প্রধানমন্ত্রীগী লোইশঙ
পি.এম.না কর্নাতকাগী কোদেকালদা চাউখৎ-থৌরাংগী তোঙানবা প্রোজেক্ত কয়াগী উরেপ উয়ুং তম্বগা লোয়ননা মীয়ামদা খুৎশিন্নখ্রে
জল জীবন মিসনগী মখাদা য়াদগির মলতি-ভিলজে দ্রিঙ্কিং ৱাতর সপ্লাই স্কিমগী উরেপ উয়ুং তমখ্রে
নরয়ানপুর লেফ বেঙ্ক কেনেল – এক্সতেন্সন রিনোভেসন অমসুং মোদর্নাইজেসন প্রোজেক্ত শঙ্গাখ্রে
এন.ঐচ.-১৫০সি.গী বরদলদগী মারাদাগি এস. অন্দোলা ফাওবগী লেন ৬কী এক্সেস কন্ত্রোল্দ গ্রীনফিল্দ হাইৱেগী কিমি ৬৫.৫গী সেক্সনগী উরেপ উয়ুং তমখ্রে
“ঐখোয়না অমৃত কাল অসিদা ভিক্সিত ভারত অমা শেম্বা তাবনি”
“জিলা অমখক্না করিগুম্বা চাউখৎপগী পেরামীতরদা মনিঙদা লৈহৌবা মতমদা, লৈবাক অসিনা কৈদৌনুংদা চাউখৎপা ঙম্লোই”
“এজুকেসন, হেল্থ নত্ত্রগা কন্নেক্তিবিতী ওইরো, য়াদগিরনা এস্পিরেস্নেল দিস্ত্রিক্ত প্রোগ্রামগী থবক খ্বাইদগী নিংথিনা পাংথোকপা মকোক থোংবা ১০গী মনুং চল্লি”
“দবল ইঞ্জিন সরকারনা ইকায় খুম্নবা অমসুং মপাঙ্গল হেনগৎহনবগী ৱাখল্লোনগা লোয়ননা থবক তৌরি”
“য়াদগিরগী লৌমী চাউরাকপা লাখ ১.২৫না পি.এম. কিসান নিধীদগী চাউরাকপা লুপা করোর ২৫০ ফংনখ্রে”
“লৈবাক্কী লৌউ-শিংউগী পোলিসীদা অপীকপা লৌমীশিংদা খ্বাইদগী অহেনবা মিৎয়েং য়েংলি”
“দবল-ইঞ্জিন সরকারনা ইনফ্রাস্ত্রকচর অমসুং রিফোর্মদা মিৎয়েং চঙবদগী কর্নাতকাবু ইনভেস্তরশিংগী অপাম্বা মফম ওইহল্
Posted On:
19 JAN 2023 2:20PM by PIB Imphal
প্রধান মন্ত্রীনা ঙসি কর্নাতকাগী য়াদগিরী জিলাগী কোদেকালদা ঈথৈ-লৌখোঙ, থক্নবা ঈশিং অমসুং নেস্নেল হাইৱে চাউখৎহনবগী প্রোজেক্তকা মরী লৈনবা চাউখৎ থৌরাংগী তোঙানবা প্রোজেক্ত কয়া মীয়ামদা খুৎশিন্নবগা লোয়ননা উরেপ উয়ুংসু তমখ্রে। প্রোজেক্তশিং অসিদা জল জীবন মিসনগী মখাদা য়াদগির মলতি-ভিলজে দ্রিঙ্কিং ৱাতর সপ্লাই স্কিমগী উরেপ উয়ুং তম্বা; এন.ঐচ.-১৫০সি.গী সুরত-চেন্নৈ এক্সপ্রেসৱেগী (বরদলদগী মারাদাগি এস. অন্দোলা ফাওবা) কিমি ৬৫.৫গী সেক্সনগী উরেপ উয়ুং তম্বা অমসুং নরয়ানপুর লেফ বেঙ্ক কেনেল – এক্সতেন্সন রিনোভেসন অমসুং মোদর্নাইজেসন প্রোজেক্ত (এন.এল.বি.সি.-ই.আর.এম.) শঙ্গাবা য়াওরি।
প্রধান মন্ত্রীনা ঙসি তিনখিবা মীয়ামদা ৱা ঙাঙবদা কর্নাতকা মীয়াম্না নুংশিবীবা অমসুং শৌগৎপগী মতৌদা মিৎয়েং চঙখি অমসুং মসিনা অচৌবা পাঙ্গল অমগী হৌরকফম ওইরি হায়খ্রে। য়াদগিরগী ইনাক খুল্লবা পুৱারীগী মতাংদা পাউদম্লদুনা, প্রধান মন্ত্রীনা ঐখোয়গী ইপা-ইপুশিংগী তৌবা ঙম্বগী খুদম ওইরিবা রত্তিহালীগী অরিবা লানবনগী মতাংদা পনখি অমসুং মসিনা ঐখোয়গী নাৎ অমসুং চৎনবীগী মশক তাক্লি হায়খি। মহাক্না শক্নাইরবা নিংথৌ মহারাজা ভেঙ্কতপ্পা নায়ক্কী হেরিতেজকী মতাংদা পল্লদুনা মহাক্কী স্বরাজ অমসুং অফবা লৈঙাক্কী ৱাখল্লোন অসিবু লৈবাক পুম্বনা খঙনরি হায়না ফোংদোকখি। “ঐখোয় পুম্নমক্না হেরিতেজ অসিগীদমক্তা চাউথোক্কদবনি”, প্রধান মন্ত্রীনা হায়খি।
ঙসি উরেপ উয়ুং তম্লিবা নত্ত্রগা মীয়ামদা খুৎশিন্নরিবা শোরোক অমসুং ঈশিংগী প্রোজেক্তশিং অসিগী মতাংদা পল্লদুনা, প্রধান মন্ত্রীনা প্রোজেক্তশিং অসিনা লমদমসিগী মীয়ামদা চাউনা কান্নবা পীগনি হায়খি। সুরত চেন্নৈ কোরিদোরগী কর্নাতকা সেক্সন অসিনা ঙসিদগী থবক হৌবগী মতৌ উরে অমসুং মসিনা য়াদগির, রাইচুর অমসুং কালবুর্গী য়াওনা লমদমসিগী পুন্সি মহিং হেন্না ফগৎহনগনি, থবক পীগনি অমসুং শেন্মিৎলোনগী থবক কয়া অমসু চাউখৎহনগনি। অৱাং কর্নাতকাদা পাংথোক্লিবা চাউখৎ-থৌরাংগী থবকশিং অসিগীদমক্তা মহাক্না কর্নাতকা সরকারবু থাগৎখি।
মথংগী চহি ২৫ অসিদি লৈবাক অমসুং রাজ্য খুদিংগী “অমৃত কাল”নি হায়না প্রধান মন্ত্রীনা অমুক্কা হন্না নিংশিংখি। “ঐহাক্না মসিগী অমৃত কালগী মনুংসিদা ভিক্সিত ভারত অমা শেম্বা তাবনি। মীওই, ইমুং অমসুং রাজ্যশিংনা কেম্পেন অসিগা মরী লৈনরকপা মতমদা মসিনা ওইথোক্কনি। লবুক্তা লৈরিবা লৌমীগী পুন্সি নুংঙাইরকপা অমসুং ওন্তোপ্রিনরশিংগী পুন্সি নুংঙাইরকপা মতমদা ভারতনা চাউখৎপা ঙমগনি। অফবা লৌরোক লৈরবা অমসুং ফেক্তরী আউপুত হেনগৎলকপা মতমদা ভারতনা চাউখৎকনি। মসিগীদমক্তা ঐখোয়না মমাংগী নেগেতিব এক্সপেরিএন্স অমসুং ফত্তবা পোলিসী কয়াদগী তম্বা তাবনি”, মহাক্না হায়খি। অৱাং কর্নাতকাগী য়াদগিরগী খুদম পীরদুনা, প্রধান মন্ত্রীনা লমদমসিনা চাউখৎ থৌরাংগী মতাংদা শোত্থনা লৈববু নুংঙাইতবা ফোংদোকখি। লমদম অসিদা তৌবা ঙম্বগী মতিক লৈজরবসু, মমাংগী সরকারনা য়াদগির অমসুং মসিগুম্বা জিলা খরবু শোত্থরবনি হায়না লাউথোক্তুনা মশাগী থবক কোম্নবা হোৎনখি হায়না প্রধান মন্ত্রীনা ফোংদোকখি। মমাংগী শাশন পায়বা সরকারনা ভোত বেঙ্ক পোলিতিক্সতা লুপ্তুনা লৈখিবা মতম লৈরম্মি হায়না মহাক্না নিংশিংলদুনা মতমদুগী সরকারনা মৈ, ঈশিং অমসুং শোরোক্কুম্বা তঙাই ফদবা ইনফ্রাস্ত্রকচরশিংদা মিৎয়েং চঙলমদে হায়খি। হৌজিক্কী সরকারগী অহেনবা মিৎয়েং চঙগদবা থবকশিংদা মীয়ামগী পুক্নিং চিংশিল্লদুনা, প্রধান মন্ত্রীনা মখোয়গী অমত্তা ঙাইরবা মিৎয়েংদি চাউখৎ থৌরাংনি, ভোত বেঙ্ক রাজনিতী নত্তে হায়খ্রে। “জিলা অমখক্না করিগুম্বা চাউখৎপগী পেরামীতরদা মনিঙদা লৈহৌবা মতমদা, লৈবাক অসিনা কৈদৌনুংদা চাউখৎপা ঙম্লোই”, প্রধান মন্ত্রীনা হায়খি। খ্বাইদগী শোত্থবা খুঙ্গংদা অহেনবা মিৎয়েং থম্লিবা অমসুং য়াদগির য়াওনা এস্পিরেস্নেল দিস্ত্রিক্ত ১০০গী কেম্পেন হৌদোক্লিবসি হৌজিক্কী সরকারনি হায়না মহাক্না পনখি। লমদম অসিগী গুদ গবর্নেন্স অমসুং চাউখৎ থৌরাংদা অহেনবা মিৎয়েং চঙবগী মতৌবু প্রধান মন্ত্রীনা পল্লদুনা য়াদগিরনা অঙাং ১০০% তীকা কাপখ্রে, মেলনৌরিশ ওইবা অঙাং মশিংসু মশক থোক্না হন্থরে, জিলাসিগী খুঙ্গং পুম্নমক শোরোকশিংনা শম্নহল্লে অমসুং গ্রাম পঞ্চায়তশিংদসু দিজিতেল সর্ভিস পীনবা কম্মন সর্ভিস সেন্তর লৈরে হায়না পাউদমখি। “এজুকেসন, হেল্থ নত্ত্রগা কন্নেক্তিবিতী ওইরো, য়াদগিরনা এস্পিরেস্নেল দিস্ত্রিক্ত প্রোগ্রামগী থবক খ্বাইদগী নিংথিনা পাংথোকপা মকোক থোংবা ১০গী মনুং চল্লি”, প্রধান মন্ত্রীনা হায়খি। প্রধান মন্ত্রীনা মীয়ামগী মীহুত অমসুং জিলাগী লৈঙাক্লোইশিংবু মসিগুম্বা মশক থোকপা মায় পাকপগীদমক্তা থাগৎপা ফোংদোকখি।
২১শুবা চহি-চাগী ভারতনা চাউখৎপগীদমক্তা ৱাতর সেক্যুরিতী মরু ওইবা চাউনা লৈ, অমসুং মসিগা ঙমখৈ, সমুদ্র তোর্বান অমসুং ইন্তর্নেল সেক্যুরিতীগসু মান্ননা মরু ওই হায়না প্রধান মন্ত্রীনা ফোংদোকখি। “দবল ইঞ্জিন সরকারনা ইকায় খুম্নবা অমসুং মপাঙ্গল হেনগৎহনবগী ৱাখল্লোনগা লোয়ননা থবক তৌরি”, মহাক্না হায়খি অমসুং ইং ২০১৪দা পন্দুনা লৈরম্বা ইরিগেসন স্কিম ৯৯গী মনুংদগী ৫০ অমদি হৌজিক লোইশিল্লে অমসুং হেন্না পাকথোক চাউথোক্লে হায়না ফোংদোকখি। কর্নাতকাদা প্রোজেক্ত কয়া চত্থরি। ক্যুসেক ১০,০০০গী কেরিয়িং কেপাসিতী লৈবা কেনেল, নরায়নপুর লেফ বেঙ্ক কেনেল – এক্সতেন্সন রিনোভেসন অমসুং মোদর্নাইজেসন (এন.এল.বি.সি.-ই.আর.এম.) অসিনা কম্মান্দ এরিয়াগী লম হেক্ত্যার লাখ ৪.৫গী ঈথৈ-লৌখোঙ পীবা ঙম্মি হায়না মহাক্না পাউদমখি। মাইক্রো ইরিগেসন্দা হান্নগী মান্নদবা মতৌদা মিৎয়েং চঙলিবা অমসুং মমাংগী চহি ৭-৮দা হেক্ত্যার লাখ ৭০ হেনবগী লম্বু মাইক্রো-ইরিগেসনগী মখাদা পুরকপা ঙমখিবা ‘পর দ্রোপ মোর ক্রোপ’কী মতাংদসু প্রধান মন্ত্রীনা ৱারী শাখি। ঙসিগী প্রোজেক্তশিং অসিনা কর্নাতকাগী হেক্ত্যার লাখ ৫গী লমশিংদা কান্নবা পীগনি অমসুং ৱাতর তেবল হেনগৎহন্নবা থবক কয়া হৌজিক্সু পায়খৎলি হায়না মহাক্না পাউদমখি।
দবল ইঞ্জিন সরকারগী মনুংদা পাংথোকখিবা থবকশিংগী খুদম পীরদুনা, প্রধান মন্ত্রীনা থা তরুক্কী মমাংদা জল জীবন মিসন হৌদোকখি, অপুনবা ইমুং করোর ১৮গী মনুংদা শুপ্নগী ইমুং করোর ৩ খক্তদা তোতি ঈশিং পুশিল্লি হায়না পাউদমখি। “ঙসিদি, মশিং অসি করোর ১১দা য়ৌরে”, প্রধান মন্ত্রীনা মখা তাখি, “মখোয়শিং অসিগী মনুংদগী, ইমুং লাখ ৩৫দি কর্নাতকাদগীনি”। য়াদগির অমসুং রাইচুরদা ইমুং অমদা ঈশিং ফংবগী চাংনা কর্নাতকা অমসুং লৈবাক্কী অপুনবা চাংদগী হেল্লি হায়না মহাক্না হায়খি।
ঙসি শঙ্গাখিবা প্রোজেক্তশিংগী মতাংদা তম্লদুনা, প্রধান মন্ত্রীনা য়াদগিরগী ইমুং খুদিংদা ঈশিং য়ৌহনবগী পান্দম অসিনা মতেং কয়া অমা ফংলগনি হায়খি। ভারতকী জল জীবন মিসন্না মরম ওইরগা চহি খুদিংগী অঙাং লাখ ১.২৫ হেনবগী পুন্সি কনবা ঙম্লে হায়না স্তদী অমনা উৎখ্রে হায়না মহাক্না পাউদমখি। হর ঘর জল কেম্পেনগী কান্নবশিং পল্লদুনা, প্রধান মন্ত্রীনা কেন্দ্র সরকারনা পি.এম. কিসান সম্মান নিধী স্কিমগী মখাদা লৌমীশিংদা লুপা ৬০০০ পী অমসুং কর্নাতকা সরকারনা লুপা ৪০০০ হাপ্তুনা লৌমীশিংদা পীবা কান্নবসি শরুক অনি ওইহল্লে হায়খি। “য়াদগিরগী লৌমী চাউরাকপা লাখ ১.২৫না পি.এম. কিসান নিধীদগী চাউরাকপা লুপা করোর ২৫০ ফংনখ্রে”, প্রধান মন্ত্রীনা মখা তাখি।
দবল ইঞ্জিন সরকারগী মতাংদা মখা তানা হায়রদুনা, প্রধান মন্ত্রীনা কেন্দ্রনা ন্যু এজুকেসন পোলিসী হৌদোকপগা লোয়ননা, কর্নাতকা সরকারনা বিদ্যা নিধী স্কিমগী খুত্থাংদা লাইরবা মহৈরোইশিংবু তেংবাংলি, কেন্দ্রনা চাউখৎ থৌরাংগী থৌওং লেপহন্দনবা হোৎনরিবা অসিদসু, কর্নাতকানা রাজ্যসিবু ইনভেস্তরশিংগী পুক্নিং চিংশিন্নবা হোৎনরি হায়খি। “কেন্দ্রনা মুদ্রা স্কিমগী মখাদা ফিশা-লোন্সা তৌরিবা মীওইশিংবু তেংবাংনবা হোৎনরিবা অসিদা, কর্নাতকা সরকারনা মখা তাবা তেংবাং পীদুনা থৌওংশিংবু হেন্না খুমাং চাউশিনহল্লি”, মহাক্না মখা তাখি।
নিংতম্বা ফংলবা মতুংগী চহি কয়া অসিদা ফাওবা, করিগুম্বা মীওই অমা, কাঙলুপ নত্ত্রগা লমদম অমনা শোত্থদুনা লৈরবদি, রাজ্য সরকারনা মখোয়গী মফমদা অহেনবা মিৎয়েং চঙলি হায়না প্রধান মন্ত্রীনা হায়খি। ঐখোয়গী লৈবাক্কী অপীকপা লৌমী করোর কয়া অমবু নুংঙাই য়াইফবগী খুদোংচাবা কয়া দিকেদ কয়াদগী ফংহন্দনা লাকখি অমসুং মমাংগী সরকারনা মখোয়গীদমক্তা করিমত্তা হোৎনরমদে হায়না মহাক্না হায়খি। লৈবাক্কী লৌউ-শিংউগী পোলিসীদা অপীকপা লৌমীশিংদা খ্বাইদগী অহেনবা মিৎয়েং য়েংলি হায়না প্রধান মন্ত্রীনা ফোংদোকখি। লৌমীশিংবু মেছিন্না তেংবাংবা, দ্রোনগুম্বা মোদর্ন তেক্নোলোজীগী মাইকৈদা পুশিনবা, নেনো য়ুরিয়াগুম্বা কেমিকেল ফর্তিলাইজর পীবা, নেচরেল ফার্মিং তৌনবা পুক্নিং থৌগৎপা, কিসান ক্রেদিত কার্দ পীবা, এনিমেল হসবেন্দরী, ঙা অমদি খোই য়োকপদা শৌগৎপগুম্বা খুদম কয়া প্রধান মন্ত্রীনা পীখি।
লমদমসিবু হৱাইগী মফম অমসুং হীরম অসিগী মতাংদা মীরমদগী পোত্থোক পুশিল্লকপদা হন্থহনবদা তেংবাংবগীদমক্তা প্রধান মন্ত্রীনা লোকেল লৌমীশিংবু থাগৎখি। মমাংগী চহি ৮দা এম.এস.পি.গী মখাদা হৱাইগী চাং শরুক ৮০ হেন্না লৈশিনবা ঙমখি হায়না মহাক্না পাউদমখি। হৱাই থাবা লৌমীশিংনা মমাংগী চহি ৮দা লুপা করোর লিশিং ৬০ ফংখ্রে অমসুং ইং ২০১৪গা চাংদম্নবদা মখোয়না করোর চাম্মা খরতমক ফংখিবনি।
য়ুনাইতেদ নেসন্সনা ইং ২০২৩বু ইন্তর্নেস্নেল য়র ওফ মিল্লেত হায়না লাউথোক্লবনি হায়না প্রধান মন্ত্রীনা পাউদম্লদুনা, জোৱার অমসুং রাগিগুম্বা অপৌবা সিরিএল অসি কর্নাতকাদা মরাং কায়না পুথোকই হায়খি। মসিগুম্বা মচি লৈবা হৱাই-চেংৱাই পুথোকপা হেনগৎহন্দুনা মালেম পুম্বদা খঙহন্নবা দবল ইঞ্জিন সরকার অসিনা খোঙফম চেৎলি হায়না মহাক্না মরু ওইনা তমখি। প্রধান মন্ত্রীনা থৌওং অসিবু মখা তানা মায় পাকহনবদা কর্নাতকাগী লৌমীশিংনা অচৌবা থৌদাং লৌগনি হায়বা থাজৈ হায়না প্রধান মন্ত্রীনা হায়খি।
কর্নাতকাগী কন্নেক্তিবিতীগী মতাংদা দবল-ইঞ্জিন সরকারানা পীরিবা কান্নবা কয়া পল্লদুনা, প্রধান মন্ত্রীনা কন্নেক্তিবিতী অসি লৌউ-শিংউ, ইন্দস্ত্রী অমসুং তুরিজমদা মান্ননা মরু ওই হায়রদুনা সুরত চেন্নৈ ইকোনোমিক কোরিদোর লোইশিল্লকপদগী অৱাং কর্নাতকাগী মফম অয়াম্বনা কান্নবা য়াম্না ফংলগনি হায়খি। লৈবাক মীয়াম্না অৱাং কর্নাতকাগী লমকোয়ফম অমসুং লাই নীংফমশিংদা চৎপদা মসিনা য়াম্না নুংঙাইহল্লগনি অমসুং মসিনা নহাশিংগী থবক কয়া অমসু পীগনি হায়না মহাক্না হায়খি। “দবল-ইঞ্জিন সরকারনা ইনফ্রাস্ত্রকচর অমসুং রিফোর্মদা মিৎয়েং চঙবদগী কর্নতকাবু ইনভেস্তরশিংগী অপাম্বা মফম ওইহল্লি”, প্রধান মন্ত্রীনা হায়খি অমসুং মালেম্না ভারত্তা ইনভেস্ত তৌনিংবগী মতৌ হেনগৎলক্লিবা অসিনা মরম ওইরগা হায়রিবা মতৌসু হেন্না হেনগৎলক্কনি হায়না মহাক্না মখা তাখি।
কর্নাতকাগী রাজ্যপাল, শ্রী থাৱর চান্দ গেহলোত, মুখ্য মন্ত্রী, শ্রী বাসবরাজ বোম্মাই, কেন্দ্রগী রাজ্য মন্ত্রী, শ্রী ভগ্বন্ত খুবা অমসুং কর্নাতকা সরকারগী মন্ত্রীশিংনা ঙসিগী থৌরমদা শরুক য়াখি।
বেকগ্রাউন্দ
য়ুম্থোং খুদিংদা মশাগী তোতি ঈশিং পুশিলহন্দুনা তেক্ত-কায়দবা অমসুং মরাং কায়বা থক্নবা ঈশিং ফংহনবগী প্রধান মন্ত্রীগী মঙলান মঙফাওনহনবগী খোঙথাং অমা ওইনা, মহাক্না য়াদগিরী জিলাগী কোদেকালদা জল জীবন মিসনগী মখাদা লৈবা য়াদগির মলতি-ভিলেজ দ্রিঙ্কিং ৱাতর সপ্লাই স্কিমগী উরেপ উয়ুং তমখি। এম.এল.দি. ১১৭কী ঈশিং ত্রিতমেন্ত তৌবগী প্লান্ত অমসু স্কিম অসিগী মখাদা শাগনি। লুপা করোর ২০৫০ হেন্না চঙবা প্রোজেক্ত অসিনা খুঙ্গংগী খুন্দাফম ৭০০ অমসুং য়াদগিরীগী শহর মচা অহুমগী চাউরাকপা ইমুং লাখ ২.৩দা থক্নবা ঈশিং ফংহনগনি।
প্রধান মন্ত্রীনা থৌরমসিগী মনুংদা নরায়নপুর লেফ বেঙ্ক কেনেল – এক্সতেন্সন রিনোভেসন অমসুং মোদর্নাইজেসন প্রোজেক্ত (এন.এল.বি.সি.- ই.আর.এম.) অসিসু শঙ্গাখি। ক্যুসেক ১০,০০০ পুবা ঙম্বা কেনেল লৈবা প্রোজেক্ত অসিনা হেক্ত্যার লাখ ৪.৫ পাক চাউবা লমগী ইথৈ-লৌখোং পীবা ঙমগনি। মসিনা কলাবুর্গী, য়দাগীর অমসুং বিজয়পুর জিলাগী খুঙ্গং ৫৬০গী লৌমী লাখ অহুম হেনবদা কান্নবা পীগনি। প্রোজেক্ত অসিদা চঙগদবা অপুনবা শেনফম অসি লুপা করোর ৪৭০০নি।
মহাক্না এন.ঐচ.-১৫০সি.গী কিলোমীতর ৬৫.৫গী সেক্সনগী উরেপ উয়ুংসু তমখি। মসিগী লেন ৬কী গ্রীনফিল্দ রোদ প্রোজেক্ত অসি সুরত-চেন্নৈ এক্সপ্রেসৱেগী শরুক অমনি। মসিদি চাউরাক্না লুপা করোর ৬০০০ চঙনা শাবনি।
*****
(Release ID: 1892347)
Visitor Counter : 102
Read this release in:
Bengali
,
English
,
Urdu
,
Marathi
,
Hindi
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam