ব্রহ্ম কুমারী ওঊপকী প্রমুখ রাজ্যোগিনী দাদী রতন মোহিনী জী, ঐগী মন্ত্রী মন্দলগী মরূপ গজেন্দ্র সিংহ সেখাৱি জী, ব্রহ্ম কুমারী লূপকী লূপ্লোয় পুম্নমক, অতৈ মীথুংশিং, ইবেম্মা অমদি ইবুংঙোশিং! ব্রহ্ম কুমারীশিংনা পায়খৎপা ‘জল-জন অভিয়ান’ থৌরম অসি হৌদোকপগী থৌরমসিদা মফমসিদা ঐনা শরুক য়াজবা ঐ নুংঙাই‍। অদোম ময়ামগী মরক্তা লাক্তুনা অদোমগী মফমদগী ৱাখল লৌশিং কয়া তানশিঞ্জবা ঐগীদমক্তদি তোপ তোপ্পা অমা ওইদুনা লাক্লি‍। লৈখিদ্রবা রাজ্যোগিনী দাদী জানকী জীগী মফমদগী ফংজহৌবা থৌজালনা ঐগী খ্বায়দগী চাউবা লন ওইরি‍। দাদী প্রকাস মানী জীনা লৈখিদ্রবা মতুংদা অবু লম্বীদা মহাক্কী মফমদা শ্রদ্ধাঞ্জলি কৎচখিবা ঐ নীংশিংলি‍। হৌখিবা চহি খরসিদা, ঐনা ব্রহ্ম কুমারীগী ইচেল ইচলশিংদগী তোঙান তোঙানবা থৌরমশিংগী পাউকৎ কয়া ফংজখি‍। অসিগুম্লবা স্পিরিচুএল ওইবা ইমুং অসিগী মীওইশিংগী মরক্তা শরুক য়াজনবা ঐনা মতম পুম্বদা হোৎনৈ‍।

ঐনা অদোমগী মরক্তা হেক লাকপা খুদিং, ২০১১দা অহমদবাদতা পাঙথোকখিবা ‘ফ্যুচর ওফ প্রোগ্রাম’ ওইরবসু, ইন্সতিত্যুসন অসি লিংখৎখিবগী চহি ৭৫ মপুং ফারকপগী থৌরম, ২০১৩গী সঙ্গম তীর্থধাম, ২০১৭দা পাঙথোকখিবা ব্রহ্ম কুমারী সন্সথানগী ৮০শুবা মপোক কুমওন, নৎত্রগা অমৃৎ মহোৎসবকা মরী লৈনবা মমাঙ চহিগী থৌরম ওইরবসু, অদোমগী নুংশিবা অমদি অমত্তা ওইবগী মতৌনা ঐগী পুক্নিংবু থুমহৎলি‍। ইশাগী হায়বা ৱাখলগী ৱাংমা লান্দুনা খুন্নাইগীদমক পুম্নমক কত্থোকপনা অদোমগী স্পিরিচুএলগী থৌওংগী মওং অমা ওইবা মরম্না ঐগা ব্রহ্ম কুমারীশিংগা লৈনবা মরীসু অখন্নবা মরীনি‍।

মরূপশিং,

‘জল-জন অভিয়ান’ অসি মালেম পুম্বদা ঈশিংগী মরাং কায়না ফংদবা হায়বসিনা তুংলমচৎকী অৱাবা ফীভম অমা ওইরক্কনি হায়না লৌনরিবা মতমসিদা হৌদোক্লি‍। ২১শুবা চহিচাসিনা মালেমদা অকক্নবা চাংদা ফংলিবা ঈশিংগী মতাঙদা লুম্না লৌনরক্লি‍। মীশিং য়াম্বা মরম্না, ভারত ফাওবা য়াওনা ঈশিংগী সিক্যুরিতী হায়বসি মরুওইবা থৌদাং অমা ওইরক্লি‍। মরম অসিননি নীংতম্বগী ‘অমৃৎ কাল’ অসিদা, ঙসি লৈবাকসিনা, ‘ঈশিং লৈরবদি হয়েংসু লৈ’ হায়নবা ৱাফম পরিংদা, ঈশিংবু হয়েং ওইনা লৌদুনা থবক পায়খৎলিবা‍। ঈশিং লৈরবদি হয়েং লৈগদৌরিবনি‍। মরম অদুনা ঐখোয়না ঙসিদগী হৌনা ঈশিংগী মরমদা পায়খৎপা য়াবা থৌরাং পায়খৎনবা হোৎনবা তাই‍। লৈবাকসিনা ঈশিং য়োকশিনবগী থৌওংবু মীয়ামগী ইহৌ ওইনা মাঙদা চঙশিল্লিবা মতৌসিদা ঐ অপেনবা পোকই‍। ব্রহ্ম কুমারীশিংগী ‘জল-জন অভিয়ান’ অসিনা মীয়াম শরুক য়ামিন্নবগী থৌরাং অসিদা অনৌবা পাঙ্গল হাপ্লগনি‍। মসিনা ঈশিং য়োকশিনবগী কেম্পেনবু কাচিন কোয়া থুংনা য়ৌহনবা ঙমহনবতা নত্তনা, মসিগী মতিংসু হেনগৎহনগনি‍। ঐনা ব্রহ্ম কুমারী লূপকা মরী লৈনরিবা মথক থোংবা লুচিংবশিং অমদি লূপ অসিগী মতুং ইল্লিবা মীওই লাখ কয়াগী মফমদা মসিগীদমক নুংঙাইবা ফোঙদোকচরি‍।

মরূপশিং,

চহি লিশিং কয়াগী মমাঙদা, ভারতকী মুনিশিংনা মহৌশা, অকোয়বগী ফীভম অমদি ঈশিংগী মরমদা অথিংবা কয়া থম্বা, খল চাবা অমদি সেন্সিতিব ওইবা থৌওং অমা শেমগৎলম্মী‍। ঐখোয়গী লৈবাকসিদা ঈশিং মাঙহল্লোইদবনি, য়োকশিনগদবনি হায়নবা অমা লৈ‍। ৱাখল্লোন অসি চহি লিশিং কয়াদগী ঐখোয়গী স্পিরিচুএলিতীগী অমদি ঐখোয়গী লাইনিংগী শরুক অমা ওইদুনা লাক্লি‍। মসি ঐখোয়গী খুন্নাইসিগী মনাৎনি, ঐখোয়গী খুন্নাইগী ৱাখল্লোনগী নুংদা চেল্লিবা ইচেলদুনি‍। মরম অদুননি ঐখোয়গী ঈশিংবু লাই ওইনা লাৎলিবা অমদি তুরেলশিংবু ইমামক্নি খন্নরম্লিবা‍। খুন্নাই অমনা মহৌশাগা অসিগুম্বা মখলগী পুক্নিংগী ওইবা মরী অমা শেমগৎলবা মতমদা, তুং কোইগদবা চাওখৎ থৌরাংনা খুন্নাই অদুগী মহৌশাগী ওইবা মচৎ ওইরকই‍। মরম অদুনা, ঙসি তুংলমচৎকী শিংনবশিংগী পাম্বৈ থিবা মতমদা, ঐখোয়না হৌখ্রবা পুৱারীগী লৈরম্লিবা ৱাখল্লোন অদুবুসু হৌদোক্তুনা খন্থবা মথৌ তাই‍। হায়রিবা ৱাখল্লোন অসিমক ঐখোয়না লৈবাক মীয়ামগী মফমদা ঈশিং য়োকশিনবগী মতাঙদা ইথিল পীদুনা লৈহনবা তাই‍। ঐখোয়না ঈশিং মোৎশিনহল্লিবা মরম খুদিংমকপুসু লৌথোকখিবা তাই‍। অদুগা, মতম পুম্নমক্তা তৌবগুম, ব্রহ্ম কুমারীগুম্বা ভারতকী স্পিরিচুএল ইন্সতিত্যুসনশিংনা হীরম অসিদা মরুওইবা থৌদাং লৌনিংঙাই য়াম্না লৈ‍।

মরূপশিং,

হৌখিবা দিকেদ খরসিদা, ঈশিং য়োকশিনবা অমদি অকোয়বগী ফীভম ঙাক শেনবনচিংবা ৱাফমশিংবু পরৈ চেনবা ৱাফম ওইনা লৌনরক্তুনা মখোয়বু থৌশাদনা থম্বগী ফত্তবা ৱাখল্লোন অমা ঐখোয়গী লৈবাকসিদা শন্দোরক্লি‍। কনাগুম্বা মীওই খরদি ৱাফম অসি থবক ওইনা পাঙথোকপা ঙম্লোইদবা অচৌবা শিংনবা অমনি হায়না খনবা ফাওবা য়াওরি‍। অদুবু, ঐবাকসিদা হৌখিবা চহি ৮-৯সিদা অদুগুম্বা ৱাখল্লোন্দু হোংদোক্লে, অমদি ফীভমসু হোংহল্লে‍। ‘নমামী গঙ্গে’না মসিগী অচৌবা খুদম অমনি‍। ঙসি, গঙ্গা খক্ত নত্তনা, মসিগী মশা মরেংশিংসু শেংদোক্লি‍। গঙ্গা তুরেলগী তোর্বান পরিংদা মহৌশাগী লৌউ পথাপকী কেম্পেনশিংসু হৌদোকখ্রে‍। ‘নমানী গঙ্গে’ কেম্পেন অসি ঙসিদি লৈবাকসিগী তোঙান তোঙানবা স্তেতশিংগী ফিদম ওইরক্লি‍।

মরূপশিং,

ঈশিং মোৎশিনবগুম্না, ময়েং তাথরক্লিবা লৈনুংগী ঈশিংগী ঈমায় অসিসু লৈবাকসিগী অচৌবা শিংনবা অমা ওইরক্লি‍। হীরম অসিগী মতাঙদা লৈবাকসিনা ‘কেত্চ দি রেন’ ইহৌ হৌদোকখি অমদি মসি খোঙজেল লৈনা চঙশিল্লি‍। ঈশিং য়োকশিনবগী থৌওং লৈবাকসিগী গ্রাম পঞ্চায়ৎ লিশিং কয়াদা অতল ভুজল য়োজনাগী মখাদা য়োকখৎলি‍। লৈবাকসিগী দিস্ত্রিক্ত খুদিংদা অমৃৎ সরোবর ৭৫ শেমগৎনবগী থৌরাং অসিসু ঈশিং য়োকশিনবগী লমদা অচৌবা খোঙথাঙ অমনি‍।

মরূপশিং,

লৈবাকসিগী নুপীশিং ঈশিং য়োকশিনবনচিংবা মরুওইবা থৌওংশিংদা মৈরা পায়দুনা মাঙজিল থাদুনা লাক্লি‍। ঙসি লৈবাকসিগী খুঙ্গংগী লমদা লৈবা নুপীশিংনা ‘পানী সমিতী’ (ঈশিংগী লুপ)শিংগী খুত্থাঙদা জল জীবন মিসন্নচিংবা মরুওইবা স্কীম কয়াবু লমজিংলি‍। ঐখোয়গী ব্রহ্ম কুমাররগী ইচে ইচলশিংনা হায়রিবা থৌদাংদুমক লৈবাকসিদা অমদি মালেমগী থাক্তা লৌবা য়াই‍। ঈশিং য়োকশিনবগা লোয়ননা, অকোয়বগী ফীভমগা মরী লৈনবা ৱাফমশিং ইচঙ থৌনা পুখৎপা তাই‍। লৈবাকসিনা লৌউ-শিংউগী লমদা ঈশিং খল চানা শীজিন্ননবগীদমক দ্রিপ ইরিগেসন্নচিংবা থৌওং কয়া য়োকখৎলি‍। অদোমদু লৌমীশিংদা মসিবু ইচঙ থৌনা শীজিন্ননবা পুক্নিং থৌগৎফম থোকই‍। হৌজিক্তি মালেম পুম্বনা ভারতকী থৌরাং তুংইন্না ইন্তরনেস্পেল মিল্লেৎ ইয়র পাঙথোক্লি‍। শ্রী অন্ন বজ্রা অমদি শ্রী অন্ন জোৱরনচিংবা মিল্লেৎশিং চহি চা কয়াগী মমাঙদগী ঐখোয়গী লৈবাক্কী লৌউ-শিংউ অমদি চানরিবা চীঞ্জাক্কী শরুক ওইদুনা লাক্লি‍। মিল্লেৎশিং অসি মচি ওইবা মচল মরাং কায়না য়াওই অমদি থাবা মতমদসু ঈশিং য়াম্না চঙদে‍। মরম অদুনা, করিগুম্বা অদোম্না মীয়ামদা মখোয়গী দাইত্তা অসিগুম্বা চীঞ্জাকশিং অসি য়াওহন্নবগীদমক পুক্নিং থৌগৎলবদি, কেম্পেন অসিগী মপাঙ্গল হাপতুনা ঈশিং য়োকশিনবগী লমদসু অচৌবা ইনোৎ অমা হাপ্লক্কনি‍।

ঐখোয়না পুন্না হোৎনমিন্নবনা ‘জল-জন অভিয়ান’ অসিবু শোয়দনা মায় পাকহনগনি অমদি ঐখোয়না হেন্না ফবা ভারত অমা অমদি হেন্না ফবা তুংলমচৎ অমা শেমগৎপা ঙমগনি হায়না ঐনা থাজৈ‍। ময়ামগী মফমদা অমুক্কা হন্না য়াইফ-পাউজেল পীজরি‍। ওম শান্তী!

দিস্ক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি‍। অশেংবা ৱারোলদি হিন্দীদা পীখিবনি‍।

***