প্রধান মন্ত্রী শ্রী নরেন্দ্র মোদীনা নই দিল্লীগী মেলা গ্রাউন্দ, আই.এ.আর.আই., পুসাদা  নুমিৎ নিনি চুপ্না চত্থগদবা “পি.এম. কিসান সম্মান সম্মেলন-২০২২” মিংথোনবা থৌরম ওক্তোবর ১৭তা হৌদোক্কনি। শ্রী মোদীনা থৌরম অসিদা পি.এম. কিসান ফ্লেগশিপ স্কিমগী মখাদা দাইরেক্ত বেনিফিত ত্রান্সফরগী খুত্থাংদা লুপা করোর ১৬,০০০কী ১২শুবা ইন্সতোলমেন্ত য়েন্থোক্কনি।  প্রধান মন্ত্রীনা এগ্রি স্তার্ত-অপ কনক্লেব অমসুং একজিবিসন অমসু হৌদোক্কনি। মহাক্না কেমিকেল অমসুং ফর্তিলাইজরগী কেন্দ্র মন্ত্রালয়গী পি.এম. কিসান সাম্রুধী কেন্দ্র (পি.এম.-কে.এস.কে.) ৬০০ হাংদোক্কনি অমসুং লৌমীশিংগীদমক্তা লৈবাক অসিনা পায়খৎলিবা খ্বাইদগী চাউবা খোঙথাং ওইরিবা ৱান নেসন ৱান ফর্তিলাইজর স্কিমগী মখাদা ভারত য়ুরিয়া বেগ পুথোক্কনি।

লৌউ-শিংউ অমসুং লৌমীশিংগী য়াইফ য়ুম্বালগী কেন্দ্র মন্ত্রী, শ্রী নরেন্দ্র তোমারনা প্রেস কনফরেন্স অমদা ৱা ঙাঙবদা, মন্ত্রালয় অনিমক্না পুন্দুনা শীনলিবা “পি.এম.-কিসান সম্মান সম্মেলন ২০২২”দা শ্রী মোদীনা লৌমী করোর কয়া, এগ্রি স্তার্ত-অপ, রিসর্চ তৌরিবা মীওই, পোলিসী শেম-শাবশিং, বেঙ্কর অমসুং অতোপ্পা স্তেকহোলদরশিংগী মফমদা ৱা ঙাঙগনি হায়খি। থৌরম অসিনা লৌমী অমসুং এগ্রি স্তার্ত-অপশিংবু প্লেতফোর্ম অমত্তদা পুরক্কনি। লৌমী করোর ১ হেনবনা থৌরম অসিদা ভর্চুএলগী খুত্থাংদা শরুক য়াগনি। কৃষি বিজ্ঞান কেন্দ্র (কে.ভি.কে.) ৭৩২, আই.সি.এ.আর. ইন্সতিত্যুত ৭৫, স্তেত এগ্রিকলচরেল য়ুনিভর্সিতী ৭৫, পি.এম. কিসান সেন্তর ৬০০, প্রাইমারী এগ্রিকলচরেল সোসাইতী ৫০,০০০ অমসুং কম্ম্যুনিতী সর্ভিস সেন্তর (সি.এস.সি.) লাখ ২না থৌরম অসিদা ভর্চুএলগী খুত্থাংদা শরুক য়াগনি। কেমিকেল অমসুং ফর্তিলাইজর কেন্দ্র মন্ত্রী, শ্রী ভগ্বন্থ খুবা অমসুং লৌউ-শিংউ অমসুং লৌমীশিংগী য়াইফ য়ুম্বালগী রাজ্য মন্ত্রী, শ্রী কৈলাশ চাউধরী অমসুং কুমারী শোভা কারন্দজলেনা হৌদোকপগী থৌরমদা শরুক য়াগনি।

অকুপ্পা মরোলশিং মখাদা পীরি:

পি.এম. কিসানগী মখাদা লুপা করোর ১৬,০০০কী ১২শুবা ইন্সতোলমেন্ত লৌমী বেনিফিশরীশিংদা য়েন্থোকপা

প্রধান মন্ত্রীনা লৌউ-শিংউ অমসুং লৌমীশিংগী য়াইফ য়ুম্বাল মন্ত্রালয়গী মখাদা চলায়বা পি.এম. কিসানগী মখাদা লুপা করোর ১৬,০০০কী শেনফমগী ১২শুবা ইন্সতোলমেন্ত লৌমী বেনিফিশরীশিংদা য়েন্থোক্কনি। ভারত সরকারগী ফ্লেগশিপ স্কিম ওইরিবা প্রধান মন্ত্রী কিসান সম্মান নিধী (পি.এম.-কিসান) অসি ইনক্লুজিব ওইবা অমসুং হেন্না কান্নবা পুরক্কদবা এগ্রিকলচরেল সেক্তর অমগীদমক্তা পোলিসী এক্সন হৌদোকপা অমসুং পব্লিক প্রোগ্রাম পাংথোক্নবা ভারত প্রধান মন্ত্রী, শ্রী নরেন্দ্র মোদীনা লেপ্তনা হোৎনদুনা লাক্লিবা থৌওং কয়াগী মহৈনি। স্কিম অসি প্রধান মন্ত্রীনা ২৪/০২/২০১৯দা হৌদোকখিবনি। স্কিম অসিগী মখাদা, মতিক চাবা লৌমীশিংদা লুপা ৬০০০পু চহি খুদিংগী লুপা ২০০০গী মান্নবা ইন্সতোলমেন্ত অহুম থোক্না থা মরি খুদিংগী পীরি। শেনফম অসি লৌমীশিংদা মতমগী দিজিতেল তেক্নোলোজী শিজিন্নদুনা দাইরেক্ত বেনিফিত ত্রান্সফর মোদকী খুত্থাংদা মখোয়গী বেঙ্ক একাউন্ততা হকথেংননা হাপ্পনি। হৌজিক ফাওবগী ওইনা, পি.এম.-কিসানগী মখাদা মতিক চাবা লৌমী বেনিফিশরীশিংনা ইন্সতোলমেন্ত ১১ থোক্না লুপা করোর লাখ ২গী কান্নবা ফংখ্রে। মসিগী মনুংদগী লুপা করোর লাখ ১.৬ অসিদি কোবিদ লাইচৎ মনুংদা পীখিবনি। প্রধান মন্ত্রীনা ১৭/১০/২০২২দা থাদোক্কদৌরিবা ১২শুবা ইন্সতোলমেন্ত অসিগা লোয়ননা, বেনিফিশরীশিংগী মফমদা পীগদৌরিবা কান্নবগী অপুনবা শেনফম্না লুপা করোর লাখ ২.১৬ হেনগনি হায়না থাজবা থম্লি।

অচৌবা অহোংবা পুরকপা স্কিম অসি হেক হৌদোকপদগী স্কিম অসিনা মশক থোকপা মায় পাকপা কয়া ফংখ্রে অমসুং মসিগী পাক চাউবা, নুং পান ফাওনা উবা অমসুং মতিক চাবা লৌমীশিংগী বেঙ্ক একাউন্ততা পরিং নাইনা ফন্দ পীথোকপগী মতৌসিগীদমক্তা মাইকৈ খুদিংদগী স্কিম অসিবু থাগৎনরক্লি। স্কিম অসিনা লৈবাক্কী লৌমীশিংদা কোবিদ লাইচৎ মনুংদা মখোয়গী নোংমগী পুন্সি চলায়বদা মশক থোক্না তেংবাংখি।

এগ্রি স্তার্ত-অপ কনক্লেব অমসুং একজিবিসন হৌদোকপা

প্রধান মন্ত্রী শ্রী নরেন্দ্র মোদীনা এগ্রি স্তার্ত-অপ কনক্লেব অমসুং একজিবিসন হৌদোক্কনি। প্রেসিসন ফার্মিং, পোস্ত হার্ভেস্ত অমসুং ভেল্যু এস সোল্যুসন, এলাইদ এগ্রিকলচর, পোৎমাঙদগী লন্দা ওন্থোকপা, অপীকপা লৌমীশিংবু মেকানাইজেসন তৌবা, সপ্লাই চেন মেনেজ তৌবা অমসুং এগ্রি লোজিস্তিক্সকা মরী লৈনবা ইন্নোভেসন কয়া স্তার্ত-অপ ৩০০ লোম্না অহানবা নুমিত্তা উৎকনি। সম্মেলন অসিদা চাউরাকপা স্তার্ত-অপ ১৫০০না শরুক য়াগনি। প্লেতফোর্ম অসিনা স্তার্ত-অপশিংগা লৌমী, এফ.পি.ও., এগ্রি-এক্সপর্ত অমসুং কোর্পোরেতশিংগা ৱারী শাবগী খুদোংচাবা পীগনি। স্তার্ত-অপশিংনা ওক্তোবর ১৮দা অতোপ্পা স্তেকহোলদর কয়াগা মখোয়গী এক্সপেরিএন্স কয়া তেক্নিকেল সেসন অমদা লান্নগনি। মখা তারকপা ওইনা, পোলিসী শেম্বশিংনা ত্রিলিয়ন ৫গী শেন্মিৎলোন্দা স্তার্ত-অপশিংনা লৌরিবা থৌদাং কয়াগী মতাংদা শন্দোক্না তাক্কনি অমসুং স্তার্ত-অপ ইকোসীস্তেম হেন্না খুমাং চাউশিনবদা সরকারগী হৌজিক লৈরিবা স্কিমশিংদা লৌরিবা থৌদাংগী মতাংদসু তমগনি।

লৈবাক অসিদা এগ্রি স্তার্ত-অপ চাউখৎহন্নবগীদমক্তা, লৌউ-শিংউ অমসুং লৌমীশিংগী য়াইফ য়ুম্বাল মন্ত্রালয় (এম.ও.এ.এফ.দবল্যু.)না রাস্ত্রিয় কৃষি বিকাস য়োজনা – রেম্যুনরেতিব এপ্রোচ ফোর এগ্রিকলচর এন্দ এলাইদ সেক্তর রিজ্যুবিনেসন (আর.কে.ভি.ৱাই.-রফতার) হৌদোকখি। নোলেজ ওর্গনাইজেসন ৫, মিং ওইনা পল্লবদা, আই.এ.আর.আই., এম.এ.এন.এ.জি.ই., এন.আই.এ.এম., এ.এ.য়ু. অমসুং য়ু.এস. ধার্ৱাদ অমসুং আর.এ.বি.আই. ২৪না মসিদা শরুক য়ারি। প্রি-সীদ স্তার্ত-অপশিংদা লুপা লাখ ৫ ফাওবা অমসুং সীদ স্তেজ স্তার্ত-অপশিংদা লুপা লাখ ২৫গী তেংবাং পীরি। মসিদা নত্তনা, আর.কে.ভি.ৱাই.-রফতারগী মখাদা অপীকপা লবুক, ইনফ্রাস্ত্রকচর ফত্তবা, ফার্ম তেক্নোলোজী শিজিন্নবগী চাং ৱাৎপা অমসুং লৌ উবগী খ্বাইদগী ফবা থৌওং, হার হেন্না চাইবা অমসুং তিলহাৎ হিদাক লেপ্তনা শিজিন্নরকপদগী লৈহাও ফবগী চাং হন্থরকপগুম্বা লৌউ-শিংউদা থেংনবা শিংনবা কয়াগী মতাংদা এগ্রি স্তার্ত-অপ  ২৫০০ হেনববু ত্রেনিং পীখ্রে।

পি.এম. কিসান সাম্রুধী কেন্দ্র (কে.এস.কে.) ৬০০ হাংদোকপা

প্রধান মন্ত্রীনা কেমিকেল অমসুং ফর্তিলাইজর মন্ত্রালয়গী পি.এম. কিসান সাম্রুধী কেন্দ্র (কে.এস.কে.) ৬০০ হাংদোক্কনি। লৈবাক্কী খুঙ্গং, সব-দিস্ত্রিক্ত/সব-দিবিজন/তালুক অমসুং জিলাগী থাক্তা হৌজিক্কী ওইনা হার য়োনবা দুকান চাউরাক্না লাখ ২.৭ লৈরি। মখোয় অসি কম্পেনীনা চলায়বা, কো-ওপরেতিব দুকান নত্ত্রগা প্রাইভেত দিলরশিংনা রিতেল তৌবনি। হার য়োনবা দুকানশিংবু প্রধান মন্ত্রী কিসান সাম্রুধী কেন্দ্র (পি.এম.কে.এস.কে.) হায়না ফেজ নাইনা ৱান স্তোপ শোপ্তা ওন্থোক্কনি অমসুং লৈবাক্কী লৌমীশিংগী তঙাই ফদবশিংদা য়েংশিন্দুনা এগ্রি ইনপুত (হার, মরু, ইমপ্লিমেন্ত); লৈহাও,মরু, হার তেস্ত তৌবগী ফেসিলিতী; লৌমীশিংদা এৱিয়র্নেস; সরকারগী তোঙানবা স্কিমশিংগী ই-পাউ পীগনি অমসুং ব্লোক/জিলাগী থাক্তা রিতেলরশিংগী কেপাসিতী বিলদিং চাং নাইনা শোইদনা পাংথোকহনগনি। পাইলোত ফেজ অসিদা জিলাগী থাক খুদিংদা য়ামদ্রবদা দুকান অমদি অপগ্রেদ তৌদুনা মোদেল শোপ্তা ওন্থোক্কনি। হার য়োনবা দুকান ৩,৩০,৪৯৯বু পি.এম.কে.এস.কে.দা ওন্থোকপগী ৱাহৌদোক লৈরি।

লৌমীশিংগী ৱান নেসন ৱান ফর্তিলাইজর স্কিমগী ভারত য়ুরিয়া বেগ পুথোকপা

প্রধান মন্ত্রীনা ৱান নেসন ৱান ফর্তিলাইজর (ও.এন.ও.এফ.)কী মতাংদা হারগী ওইনা পায়খৎপা খ্বাইদগী চাউবা খোঙথাং হৌদোক্কনি। হার পুথোকপা কম্পেনী মখা পোন্দনা হারগী ব্রান্দশিংবু লৈবাক শিনবা থুংবদা মান্নবা স্তেন্দর্দ লৈহন্নবগীদমক্তা ভারত সরকারনা হার কম্পেনী খুদিংনা মখোয়গী পোত্থোকশিংবু “ভারত” মিংগী মখাদা য়োন্নবা খঙহনখ্রে। মিং অসিনা “ভারত য়ুরিয়া, ভারত দি.এ.পি., ভারত এম.ও.পি. অমসুং ভারত এন.পি.কে.” ওইবা য়াই। হার খুদিংগীদমক্তা ‘ভারত’ হায়বা ব্রান্দ অমখক্তমক লৈহনবনা হারগী ক্রিস-ক্রোস মুবমেন্ত হন্থহনগনি অমসুং ফ্রৈত সবসিদী হেনগৎহনগনি।

প্রধান মন্ত্রীনা থৌরম অসিদা ভারত য়ুরিয়া বেগ পুথোক্কনি।

চয়োলগী ওইবা হারগী ইন্তর্নেস্নেল ই-মেগাজিন ফোঙবা

প্রধান মন্ত্রীনা ইন্দিয়ন এজ কৌবা হারগী চয়োলদা ফোঙগদবা ইন্তর্নেস্নেল ই-মেগাজিন অমা থৌরমসিদা ফোঙগনি। মসিনা ইকুই থোকখিবা থৌদোক, মমলগী চৎনবী য়েংশিনবা, লৌমীশিংগী মায় পাকপগী ৱারী য়াওনা হার ফংবা অমসুং শিজিন্নবগী মরোল য়াওনা লৈবাক অমসুং মালেদা ওইরিবা হারগী ফিভমগী ই-পাউ পীগনি।

*****