প্রধানমন্ত্রীগী লোইশঙ
মধ্য প্রদেশকী ইন্দোরদা পাঙথোকপা মধ্য প্রদেশ গ্লোবেল ইনভেস্তর্স সম্মি ২০২৩দা ভিদিও পাউজেলগী খুত্থাঙদা পীখিবা প্রধান মন্ত্রীগী ৱারোল
Posted On:
11 JAN 2023 11:54AM by PIB Imphal
খুরুমজরি!
মধ্য প্রদেশ ইনভেস্তর্স সম্মিত্তা ইনভেস্তর অমদি ওন্ত্রপ্রিন্যুর পুম্নমকপু তরাম্না ওকচরি! চাওখৎপা ভারত অমা শেমগৎপদা মধ্য প্রদেশনা মরুওইবা শক্লোন লৌরি। লাইনিং অমদি স্পিসিচুএলিতদগী তুরিজম ফাওবদা; লৌউ-শিংউদগী মহৈ মশিং অমদি স্কিল দিভেলপমেন্ত ফাওবদা, মধ্য প্রদেশনা তোপ তোপ্পা, অথোইবা অমদি মমুৎ তানা খঙবগী মফম অমা কল্লি।
মরূপশিং,
সম্মিৎ অসি ‘অজাদী কা অমৃৎকাল’গী সনা ফুদোংবা চহি হৌরকপা মতমসিদা পাঙথোক্লি। চাওখৎপা ভারত অমা শেম্নবগীদমক ঐখোয় পুন্না হোৎনমিন্নরি। অদুগা ঐখোয়না চাওখৎপা ভারত হায়রিবসি, ঐখোয়গী অনিংবা অপাম্বখক্কী ৱাফম নত্তে, ভারত মচা পুম্নমক্না লেপ্লিবা খোঙফমদুবুনি। ভারত মচাশিংখক্তা নত্তনা মালেমগী লূপ অমদি এক্সপর্ত খুদিংমক্না হায়রিবা ৱাফমসিদা থাজবা থম্বিবসিদা ঐ তশেংনা নুংঙাই।
মরূপশিং,
আই.এম.এফ.না ভারতপু মালেমগী শেন্মিৎলোনগী অরংবা মফম অমা ওইনা উরি। ৱর্ল্দ বেঙ্কনা ভারতপু অতৈ লৈবাকশিংদগী হনে্না মালেমগী হোংলক্লিবা শাহুম থেংনবা ঙমগদবা হেন্না ফবা ফীভমদা লৈ হায়রি। পুম্নমকসি ভারতকী মপাঙ্গল কল্লবা মেক্রোইকনমিক ফন্দামেন্তেলশিং অসিনা ওইহল্লকপনি। ও.ই.সি.দি.না চহি অসিজী জি-২০ কাঙলুপ্তা ভারতকী খ্বাইদগী খোঙজেল য়াঙবা শেন্মিৎলোনশিংগী মনুং চনগনি হায়খি। মোর্গন স্তেনলীনা ফোঙদোকখিবগী মতুং ইন্না ভারত অসি লাক্কদৌরিবা চহি ৪-৫সিদা মালেমগী অহুমসুবা খ্বায়দগী চাওবা শেন্মিৎলোন ওইরক্নবগী লম্বীদা চঙশিল্লি হায়খি। মেককিন্সীগী সি.ই.ও.না চৎলিবা দিকেৎ অসিখক নত্তনা চহিচা অসিমক ভারতকীনি হায়খি। মালেমগী শেন্মিৎলোন খোঙ্গুল লীরিবা ইনস্তিত্যুসনশিং অমদি থাজবা য়াবা খোঞ্জেলশিংনা ভারত্তা হান্না খন্নরুদবা মওংদা থাজবা থম্লি। মালেমগী ইনভেস্তরশিংদসু হায়রিবা ৱাখল্লোন অসিমক লৈ। হন্দক্তা মমিং লৈরবা ইন্তরনেস্নেল বেঙ্ক অমনা সর্ভে অমা তৌখি। ইনভেস্তর অয়াম্বনা ভারতপু মখোয়গী ইনভেস্তমেন্তকী লমথুংফম ওইনা লৌনৈ হায়বা ৱাফম মখোয়না ফংখি। ঙসি ভারতনা রেকোর্দ থুগায়বা মওংগী এফ.দি.আই. ফংলি। ঐখোয়গী ইরক্তা ময়াম্না তিল্লরিবা অসিমক্তদসু হায়রিবা ফীভম অসিগী মমি তারি।
মরূপশিং,
ভারতকীদমক লৈরিবা থাজবা অসি মপাঙ্গল কল্লবা দিমোক্রেসী, নহা ওইরিবা দিমোগ্রাফী অমদি মরা চেৎপা রাজনিতীগী ফীভমশিংনা ওইথোকহনবনি। মসিনা মরম ওইরগা ভারতনা ইজ ওফ লিভিং অমদি ইজ ওফ বিজিনেস হেনগৎহন্নবা ফিরেপশিংগী লৌরি। চহিচা অমদা অমুকখক লাকপা লাংফমগী মতমদা ফাওবা, ঐখোয়না রিফোর্মগী লম্বীদা চঙশিনখি। ভারতনা ২০১৪দগী হৌরগা ‘রিফোর্ম, ত্রান্সফোর্ম অমদি পরফোর্ম’গী লম্বীদা চঙশিল্লি। মসিদা ‘আত্মনিরভর ভারত অভিয়ান’না অহেনবা খোঙজেল হাপ্লি। মদুগী মহৈনা ভারত পুক্নিং চিংশিন্নিংঙাই ওইরবা ইনভেস্তমেন্তকী লমথুংফম অমা ওইরে।
মরূপশিং,
মরা চেৎপা, খোঙফম চেৎবা অমদি অচুম্বা পান্দমগা লোয়ননা চলাইরিবা লৈঙাক অমনা খন্নরুদবা খোঙজেলদা চাওখৎপগী ফীভম উৎলি। লৈবাকসিগী মরুওইবা ফিরেপ খুদিংমক হেক য়ারিবমখৈ থুনা লৌরি। ঐখোয়না হৌখিবা চহি ৮সিদা রিফোর্মগী খোঙজেল অমদি পাক চাউবা লেপ্পা লৈতনা হেনগৎহল্লিবা অসি অদোমসু উরে। বেঙ্কিং সেক্তরদা রিকেপিতেলাইজেসন অমদি গভর্নেন্স ফগৎহনবা, আই.বি.সি.গুম্বা মোদর্ন রিজোলুসন ফ্রেমৱর্ক অমা শেমগৎপা, জি.এস.তি.গী মওংদা ৱন নেসন, ৱন তেক্সকী সিস্তেম শেমগৎপা, কোর্পোরেৎ তেক্সপু মালেমগী চাংদম্নবা য়াবা ফীভম ওইহনবা, সোভেরেন ৱেল্থ ফন্দশিং অমদি পেন্সন ফন্দশিংদগী তেক্স কোকপিবা, সেক্তর কয়াদা ওতোমেতিক রুৎকী পরিংদা ১০০% এফ.দি.আই. য়াহনবা, অচম্বা শেন্মিৎলোনগী অশোয়বশিং দিক্রিমিনেলাইজ তৌবা, অমদি রিফোর্মশিংগী খুত্থাঙদা ইনভেস্তমেন্তকী লম্বীদা লৈরম্বা খুরৌশিং লৌথোকপগা মরী লৈনবা রিফোর্মশিংগা লোয়ননা ইনভেস্তেমেন্তকী লম্বীদা লৈরম্বা খুরৌ কয়া ঐখোয়না লৌথোকখ্রে। ঙসিগী অনৌবা ভারতনা মাগী লনাই সেক্তরগী মপাঙ্গলদা চপ চানা থাজবা থমদুনা মাঙদা চঙশিল্লি। ঐখোয়না দিফেন্স, মাইনিং অমদি স্পেসনচিংবা স্ত্রেতেজিক সেক্তর কয়া লনাই প্লেয়রশিংগীদমক হাংদোক্লে। মসিগী মথক্তা অচৌবা খোঙথাঙ অমা ওইনা লেবর লো দজন কয়া কোদ ৪দা পুনশিল্লে!
মরূপশিং,
কম্প্লাইএন্সকী পোৎলুম হন্থহন্নবা কেন্দ্র অমদি স্তেতকী থাক্তা খন্নরুদবা চাংদা হোৎনরি। হৌখিবা চহি খরসিদা কম্প্লাইএন্স ৪০,০০০রোম লৌথোকখ্রে। হন্দক্তা ঐখোয়না নেস্নেল সিঙ্গল ৱিন্দো সিস্তেম হৌদোক্লে অমদি মধ্য প্রদেশনসু হায়রিবা সিস্তেম অসিবু শীজিন্নরি। সিস্তেম অসিগী মখাদা হৌজিক ফাওবদা অপ্রুভেল লিশিং ৫০রোম পীখ্রে।
মরূপশিং,
ভারতকী মোদর্ন অমদি মল্তিমোদেল ইনফ্রাস্ত্রকচরশিংনসু ইনভেস্তমেন্তকী পোজিবিলিতীশিং হেনগৎহল্লি। হৌখিবা চহি ৮সিদা নেস্নেল হায়ৱে শেমগৎপগী খোঙজেল শরুক অনি হেনগৎলে। হায়রিবা মতমসিদা ভারতকী মথৌ তৌবা এয়রপোর্ত মশিংসু শরুক অনি হেনগৎলে। ভারতকী হিথাংফমশিংগী হেনদ্লিং কেপাসিতী অমদি তর্নএরাউন্দ তাইমদা খন্নরুদবা মওংদা ফীভম ফগৎলক্লে। অখন্নবা ফ্রৈৎ কোরিদোর, ইন্দস্ত্রিএল কোরিদোর, এক্সপ্রেসৱে, লোজিস্তিক পার্ক, হায়রিবশিং অসিনা অনৌবা ভারতকী শক্তম ওইরক্লি। ভারত্তা অহানবা ওইনা, পি.এম. গতিশক্তী নেস্নেল মাস্তর প্লান হায়বা ইনফ্রাস্ত্রকচর শেমগৎপগী নেস্নেল প্লেৎফোর্ম অমা শেম্লে। প্লেৎফোর্ম অসিদা লৈঙাক, এজেন্সীশিং, অমদি ইনভেস্তরশিংগা মরী লৈনবা অপদেৎ তৌরবা দেতাশিং ফংলি। ভারতবু মালেমগী খ্বাইদগী হিদান্নবা য়াবা লোজিস্তিক মার্কেৎ অমগী শক্তম শেমগৎনবা ভারতনা খোঙফম চেৎনা লেপ্লি। হায়রিবা পান্দম অসিগা লোয়ননা ঐখোয়না ঐখোয়গী নেস্নেল লোজিস্তিক্স পোলিসী পায়খৎলে।
মরূপশিং,
ভারত অসি স্মার্তফোন দেতা শীজিন্নবা মকোক তারি। ভারতনা গ্লোবেল ফিনতেক অমদি আই.তি.-বি.পি.এন. আউতসোর্সিং দিস্ত্রিব্যুসন্দা অহানবা মফম কল্লি। ভারত অসি মালেমগী অহুমশুবা খ্বাইদগী চাউবা এভিএসন অমদি ওতো মার্কেৎনি। ঙসিদি পুম্নমক্না ভারতকী অফবা দিজিতেল ইনফ্রাস্ত্রকচরদা থাজবা থম্লি। মালেমগী চাওখৎপগী মথংগী তাঙ্কক্কী মরুওইবা ৱাফমশিং অদোম মমুৎ তানা খঙবিরবনি। নাকল অমদা ভারতনা খুঙ্গঙ খুদিংদা ওপ্তিকেল ফাইবর নেৎৱর্ক ফংহল্লি।, অদুগা নাকল অমদনা ৫জি নেৎৱর্ক থুনা পাকথোক চাউথোকহল্লি। কঞ্জ্যুমরশিং অমদি ইন্দস্ত্রীশিংগী ৫জি, ইন্তরনেৎ ওফ থিংস নৎত্রগা এ.আই.গী মতাঙদা ওইরবসু, শেমগৎলিবা অনৌবা খুদোংচাবা খুদিংমক্না ভারতকী চাওখৎ খোঙজেল হেন্না য়াঙ্খৎহল্লগনি।
মরূপশিং,
ঙসি, হোৎনরিবা ময়ামসিনা ‘মেক ইন ইন্দিয়া’দা অনৌবা ইনোৎ অমা হাপ্লি। ভারতনা মাগী মেনুফেকচরিংগী তাইবংবু থুনা পাকথোক চাউথোকহল্লি। প্রদক্সন লিঙ্ক ইন্সেন্তিব স্কীমশিংগী মখাদা লুপা করোর লাখ ২.৫ হেনবগী ইন্সেন্তিবশিং লাউথোকখ্রে। স্কীম অসি মালেম পুম্বদা লৈরিবা মেনুফেকচররশিংগী মরক্তা পাম্নরি। স্কীম অসিগী মখাদা তোঙান তোঙানবা সেক্তরদা হৌজিক ফাওবদা লুপা করোর লাখ ৪ হেনবগী পোত্থোকশিং পুথোকখ্রে। মধ্য প্রদেশতা লুপা করোর চা কয়া থাদখ্রে। মধ্য প্রদেশপু অচৌবা ফার্মা অমদি তেক্সতাইল হব অমা ওইহনবদা স্কীম অসিনা মরুওইবা শক্লোন লৌখি। ঐনা এম.পি.দা লেঙবিরক্লিবা ইনভেস্তরশিংগীম ফমদা পি.এল.আই. স্কীমগী কান্নবা য়ারিবমখৈ লৌবিনবা ৱাফম থমজরি।
মরূপশিং,
ময়াম পুম্নমক্না গ্রীন ইনর্জীগী লমদা লৈরিবা ভারতকী অনিংবা অপামবা অসিদা শরুক য়াবিয়ু। নুমিৎ খরনিগী মমাঙদা ঐখোয়না গ্রীন হায়দ্রোজেন মিসন অয়াবা পীখ্রে। মসিনা লুপা করোর লাখ ৮লোমগী ইনভেস্তমেন্ত পুরক্লি। মসি ভারতখক্তগী খুদোংচাবা নত্তনা মালেমগী দিমান্দবুসু ফংহন্নবনি। কেম্পেন অসিগী মখাদা লুপা করোর লিশিং কয়াগী ওইগদবা ইন্সেন্তিবশং থৌরাং তৌদুনা থম্লে। মিসন অসিদা অদোম্না লৌবা য়াবা শক্লোনশিং য়েংবিয়ু।
মরূপশিং,
হকশেল, লৌউ-শিংউ, ন্যুত্রিসন, স্কিল নৎত্রগা ইনোভেসন ওইরবসু ভারত্তা হীরম খুদিংদা অনৌবা খুদোংচাবশিংনা অদোমবু ঙাইদুনা লৈরি। হৌজিক ভারতকা লোয়ননা মালেমগী ওইবা অনৌবা সপ্লাই চেন অমা শেমগৎপগী মতম ওইরে। মরম অসিনা ঐনা অমুক্কা হন্না ময়াম পুম্নমকপু তরাম্না ওকচরি। সম্মিৎ অসিগীদমক্তা ঐনা য়াইফ-পাউজেল পীজরি। মধ্য প্রদেশগী মতিক অমদি মধ্য প্রদেশকী ফিরেপ্না অদোমগী খোঙজেলবু মাঙদা খোঙফম অনিদি শোয়দনা পুখৎকনি হায়না ঐনা থাজবগা লোয়ননা হায়জরি। পুম্নমকপু থম্মোয়নুংদগী থাগৎচরি!
দিস্ক্লেমর: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখিবনি।
***
(Release ID: 1890406)
Visitor Counter : 124
Read this release in:
Bengali
,
Assamese
,
English
,
Urdu
,
Hindi
,
Marathi
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam