লাক্লিবা য়ুনিয়ন বজেৎ ২০২৩-২৪গীদমক ভর্চুএল ওইনা নবেম্বর ২১-নবেম্বর ২৮, ২০২২ ফাওবা য়ুনিয়ন ফাইনান্স অমসুং কোর্পোরেৎ এফেয়ার্স মিনিস্তর শ্রীমতি নিরমালা সিতারমন্না লুচিংদুনা বজেৎ মমাঙগী খন্ন-নৈনবা মীফমশিং পাংথোকখ্রে। বজেৎ মমাঙগী মীফম অদু ঙসি নিউ দিল্লিদা লোইশিনখ্রে।

তোঙান-তোঙানবা মীফম ৮ পাংথোকখিবা অদুদা তোঙান-তোঙানবা মরী লৈনবা কাংবুগী মীওই ১১০ হেন্না শরুক য়াখি। মরী লৈনবা কাংবুগী মনুংদা লৌউ-শিংউ অমসুং এগ্রো-প্রোসেসিং ইন্দস্ত্রি, ইন্দস্ত্রি, ইনফ্রাস্ত্রকচর অমসুং ক্লাইমেত চেঞ্জ, ফাইনান্সিএল সেক্তর অমসুং কেপিতেল মার্কেতশিং, সর্বিসেস অমসুং ললোন-ইতিক, সোসিএল সেক্তর, ত্রেদ য়ুনিয়নশিং অমসুং লেবর ওর্গনাইজেসনশিংগী মীহুৎশিং অমসুং ইকোনোমিস্তশিং শরুক য়াখি। 

পাংথোকখিবা মীফমশিং অদুদা ফাইনান্সকী রাজ্য মন্ত্রীশিং শ্রী পঙ্কজ চৌধুরি অমসুং দোক্তর ভগৱাত কিসনরাও করাদ; ফাইনান্স সেক্রেতরি শ্রী তি.ভি সোমানাথান; দি.ই.এগী সেক্রেতরি শ্রী অজয় সেথ; চীফ ইকোনোমিস্ত এদভাইজর দোক্তর ভি.অনন্থ নাগেশ্বারন; দিপামগী সেক্রেতরি শ্রী তুহিন কান্ত পান্দে; ফাইনান্সিএল সর্বিসেসকী সেক্রেতরি শ্রী ভিবেক জোসি; কোর্পোরেত এফেয়ার্সকী সেক্রেতরি শ্রীমনোজ গোবিল; রেভিনিউগী ও.এস.দি শ্রী সঞ্জয় মালহোত্রা অমসুং ফাইনান্স মিনিস্ত্রিগী সেনিয়র ওফিসারশিং শরুক য়াখি। মরী লৈনবা অতোপ্পা মিনিস্ত্রিশিং/দিপার্তমেন্তশিংগী সেক্রেতরিশিং ওনলাইনগী খুৎথাংদা মীফম শরুক য়াখি।

এম.এস.ইশিং মতেং পাংনবা গ্রিন সর্তিফিকেসনগী থবকশিং, সহরগী মফমশিং থবক ফংবা হেনগৎহন্নবা আর্বান ইমপ্লোইমেন্ত প্রোগ্রাম, ইনকম তেক্স, ইন্নোবেসন ক্লস্তর শেম্বা, লৈবাক মনুংগী সপ্লাই চেন ফগৎনবা স্কিমশিং, ইলেক্ত্রিক গারিশিংদা লৌবা তেক্স হন্থহনবা, ই.ভি পোলিসি হৌদোকপা, ভারত অসি গ্রিন হায়দ্রোজেনগী মফম অমা ওইনা শেমগৎপা, সোসিএল ইম্পেক কম্পেনিশিংগী সোসিএল সেক্তর ইন্ত্রেপ্রেনিউয়রশিপ ফন্দ, কিয়ার ইকোনোমি ৱার্করশিংগী ত্রেনিং অমসুং এক্রিদিতেসন, অঙাংশিংগী য়াইফনবা স্কিমশিং, ঈশিং অমসুং সেনিতেসনগী নেসনেল রিগুলেতোরি ওথোরিতি, অনওর্গনাইজ ৱার্করশিং ই.এস.আই.সিনা কোনশিনবা, পব্লিক কেপেক্স মখা চৎথবা, কস্তমস দিউতিশিং হন্থহনবা অমসুং অতৈ ৱাফম কয়া লাক্লিবা বজেৎ মীফমদা পুথোক্নবা মীফমশিং অদুদা শরুক য়াখিবা কাংবুগী মীহুৎশিংনা খন্নখি।

বজেৎ ২০২৩-২৪গী থৌরাং তৌবা মতমদা চেকশিন্না খন্ননবা মরুওইবা অমসুং মমল য়াম্লবা পাউতাকশিং পীখিবগীদমক শরুক য়াখিবশিং ফাইনান্স মিনিস্তরনা থাখৎখি।

*****