ঙসি গুৱাহাতিদা পোর্তস, সিপ্পিং অমসুং ৱাতরৱেজ অমসুং অয়ুসকী য়ুনিয়ন মিনিস্তর শ্রী সর্বনন্দা সোনোৱালনা অসামগীদমক পোর্তস, সিপ্পিং অমসুং ৱাতরৱেজ মিনিস্ত্রিদা চহি অসিদা ইনলেন্দ ৱাতরৱেজশিং শেমগৎনবা পায়খৎকদবা মরুওইবা থবকশিং লাউথোকখ্রে। জনুৱারি ১৩,২০২৩দা গুৱাহাতিদা প্রধান মন্ত্রী শ্রী নরেন্দ্র মোদীনা অচৌবা প্রোজেক অনি উরেপ-উয়ুং তম্বগা লোয়ন্না পান্দু হিথাংফমগী থবক তৌবা ঙম্বা হেনগৎহন্নবা অৱাং-নোংপোক্কী মেরিতাইম স্কিল সেন্তর শঙ্গাগনি। উরেপ-উয়ুং তমগদবা অতোপ্পা থবকশিংগী মনুংদা পান্দু মলতি মোদাল তর্মিনেলদা সিপ রিপিয়র ফেকসিলিতি অমসুং গুৱাহাতিগী নেসনেল হায়ৱেজ ২৭দগী পান্দু মলতি মোদাল তর্মিনেল য়ৌবা লম্বী অমা য়াওরি। খুদোংচাবশিং অসি অসাম অমসুং অৱাং-নোংপোক লমদমদা ঈশিং লম্বীশিং নৌনা শেমগৎনবা পোর্তস, সিপ্পিং অমসুং ৱাতরৱেজ মিনিস্ত্রিনা থৌরাং তৌরিবা অচৌবা থবকশিংগী শরুক অমনি।

লাক্লিবা চহিশিংদা অসামদা ইনলেন্দ ৱাতরৱেজশিং শেমগৎনবা লুপা করোর ১০১৬গী শেনফম অমা থাদগনি হায়না য়ুনিয়ন মিনিস্তরনা লাউথোকখি। নেসনেল ৱাতরৱেজ ২(ব্রাহ্মাপুত্রা)শেমগৎনবা শেনফম লুপা করোর ৪৭৪দা হেনগৎলে অমসুং নেসনেল ৱাতরৱেজ ১৬(বরাক) শেমগৎনবা লুপা করোর ১৪৮গী শেনফম খাক্তুনা থম্লে। হন্দক মিনিস্ত্রিনা ধনসিরি তুরেল(নেসনেল ৱাতরৱেজ ৩১) অমসুং কোপিলি তুরেল (নেসনেল ৱাতরৱেজ ৫৭)শেমগৎনবা অয়াবা পীখ্রে। মোদী সরকারগী মখাদা ঈশিং লম্বীশিং অমুক হন্না শেমজিনবদগী, ইন্দো বংলাদেস প্রোতোগোল রুত(আই বি পি আর)দা পোৎ-চৈ পুথোক-পুশিন তৌবা ২০১৪-১৫দা মেত্রিক তন ২.০ ওইরম্বদগী ২০২১-২২দা মেত্রিক তন ৫.৪৩দা হেনগৎলে হায়না শ্রী সোনোৱালনা ফোঙদোকখি।

থৌরম অদুদা ৱা ঙাংবদা শ্রী সোনোৱালনা হায়খি লমদম অসিগী শেন-থুম চাউখৎনবা মফম অমা ওন্থোক্নবা লমদম অসিগী ঈশিং লম্বীশিং শেমগৎনবা মিনিস্ত্রিনা অচৌবা থবকশিং পায়খৎলে। থৌরাং অসিগী শরুক অমা ওইনা, প্রধান মন্ত্রী মোদীনা ভর্চুএল ওইনা গুৱাহাতিদা পান্দু হিথাংফমদা অচৌবা থবকশিং উরেপ-উয়ুং তমগনি। মসিনা লমদম অসিগী চাউখৎ-থৌরাংদা চাউনা মতেং পাংগনি। ফজরবা ঈশিং লম্বীশিং অসিনা শেন-থুমগী ফিবম ফগৎহনগনি অমসুং য়াংনা চৎথোক-চৎশিন য়াহনগনি অমসুং অনৌবা ভারত চাউখৎনবা ইঞ্জিন ওইনা থবক তৌগনি।

বরানসীদগী দিব্রুগর য়ৌবা মালেমদা খ্বাইদগী শাংবা রিভর ক্রুইজ গঙ্গা বিলাস হৌদোক্কদৌরিবা অসিগী মতাংদা য়ুনিয়ন মিনিস্তরনা হায়খি, গঙ্গা বিলাসনা লৈবাক অসিদা তুরিজমগী অনৌবা মফম অমা হাংদোক্লগনি। ক্রুইজনা অসামদা নুমিৎ ১০ নি হেন্না লৈগনি অমসুং মপান লৈবাক্কী লমকোয়বশিংনা তুরেল মপানগী ফিজেৎ-চাকচা অমসুং চৎনবীশিং উবা ফংলগনি। ধুব্রিদগী দিব্রুগর ফাওবা; ময়োংদগী মাজুলি ফাওবগী ক্রুইজ অসিনা অসামগী মহৌশাগী ফজবশিং উবা ফংগনি। মসিগী মাইপাকপা অসিনা অসামদা রিভর ক্রুইজ তুরিজমদা শেন থাদনবা অনৌবা খুদোংচাবা অমা হাংদোক্লে। গঙ্গা বিলাসনা ধুব্রি, গোলপারা, গুৱাহাতি, পোবিতোরা, তেজপুর, সিলঘাত, নেমাতি ঘাত অমসুং অরোইবদা দিব্রুগর(বোগিবিল)দা লেপকনি।

পান্দু তর্মিনেলদা লৈগদৌরিবা সিপ রিপিয়ার ফেকসিলিতি অসিনা মতম অমসুং শেন কনগনি। মফম অসিদা আই.দব্লিউ.তি, অসাম সরকার, আই.দব্লিউ.এ.আই, ভারত লান্মী অমসুং এন.দব্লিউ-২ অমসুং ১৬দা হোল্লিবা লনাই মীওইশিংগী জহাজশিং শেমজিন্নবগী খুদোংচাবা পীগনি। এন.ঐচ-২৭দগী পান্দু তর্মিনেল য়ৌবা লম্বী অসিনা পুং ২৪ অফবা লম্বী ফংহন্দুনা কার্গোগী থবক তৌরিবশিং খুদোংচাহনগনি। অৱাং-নোংপোক্কী মেরিতাইম স্কিল সেন্তর অসিনা ঐখোয়গী হৈথোই-শিংথোইরবা নহারোল কয়া লোজিস্তিক্স ইন্দস্ত্রিদা থবক ফংনবা দরকার ওইবা লৌশিং কয়া ফংহনগনি।

*****