কেন্দ্রগী কেবিনেত্তা ঐগা লোইননা থৌ পুমিন্নরিবা দোক্তর জিতেন্দ্র সিং জী, নেস্নেল সেক্যুরিতী এদভাইজর, শ্রী অজিত দোভল জী, কেবিনেত সেক্রেতরী, সি.বি.আই.গী দাইরেক্তর, অতোপ্পা ওফিসিয়েলশিং, ইচে-ইচল, অহল লমন লাই-গুরুশিং! ময়াম পুম্নমকপু সি.বি.আই.গী চহি ৬০ মপুং ফারকপগী, দাইমন্দ জুবিলীগী অসিগুম্বা নুংঙাইরবা পুংফম অসিদা ময়াম পুম্নমকপু নুংঙাইবা ফোংদোক্লি।

লৈবাক অসিগী খ্বাইদগী অৱাংবা থাক্কী ইনভেস্তিগেশন এজেন্সী অমা ওইনা চহি ৬০গী শাংলবা খোংচৎ অসি মপুং ফাখ্রে। মসিগী চহি ৬০ অসিদা তশেংনমক হায়নিংঙাই লৈতনা মাইপাকপা কয়া অমা পুরকখি। ঙসি মফম অসিদা সি.বি.আই.গা মরি লৈনবা কেসশিংগী মতাংদা সুপ্রীম কোর্তনা পীবা ৱায়েলগী কমপেন্দিয়মসু মফম অসিদা ফোংলগনি। মসি হৌখ্রবা মতমশিংদা সি.বি.আই.গী খোংচৎ অদুবু উৎলি।

সহর খরদা সি.বি.আই.গী অনৌবা লোইশংশিং, ত্বীতর হেন্দল, অতোপ্পা থৌশিল কয়া অমা ঙসি হৌদোক্লে, মখৌয়শিং অসিনা সি.বি.আই.বু অমুক্কসু হেন্না মপাঙ্গল কনখৎহনবদা য়াম্না মরু ওইবা থৌদাং লৌরগনি। সি.বি.আই.না মখোয়গী থবক-থৌরমশিং, মখোয়গী হৈ-শিংবা অদুনা চমজরবা প্রজা মীয়ামদা থাজবা অমা পীবীরি। ঙসিসু করিগুম্বা কেস অমবু লোইশিনবা ঙমদ্রে হায়না খল্লকপা মতমদা কেস অদুবু সি.বি.আই.দা পীনবা হায়বা খোল্লাও লাওনরি। মীয়াম্না ৱাকৎ মীফম ফমদুনা কেস অসিবু মখোয়দগী লৌথোক্তুনা সি.বি.আই.দা খুৎশিন্ননবা হায়নরি। পঞ্চায়তকী থাক্তা ফাওবা কেস লাকপা মতমদা, মীয়াম্না হায়নরি মদুদি- মসিদি সি.বি.আই.দা খুৎশিন্নগদবনি হায়না হায়নরি। অচুম্বা ৱায়েল পীবগী ব্রান্দ অমা ওইনা সি.বি.আই.না মীয়াম পুম্নমক্কী মচিন্দা শোন্নরি।

চমজরবা মীচম প্রজাশিংগী অসিগুম্বা থাজবা অসি অচম্বা মাইপাকপা নত্তে। অমসুং মসিগীদমক্তা হৌখিবা চহি ৬০ অসিদা কত্থোকখিবশিং, মসিগী ওর্গনাইজেশন অসি থবক তৌরিবা ওফিসিয়েলশিং পুম্নমক, কর্মচারি পুম্নমকপু থাগৎনিংঙাই ওই। হৌজিক মফম অসিদা মরুপ কয়া অমা ময়ামদগী থোইদোক-হেন্দোকপা মওংদা থৌ পাংথোকপগীদমক্তা পুলিস সেৱা মেদলগা লোইননা ইকাইখুম্নখ্রে। মখোয়বু ইকাই-খুম্ননবগী তাঞ্জা অদুবু ঐঙোন্দা পীনবীরে, ইকাইখুম্নখ্রবা মীওইশিং, মখোয়শিং অমসুং মখোয়গী ইমুং-মনুংশিংবু এগী মাইকেদগী নুংঙাইবা ফোংদোক্লি।

মরুপশিং,

 অসিগুম্বা য়াম্না মরুওইবা তাঙ্কক  অসিদা হৌখিবা মতমগী মাইপাকখিবশিং অদুগা লোইননা, তুংদা লাক্কদবা মতমশিংদা মায়োক্নগদবা শিংনবশিং অদুগীদমক্তা খন্থবা হায়বসিসু য়াম্না তঙাইফদবনি। নখোয়না অসিগুম্বা খন্থনবগীদমক্তা পাংথোক্লিবা মীতিন অসিগী পান্দমদি নখোয়না নশাবু অপগ্রেদ তৌবা, নশানা-নশাবু অপদেৎ তৌবা অমসুং মসিদা মমাংদা থেংনখিবা থৌদোকশিং অদুদগী তমদুনা তুংগীদমক্তা লম্বি য়াৎপা অমসুং ৱারেপ লৌনবদমক্তনি। ভারত মচা করোর কয়া-কয়ানা লাক্কদবা চহি ২৫ অসিদা ভারত অসিবু মপুং ফানা চাউখৎপা লৈবাক অমা ওইহন্নবা অচেৎপা ফিরেপ লৌরি। অমসুং চাউখৎপা ভারত অমা শেম্বা হায়বসি প্রোফেস্নেল অমসুং এফিসিয়েন্ত ওইবা ইনস্তিত্যুশন লৈতনা ওইথোকপা ঙম্লোই। অমসুং মরম অসিনা সি.বি.আই.দা য়াম্না চাউরবা থৌদাং লৈ।

মরুপশিং,

হৌখিবা চহি ৬০দা সি.বি.আই.না মল্তি-দাইমেনস্নেল অমসুং মল্তি-দিসিপ্লিনরী ওইবা ইনভেস্তিগেশন এজেন্সী অমা ওইনা মশাগী মশক তাকখি। ঙসি সি.বি.আই.গী স্কোপ অসি য়াম্না চাউখ্রে। বেঙ্ক ফ্রোদগী হৌরগা ৱাইল্দ লাইফকা মরি লৈননা মরাল লৈরবশিং, হায়বদি অসিদগী অদুদা, মেত্রোপোলিসদগী জঙ্গল ফাওবা হৌজিক্তি সি.বি.আই. থবক চেন্থোক চেন্সিন তৌরি। ওর্গনাইজদ ক্রাইমদগী হৌরগা সাইবর ক্রাইম ফাওবগী কেসশিং, সি.বি.আই.না য়েংশিল্লি।

অদুবু মরু ওইবা সি.বি.আই.গী মথৌদি করপ্সনদগী লৈবাক অসিবু কোকহনবনি।করপ্সন হায়বসি অচম্বা মরাল নত্তে। করপ্সন্না লাইরবশিংদগী মখোয়গী হক মৎপী, করপ্সন হায়বসিনা তোঙান-তোঙানবা অরানবা থবক কয়া অমা হৌরকই, অরানবা থবক কয়া অমা থোকহল্লি। করপস্ন হায়বসিনা দেমোক্রেসী অমসুং ৱায়েল বিচারগী লম্বিদা খবাইদগী চাউবা অপনবা অমা ওইহল্লি।  মরু ওইনা সরকারগী চৎন-পথাপশিংদা করপ্সনগী মমি তাবা মতমদা দেমোক্রেসীগী মহৈ য়ানবা ঙমহনদে। করপ্সন লৈবা মফমদা খ্বাইদগী অহানবদা নহা ওইরিবশিংগী মঙলানশিং অদুবু অরেম্বদা তাহল্লি, নহাশিংদা মতাং চানা খুদোংচাবা ফংহন্দে। মফম অদুদা অকক্নবা ইকোসীস্তেম অমা খক্তমক শন্দোক্তুনা লৈ। করপ্সন হায়বসি হৈ-শিংবা মতিক চাবশিংগী খ্বাইদগী চাউবা য়েক্নবনি, মসিদগী মীচং-শঙ্গা, ইমুং-মনুং, শাগৈ-নাতৈগী ওইবা হায়বসি য়াম্না হেন্না থোরকই অমসুং মসিগী খুবাম নুংদা হেন্না চেৎশিন্না তাশিল্লি।  করিগুম্বা মীচং-শঙ্গা, ইমুং-মনুং, শাগৈ-নাতৈগী ওইবা ৱাখল্লোন অসিনা হেনগৎলকপা মতমদা খুনাইগী ওইবা, লৈবাক্কী ওইবা ৱাখল্লোন অসি অদুমক হন্থরকই। লাইবক থিবদি, মীনাই নাইথাং ওইরিঙৈ মতমদগী থম্বিরম্বা করপ্সনগী লিগেসী অমদি ঐখোয়দা ফংহৌরে। অদুবু মসিদা নুংঙাইত্রিবা ৱাফমদি নিংতম্লবা মতুংদা দেকেদ কয়া অমা মসিগী লিগেসী অসিবু মুথৎপগী মহুত্তা মওং অমা নত্রগা অমদা মীওই খরনা অসিবু হেন্না মপাঙ্গল কনখৎহল্লি।

মরুপশিং

নখোয়না নিংশিংবীয়ু, চহি ১০গী মমাংদা নখোয়না গোল্দন জুবিলী পাংথোকপা মতমদা, লৈবাক অসিগি ফিভম করি ওইরম্বগে? মতম অদুগী সরকার ফিরেপ খুদিংমক, প্রোজেক্ত খুদিংমক, ৱাহং ময়াম্না কোইশিন্দুনা লৈ। করপ্সনগী কেস খুদিংমক্তা,  হান্নগী কেসতগী হেন্না চাউথোকপগী ফিভম অদুমক লৈ, নঙনা অসুক তৌরম্লবদি ঐনা অসুক য়াম্না তৌদুনা উৎকনি। ঙসি লৈবাক অসিদা ইকোনোমীগী সাইজগীদমক্তা করোর লাখ হায়বদি ত্রিলিয়ন দোলরগী মতাংদা খন্নৈ। অদুবু মতম অদুদা স্কেমশিংগী শাইজগীদমক্তা করোর লাখ হায়বা তর্ম অসি মমিং চৎখি। অসিগুম্বা য়াম্না চাউর-চাউরবা স্কেমশিং অসি থোকখি, অদুবু মরাল লৈবশিংদি থৌশাদনা লৈখি। মখোয়না খঙখি মদুদি সীস্তেম অসিনা মখোয়গীদমক্তআ লৈপ্লি হায়বা। অমসুং মসিনা করি ওইরক্লে? লৈবাক অসিগী এদমিনিস্ত্রেশনদা থাজবা মাংখ্রে। লৈবাক শিনবা থুংনা করপ্সনগী মায়োক্তা খোইরাং-খোইশাওনবগী খোল্লাও অসি লেপ্তনা হেনগৎলকখি। মসিনা চৎন-পথাপতা মচেৎ-মচেৎ কাইথরকখি, মীশিংনা ফিরেপ লৌবদগী নান্থোক্তুনা চেনবা হৌনরকখি, পোলিসী পেরালীসিসকী ফিভম অদুমক ওইখি। মদুনা লৈবাক চাউখৎপদা থিন্থহনখি। ইনভেস্তরশিংনা লৈবাক অসিদা লাকপা কিরম্মি। করপ্সনগী মতম অদুনা লৈবাক অসিদা য়াম্না অমাং-অতা থোকহল্লম্মি।

মরুপশিং,

চহি ২০১৪গী মতুংদা ঐখোয়গী খ্বাইদগী অহানবা ইথৌদাংদি, এদমিনিস্ত্রেশনদা অমুক হন্না থাজবা লেংদনা লৈহনবা অমসুং মরম অদুনা ঐখোয়না অরোনবা পৈশাগা মরি লৈননা, অরোনবা লন-থুম, মিসন মোদতা থবক ওইনা পাইখৎপা হৌখি। ঐখোয়না করপ্সন তৌরিবশিং অদুগা লোইন-লোইননা করপ্সনবু য়োকখৎলিবশিং অদুবুসু ঐখোয়না থবক পাইখৎপা হৌখি। নখোয় নিংশিংবীয়ু, সরকারগী তেন্দর লৌবগী নিয়মশিং, সরকারগী কোন্ত্রেক্ত, হায়রিবশিং অসি ৱাহংনা কোইশিন্দুনা লৈরম্মি। ঐখোয়না মসিদা ত্রান্সপরেন্সীবু থৌগৎলি। ঙসি ঐখোয়না ২.জি. অমসুং ৫.জি. স্পেক্ত্রমগী এলোকেশন তৌবা মতমদা খেৎনবা অদু ময়েক শেংনা উরমগনি। নখোয়নসু খঙলিবদুনি হৌজিক্তি কেন্দ্র সরকারগী দিপার্তমেন্ত খুদিংমক্তা অরৈ-অয়োন তৌনবগীদমক্তা জি.ই.এম. হায়বদি গোবর্নমেন্ত ই-মার্কেত প্লেস অসি লিংখৎখি। ঙসিদি দিপার্তমেন্ত খুদিংমক্না ত্রান্সপরেন্সীগা লোইননা মসিগী দিজিতেল প্লেতফোর্ম অসিদা লৈবা য়াবা পুম্নমক লৈরি।

মরুপশিং,

ঙসি ঐখোয়না ইন্তর্নেত বেঙ্কিংগী মতাংদা ৱারি শাবা মতমদা, য়ু.পি.আই.গী খুত্থাংদা য়াম্লবআ ত্রান্সেক্সনশিং পাংথোক্লি। অদুবু ঐখোয়না ২০১৪গী মমাংদা ফোন বেঙ্কিং তৌবগী তাঙ্কক অদুসু উখি। হায়রিবা মতম অসি, দিল্লীদা মতিক লৈবা রাজনিতিগী দলশিংগা শঙ্গা লৈবা মীশিংগী ফোনদা করোর লিশিং কয়াগী লোন ফংলম্বা মতম অদুনি। মদুনা ঐখোয়গী শেনমিৎলোনগী মরু ওইবা ঙাক্লৌ পীরিবা, ঐখোয়গী বেঙ্কিং সীস্তেমবু মাং-তাকহনখি। হৌখিবা চহিশিংদা য়াম্না কন্না হোৎনদুনা ঐখোয়গী বেঙ্কিং সেক্তরবু অরুবা ফিভম অদুদগী কনদুনা পুখৎলক্লি। ফোন বেঙ্কিংগী মতম অদুদা মীওই খরনা লুপা করোর লিশিং ২২ লৈবাক অসিগী বেঙ্কশিংদগী লুত তৌখি অমসুং মপান লমদা চেনখি। ঐখোয়না ফ্যুজিতিব ইকোনোমিক ওফেন্দরশিং আইন শেমখি। হৌজিক ফাওবদা মপান লমদা চেনখিবা অসিগুম্বা ইকোনোমিক ওফেন্দরশিং অদুগী লুপা করোর লিশিং ২০দগী হেনবা মরল-মথুম ফাগৎখ্রে।

মরুপশিং,

করপ্সন তৌরিবশিং অদুনা লৈবাক অসিগী লন-থুম হুরান্নবগীদমক্তা অনৌবা মওং অমসু শেমখি, মদুমক লৈবাক অসিদা চৎনদুনা লাকখি। মদুদি সরকারগী স্কীমশিংগী বেনিফিসরীশিংদগী হুরানবা । হান্নগী সরকারশিংদা লাইরবা বেনিফিসরীশিংগীদমক্তা কাইথোকখিবা কান্নবশিং অদু লমখাংদা অদুমক হুরানখি। রেশন, য়ুম, স্কোলারশিপ, পেন্সন, অসিগুম্বা সরকারগী স্কীমশিং অসিগী অশেংবা বেনিফিসরীশিং অদুনা মশাবু নমথাক তৌবীরে হায়না ফাওখি।  অমসুং প্রধান মন্ত্রী অমনদি হায়খি মদুদি লুপা অমা কাইথোকই মদুদা পৈশা ১৫ থুংঙি, পৈশা ৮৫দি হুরানখি। হৌখিবা মতমশিংদা ঐহাক্না খনখি মদুদি ঐখোয়না দি.বি.তি.গী খুত্থাংদা চাউরাক্না লুপা করোর লাখ ২৭  মীয়ামদা য়ৌহনখি। করিগুম্বা অসিগী মওংদা য়েংলবদি করোর লাখ ২৭ অসিগী মনুংদা চাউরাক্না করোর লাখ ১৬ কদাইদনোমা চৎখ্রে। ঙসি জনধন, আধার, মোবাইলগি ত্রিনিতীগি খুত্থাংদা বেনিফিসরী খুদিংমক্তা মখোয়গী হক মপুংফানা ফংহল্লি। মসিগী সীস্তেম অসিগী খুত্থাংদা করোর ৮ হেনবা শাজিন্নবা বেনিফিসরীশিং সীস্তেমদগী লৌথোকখ্রে। নুপী পোক্তবশিং অদু লুখ্রাবী ওইখি অমসুং লুখ্রাবীগী পেন্সন লৌখি। দি.বি.তি.গী খুত্থাংদা চাউরাক্না লুপা করোর লাখ ২.২৫ অসিবু অরানবা খুত্তা থুংখিবদগী কনখি।

মরুপশিং,

মতম অমদা সরকারগী থবক্কী ইন্তরভ্যু পাস তৌহন্নবগীদমক্তা করপ্সন য়াম্না চাউনা তৌরম্মি। ঐখোয়না কেন্দ্রগী গ্রুপ-সি, গ্রুপ-দি ইন্তর্ভ্যু অদুবু লোইশিনখি। মতম অমদা য়ুরিয়াগীদমক্তা স্কেম তৌরম্মি। ঐখোয়না মসিদসু য়ুরিয়াদা নীম কোতিং তৌদুনা মসিদসু অথিংবা থমখি। দিফেন্সকী দীলদা স্কেম তৌবা হায়বসি তোইনা থোকপা থৌদোক্নি। হৌখিবা চহি ৯দা দিফেন্সকী দীলশিংদা ত্রান্সপরেন্সীগা লোইননা তৌখি। হৌজিক্তি ঐখোয়না ভারত্তা ঐখোয়গী দিফেন্সকী পোৎলমশিং শাজবগী মতাংদা অহেনবা মিৎয়েং থম্লি। 

মরুপশিং,

করপ্সনগী ময়োক্তা থেংনরিবা লান অসিগী মতাংদা অসিগুম্বা খোংথাং কয়া অমা নখোয়সু হায়বা ঙম্মি, ঐসু মদু মশিং থিবা ঙম্মি। অদুবু হৌখিবা মতমশিংদা থেংনখিবশিং অদুদগী করিগুম্বা খরদি অদুমক তমজনিংঙাই ওই। লাইবক থিবদগী, করপ্সনগা মরি লৈনবা কেসশিং চহি কয়া শাংদোক্তুনা লাক্লি। করিগুম্বা কেস খরদি এফ.আই.আর. চল্লবা মরুং চহি ১০ ফাওবা, সজাই পীবগী মতাংদা খন্ন-নৈনদুনা লৈখি। ঙসিসু অসিগুম্বা কেসশিংগী মতাংদা এক্সন লৌখৎলি, হায়রিবশিং অসি চহি কয়া লিরবা কেসশিংনি।

ইনভেস্তিগেশন তৌবদাথিন্থবা হায়বসিনা প্রোব্লেম মখল অনি থোকহল্লি। নাকল অমদা করপ্সন তৌবা অদুবু সজাই পীবদা থেংথহল্লি, অদুগা অমরোমদনা মরাল লৈজদবা অদুবুনা ৱাহল্লি। ঐখোয়না মসিগী থৌওং অসিবু করম্না য়াংখৎহনগনি অমসুং করপ্সনদা চেন্নবা মরাল লৈরবা মীশক অদুবু শজাই পীবদা অথিংবা অপনবা লৈতনবা হোৎনগদবনি।ঐখোয়না বেস্ত ইন্তর্নেস্নেল প্রক্তিসশিংবু স্তদী তৌগদবনি। ইনভেস্তিগেশন তৌরিবা ওফিসিয়েলশিংগী কেপাসিতী বিল্দিংদা ফোকস তৌবা তাই।

ঐহাক্না খঙঙি মদুদি নখোয়না এক্সন লৌখৎলিবশিং অদু য়াম্না শক্তি লৈবা মীশিংনি। চহি কয়া সরকারগী, সীস্তেমগী শরুক অমা ওইদুনা লাক্লবশিংনি। করিগুম্বা মফম খরদদি, রাজ্য অমগী সরকার পাইরিবশিংগী শরুক অমা ওইরম্বা য়াই। চহি কয়াদগী মখোয়নসু ইকোসীস্তেম অমা শেম্মি। মসিগী ইকোসীস্তেম অসিনা অনম্বা মতমদা মখোয়গী অরোন-অথুপশিং অদুবু কুপশিন্নবগীদমক্তা নখোয়গুম্বা ইনস্তিত্যুশনশিং অসিগী মিংচৎ থিহন্নবগীদমক্তা এক্তিব ওই। এজেন্সীদা লান্দাই।

মখোয়শিং অসিনা নখোয়গী ৱাখল থৈদোক্নবগীদমক্তা হোৎনগনি, অদুবু নখোয়না নখোয়গী থবকশিং অদুদা ফোকস তৌদুনা লৈগদবনি। করপ্সন তৌবা মীওই অমত্তা নান্থোকহল্লোইদবনি। ঐখোয়না হোৎনরিবশিং অসিদসু থেংথহল্লোইদবনি। মসি লৈবাক অসিগী অপাম্বনি, লৈবাক অসিগী মীয়ামগী অপাম্বনি। অমসুং ঐহাক্না নখোয়দা থাজবা পীরি মদুদি লৈবাক অসিনা নখোয়গা লেপ্লি, লৈবাক অসিগী আইননা নখোয়গা লেপ্লি, লৈবাক অসিগী সংবিধান্না নখোয়গা লেপ্লি।

মরুপশিং,

হেন্না ফবা ফলগীদমক্তা তোঙান-তোঙানবা এজেন্সীশিংগী মরক্তা সিলোশিং লৈহন্দবা হায়বসি য়াম্না মরু ওই। জোইন্ত অমসুং মল্তিদিসিপ্লিনরী ইনভেস্তিগেশন অসি ঐখোয় মশেলগী মরক্তা থাজনবা মতমদতা ওইথোক্কদৌরিবনি। হৌজিক্তি লৈবাক অসিগী জিয়োগ্রাফিকেল বাউন্দরীশিং ৱাংমদা শেল-থুমগী, মীশিংগী, গুদস অমসুং সর্বিসশিংগী মোভমেন্ত য়াম্না চাউবা থাক্তা থোক্লি।  

ভারতকী খুনাইগী ওইবা মরি, ঐখোয়গী অমত্তা ওইবগী শক্তম অমসুং ইচিল-ইনাও ওইবগী মরিদা, ঐখোয়গী শেনমিৎলোনদা, ঐখোয়গী ইনস্তিত্যুশনশিংদা নোংম-নোংমগী য়ৈখাইবা-থিনগাইবা হেনগৎলক্লি। অমসুং মসিদা শোইদনা করপ্সনগী শেল অদু থাদরিবনি। মরম অদুনা, ঐখোয়না ক্রাইম অমসুং করপ্সনগী মল্তিনেস্নেল নেচর অদুবুসু খঙজিনবা মথৌ তাই, স্তদী তৌবা তাই। মসিগী রুত কোজ অদুফাওবা থিজিনবা মথৌ তাই। ঙসি ঐখোয়না তত্তনা উরি মদুদি মতম অসিগী অনৌবা তেক্নোলোজীনা মরম ওইরগা ক্রাইম গ্লোবল ওইরক্লি। অদুবু মসিগী তেক্নোলোজী, মসিগী ইনোভেশন অসিনসু মসিবু কোকহন্নবা লম্বি অদুবুসু পীগনি। ঐখোয়না ইনভেস্তিগেশনদা ফোরেন্সিক সাইন্স শিজিন্নবা অমসুং মসিগী মতাংদ নিংথিনা খঙবা মথৌ তাই।

মরুপশিং,

সাইবর ক্রাইমগুম্বা শিংনবশিং অসিবু লাকশিন্নবগীদমক্তা ঐখোয়না ইনোভেতিব ওইবা পাম্বৈ থিবা তাই। ঐখোয়না তেক ইনেবলদ এন্ত্রপ্রেনরশিং অমসুং নহারোলশিংবু ঐখোয়গা পুনশিনবা য়াই। নখোয়গী ইনস্তিত্যুশনমক্তসু তেক্নো-সেভী ওইবা নহারোলশিং য়াওরমগনি, মখোয়শিং অদুবু নিংথিনা শিজিন্নবা য়াগনি।

মরুপশিং,

ঐঙোন্দা খঙহল্লকখি মদুদি সি.বি.আই.না মুত্থৎপা য়াবা চৎনবী ৭৫ কমপাইল তৌখ্রে। ঐখোয়না অকক্নবা মতমগী মনুংদা হায়রিবশিং অসিদা থবক তৌগদবনি। হৌখিবা চহি শিংদা সি.বি.আই.না মশানা-মশাবু অওনবা অমা পুরকখ্রে। মসিগী থৌওং অসি লেপ্পা লৈতনা, অসিগুম্না মখাতানা অদুমক চৎথগদবনি।

ঐহাক্না থাজৈ মদুদি মসিগী কন্তেম্পলেশন কেম্প অসিনা অনৌবা মওংদা ইশান-ইশাবু থাজবা অমা পোকহল্লগনি, মসিগী কন্তেমপ্লেশন কেম্প অসিনা অনৌবা দাইমেন্সন অমা য়ৌহন্নবগী লম্বি অমা পীরগনি, মসিগী কন্তেমপ্লেশন কেম্প অসিনা লুবদগী লুরবা, ৱাবদগী ৱারবা প্রোব্লেম কয়া অমবু কোকহন্নবগীদমক্তা অনৌবা অওনবা অমা পুরক্লগনি।  অমসুং ঐখোয়না হেন্না মতিক চানা, য়াম্না হেন্না মহৈ য়ানগদবা মওংদা থবক তৌরগনি অমসুং মীচম প্রজাশিংনা অরানবা তৌররোই অদুগা অরানবসু তৌনিংলরোই। ঐখোয়না পুকচেল শেংবশিং অদুগী থাজবা অদুবু হেনগৎহনবা পাম্লি । অমসুং মখোয়গী মশিং অদু করোর কয়া-কয়ানি, মীওই করোর কয়া-কয়া অমগীনি। অসুক য়াম্লবা মীয়াম অসিনা ঐখোয়গা লোইননা লেপ্লি। মরুপশিং ঐখোয়গী থাজবদা অৱাৎপা অমত্তা লৈতে।

অসিগী দাইমন্দ জুবিলী অসিগী য়াম্না মরুওইবা থৌরম অসিদা ঐহাক্না নখোয়দা য়াইফ-পাউজেল কয়া অমা পীরি। নখোয়না নখোয়গীদমক্তা চহি ১৫দা করি তৌগদবা, অমসুং নখোয়গী খুত্থাংদা ২০৪৭ ফাওবদা করি ফংবা ঙমগনি, মসিগী পান্দম অনি অসিগা লোইননা অচেৎপা ফিরেপ লৌরগা মাংলোমদা খোং থাংজিনগদবনি। চহি ১৫ হায়রিবা অসি নখোয়না চহি ৭৫ শুবা মতমদা নখোয়না কয়া য়াম্না মতিক চাবা, কদাইফাওবা কত্থোকপা, কয়া য়াম্না চেৎনা ফিরেপ লৌবা অমসুং লৈবাক অসিনা ২০৪৭দা চহি চা শুবগী কুমওন পাংথোকপা মতমদা, লৈবাক অসিগী থাজবা অমসুং আশা অদুগী মতুং ইন্না নখোয়না কদাই ফাওবা য়ৌরবগে হায়বা নুমিৎ অদু লৈবাক অসিনা য়েংবা পাম্লি।

ঐহাক্না নখোয় ময়ামদা য়াইফ-পাউজেল পীরি।

থাগৎচরি!

*****