প্রধানমন্ত্রীগী লোইশঙ
রাস্ত্রপতীগী ৱারোল থাগৎপগী মোসন্দা প্রধান মন্ত্রীনা রাজ্য সভাদা পীখিবা পাউখুম
"ঐখোয়গী লৈঙাক্কী পান্দমদি মীয়াম্না থেংনরিবা প্রোব্লেমশিংগী মতম চুপ্পগী ওইবা পাম্বৈ পীবা অমদি মখোয়বু মপাঙ্গল হাপ্পনি"
"ঐখোয়না মতমগী ভারত অমা শেমগৎনবগীদমক ইনফ্রাস্ত্রকচর, স্কেল অমদি খোঙজেলগী মরুওইবা খঙই"
"ঐখোয়গী ৱাখল মচোই মচোই তাদে ঐখোয়না মচিৎ মচিৎ তৌবদা থাজবা থমদে"
"ঐখোয় মায় পাক্লে অমদি ঐখোয়না মীচম মীয়ামগী মপাঙ্গল হাপ্নবা তেক্নোলোজী শীজিন্নরি"
"দিজিতেল ইন্দিয়া মায় পাকপনা মালেম পুম্বগী পুক্নিং চিংশিল্লে"
"ঐখোয়না লৈবাক্কী খোঙজেলদা মীৎয়েঙ থমখি অমদি রিজনেল এস্পিরেসন্দসু পুক্নিং চঙখি"
"ভারতনা ২০৪৭ ফাওবদা 'বিক্সিৎ ভারত' ওইহনবা হায়বসি ঐখোয়গী ফিরেপ্নি"
Posted On:
09 FEB 2023 3:51PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি রাজ্য সভাদা রাস্ত্রপতীগী ৱারোল থাগৎপগী মোসন্দা পাউখুম পীখ্রে। প্রধান মন্ত্রীনা মহাক্কী পাউখুম রাস্ত্রপতী জীবু মহাক্কী ৱারোলদা ‘বিক্সিৎ ভারত’কী মঙলান পুথোক্তুনা হাউস অনিমকপু লমজিংবিবগীদমক থাগৎ ৱাহৈগা লোয়ননা হৌদোকখি।
প্রধান মন্ত্রীনা, ঙল্লিঙৈ মতমদা তৌনরম্বগী ওন্নবদা, “ঐখোয়গী লৈঙাক্কী পান্দমদি মীয়ামগী প্রোব্লেমশিংগী মতম চুপ্পগী ওইবা পাম্বৈশিং ফংহনবা অমদি মখোয়বু মপাঙ্গল হাপ্পনি” হায়খি। মমাঙথক্তা মীয়ামগী প্রোব্লেমশিংগী পাম্বৈ ফংহনবা হায়বসি লৈঙাক্কী থৌদাং ওইরম্লবসু মখোয়গী প্রাইওরিতী অমদি ইহুল খেন্নরম্মী হায়না মহাক্না হায়খি। “ঙসিদি হায়রিবা প্রোব্লেমশিং অদুগী মতম চুপ্পগী ওইবা পাম্বৈগী মায়কৈদা ঐখোয়না চঙশিল্লি” হায়না মহাক্না মখা তাখি। প্রধান মন্ত্রীনা ঈশিংগী ৱাফমবু খুদম ওইনা পীখি অমদি মচিৎ মচিৎ তৌবগী মহুত্তা, ঈশিংগী ইনফ্রাস্ত্রকচর শেমগৎপা, ঈশিংগী গভর্নেন্স, ক্বালিতী কন্ত্রোল, ঈশিং য়োকশিনবা, অমদি ঈথৈ লৌখোংগী অনৌবা থৌওংশিংগী ওইবা মায়কৈ শুবা লম্বীদা চঙশিল্লি হায়না শন্দোক্না তাকখি। জন ধনগী খুত্থাঙদা দি.বি.তি. – আধার মোবাইল, পি.এম. গতিশক্তি মাস্তরপ্লানগী খুত্থাঙদা ইনফ্রাস্ত্রকচর প্লানিং অমদি ইমপ্লিমেন্তেসন নচিংবা থৌরাংশিংনা ফাইনেন্সিল ইনক্লুজন্দা মতম চুপ্পগী ওইবা পাম্বৈ শেম্লে।
“ঐখোয়না মতমগী ভারত অমা শেমগৎপদা ইনফ্রাস্ত্রকচর, স্কেল অমদি খোঙজেলগী মরুওইবা খঙই”, হায়না প্রধান মন্ত্রীনা হায়খি। লৈবাকসিগী থবক শুবগী কল্চরদা তেক্নোলোজীগী মতিক্না অহোংবা পুরক্লে অমদি লৈঙাক অসিনা ফীভমসিগী খোঙজেল অমদি পাক চাউবা হেনগৎহন্নবা মীৎয়েঙ চঙলি হায়বা ৱাফম মহাক্না থমখি।
“মহাত্মা গান্ধীনা ‘শ্রে’ (কান্নবা) অমদি ‘প্রিয়’ (নুংশিবা) হায়বিরম্মী। ঐখোয়না ‘শ্রে’ (কান্নবা)গী লম্বী অসিবু খল্লে”, হায়না প্রধান মন্ত্রীনা ফোঙদোকখি। লৈঙাক অসিনা খল্লিবা লম্বী অসি পোত্থাবদা মীৎয়েঙ থম্বা লম্বী নত্তে, মীচম মীয়ামগী অনিংবা অপাম্বা ফংহন্নবগীদমক অহিং নুংথিল চোকথবা নাইদনা হোৎনবগী লম্বীদুনি হায়না প্রধান মন্ত্রীনা ফোঙদোকখি।
প্রধান মন্ত্রীনা অজাদী কা অমৃৎ কাল অসিদা সেচুরেসন ফংনবগীদমক মশক থোকপা খোঙথাঙ লৈঙাক্না লৌখৎলে হায়বা ৱাফম থমখি। লৈবাকসিগী বিনিফিসরী খুদিংমক্তা কান্নবা চাদা ১০০ ফংহন্নবগীদমক লৈঙাক্না লৌখৎলিবা থৌরাংশিং মহাক্না অমুক হন্না থমখি। “মসি অশেংবা সেক্যুলরিজম্নি। মসিনা খেন্ননা য়েংবা অমদি শেঞ্জা থুমজাবু মুত্থৎলি”, হায়না শ্রী মোদীনা হায়খি।
প্রধান মন্ত্রীনা হায়খি, “দিকেদ কয়া, ত্রাইবেল ফুরুপশিংগী চাওখৎ থৌরাং নাথৈদুনা থম্বিরম্মী। ঐখোয়না মখোয়গী য়াইফ-থৌরাংদা খ্বায়দগী মরুওইবা মীৎয়েঙ থমখি।” প্রধান মন্ত্রী অতল বিহারী বাজপায়ীগী মতমদা ত্রাইবেল ৱেলফ্যারগী তোখাইবা মন্ত্রালয় অমা শেমগৎপিরম্মী অমদি ত্রাইবেলশিংগী য়াইফনবা পুম্নমক্কী ওইবা থৌরাং পায়খৎলম্মী হায়না মহাক্না ফোঙদোকখি।
প্রধান মন্ত্রীনা “অপীকপা লৌমীশিং অসি ভারতকী লৌউ-শিংউ সেক্তরগী য়াংলেন শরুনি” হায়খি। অপীকপা লৌমীশিং মতম শাংনা মীরায়বিদুনা থম্লম্মি হায়না প্রধান মন্ত্রীনা হায়খি। হৌজিক্কী লৈঙাকসিনা মখোয়গী মথৌ তাবশিংদা মীৎয়েঙ চঙখি অমদি অপীকপা পোৎফম ফম্বা অমদি খুৎহৈবশিংগা লোয়ননা অপীকপা লৌমীশিংগী খুদোংচাবা কয়া শেমগৎখি। প্রধান মন্ত্রীনা নুপীশিংগী মপাঙ্গল হাপ্ননবা পায়খৎখিবা খোঙথাঙ কয়াগী মরমদা শুগাইনা তাকখি অমদি ভারত্তা নুপী অমগী পুন্সিগী তাঙ্কক খুদিংদা মপাঙ্গল হাপ্নবা, ইকায়খুম্নবা ঙাক্না অমদি কোম্না হিংনবা লৈঙাক্কী থৌরাংশিংগী মরমদা ৱাফম কয়া থমখি।
“ঐখোয়গী সাইন্তিস্তশিং অমদি ইনোভেতরশিংগী হৈশিংবগা লোয়ননা, ভারতনা মালেমগী ফার্মা হব অমা ওইরক্লি”, হায়না প্রধান মন্ত্রীনা ভারতকী সাইন্তিস্তশিং, ইনোভেতরশিং অমদি ভেক্সিন মেনুফেকচররশিংবু মীওই খরনা হন্থনা য়েংবিবগী লাইবক থিবা থৌওংশিংদা পুক্নিং চিংশিল্লদুনা ফোঙদোকখি। প্রধান মন্ত্রীনা অতল ইনোভেসন মিসন এন্দ তিঙ্করিং লেবনচিংবা থৌরাংশিংগী খুত্থাঙদা সাইন্তিফিক তেম্পা পুরক্নবগী লৌখৎলিবা থবক থৌরমশিংগী মরমদসু ফোঙদোকখি। মহাক্না নহাশিং অমদি সাইন্তিস্তশিংবু লৈঙাক্না শেমগৎলিবা খুদোংচাবশিংগী কান্নবা মপুং ফানা লৌদুনা লনাই সেতলাইতশিং থাগৎপগীদমক থাগৎখি। “ঐখোয় মায় পাক্লে অমদি মীচম মীয়ামগী মপাঙ্গল হাপ্পদা তেক্নোলোজী শীজিন্নরি”, হায়না মহাক্না হায়খি।
“লৈবাকসিনা ঙসিদি দিজিতেল ত্রাঞ্জেক্সনগী লমদা মালেমগী লুচিংবা ওইরি। দিজিতেল ইন্দিয়াগী মায় পাকপনা ঙসি মালেম পুম্বগী পুক্নিং চিংশিল্লি”, হায়না প্রধান মন্ত্রীনা হায়খি। মহাক্না ভারত্তা মোবাইল ফোনশিং পুশিল্লক্লম্বা মতমবু নীংশিংলদুনা, ঙসিদি মোবাইল ফোনশিং অতোপ্পা লৈবাকশিংদা থাদোকবদা চাউথোকচরি হায়না ফোঙদোকখি।
“ভারতনা ২০৪৭ ফাওবদা ‘বিক্সিৎ ভারত’ ওইহনবা হায়বসি ঐখোয়গী ফিরেপ্নি”, হায়না প্রধান মন্ত্রীনা ফোঙদোকখি। ঐখোয়না থিদুনা লাক্লিবা খুদোংচাবা কয়া লৌহৌনবগীদমক মশক থোকপা খোঙথাঙ কয়া লৈঙাকসিনা পায়খৎলে হায়না মহাক্না হন্না নীংশিংখি। “ভারত অচৌবা খোঙফম অমা চোংনবগীদমক শেম শারে অমুক তু হন্না য়েংলরোই”, হায়বা ৱাফমগা লোয়ননা প্রধান মন্ত্রীনা লোইশিনখি।
***
(Release ID: 1897713)
Visitor Counter : 147
Read this release in:
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam