মালেমগী য়োগ নুমিৎ 75 ৱাৎলিবা অসি য়েংদুনা ঙসি দিব্রুগর য়ুনিভর্সিতী লম্পাক্তা পাংথোকখিবা ‘য়োগ মহোৎসব’ অসি য়াম্না চাউবা মায় পাকপা অমা ওইখি। মীওই লিশিং কয়ানা মসিদা শরুক য়াদুনা কম্মন য়োগ প্রোতোকোল (সি.ৱাই.পি.) পাংথোকখি।

পোর্ত, শিপ্পিং অমসুং ৱাতরৱেজ অমসুং আয়ুশকী কেন্দ্র মন্ত্রী, শ্রী সর্বানন্দ সোনোৱাল; ত্রিপুরাগী মুখ্য মন্ত্রী, দাঃ মানিক সাহা; অরুনাচল প্রদেশকী উপ মুখ্য মন্ত্রী, চাউনা মেন; পেত্রোলিয়ম অমসুং নেচরেল গ্যাসকী কেন্দ্রগী রাজ্য মন্ত্রী অমসুং দিব্রুগরগী এম.পি., শ্রী রামেশ্বর তেলী; এক্সতর্নেল এফিয়র্সকী কেন্দ্রগী রাজ্য মন্ত্রী, দাঃ রাজকুমার রঞ্জন সিংহ; অসমগী হকশেল অমসুং য়াইফ য়ুম্বাল মন্ত্রী, শ্রী কেশব মহান্তা; হান্নগী মন্ত্রী অমসুং হাউস্ফীদকী চেয়রপর্সন, শ্রী ভবেশ কলিতা; মনিপুরগী হকশেল অমসুং য়াইফ য়ুম্বাল মন্ত্রী, শ্রী সাপম রঞ্জন সিংহ; মেঘালয়গী পাৱর মন্ত্রী, শ্রী এ.কে. মোন্দল; দিব্রুগর য়ুনিভর্সিতীগী ভাইস চান্সেল্লর, প্রোফঃ জিতেন হজারিকা অমসুং আয়ুশ মন্ত্রালয়গী সেক্রেতরী, বাইদ্যা রাজেশ কোতেচানা থৌরম অসিদা শরুক য়াখি।

কেন্দ্র মন্ত্রী, শ্রী সর্বানন্দ সোনোৱালনা থৌরম অসিদা ৱা ঙাঙবদা অসুম্না হায়খি, “হৌজিক্কী য়াইফরবা মতম অসিদা দিব্রুগরনা নিংথীরবা ‘য়োগ মহোৎসব’ পাংথোক্লিবা অসিদা ঐহাক্না নুংঙাইবগা লোয়ননা চাউথোকচবা পোকচরি। অদোম লিশিং কয়ানা ঐখোয়গা পুল্লিবা অসিনা হকশেল ফবা অমসুং অফবা তুংগী মতম অমগীদমক্তা য়োগবু মালেমগী ইহৌ অমা ওইনবগী প্রধান মন্ত্রী শ্রী নরেন্দ্র মোদীগী মঙলানবু মপাঙ্গল হেন্না হাপ্লি”।

আয়ুশ মন্ত্রী, শ্রী সর্বানন্দ সোনোৱালনা মখা তারদুনা অসুম্না হায়খি, “ঙসিগী মালেমগী হকশেল নুমিৎ অসিদা পাংথোক্লিবা য়োগ মহোৎসবকী য়াইফরবা থৌরম অসিদা আয়ুশ মন্ত্রালয়না ফমুং 100 থাবা য়োগ অমসুং নেচ্যুরোপেথীগী হোস্পিতাল অমা দিব্রুগরদা লিংখৎলগনি হায়না ঐহাক্না লাউথোকচরি। মসিনা দিব্রুগরবু লমদম অসিগী হেল্থকেয়রগী ময়োল অমা ওইরিবা অসিবু মখা তানা মপাঙ্গল হাপ্লগনি। মসিগুম্বা অৱাং নোংপোক্কী অমত্তা ঙাইরবা সেন্তর অসিদা মপুং ফানা শৌগৎপীবগীদমক্তা ঐহাক্না অসমগী মুখ্য মন্ত্রী, শ্রী হিমন্তা বিস্বা শর্মবু থাগৎচরি। সেন্তর অসিনা য়োগ অমসুং নেচ্যুরোপেথী আউত-পেসেন্ত অমসুং ইন-পেসেন্ত লাইয়েংশিংবু অসমগী মীয়ামদা ফংহন্দুনা লমদমসিগী তঙাই ফদবশিংদা তেংবাংগনি।

য়োগবু মীপুম খুদিংগী হকশেল ফবা পুন্সি মহিংগী শরুক অমা ওইহন্নবগীদমক্তা ঐখোয়না খোঙফম চেৎলিবা অসিবু হেন্না চেৎশিলহনগদবা য়োগ তৌবশিংগী ইকোসীস্তেম অমা শেম্নবগীদমক্তা মোরার্জী দেসাই নেস্নেল ইন্সতিত্যুত ওফ য়োগ (এম.দি.এন.আই.ৱাই.) অমসুং দিবুরগর য়ুনিভর্সিতীগী মরক্তা এম.ও.য়ু. অমগী খুৎয়েকসু পীনখ্রে।

ত্রিপুরাগী মুখ্য মন্ত্রী, দাঃ মানিক সাহানা ঙসিগী মীয়ামদা ৱা ঙাঙবদা অসুম্না হায়খি, “ঐখোয় পুম্নমক্না ঙসিগী য়াইফরবা অয়ুক অসিদা পুন্দুনা ভারতকী হেরিতেজকী খ্বাইদগী শক্নাইরবা বর অমা ওইরিবা য়োগ তৌমিন্নবা অসি য়াম্না নুংঙাইবা মিৎকুপ অমনি। ঐখোয়না ঙসি য়োগ তৌরিবা অসিনা মীয়াম মরক্তা য়োগ তৌনবা পুক্নিং থৌগৎপদা নত্তনা হকশেল ফবা অমসুং অফবা তুংগী মতম অমা লৈরগনি হায়বগী থাজবসু পীরি”।

অরুনাচল প্রদেশকী উপ মুখ্য মন্ত্রী, চাউনা মেন্না ঙসিগী থৌরমদা ৱা ঙাঙবদা হায়খি, “য়োগ অসিদি ভারতকী ইনাক খুল্লবা হেরিতেজকী খুদোল অমনি অমসুং মসিনা মালেম্বু হকশেল ফবা মফম অমা ওইহল্লি। ঐহাক্না ঙসিগী থৌরম অসিদা শরুক য়াবা ফংবা অমসুং হকশেল ফবা হয়েংগী মতম অমগীদমক্তা ঐখোয়না করিগুম্বা খরা পাংথোক্লিবা অসিদা নুংঙাইবা ফাওই”।

অসমগী ইন্দস্ত্রী অমসুং কম্মর্স মন্ত্রী, বিমল বোরাহ; অরুনাচল প্রদেশকী হকশেল অমসুং য়াইফ য়ুম্বাল মন্ত্রী, অলো রিবাং; মেঘালয়গী হকশেল অমসুং য়াইফ য়ুম্বাল মন্ত্রী, দাঃ মাজেল অম্পারীন লিংদোহ; সিক্কিমগী অর্বান দিভেলপমেন্ত মন্ত্রী, এল.বি. দাস; অসমগী লেবর ৱেলফিয়র দিপার্তমেন্তকী মন্ত্রী, সঞ্জয় কিশন; দিব্রুগরগী এম.এল.এ. অমসুং এ.আই.দি.সি.গী চেয়রমেন, প্রশান্তা ফুকান; এম.পি. হোরেন সিংহ বে; এম.এল.এ. তেরোস গোৱালা, বিনোদ হজারিকা, চক্র গোগোইসু অতোপ্পা শক্নাইরবা মীওই কয়াগা লোয়ননা ঙসিগী য়োগ মহোৎসবতা শরুক য়াখি।

ভারতকী মহৈরোই লিশিং কয়াগী মথক্তা তাঞ্জানিয়া, য়ুগান্দা, কেনয়া, তোগো, নেপাল, নাইজেরিয়া, লেসোথো, বোৎস্বানা, ইজিপ্ত, নামিবিয়া অমসুং কোরিয়াগী ইন্তর্নেস্নেল মহৈরোইসিং, য়োগবু পামজবা মীওই কয়ানা য়োগ মহোৎসব অসিদা শরুক য়াদুনা থৌরম অসিবু অচৌবা মায় পাকপা অমা ওইহনখি। থৌরম অসিদা এম.দি.এন.আই.ৱাই.গী দাইরেক্তর, দাঃ ইশ্বর ভি. বাসাভারাদীনা তাক্তুনা মীয়াম্না সি.ৱাই.পি. পাংথোকখি।

******