প্রধান মন্ত্রী, শ্রী নরেন্দ্র মোদীনা ইন্দোনেসিয়াগী বালিদা লৈবা ভারতকী দাইস্পোরাগী মেম্বর ৮০০ হেনবা অমসুং ভারতকী মরুপশিংগা নবেম্বর ১৫, ২০২২দা উন্নখিবগা লোয়ননা মহাক্কী ৱারোলসু মীয়াম মাঙদা থমখ্রে। য়াম্লবা মীয়ামশিং অসি ইন্দোনেসিয়া শিনবা থুংবদগী লাকখিবনি।

প্রধান মন্ত্রীনা মহাক্কী ৱারোলদা ভারত অমসুং ইন্দোনেসিয়াগী মরক্তা লৈনরিবা নাত অমসুং সিভিলাইজেসনগী নক্নবা মরীদা মিৎয়েং চঙখি। মহাক্না লৈবাক অনিগী মরক্তা চত্থদুনা লাক্লিবা লল্লোন ইতিক অমসুং লৈনরিবা নাৎকী মরী তাক্নবা চহি কয়াদগী চৎনবী অমা ওইরক্লিবা ‘বালি জত্রা’বু খুদম ওইনা পীখি। তোঙানবা সেক্তরশিংদা ভারত অমসুং ইন্দোনেসিয়াগী মান্নবা মতৌবুসু মহাক্না তাকখি।

কম্ম্যুনিতী মেম্বরশিংনা হৌজিক্না মখোয়গী মমা লৈবাক ওইরবা মীরম লৈবাক অসিদা কন্না হোৎনদুনা ভারতকী মিংচৎ ঙাকপা অমসুং থাক ৱাংনা থম্বগীদমক্তা প্রধান মন্ত্রীনা মখোয়বু থাগৎখি। ভারত-ইন্দোনেসিয়া মরীগী ফিভম হেন্না ফগৎলক্লিবা অমসুং মরী অসিবু হেন্না চেৎশিনহনবদা ভারতকী কম্ম্যুনিতীনা থৌদাং য়াবগী মতাংদসু প্রধান মন্ত্রীনা পনখি।

প্রধান মন্ত্রীনা ভারতকী শাহৌ লৌবগী ৱারী, মায় পাকপা অমসুং দিজিতেল তেক্নোলোজী, ফাইনান্স, হকশেল, তেলিকোম অমসুং স্পেসকুম্বা লমদা খোঙজেল য়াঙনা চাউখৎলক্লিবা অসিগী মতাংদা মিৎয়েং চঙখি। চাউখৎ-থৌরাংগীদমক্তা ভারতনা থৌরাং য়াৎলিবসিদা রাজনিতী অমসুং শেন্মিৎলোনগী লমদা লৈরিবা মালেমগী অপাম্বা অমসুং মালেমগী অফবা পাংথোকপগী ইথিল শাগোন্নরিবা মরোমদোম লেপচবা ভারতকী মঙলান্সু মনুং চল্লি হায়না মহাক্না ফোংদোকখি।

প্রধান মন্ত্রীনা কম্ম্যুনিতী মেম্বর অমসুং ভারতকী মরুপশিংবু ইং ২০২৩গী জনুৱারী ৮দগী ১০ ফাওবদা মধ্য প্রদেশকী ইন্দোর্দা চত্থগদবা মথংগী প্রবাসি ভারতীয় দিবস কনভেন্সন অমসুং মসিদগী মতম খরগী মতুংদা গুজরাত্তা পাংথোক্কদবা তেলঙ্গাগী কুহ্মৈদা লাক্তুনা শরুক য়ানবা পাউজেল পীখি।

***