କୋଇଲା ମନ୍ତ୍ରଣାଳୟ
ଓଡିଶାରେ ଆକର୍ଷଣୀୟ ଇକୋ-ପାର୍କ ଓ କୋଇଲା ସଂଗ୍ରହାଳୟ ନିର୍ମାଣ କଲା ମହାନଦୀ କୋଲ ଫିଲ୍ଡସ
Posted On:
28 JAN 2023 11:17AM by PIB Bhubaneshwar
କୋଇଲା ମନ୍ତ୍ରଣାଳୟଙ୍କ ଅନ୍ତର୍ଗତ ପ୍ରମୁଖ ସିପିଏସଇ, ମହାନଦୀ କୋଲ ଫିଲ୍ଡସ ଲିମିଟେଡ (ଏମସିଏଲ) ପରିବେଶ ଅନୁକୂଳ ଏବଂ ସ୍ଥାୟୀ ଖନନ ପ୍ରଥା ମାଧ୍ୟମରେ କୋଇଲା ଉତ୍ପାଦନରେ ଲଗାତର ନୂତନ ସଫଳତା ହାସଲ କରିଚାଲିଛି । ଏହି କ୍ଷେତ୍ରରେ ଏମସିଏଲର ନୂଆ ଉପଲବ୍ଧି ମଧ୍ୟରେ ଓଡିଶାର ଝାରସୁଗୁଡା ସ୍ଥିତ ଇବ ଭ୍ୟାଲି କୋଲଫିଲ୍ଡସର ଓରିଏଣ୍ଟ ଏରିଆ ଖଣି ସଂଖ୍ୟା- ୪ରେ ଚନ୍ଦ୍ରଶେଖର ଆଜାଦ ଇକୋ-ପାର୍କ ଏବଂ କୋଇଲା ସଂଗ୍ରହାଳୟ ବିକଶିତ କରାଯାଇଛି । ଏହି ଇକୋ ପାର୍କଟି ଝାରସୁଗୁଡା- ରାୟଗଡ ଜାତୀୟ ରାଜପଥ ୪୯ ପାର୍ଶ୍ୱସ୍ଥ ଗଣ୍ଡଘୋରା ଗାଁରେ ରହିଛି ।
କୋଇଲା ଖଣି ସଂଖ୍ୟା-୪ରୁ ୨୦୧୭ରେ ଉତ୍ପାଦନ ବନ୍ଦ ହେବା ପରେ ଏହାକୁ ପୁନଃ ବ୍ୟବହାର ଯୋଗ୍ୟ କରିବା ପାଇଁ ସବୁଜିମାଭରା ଦୃଶ୍ୟରାଜି, କୋଲ କ୍ୟାଫେ ଓ ଶିଶୁ ଉଦ୍ୟାନ ଥିବା ଏହି ଆକର୍ଷଣୀୟ ଇକୋ ପାର୍କ ଏମସିଏଲ ଦ୍ୱାରା ରେକର୍ଡ ସମୟ ମଧ୍ୟରେ ପ୍ରସ୍ତୁତ କରାଯାଇଛି । ୨୦୨୧ ରେ କେନ୍ଦ୍ର କୋଇଲା, ଖଣି ଓ ସଂସଦୀୟ ବ୍ୟାପାର ମନ୍ତ୍ରୀ ଶ୍ରୀ ପ୍ରହ୍ଲାଦ ଜୋଶୀ ପାର୍କର ଶିଳାନ୍ୟାସ କରିଥିଲେ । ଏହି ପାର୍କ ପରିଦର୍ଶକମାନଙ୍କୁ ଭୂତଳ ଖଣିର ପ୍ରତ୍ୟକ୍ଷ ଅନୁଭବ ଲାଭ କରିବାର ସୁଯୋଗ ପ୍ରଦାନ କରିବ ।
ଏହି ପାର୍କ ଭିତରେ ଥିବା କୋଇଲା ସଂଗ୍ରହାଳୟ ଭାରତରେ କୋଇଲା ଖନନର ଇତିହାସ ଓ ପରମ୍ପରାର ଏକ ପ୍ରକୃଷ୍ଟ ଝଲକ । ଭୂତଳ ଓ ଓପନ କାଷ୍ଟ ଖଣିଗୁଡିକରେ ବ୍ୟବହାର ହେଉଥିବା ବିଭିନ୍ନ ମେସିନ ଓ ଯାନବାହାନର ୱାର୍କିଂ ମଡେଲଗୁଡିକ ପ୍ରଦର୍ଶିତ କରାଯାଇଛି । ସରଫେସ ମାଇନର, ଡମ୍ପର, କ୍ରେନ, ଟିପର, ଡୋଜର, ବେଲ୍ଟ କନଭେୟର, କୋଲ କଟିଂ ମେସିନ, ଡ୍ରିଲ ମେସିନ ଓ ବ୍ୟାକହୋ ଭଳି କୋଇଲା ଖନନ ଉପକରଣ/ଯନ୍ତ୍ରାଂଶ ପ୍ରଦର୍ଶିତ କରାଯାଇଛି ।
ଓଡିଶାର ସୁନ୍ଦରଗଡ, ଝାରସୁଗୁଡା ଓ ଅନୁଗୁଳ ଜିଲ୍ଲାରେ କୋଇଲା ଖନନରେ ନିୟୋଜିତ ଏମସିଏଲ ବର୍ତ୍ତମାନ ପର୍ଯ୍ୟନ୍ତ ସମ୍ପୂର୍ଣ୍ଣ ବ୍ୟବହାର ହୋଇ ସାରିଥିବା ପ୍ରାୟ ୨ ହଜାର ହେକ୍ଟର ଜମିକୁ ପୁନଃ ଭରିବା ସହ ପୁନରୁଦ୍ଧାର କରିସାରିଛି । ସ୍ଥାୟୀ ଖନନ ପ୍ରଥା ଅନୁରୂପ ଅନେକ ଖଣିକୁ ବର୍ଷା ଜଳ ଅମଳ ପାଇଁ ଜଳାଶୟ ଭାବେ ବିକଶିତ କରାଯାଇଛି ।
SR/BS
(Release ID: 1894359)
Visitor Counter : 144