখৈদা লৈবা খুঙ্গংশিংগী মীয়ামগী পুন্সি মহিং ফগৎহনবদা প্রোগ্রাম অসিনা মতেং পাংগনি অমসুং ঙমখৈদা ঙাক-শেনগী থবক হেনগৎহন্দুনা অমসুং হায়রিবা খুঙ্গংশিং অসিদগী য়ুম হোঙখিবা তোকহন্দুনা মখোয়গী পোক্নফম খুঙ্গংশিংদা লৈনবা খুঞ্জাশিং পুক্নিং থৌগৎকনি। কেন্দ্র অমসুং রাজ্য সরকারগী স্কিমশিং চাদা ১০০ থবক ওইনা পাংথোক্নবা মশক খঙদোক্লবা খুঙ্গংশিংগী এক্সন প্লানশিং শেম-শানবা ব্লোক অমসুং পঞ্চায়তকী থাক্তা দিস্ত্রিক এদমিনিস্ত্রেসন্না চুনবা থবকশিংগী মতেং পাংগনি। খুঙ্গংগী চাউখৎ-থৌরাংগী পায়খৎকদবা থবকশিংগী মনুংদা লম্বী-থোঙ, অফবা থক্নবা ঈশিং, মৈ, সোলার অমসুং ৱিন্দ ইনর্জি, মোবাইল অমসুং ইন্তরনেত ফংহনবা, লমকোয়ফমশিং, মল্তি-পর্পজ সেন্তরশিং অমসুং লায়য়েংশঙশিং শেমগৎপা য়াওরি।

“গোল্দন জুব্লি বোর্দর ইল্লুমিনেসন প্রোগ্রাম”গী মখাদা শাবা অরুনাচল প্রদেস সরকারগী মাইক্রো হায়দেল প্রোজেক ৯ শ্রী অমিত সাহনা এপ্রিল ১০,২০২৩দা শঙ্গাগনি। হায়রিবা প্রোজেকশিং অসিনা ঙমখৈদা লৈবা খুঙ্গংশিংগী মীয়ামদা মৈ ফংহনগনি। মহাক্না লিকাবালি(অরুনাচল প্রদেস), চাপ্রা(বিহার), নুরানাদ(কেরলা) অমসুং ভিশাখাপত্নম(অন্ধ্র প্রদেস)তা আই.তি.বি.পি পর্সোনেলশিংগী দরকার ওইবশিং ফগৎহন্নবা মহাক্না ইন্দো-তিবেতান বোর্দর পুলিস প্রোজেকশিং শঙ্গাগনি। য়ুনিয়ন হোম মিনিস্তরনা কিবিথোদা ইন্দো-তিবেতান বোর্দর পুলিস পসোনেলশিংদা ৱারি শানগনি। ঙমখৈদা লৈবা সেল্ফ হেল্প গ্রুপশিংগী নুপী মেম্বরশিংনা পুথোকপা পোৎথোকশিংগী মেলা অমসু পাংথোক্কনি। য়ুনিয়ন হোম মিনিস্তরনা মেলা অদুগী একজিবিসনগী স্তোলশিং য়েংগনি। এপ্রিল ১১,২০২৩দা নামতি ফিল্দদা চৎকনি অমসুং ৱালোং ৱার মেমোরিএলদা ইকায়খুম্নবা উৎকনি।

*****