জনুৱারী ১৩দা বরানসীদগী প্রধান মন্ত্রী শ্রী নরেন্দ্র মোদীনা লমথাখিবা, মালেমগী খ্বায়দগী শাংবা রিভর ক্রুজ ‘এম.ভি. গঙ্গা বিলাস’না মাগী খোঙচৎ দিব্রুগরদা ফেব্রুৱারী ২৮দা লোইশিল্লগনি‍। ইনলেন্দ ৱাতরৱেজ ওথোরিতী ওফ ইন্দিয়া (আই.দব্লিউ.এ.আই.)না ভারত লৈঙাক্কী পোর্ত, সিপ্পিং এন্দ ৱাতরৱেজ মন্ত্রালয়গী মখাদা হায়রিবা নুমিৎসিমক্তদা দিব্রুগরদা তরাম্না ওকপগী থৌরম অমা পাঙথোক্কদৌরি‍। থৌরম অসিদা পোর্ত, সিপ্পিং অমদি ৱাতরৱেজকী কেন্দ্র মন্ত্রী শ্রী সর্বনন্দ সোনোৱালগা লোয়ননা অতৈ কেন্দ্র মন্ত্রীশিং, স্তেতকী মন্ত্রীশিং, দিপ্লোমেৎশিং অমদি আই.দব্লিউ.এ.আই. অমসুং এম.ও.পি.এস.দব্লিউ.গী ওফিসিএলশিংনা শরুক য়াগনি‍।

ভারত্তা শাবা ক্রুজ ভেসেল ‘এম.ভি. গঙ্গা বিলাস’ প্রধান মন্ত্রীনা লমথারবা মতুংদা জনুৱারী ১৩দা বরানসীদগী মাগী খোঙচৎ হৌরকখিবনি‍। ক্রুগ অসিনা ফেব্রুৱারী ২৮দা দিব্রুগর য়ৌরকত্রিঙৈদা পত্না সাহিব, বোধ গয়া, বিক্রমসিলা, ধাকা, সুন্দরবন্স, অমদি কাজিরঙ্গা নেস্নেল পার্ক ফাওদুনা নুমিৎ ৫০নিদা কিলোমিতর ৩,২০০ লাপ্না লাক্লি‍। তোপ তোপ্পা দিজাইন অমদি তুংগী ওইবা মীৎয়েঙ থমদুনা শাখিবা ক্রুজ অসিদা তেক অহুম অমদি সুইত ১৮ য়াওদুনা তুরিস্ত ৩৬ চল্লি‍। মসি মথঙগী চহি অনিগী ওইনা হঙ্গৎ হন্দাগী খোঙচৎকীদমক মাঙজৌননা বুক তৌখ্রে‍।

“এম.ভি. গঙ্গা বিলাসনা ভারত অমসুং বংলাদেশপু মালেমগী রিভর ক্রুজকী মেপ্তা হাপ্তুনা ইন্দিয়ন সব-কন্তিনেন্ততা তুরিজম অমদি ফ্রৈৎ কেরিএজকর অনৌবা লমখৈ অমা হাংদোক্লে‍। স্পিরিচুএলিতী থিরিবা তুরিস্তশিংনা কাসি, বোধ গয়া, বিক্রমসিলা, পত্না সাহিবনচিংবা মফমশিং চৎনবগী অদুগা মহৌশাগী খেন্নবা মফমশিং য়েংনিংবা মীওইশিংনা সুন্দরবন অমদি কাজিরঙ্গানচিংবা লমথুংফমশিং চৎপগী খুদোংচাবা ফংগনি‍। রুত অসিনা ভারত অমসুং বংলাদেশ অনিমক্কী ওইনা ইনলেন্দ ঈশিং লম্বীদা পোৎ-চৈ পুথোক পুশিন তৌবগী অনৌবা পন্দুপ অমা হাংদোক্লে‍। হৌজিক্তি খোঙচৎ অসিগী খুত্থাঙদা, তুরিস্তশিংনা ইমর্সিব এক্সপরিএন্সিএল ওইবা খোঙচৎ অমদা চৎনবগী অমদি খোঙচৎ পরিংসিদা ভারত অমসুং বংলাদেশকী আর্ত, নাৎ, পুৱারী, অমদি স্পিরিচুএলিতীগী মশকশিং য়েংনবগী খুদোংচাবা পীরি”, হায়না শ্রী সোনোৱালনা হায়খি‍।

অৱাং নোংপোক্তা নেস্নেল ৱাতরৱেজ (এন.দব্লিউ)গী খুত্থাঙদা পোৎ-চৈ পুথোক পুশিন তৌবগী অচৌবা মতিং লৈ‍। হায়রিবা নেস্নেল ৱাতরৱেজশিং অসিনা অসাম, নগালেন্দ, ত্রিপুরা, মনিপুর, মিজোরম অমদি অরুনাচল প্রদেশগী মনুং হঞ্জিনবা মফমশিংদা কন্নেক্তিবিতী ফংহন্দুনা স্তেতশিং অসিবু মেনলেন ইন্দিয়া অমদি ইন্দো-বংলাদেশ প্রোতোকোল রুতকী খুত্থাঙদা কোলকতা অমদি হল্দিয়াগী সমুদ্রগী হিথাংফমশিংদা শম্নহল্লে‍। ফ্যারৱে, তর্মিনেল অমদি নেভিগেসন এদনচিংবা ইনলেন্দ ৱাতর ত্রান্সপোর্ত ইনফ্রাস্ত্রকচর শেমগৎপগী প্রোজেক্ত কয়া অৱাং নোংপো লমদমদা আই.দব্লিউ.এ.আই.না পায়খৎপা লোইরে অমদি মখোয় খরনা থবক পায়খৎলি‍। ইং ২০১৭দা পাঙথোকখিবা আই.দব্লিউ.এ.আই.গী মনুংগী ওইবা স্তদী অমগী মতুং ইন্না, অৱাং নোংপোক লমদমদা কার্গো এম.এম.তি.পি.এ. ৪৯ পুশিল্লকপা অমদি পুথোকখিবগী থবক তৌই অমদি অৱাং নোংপোক লমদম মনুংগী ওইনা এম.এম.তি.পি.এ. ৩০রোমগী কার্গো পুথোক পুশিন তৌরি হায়রি‍।

*****