مرکزی وزیر داخلہ اور وزیر تعاون جناب امت شاہ نے آج کولکاتہ میں مشرقی زونل کونسل کی 25ویں میٹنگ کی صدارت کی۔ میٹنگ میں مغربی بنگال اور جھارکھنڈ کے وزرائے اعلیٰ، بہار کے نائب وزیر اعلیٰ اور اوڈیشہ کے وزرا اور وزارت داخلہ اور کونسل کے ماتحت ریاستوں کے دیگر سینیئر افسران نے شرکت کی۔

اپنے افتتاحی خطاب میں مرکزی وزیر داخلہ نے کہا کہ گزشتہ 8 سالوں میں وزیر اعظم نریندر مودی کی قیادت میں زونل کونسلوں کی میٹنگوں میں 1000 سے زیادہ مسائل پر تبادلہ خیال کیا گیا اور ان میں سے 93 فیصد کو حل کیا گیا جو کہ ایک بہت بڑی کامیابی ہے۔ انھوں نے کہا کہ 2006 سے 2013 تک کے 8 سالوں میں زونل کونسل کے کل 6 اجلاس منعقد ہوئے (ہر سال اوسطاً ایک اجلاس سے بھی کم) لیکن 2014 سے 8 سالوں میں کووڈ 19 کی وبا کے باوجود، کل 23 میٹنگ (بشمول آج کی میٹنگ) ہوئی ہیں (ہر سال اوسطاً 3 میٹنگز)۔ جناب شاہ نے کہا کہ زونل کونسل کی میٹنگوں کی تعدد میں نمایاں اضافہ ہوا ہے اور یہ نتائج نظر آ رہے ہیں، جو تمام ریاستی حکومتوں، مرکزی وزارتوں اور محکموں کے تعاون سے ممکن ہوا ہے اور اس میں بین ریاستی کونسل سیکرٹریٹ فعال کردار ادا کر رہا ہے۔

جناب امت شاہ نے کہا کہ وزیر اعظم نریندر مودی کی قیادت میں مرکزی حکومت نے مشرقی خطے کی ریاستوں میں بنیادی ڈھانچے کو ترقی دینے کی سمت میں پچھلے سالوں میں کافی کام کیا ہے۔ انھوں نے کہا کہ وزیر اعظم نریندر مودی کی گتی شکتی اسکیم کے وژن میں مشرقی خطہ کی ریاستوں کا بڑا حصہ ہے، کیونکہ جناب مودی نے ہمیشہ اس خطے کی ترقی پر زور دیا ہے۔ جناب شاہ نے کہا کہ اگلے 25 سالوں میں آزادی کا امرت کال کے دوران ملک کا مشرقی خطہ ہندوستان کی ترقی میں اہم کردار ادا کرے گا۔ جناب شاہ نے کہا، 25ویں مشرقی زونل کونسل کی میٹنگ اچھے اور مثبت ماحول میں ہوئی، بہت سے معاملات پر اتفاق رائے ہوا، جب کہ زیر التوا مسائل کو بھی مشاورت کے ذریعے حل کیا جائے گا۔

مرکزی وزیر داخلہ نے کہا کہ ملک کے مشرقی علاقے سے بائیں بازو کی انتہا پسندی کا تقریباً خاتمہ ہو چکا ہے اور بائیں بازو کی انتہا پسندی پر اس فیصلہ کن غلبہ کو برقرار رکھنے کی کوشش کی جانی چاہیے۔ انھوں نے اس بات پر زور دیا کہ کوششیں جاری رہنی چاہئیں کیونکہ ایل ڈبلیو ای سے پاک ریاستوں میں انتہا پسندی دوبارہ نہیں ابھرنی چاہیے اور ان ریاستوں کو ملک کے دیگر حصوں کے برابر ترقی کرنی چاہیے۔ مرکزی وزیر داخلہ نے وزرائے اعلیٰ سے زور دے کر کہا کہ وہ این سی او آر ڈی میکانزم کے ضلعی سطح کے ڈھانچے کی تشکیل اور منشیات کی روک تھام کے لیے اس کی باقاعدہ میٹنگوں کو یقینی بنائیں۔ انھوں نے کہا کہ ملک میں منشیات کے خلاف جنگ اب ایک اہم مرحلے پر ہے اور مصنوعی ذہانت کی مدد سے منشیات کے خلاف مہم کو تیز کرنے کی ضرورت ہے۔

**************

ش ح۔ ف ش ع- م ف

U: 13964