কোওপরেতিব রিপব্লিক ওফ গুয়ানাগী রাস্ত্রপতি, দাঃ মোহম্মদ ইর্ফান অলিনা ভারতকী প্রধান মন্ত্রীবু খ্বাইদগী অহানবা মালেমগী মিল্লেত (শ্রী অন্না) কনফরেন্স অমা নই দিল্লীগী পুসাদা পাংথোকপগীদমক্তা থাগৎপা ফোংদোকখ্রে অমসুং কনফরেন্স অসিনা ফুদ সেক্যুরিতীগী মালেমগী খ্বাইদগী মরু ওইবা শিংনবা অমা মাইয়োক্নবদা চাউনা তেংবাংগনি হায়খ্রে।

গুয়ানাদগী ঙসি থারকপা ভিদিওগী ৱারোল অমদা দাঃ ইর্ফান অলিনা য়ুনাইতেদ নেসন্সনা ইং ২০২৩বু মালেমগী মিল্লেতকী চহি (আই.ৱাই.ও.এম.) হায়না লাউথোকখিববু শকখঙবা ওইনা মহাক্কী লৈবাক্তা মিল্লেত মপুং ওইনা থানবগীদমক্তা একর ২০০০গী লম পীগনি হায়না ফোংদোকখ্রে। মসিগুম্বা অঙকপা চিঞ্জাক অসিবু ফার্মদা থাবা অমসুং পুথোকপগী চাং হেনগৎহন্নবগীদমক্তা ভারতনা তেক্নোলোজী অমসুং তেক্নিকেল সপ্পোর্ত পীগনি হায়না মহাক্না ফোংদোকখি।

মিল্লেত অসি শেল য়াম্না তাঙদবা অমসুং মচি য়াম্না লৈবা ওপ্সন অমা ওইবতা নত্তনা অইং-অশা হোংবগী তোঙান-তোঙানবা শিংনবশিং নিংথীনা মাইয়োক্নবসু ঙম্মি হায়না দাঃ ইর্ফান্না হায়খি। কেরিবিয়ন লৈবাক ১৭তা মিল্লেত থাবা অমসুং পুথোকপগী থৌওংশিংদা পাংবা য়াবা মতেং খুদিংমক মহাক্না পীগনি হায়না ফোংদোকখি অমসুং মসিগুম্বা থৌওং অসিনা কেরিবিয়ন লৈবাকশিংদা মিল্লেতপু মমিং চৎহনগনি।

ভারতনা মিল্লেত পুথোকপা অমসুং এক্সপোর্ত তৌবদা মালেমগী খ্বাইদগী মকোক থোংবা ওইরি অমসুং মালেমদা মিল্লেতপু মমিং চৎহনবা অমসুং পুথোকপগী চাং হেনগৎহনবদা লুচিংবগী থৌদাং লৈবা ঙমগনি হায়না দাঃ ইর্ফান অলিনা মখা তাখি।

অতোপ্পা ভিদিওগী ৱারোল অমদা, ইথিওপিয়াগী রাস্ত্রপতি, কুমারী সাহলে-ৱোর্ক জিউদেনা ভারতকী প্রধান মন্ত্রীবু মিল্লেতকী মতাংদা মসিগুম্বা মালেমগী কনফরেন্স শীনবগীদমক্তা থাগৎপা ফোংদোকখি অমসুং মসিনা মালেমগী সরকার অমসুং পোলিসী শেম্বশিংগী মফমদা মিরাকল মিল্লেত পুথোকপা অমসুং মসিবু পুক্নিং থৌগৎনবা পায়খৎপা থৌওংশিংদা থৱাই হেন্না য়াওহল্লগনি হায়না ফোংদোকখি।

ইথিওপিয়াগুম্বা সব-সহারা লৈবাকশিং খক্তা নত্তনা অফ্রিকা মহাদেশ পুম্বনা থেংনরিবা ফুদ সেক্যুরিতীগী শিংনবশিং মাইয়োক্নবদা মিল্লেতনা য়াম্না চাউনা তেংবাংগনি হায়না কুমারী সাহলে- ৱোর্ক জিউদেনা ফোংদোকখি। কনফরেন্স অসিদগী ফংবা ৱাখল্লোনশিংনা ইং ২০৩০গী সস্তেনেবল দিভেলপমেন্ত পান্দমশিং ফংহনবদসু তেংবাংগনি হায়না মহাক্না মখা তাখি।

<><><><><>