প্রধান মন্ত্রী শ্রী নরেন্দ্র মোদীগী লমজিং মখাদা কেন্দ্র সরকারনা থবক কয়া পায়খৎপদগী অৱাং-নোংপোক রাজ্যশিংদা ঙাক-শেনগী ফিবম শিংথাবা য়ানা ফগৎলে অমসুং চাউখৎপগী খোঙজেল য়াংখৎলে। ২০১৪গা চাংদম্নবদা, ২০২২দা লালহৌবগী থৌদোকশিং চাদা ৭৬ হন্থরে। হায়রিবা মতম অসিগী মনুংদা সেকুরিতিগী মীওইশিং অমসুং মীচম মীয়াম শিবগী চাং চাদা ৯০ অমসুং চাদা ৯৭দা হন্থখি।

প্রধান মন্ত্রী শ্রী নরেন্দ্র মোদীগী লমজিং মখাদা কেন্দ্র সরকারনা লেপ্তনা থবক কয়া পায়খৎপদগী, মমাঙদা অমুক্তা ওইখিদ্রিবা মওংদা অৱাং-নোংপোক ভারত্তা ঙাক-শেনগী ফিবম ফগৎলে অমসুং পুৱারি ওইরবা খোঙথাং অমদা, চহি কয়াগী মতুংদা, এপ্রিল ২০২২দগী ভারত সরকারনা, আর্মদ ফোর্সেস স্পিসিএল পৱার্স এক্ত(অফস্পা)কী মখাদা নাগালেন্দ, অসাম অমসুং মনিপুরদা দিসতর্ব এরিয়াশিং মশিং হন্থহল্লে। ঙসি অতোপ্পা মরুওইবা ৱারেপ অমা লৌরদুনা, এপ্রিল ১,২০২৩দগী, অফস্পাগী মখাদা হায়রিবা রাজ্য অহুম অসিদগী মখা তানা দিসতর্ব এরিয়াশিং হন্থরগনি। য়ুনিয়ন হোম মিনিস্তর শ্রী অমিত সাহনা হায়খি অৱাং-নোংপোক ভারত্তা ঙাক-শেনগী ফিবম শিংথাবা য়ানা ফগৎলকপদগী মসিগী ৱারেপ অসি লৌখিবনি। প্রধান মন্ত্রী শ্রী নরেন্দ্র মোদীগী লমজিং মখাদা অহানবা ওইনা অৱাং-নোংপোক লমদমগী ঙাক-শেন, শান্তি অমসুং চাউখৎপা মরুওইনা লৌবদগী, মদুগী ফল ওইনা ঙসি লমদম অসি শান্তি অমসুং চাউখৎপগী লম্বীদা য়াংনা চঙশিল্লি।

শান্তি লৈবা অমসুং নুংঙাই-য়াইফবা অৱাং-নোংপোক ভারত অমগী প্রধান মন্ত্রী শ্রী নরেন্দ্র মোদীগী মঙলান মঙফাউন্নবা, য়ুনিয়ন হোম মিনিস্তর শ্রী অমিত সাহগী লমজিং মখাদা, হৌখিবা চহি ৪দা অৱাং-নোংপোক রাজ্যশিংদা শান্তি পুরক্নবা য়ানচে কয়া খুৎয়েক পীনখ্রে। থবকশিং অদুগী ফলশিং ওইনা, লালহৌলুপ অয়াম্বা লৈবাক অসিগী সংবিধান্দা থাজবা লৈরে অমসুং প্রধান মন্ত্রী শ্রী নরেন্দ্র মোদীনা লুচিংবা সরকারগী থৌশিলশিংদগী মখোয় খুৎলায় থাদোক্লে অমসুং অৱাং-নোংপোক লমদমগী শান্তি অমসুং চাউখৎ-থৌরাংদা শরুক য়ারে। ২০১৪দগী হৌজিক ফাওবদা লালহৌবা ৭০০০ হেন্না চঙজরকখ্রে।

হৌখিবা চহি ৪গী মনুংদা, শান্তি লৈবা অমসুং নুংঙাই-য়াইফবা অৱাং-নোংপোক অমগী প্রধান মন্ত্রী শ্রী নরেন্দ্র মোদীগী মঙলান মঙফাউন্নবা, চহি কয়া শুরবা ৱাথোকশিং ৱারোইশিন পুরক্নবা, হোম এফেয়ার্স মিনিস্ত্রিনা পুৱারি ওইরবা য়ানচে কয়া খুৎয়েক পীনখ্রে।

• লালহৌবশিং মহৌশাগী পুন্সিদা পুরক্নবা, ওগস্ত ২০১৯দা, ত্রিপুরাদা এন.এল.এফ.তি(এস দি)গা লোয়ন্না য়ানচে খুৎয়েক পীনখ্রে।
• জনুৱারি ২০২০গী বোরো একোর্দনা, অসামগী চহি ৫০শুরবা বোরোগী ৱাথোক ৱারোইশিন পুরকখ্রে।
• জনুৱারি ২০২০দা, চহি কয়া কুইরবা ব্রু-রিয়াং রিফিউজি ৱাথোক লোইশিন্নবা পুৱারি ওইরবা য়ানচে অমা খুৎয়েক পীনখ্রে, মসিগী মখাদা লাঞ্জেন্দুনা লৈরকপা মীওই ৩৭,০০০ ত্রিপুরাদা অমুক হন্না খুন্দা-লৈতারে।
• সেপ্তেম্বর ২০২১গী কার্বি-অংলোং য়ানচেনা, অসামগী কার্বি লমদমগী মতম কুইরবা ৱাথোক য়ানশিন্নবা পুরকখ্রে।
• সেপ্তেম্বর ২০২২দা অসামগী ত্রাইবেল কাংবুগা য়ানচে অমা খুৎয়েক পীনখ্রে।

অৱাং-নোংপোক লমদম শীনবা থুংনা লালহৌবগী ইরাং লৈতনবা প্রধান মন্ত্রী মোদীনা অচেৎপা ফিরেপ লৌরে, মসিগী মতুংইন্না কেন্দ্র সরকারনা রাজ্য সরকারশিং অমসুং অতোপ্পা মরী লৈনবশিংগা লেপ্তনা ৱারি শানরি। মোদী সরকারগী মখাদা ঙাক-শেনগী ফিবম ফগৎলকপনা মরম ওইদুনা, অফস্পাগী মখাদা দিসতর্ব এরিয়া লাউথোকখিবা অদু ২০১৫দা ত্রিপুরাদগী অমসুং ২০১৮দা মেঘালয়দগী লৌথোকখ্রে।

১৯০০দগী অসাম শীনবা থুংনা দিসতর্ব এরিয়া চৎনবা হৌখি। মোদী সরকারনা কন্না হোৎনবদগী ইরাংগী ফিবম ফগৎলকপদগী, জিলা ৯ অমসুং অতোপ্পা জিলা অমগী সব-দিবিজন অমা খক নত্তনা অসাম শীনবা থুংনা এপ্রিল ১,২০২২দগী অফস্পাগী মখাদা লৈরকপা দিসতর্ব এরিয়া লৌথোকখ্রে অমসুং মসি এপ্রিল ১,২০২৩দগী শুপ্নগী জিলা ৮ খক্তদা চৎনরে।

মনিপুরদা ২০০৪দগী(ইম্ফাল মিউনিসিপালিতিগী মফমশিং নত্তনা) অফস্পাগী মখাদা দিসতর্ব এরিয়া থম্লক্লে। প্রধান মন্ত্রী শ্রী নরেন্দ্র মোদীগী মখাদা, কেন্দ্র সরকারনা মরুওইবা ৱারেপ অমা লৌবদগী, জিলা ৬দা পুলিস স্তেসন ১৫না কোনবা মফমশিংদগী এপ্রিল ১,২০২২দগী দিসতর্ব এরিয়া লৌথোকখ্রে অমসুং হৌজিক অতোপ্পা পুলিস স্তেসন ৪দগী এপ্রিল ১, ২০২৩দগী দিসতর্ব এরিয়া লৌথোক্লগনি। অসুম্না, মনিপুরগী জিলা ৭গী পুলিস স্তেসন ১৯দগী অফস্পাগী মখাদা লৈরকপা দিসতর্ব এরিয়া লৌথোক্লে।

১৯৯৫দগী নাগালেন্দ শীনবা থুংনা অফস্পাগী মখাদা দিসতর্ব এরিয়া চৎন্দুনা লাক্লি। তাঙ্কক নাইনা অফস্পা লৌথোক্নবা শেমখিবা কম্মিতিগী ৱারেপ মতুংইন্না, এপ্রিল ১,২০২২দগী জিলা ৭গী পুলিস স্তেসন ১৫দগী অফস্পাগী মখাদা লৈরকপা দিসতর্ব এরিয়া লৌথোকখ্রে। মখা তানা, এপ্রিল ১,২০২৩দগী অতোপ্পা পুলিস স্তেসন অহুমদগী লৌথোক্তুনা, নাগালেন্দগী জিলা ৮গী পুলিস স্তেসন ১৮দগী অফস্পাগী মখাদা লৈরকপা দিসতর্ব এরিয়া লৌথোক্লগনি।

প্রধান মন্ত্রী শ্রী নরেন্দ্র মোদী থাগৎলদুনা, য়ুনিয়ন হোম মিনিস্তর শ্রী অমিত সাহনা হায়খি অৱাং-নোংপোক লমদমগী মীয়ামগী পুন্সিদা অফবা অহোংবা পুরকপা অমসুং ভারতকী অতৈ মফমশিংগা লমদম অসিগা থম্মোয়গী মরী শেমগৎপগীদমক ঐনা প্রধান মন্ত্রী শ্রী নরেন্দ্র মোদীদা ঐগী থাগৎপা ফোঙদোকচরি, অচৌবা থৌরম অসিদা অৱাং-নোংপোক লমদমগী মীয়ামদা য়াইফ-পাউজেল পীজরি।

*****