আয়ুশ অমসুং পোর্তস, শিপ্পিং অমদি ৱাতরৱেজকী কেন্দ্র মন্ত্রী, শ্রী সর্বানন্দ সোনোৱালনা মালেমগী য়োগ নুমিৎ ২০২৩ পাঙথোক্কদবগী নুমিৎ ৭৫ ৱাৎলিঙৈগী থৌরম, “য়োগ মহোৎস” এপ্রিল ৭তা অসামগী দিব্রুগরদা পাঙথোক্কদবা অসিগী মাংওইননা গুৱাহাতিদা পাঙথোকপা প্রেস কনফরেন্সতা ৱা ঙাংখ্রে।

পাউমীশিংদা ৱা ঙাংবদা শ্রী সর্বানন্দ সোনোৱালনা হায়খি মালেমগী য়োগ নুমিৎ ২০২৩ পাঙথোক্কদবগী নুমিৎ ৭৫ ৱাৎলিঙৈগী থৌরম, “য়োগ মহোৎস” অসি অসামগী দিব্রুগরদা লৈবা দিব্রুগর য়ুনিভর্সিতী কেম্পসতা পাঙথোক্কনি হায়না ফোঙদোকখি। মহাক্না হায়খি অসামনা থংন-থংননা (২০২২দা শিবসাগরদা অমসুং ২০২৩দা দিব্রুগরদা) অচৌবা য়োগ মহোৎসব অনি পাঙথোকখি। মন্ত্রীনা মখা তারদুনা হায়খি আয়ুশ মন্ত্রালয়না রাজ্য অসিগী অচৌবা মতিক-ময়াই লৈবা লমশিং মশক খঙদোকখি অমসুং য়োগ অসি মখোয়গী মরক্তা অমনি। থৌরমশিং অসিনা মাইপাকপা অসিনা লমদম অসিদা য়োগ প্রেক্তিস তৌবা থৌগৎপা খক্তা নত্তনা লমদম অসিগীদমক খুদোংচাবগী অনৌবা হীরমশিংসু  হাংদোক্লি।

আয়ুশকী থৌশিলশিংগী মতাংদা মখা তারদুনা শ্রী সোনোৱালনা হায়খি, “অসামদা আয়ুশকী মতিক ময়াই য়াম্না লৈ। মতিক-ময়াই অসিবু পুথোকপা ঙম্নবা গুৱাহাতিদা লমদম অসিদা অহানবা মখলগী লেবশিং য়াওবা ফার্মাকোলোজী অমসুং কেমেস্ত্রী বিল্দিং অমগা লোয়ননা তোখাইনা শাখিবা পঞ্চকর্ম ব্লোক শাখিবা - সেন্ত্রেল আয়ুর্বেদ রিসর্চ ইন্সতিত্যুত (সি.এ.আর.আই.)- গুম্বা ইন্সতিত্যুসন য়াওনা খোঙথাং কয়া পাইখৎলি। ঐখোয়না অৱাং নোংপোক্কী মমল য়াম্লবা নাৎকী ওইবা হীদাক লাংথকশিং য়োকখৎপা পাম্মি। মসিগীদমক রাজ্য ৮দা অচৌবা সর্ভে অমা পাইখৎলি, মসিদা নীংথিনা দোক্যুমেন্তেসনশিংগা লোয়ননা সাইন্তিফিক সর্ভে তৌবনা ঐখোয়গী মমল য়াম্লবা নাৎকী ওইবা হীদাকশিং সেন্দর্দাইজ তৌবা য়াগনি অমসুং মথৌ তাবা খোঙথাংশিংগী মতুংদা মীওইবগী লাইনাশিং লায়েংনবা ফংহনগনি। মসিনা পুন্সি কনবদা চাউনা কান্নবা পীবা খক্তা নত্তনা মেদিকেল অমসুং ফার্মাকোলোজী সেক্তরশিংদা লমদম অসিগীদমক শেন্মীৎলোনগী খুদোংচাবসু হাংদোক্কনি।”

য়োগ মহোৎসবতা শরুক য়াগদবা অতোপ্পা মশক নাইবা মীওইশিং অদুদা ত্রিপুরাগী মুখ্য মন্ত্রী, প্রোফেসর (দা) মানিক সাহা, অরুনাচল প্রদেশকী উপ মুখ্য মন্ত্রী, চৌনা মেন, মেঘালয়গী উপ মুখ্য মন্ত্রী, প্রেস্তন ত্যেনসোং, মপাল থৌরমগী কেন্দ্রগী এম.ও.এস., রাজকুমার রঞ্জন সিংহ অমসুং পেত্রোলিয়ম অমসুং গ্যাসকী এম.ও.এস., রামেশ্বর তেলি য়াওরি।

অসামগী হকশেল অমসুং য়াইফ য়ুম্বাল মন্ত্রী, কেশাব মহন্তা; মনিপুরগী হকশেল অমসুং য়াইফ য়ুম্বাল মন্ত্রী, দা. সাপম রঞ্জন সিংহ; অসামগী ইন্দস্ত্রী অমসুং কম্মর্স মন্ত্রী, বিমল বোরা; অরুনাচল প্রদেশকী হকশেল অমসুং য়াইফ য়ুম্বাল মন্ত্রী, এলো লিবাং; মেঘালয়গী হকশেল অমসুং য়াইফ য়ুম্বাল মন্ত্রী, দা. মজেল অম্পারীন লিন্দো; সিক্কিমগী অর্বান দিবেলপমেন্ত মন্ত্রী এল.বি. দাস; হান্নগী মন্ত্রী অমসুং হাউসফেদকী চিয়রমেন, ভাবেশ কলিতা; অসামগী লেবর ৱেল্ফিয়র দিপার্তমেন্তগী মন্ত্রী, সঞ্জয় কিশন; দিব্রুগরগী এম.এল.এ. অমসুং এ.আই.দি.সি.গী চিয়রমেন, প্রশান্তা ফুকন; আয়ুশ মন্ত্রালয়গী সেক্রেতরী, বৈদ্যা রাজেশ কোতেচা লোয়ননা দিব্রুগর য়ুনিভর্সিতীগী ভাইদ চাঞ্চেলর, প্রোফেসর জিতেন হজারিকানা শরুক য়াগনি।

আয়ুশ মন্ত্রালয়না অসামগী দিব্রুগর য়ুইভর্সিতীদা এপ্রিল ৬দগী ৭, ২০২৩ ফাওবা আয়ুশ সিস্তেমগী হীদাক-লাংথকশিং – আয়ুর্বেদ, য়োগ অমসুং নেচরোপেথী, উনানি, সিদ্ধা, সোৱা রিগপা অমসুং হোমিওপেথীগী শক্তি উৎলিবা একজিবিসন অমসু উৎকনি।

****