মেঘালয়ৰ ৰাজ্যপাল ব্ৰিগেডিয়াৰ বিডি মিশ্ৰজী, মেঘালয়ৰ মুখ্যমন্ত্ৰী চাংমাজী, মোৰ কেবিনেট সহকৰ্মী শ্ৰী অমিত ভাই শ্বাহ, সৰ্বানন্দ সোণোৱালজী, কিৰেন ৰিজিজুজী, জি কিষাণ ৰেড্ডীজী, বি এল বাৰ্মাজী, মণিপুৰ, মিজোৰাম, অসম, অৰুণাচল প্ৰদেশ, ত্ৰিপুৰা আৰু ছিকিমৰ মুখ্যমন্ত্ৰী আৰু মেঘালয়ৰ মোৰ মৰমৰ ভাই-ভনীসকল!

খুবলেই শ্বিবন! (খাচী আৰু জয়ন্তীয়াত শুভেচ্ছা) নেমেং আমা! (গাৰোত শুভেচ্ছা) মেঘালয় হৈছে প্ৰকৃতি আৰু সংস্কৃতিৰে সমৃদ্ধ এখন ৰাজ্য। এই সমৃদ্ধি আপোনালোকৰ আতিথ্যতো প্ৰতিফলিত হয়। আজি আকৌ এবাৰ আমি মেঘালয়ৰ উন্নয়নমূলক যাত্ৰা উদযাপনৰ বাবে এই অনুষ্ঠানত অংশগ্ৰহণ কৰাৰ সুযোগ পাইছো। সংযোগ, শিক্ষা, দক্ষতা আৰু নিযুক্তি সম্পৰ্কীয় ডজনোধিক প্ৰকল্পৰ বাবে মেঘালয়ৰ মোৰ সকলো ভাই-ভনীলৈ আন্তৰিক অভিনন্দন থাকিল!

ভাতৃ আৰু ভগ্নীসকল,

কাকতালীয়ভাৱে আজি ফুটবল বিশ্বকাপৰ ফাইনেল অনুষ্ঠিত হোৱাৰ লগে লগে মই ফুটবল প্ৰেমীসকলৰ মাজত ফুটবল খেলপথাৰত উপস্থিত আছোঁ। ফুটবল খেলখন তাত চলি আছে আনহাতে একে সময়তে আমি এই ফুটবল খেলপথাৰত উন্নয়নৰ বাবে প্ৰতিযোগিতা কৰি আছো। যদিও খেলখন কাটাৰত অনুষ্ঠিত হৈছে, ইয়াতো উত্তেজনা আৰু উৎসাহ কম হোৱা নাই। আৰু বন্ধুসকল, যিহেতু মই ফুটবল খেলপথাৰত আছোঁ আৰু ফুটবল জ্বৰ সকলোতে আছে, তেন্তে আমি ফুটবলৰ কথা কিয় নাপাতো? আহক আমি ফুটবলৰ উপমা লওঁ। আমি সকলোৱে ফুটবলত এই নিয়মটো জানো; যদি কোনোবাই খেলুৱৈৰ মনোভাৱৰ বিৰুদ্ধে আচৰণ কৰে, তেন্তে তেওঁক ৰঙা কাৰ্ডেৰে বাহিৰ কৰি দিয়া হয়। একেদৰে, যোৱা ৮ বছৰত, আমি উত্তৰ-পূৰ্বাঞ্চলৰ উন্নয়নৰ পথত অহা বহুতো বাধাক ৰঙা কাৰ্ড দেখুৱাইছো। আমি দুৰ্নীতি, বৈষম্য, স্বজনপোষণ, হিংসা, স্তব্ধ প্ৰকল্পৰ লগতে ভোট বেংকৰ ৰাজনীতি দূৰ কৰিবলৈ আন্তৰিক প্ৰচেষ্টা চলাই আছো। কিন্তু আপুনি জানে, সমগ্ৰ দেশে জানে যে এই ৰোগবোৰৰ শিপা অতি গভীৰলৈ শিপায়। গতিকে আমি সকলোৱে এই বিষয়বোৰ উৎখাত কৰিবলৈ একেলগে কাম কৰিব লাগিব। আমি উন্নয়নমূলক কামবোৰ ত্বৰান্বিত কৰিবলৈ আৰু সেইবোৰ অধিক কাৰ্যকৰী কৰাৰ বাবে আমাৰ প্ৰচেষ্টাৰ ইতিবাচক ফলাফলো প্ৰত্যক্ষ কৰি আছোঁ। কেৱল সেয়াই নহয়, আজি কেন্দ্ৰীয় চৰকাৰে ক্ৰীড়া সন্দৰ্ভত এক নতুন দৃষ্টিভংগীৰে আগবাঢ়িছে। ই উত্তৰ-পূৰ্বাঞ্চল, উত্তৰ-পূৰ্বাঞ্চলৰ মোৰ সৈনিক আৰু ইয়াত থকা আমাৰ পুত্ৰ-কন্যাসকলক উপকৃত কৰিছে। দেশৰ প্ৰথম ক্ৰীড়া বিশ্ববিদ্যালয় উত্তৰ-পূৰ্বাঞ্চলত স্থাপন হৈছে। আজি উত্তৰ-পূৰ্বাঞ্চলত বহুমুখী হল, ফুটবল খেলপথাৰ, এথলেটিকছ ট্ৰেক আদিৰ দৰে ৯০ টা প্ৰকল্পৰ কাম চলি আছে। আজি মই শ্বিলঙৰ পৰা এটা কথা ক'ব বিচাৰো। যদিও আমাৰ চকু কাটাৰত চলি থকা খেলৰ ওপৰত নিৱদ্ধ, য'ত বিদেশী দলবোৰে খেলি আছে, মোৰ দেশৰ যুৱ শক্তিৰ ওপৰত মোৰ সম্পূৰ্ণ আস্থা আছে। সেইকাৰণে মই আত্মবিশ্বাসেৰে ক'ব পাৰোঁ যে সেই দিনটো বেছি দূৰ নহয় যেতিয়া আমি ভাৰতত এনে অনুষ্ঠান উদযাপন কৰিম আৰু ত্ৰিৰংগাৰ বাবে উল্লাস কৰিম।

ভাতৃ আৰু ভগ্নীসকল,

উন্নয়ন কেৱল বাজেট, নিবিদা, আধাৰশিলা স্থাপন অনুষ্ঠান আৰু উদ্বোধনৰ দৰে এই ৰীতি-নীতিত সীমাৱদ্ধ নহয়। এইবোৰ ২০১৪ চনৰ আগতেই হৈছিল। মানুহে ৰিবন কাটিবলৈ উপস্থিত হয়; নেতাসকলক মালা পিন্ধোৱা হয়; 'জিন্দাবাদ'ৰ শ্লোগানো উত্থাপন কৰা হয়। তেন্তে আজি কি সলনি হৈছে? আজিৰ এই পৰিৱৰ্তন আমাৰ উদ্দেশ্যত আছে। পৰিৱৰ্তনটো আমাৰ সংকল্প, আমাৰ অগ্ৰাধিকাৰ, কৰ্ম সংস্কৃতি, প্ৰক্ৰিয়া আৰু ফলাফলত নিহিত আছে। প্ৰস্তাৱটো হৈছে আধুনিক আন্তঃগাঁথনি আৰু আধুনিক সংযোগৰ সৈতে এক উন্নত ভাৰত গঢ়ি তোলা। ইয়াৰ উদ্দেশ্য হৈছে ভাৰতৰ উন্নয়নৰ বাবে সকলোৰে প্ৰচেষ্টাৰ সৈতে ভাৰতৰ প্ৰতিটো অঞ্চল, ভাৰতৰ প্ৰতিটো শ্ৰেণীক দ্ৰুত বিকাশৰ লক্ষ্যৰে সংযোগ কৰা। বঞ্চনা আঁতৰ কৰা, দূৰত্ব হ্ৰাস কৰা, ক্ষমতা বৃদ্ধিত উদগনি দিয়া আৰু যুৱসকলক অধিক সুযোগ প্ৰদান কৰাটো অগ্ৰাধিকাৰৰ বিষয় হৈ পৰিছে। কৰ্ম সংস্কৃতিৰ পৰিৱৰ্তনৰ অৰ্থ হৈছে যে প্ৰতিটো প্ৰকল্প আৰু প্ৰতিটো কাৰ্যসূচী সময়সীমাৰ ভিতৰত সম্পূৰ্ণ কৰিব লাগে।

বন্ধুসকল,

আমি কেন্দ্ৰীয় চৰকাৰৰ অগ্ৰাধিকাৰ সলনি কৰাৰ পিছত, ইয়াৰ ইতিবাচক প্ৰভাৱো সমগ্ৰ দেশতে স্পষ্টভাৱে দেখা গৈছে। কেন্দ্ৰীয় চৰকাৰে এই বছৰ কেৱল দেশৰ আন্তঃগাঁথনিৰ বাবে ৭ লাখ কোটি টকা ব্যয় কৰিছে। মেঘালয় আৰু সমগ্ৰ উত্তৰ-পূৰ্বাঞ্চলৰ ভাই-ভনীসকল, অনুগ্ৰহ কৰি এই পৰিমাণটো মনত ৰাখিব - ৭ লাখ কোটি টকা! আনহাতে ৮ বছৰ আগতে এই ব্যয় ২ লাখ কোটি টকাতকৈও কম আছিল। অৰ্থাৎ স্বাধীনতাৰ ৭ দশক ৰ পাছতো ই মাত্ৰ ২ লাখ কোটি টকাহে হৈছিল। কিন্তু ৮ বছৰৰ ভিতৰত আমি ইয়াৰ ক্ষমতা প্ৰায় ৮ গুণ বৃদ্ধি কৰিছো! আজি বিভিন্ন ৰাজ্যই আন্তঃগাঁথনি বিকাশৰ ক্ষেত্ৰতো প্ৰতিযোগিতা সৃষ্টি কৰিছে। বিকাশৰ বাবে এটা প্ৰতিযোগিতা আছে। আজি দেশত সংঘটিত হোৱা এই পৰিৱৰ্তনৰ আটাইতকৈ ডাঙৰ হিতাধিকাৰী হৈছে মোৰ উত্তৰ-পূৰ্বাঞ্চল। শ্বিলঙকে ধৰি উত্তৰ-পূৰ্বাঞ্চলৰ সকলো ৰাজধানীক ৰে'ল সেৱাৰ সৈতে সংযোগ কৰাৰ বাবে দ্ৰুত গতিত কাম চলি আছে। ২০১৪ বৰ্ষৰ আগতে, প্ৰতি সপ্তাহত মাত্ৰ ৯০০ খন বিমান হে চলিব পাৰিছিল। আজি সংখ্যাটো প্ৰায় ১৯০০ ত উপনীত হৈছে। আগতে ই ৯০০ আছিল; এতিয়া ১৯০০। আজি, উড়ান আঁচনিৰ অধীনত মেঘালয়ৰ ১৬টা পথত বিমান সেৱা চলি আছে। ইয়াৰ ফলত মেঘালয়ৰ জনসাধাৰণে সুলভ বিমান সেৱাৰ সুবিধা লাভ কৰিছে। মেঘালয় আৰু উত্তৰ-পূৰ্বাঞ্চলৰ কৃষকসকলেও উন্নত বিমান সংযোগৰ দ্বাৰা লাভান্বিত হৈছে। কেন্দ্ৰীয় চৰকাৰৰ কৃষি উড়ান আঁচনিৰ সৈতে, ইয়াৰ পৰা ফল আৰু পাচলিবোৰ দেশ আৰু বিদেশৰ বজাৰত সহজে উপনীত হৈছে।

বন্ধুসকল,

যিবোৰ প্ৰকল্প উদ্বোধন কৰা হৈছে বা যাৰ আধাৰশিলা আজি স্থাপন কৰা হৈছে তাৰ দ্বাৰা মেঘালয়ৰ সংযোগ অধিক শক্তিশালী হ'বলৈ গৈ আছে । যোৱা ৮ বছৰত মেঘালয়ত ৰাষ্ট্ৰীয় ঘাইপথ নিৰ্মাণত ৫০০০ কোটি টকা বিনিয়োগ কৰা হৈছে। মেঘালয়ৰ প্ৰধানমন্ত্ৰী চড়ক যোজনাৰ অধীনত যোৱা ৮ বছৰত নিৰ্মাণ কৰা গ্ৰামীণ পথৰ সংখ্যা আগৰ ২০ বছৰতকৈ সাত গুণ বেছি।

ভাতৃ আৰু ভগ্নীসকল,

ডিজিটেল সংযোগে উত্তৰ-পূৰ্বাঞ্চলৰ যুৱ শক্তিৰ বাবে নতুন সুযোগৰ সৃষ্টি কৰিছে। ডিজিটেল সংযোগে কেৱল যোগাযোগ খণ্ডক লাভান্বিত কৰাই নহয়, লগতে পৰ্যটন, প্ৰযুক্তি, শিক্ষা আৰু স্বাস্থ্যসেৱাৰ দৰে ক্ষেত্ৰত সুবিধা আৰু সুযোগো বৃদ্ধি কৰিছে। ইয়াৰ উপৰিও, বিশ্বত দ্ৰুতগতিত উদীয়মান ডিজিটেল অৰ্থনীতিৰ সম্ভাৱনাও বৃদ্ধি পাইছে। ২০১৪ চনৰ তুলনাত, উত্তৰ-পূৰ্বাঞ্চলত অপ্টিকেল ফাইবাৰ কভাৰেজ প্ৰায় ৪ গুণ বৃদ্ধি পাইছে আৰু মেঘালয়ত ই ৫ গুণতকৈ অধিক বৃদ্ধি পাইছে। উত্তৰ-পূৰ্বাঞ্চলৰ প্ৰতিটো কোণত উন্নত মোবাইল সংযোগৰ বাবে ৬,০০০ টাৱাৰ স্থাপন কৰা হৈছে। ইয়াৰ বাবে ৫ হাজাৰ কোটিতকৈও অধিক টকা ব্যয় কৰা হৈছে। আজি মেঘালয়ত কেইবাটাও ৪জি মোবাইল টাৱাৰৰ উদ্বোধনে এই প্ৰচেষ্টাসমূহক গতি প্ৰদান কৰিব। এই আন্তঃগাঁথনিটোৱে ইয়াত যুৱসকলৰ বাবে নতুন সুযোগ মুকলি কৰিবলৈ গৈ আছে। আইআইএমৰ উদ্বোধন আৰু মেঘালয়ত প্ৰযুক্তি উদ্যানৰ আধাৰশিলা স্থাপনে শিক্ষা আৰু উপাৰ্জনৰ সুযোগো সম্প্ৰসাৰিত কৰিব। আজি উত্তৰ-পূৰ্বাঞ্চলৰ জনজাতীয় অঞ্চলসমূহত ১৫০ খনতকৈও অধিক একলব্য আদৰ্শ বিদ্যালয় স্থাপন কৰা হৈছে, যাৰ ভিতৰত ৩৯ খন মেঘালয়ত আছে। ইয়াৰ উপৰিও, যুৱক-যুৱতীসকলে আইআইএমৰ দৰে পেছাদাৰী শিক্ষা প্ৰতিষ্ঠানৰ পৰা পেছাদাৰী শিক্ষাৰ সুবিধা লাভ কৰিবলৈ গৈ আছে।

ভাতৃ আৰু ভগ্নীসকল,

বিজেপি-এনডিএ চৰকাৰে উত্তৰ-পূৰ্বাঞ্চলৰ উন্নয়নৰ বাবে আন্তৰিকতাৰে কাম কৰি আছে। এই বছৰেই, ৩টা নতুন আঁচনি আৰম্ভ কৰা হৈছে, যিবোৰ হয় পোনপটীয়াকৈ উত্তৰ-পূৰ্বাঞ্চলৰ বাবে বা উত্তৰ-পূৰ্বাঞ্চলক আটাইতকৈ বেছি লাভান্বিত কৰিব। পৰ্বতমালা আঁচনিৰ অধীনত এটা ৰ'পৱে নেটৱৰ্ক নিৰ্মাণ কৰা হৈছে। ইয়াৰ ফলত উত্তৰ-পূৰ্বাঞ্চলৰ বিখ্যাত পৰ্যটন ক্ষেত্ৰসমূহৰ আশে-পাশে সুবিধা বৃদ্ধি হ'ব আৰু পৰ্যটনৰ বিকাশো হ'ব। 'পিএম ডিভাইন' আঁচনিয়ে উত্তৰ-পূৰ্বাঞ্চলৰ উন্নয়নত এক নতুন গতি প্ৰদান কৰিবলৈ গৈ আছে। এই আঁচনিৰ দ্বাৰা উত্তৰ-পূৰ্বাঞ্চলৰ বাবে মুখ্য উন্নয়নমূলক প্ৰকল্পসমূহ অধিক সহজে অনুমোদিত হ'ব। ইয়াত, মহিলা আৰু যুৱসকলৰ জীৱিকাৰ উপায়ো বিকশিত কৰা হ'ব। প্ৰধানমন্ত্ৰী-ডিভাইনৰ অধীনত অহা ৩-৪ বছৰৰ বাবে ৬০০০ কোটি টকাৰ বাজেট নিৰ্ধাৰণ কৰা হৈছে।

ভাতৃ আৰু ভগ্নীসকল,

দীৰ্ঘদিন ধৰি চৰকাৰত থকা দলবোৰে উত্তৰ-পূৰ্বাঞ্চলক 'বিভাজন' কৰাৰ ধাৰণা মনত পুহি ৰাখিছিল; কিন্তু আমি 'ডিভাইন'ৰ ধাৰণাটো লৈ আহিছো। বিভিন্ন সম্প্ৰদায় হওক বা বিভিন্ন অঞ্চলই হওক, আমি সকলো ধৰণৰ বিভাজন আঁতৰ কৰি আছোঁ। আজি উত্তৰ-পূৰ্বাঞ্চলত আমি বিবাদৰ সীমা অংকন কৰা নাই, কিন্তু আমি উন্নয়নৰ কৰিডৰ নিৰ্মাণ কৰি আছো; আমি তাৰ ওপৰত গুৰুত্ব আৰোপ কৰি আছো। যোৱা ৮ বছৰত, বহুতো গোটে হিংসাৰ পথ এৰি স্থায়ী শান্তিৰ পথ বাছি লৈছে। উত্তৰ-পূৰ্বাঞ্চলত এএফএছপিএ-ৰ আৰু প্ৰয়োজন নোহোৱাটো নিশ্চিত কৰিবলৈ, ৰাজ্য চৰকাৰৰ সহায়ত পৰিস্থিতি নিৰন্তৰ উন্নত হৈ আছে। কেৱল এয়াই নহয়, কেইবা দশক ধৰি চলি থকা ৰাজ্যসমূহৰ মাজত সীমা বিবাদৰ সমস্যা সমাধান কৰা হৈছে।

বন্ধুসকল,

আমাৰ বাবে উত্তৰ-পূৰ্বাঞ্চল আৰু আমাৰ সীমান্ত অঞ্চলসমূহ অন্তিম বিন্দু নহয়, বৰঞ্চ ই হ’ল নিৰাপত্তা আৰু সমৃদ্ধিৰ প্ৰৱেশদ্বাৰ। ইয়াৰ পৰা ৰাষ্ট্ৰৰ নিৰাপত্তাও নিশ্চিত কৰা হয় আৰু ইয়াৰ পৰা আন দেশৰ সৈতে বাণিজ্য আৰু ব্যৱসায়ো হয়। সেয়েহে আন এটা গুৰুত্বপূৰ্ণ আঁচনি আছে, যি উত্তৰ-পূৰ্বাঞ্চলৰ ৰাজ্যসমূহক লাভান্বিত কৰিব। এই পৰিকল্পনাটো হ’ল সীমান্ত গাওঁ বিকশিত কৰাৰ বিষয়ে। ইয়াৰ অধীনত সীমান্তৱৰ্তী গাওঁসমূহত উন্নত সুবিধা বিকশিত কৰা হ'ব। দীৰ্ঘদিন ধৰি দেশখনত এটা ভুল ধাৰণা আছিল যে যদি সীমান্ত অঞ্চলবিলাক বিকশিত কৰা হয় আৰু যোগাযোগ উন্নত কৰা হয় তেন্তে শত্ৰুসকল উপকৃত হ'ব। মই কল্পনাও কৰিব নোৱাৰো যে এনেকুৱাও মানসিকতা পূৰ্বে আছিল। পূৰ্বৰ চৰকাৰসমূহৰ এই মানসিকতাৰ বাবে উত্তৰ-পূৰ্বাঞ্চলকে ধৰি দেশৰ সকলো সীমান্ত অঞ্চলতে যোগাযোগ ব্যৱস্থা উন্নত কৰিব পৰা নগ'ল। কিন্তু আজি স্পষ্টভাৱে, আত্মবিশ্বাসেৰে, নতুন পথ, নতুন সুৰংগ, নতুন দলং, নতুন ৰে'ল লাইন, নতুন এয়াৰষ্ট্ৰিপ আৰু প্ৰয়োজনীয় সকলোবোৰৰ বাবে নিৰ্মাণ কাৰ্য এটাৰ পিছত এটা দ্ৰুত গতিত চলি আছে। আমি এসময়ত নিৰ্জন হৈ থকা সীমান্তৱৰ্তী গাওঁবোৰক জীৱন্ত গাওঁলৈ পৰিৱৰ্তন কৰাত নিয়োজিত হৈআছো। আমি আমাৰ চহৰবোৰত যি গতিত কাম কৰো সেয়া আমাৰ সীমাতো প্ৰয়োজনীয়। ফলস্বৰূপে, ইয়াত পৰ্যটন সম্প্ৰসাৰিত হ'ব আৰু যিসকলে গাওঁ এৰিছে তেওঁলোকো ঘূৰি আহিব।

বন্ধুসকল,

যোৱা বছৰ মই ভেটিকান চিটি ভ্ৰমণ কৰাৰ সুযোগ পাইছিলো, য'ত মই পবিত্ৰ পোপক লগ পাইছিলো। মই তেওঁক ভাৰত ভ্ৰমণৰ বাবেও আমন্ত্ৰণ জনাইছো। এই বৈঠকখনে মোৰ মনত গভীৰ প্ৰভাৱ পেলাইছিল। আমি দুয়োজনে আজি সমগ্ৰ মানৱজাতিয়ে সন্মুখীন হোৱা প্ৰত্যাহ্বানসমূহৰ বিষয়ে আলোচনা কৰিছিলো। ঐক্য আৰু সম্প্ৰীতিৰ ভাৱনাৰে সকলোকে কেনেদৰে লাভান্বিত কৰিব পাৰি তাৰ ওপৰত ঐক্যবদ্ধ প্ৰচেষ্টাৰ বাবে সহমত পোষণ কৰা হৈছিল। আমি এই মনোভাৱ শক্তিশালী কৰিব লাগিব।

বন্ধুসকল,

শান্তি আৰু উন্নয়নৰ ৰাজনীতিৰ পৰা আমাৰ জনজাতীয় সমাজে আটাইতকৈ বেছি লাভান্বিত হৈছে। জনজাতীয় সমাজৰ পৰম্পৰা, ভাষা আৰু সংস্কৃতি বজাই ৰাখি জনজাতীয় অঞ্চলৰ বিকাশ কৰাটো আমাৰ চৰকাৰৰ অগ্ৰাধিকাৰ। সেইকাৰণে আমি বাঁহ কাটিবলৈ থকা নিষেধাজ্ঞা আঁতৰাই দিছো। এইটোৱে বাঁহৰ সৈতে সম্পৰ্কিত জনজাতীয় সামগ্ৰীৰ নিৰ্মাণ বৃদ্ধি কৰিছে। বনাঞ্চলৰ পৰা লাভ কৰা সামগ্ৰীৰ মূল্য সংযোজনৰ বাবে, উত্তৰ-পূৰ্বাঞ্চলত ৮৫০ টা বন ধন কেন্দ্ৰ স্থাপন কৰা হৈছে। বহুতো আত্মসহায়ক গোট তেওঁলোকৰ সৈতে সম্পৰ্কিত, য'ত আমাৰ বহুতো মাতৃ আৰু ভগ্নীয়ে কাম কৰি আছে। তদুপৰি, ঘৰ, পানী, বিদ্যুৎ আৰু গেছৰ দৰে সামাজিক আন্তঃগাঁথনিয়েও উত্তৰ-পূৰ্বাঞ্চলক আটাইতকৈ বেছি লাভান্বিত কৰিছে। যোৱা কেইবছৰমানত, মেঘালয়ত প্ৰথমবাৰৰ বাবে বিদ্যুৎ ২ লাখ পৰিয়ালত উপলব্ধ হৈছে। দৰিদ্ৰসকলৰ বাবে প্ৰায় ৭০ হাজাৰ ঘৰৰ মঞ্জুৰ কৰা হৈছে। প্ৰায় তিনি লাখ পৰিয়ালে প্ৰথমবাৰৰ বাবে নলৰ পানীৰ সুবিধা লাভ কৰিছে। এনে সুবিধাসমূহৰ আটাইতকৈ ডাঙৰ হিতাধিকাৰী হৈছে আমাৰ জনজাতীয় ভাই-ভনীসকল।

বন্ধুসকল,

উত্তৰ-পূৰ্বাঞ্চলত দ্ৰুত বিকাশৰ এই ধাৰা যাতে এনেদৰে প্ৰবাহিত হৈ থাকে, সেয়া নিশ্চিত কৰিবলৈ আপোনালোকৰ আশীৰ্বাদ হৈছে আমাৰ শক্তিস্বৰূপ।  খ্ৰীষ্টমাছৰ উৎসৱ সমাগত। আজি মই উত্তৰ-পূৰ্বাঞ্চললৈ অহাৰ লগে লগে উত্তৰ-পূৰ্বাঞ্চলৰ সকলো দেশবাসী আৰু মোৰ ভাই-ভনীসকলক দেশবাসীৰ তৰফৰ পৰা খ্ৰীষ্টমাছ উৎসৱৰ বাবে আন্তৰিক শুভেচ্ছা জনাইছো। আকৌ এবাৰ, আপোনালোক সকলোকে মোৰ আন্তৰিক অভিনন্দন জনালো! খুবলেই শ্বিবন! (খাচী আৰু জয়ন্তীয়াত ধন্যবাদ) মিতেলা! (গাৰোত ধন্যবাদ)

***

DS/ VJ/IG/AK/MM