ঙসি ওক্তোবর ১৩, ২০২২দা ভারতকী রাস্ত্রপতি শ্রীমতি দ্রৌপতি মুর্মুনা আই.আই.তি গুৱাহাতিদা সুপরকম্পুতর পারম-কামরুপা অমসুং অৱাংবা থাক্কী মাইক্রোৱেব কম্পোনেন্তশিংগী দিজাইন অমসুং দিবলপমেন্তগী লেবোরেতোরি শঙ্গাখ্রে। মহাক্না ধুব্রিদা মেদিকেল কোলেজ অমসুং হোস্পিতাল শঙ্গাখ্রে অমসুং অসামগী দিব্রুগর অমসুং মধ্য প্রদেসকী জবালপুরদা নেসনেল ইন্সতিতুৎ ওফ ভাইরোলোজিগী জোনেল ইন্সতিতুৎ অনি শানবা উরেপ-উয়ুংশু তমখি।

থৌরম অদুদা রাস্ত্রপতিনা হায়খি তেল্লবা মতম খরগী মনুংদা, লৈবাক মনুং অমসুং মালেমগী থাক্তা আই.আই.তি গুৱাহাতিনা থবক কয়া মাইপাক্না পাংথোক্তুনা লমদম অসিগী অমসুং লৈবাক্কী ওইনা চাউথোকচবা পোকহল্লে। নুমিৎ খরনিগী মমাংদা, আই.আই.তি গুৱাহাতিনা ভারত লান্মীগীদমক শেন চঙদবা অমসুং মতম শাংনা শীজিন্নবা য়াবা থ্রিদি-প্রিন্তেৎ সেন্ত্রি পোস্ত অমা শাখিবা অসিদা হরাওই।

রাস্ত্রপতিনা হায়খি লম্বী-থোঙ অমসুং অৱাং-নোংপোক লমদমগী অতোপ্পা খুদোংচাদবশিং কোকহন্নবা তেক্নোলোজিগী পাম্বৈশিং পুথোক্নবা আই.আই.তি গুৱাহাতি অসি লৌশিংগী মফম অমা ওইরে। লমদম অসিগী অমতা ঙাইরবা আই.আই.তি ওইবনা, লমদম অসিগী অতোপ্পা ইন্সতিতুৎশিং ফগৎনবা আই.আই.তি গুৱাহাতিনা থৌদাং লৌগদবনি অমসুং ঐখোয়গী ঙমখৈগী শরুকশিং শেমগৎনবা অমসুং লমদম অসিদা থেংনরিবা মহৌশাগী অমাং-অতাশিংদগী ঙাকথোক্নবা তেক্নোলোজিগী পাম্বৈশিং পুথোক্নবা রাজ্য সরকার অমসুং দিফেন্স ফোর্সশিংগা লোয়ন্না থবক তৌমিন্নগদবনি। অনৌবা কয়া পুথোক্নবা, লৈবাক অসিনা মশাগী ওইবা অফবা তেক্নোলোজিশিংগী লমদা থবক তৌনবা অমসুং স্কিল লৈহন্নবা থবকশিং পায়খৎনবা অমসুং ঐখোয়গী লৈবাক অসি অত্মা-নির্ভর ওইহন্নবা ইন্সতিতুৎ অসিনা থবক তৌগদবনি।

রাস্ত্রপতিনা হায়খি তেক্নোলোজিগী অনৌবা কয়া পুথোকপদা ভারতনা মাঙজিল থানবা লৈবাক অসিগী সাইন্স অমসুং তেক্নোলোজিগী ইন্সতিতুৎশিংনা রিছর্স অমসুং দিবলপমেন্তগী থবকশিং হেন্না পুক্নিং থৌগৎকদবনি। ঙসি থেংনরিবা খুন্নাইগী শেন-থুমগী খুদোংচাদবশিং অসি থেংন্নবা ভারত্তা হিরম কয়াগী অৱাংবা থাক্কী রিছর্স মথৌ তাই অমসুং ইরাই লাইনা মপান লৈবাকশিংদগী লৌরোইদবনি হায়বা ৱাফম অসি নেসনেল ইজুকেসন পোলিসি ২০২০গী ময়েক শেংনবা পল্লি। অৱাংবা থাক্কী মহৈলোয়শঙশিংদা রিছর্স অমসুং ইন্নোবেসনগী থবকশিং পাংথোকপা অসি য়াম্না মরুওই। থিজিনবা অমসুং লৌশিং তানশিনবগী লমদা ভারতকী শাংলবা পুৱারি অমা লৈরি অমসুং ২১শুবা চহিচাদা রিছর্স অমসুং ইন্নোবেসন্দা ভারতনা মাঙজিল থানবা মসি মখা তানা মপাঙ্গল কনখৎহনবা দরকার ওইরে। 

রাস্ত্রপতিনা হায়খি ঙসিদি চাউখৎ-থৌরাংগী থবকশিংদা ভারতকী অৱাং-নোংপোক লমদম্না অচৌবা থবক কয়া পাংথোক্লে অমসুং লমদম অসিগী ভারতকী মীয়ামদা অনা-লায়য়েং অমসুং লাইরিক-লাইশু তম্বগী লমদা মগুন লৈবা অখন্নবা থবকশিং পাংথোক্লে। অফবা মল্তিস্পিসিএলিতি হোস্পিতাল অমা শানবা আই.আই.তি গুৱাহাতিদা অসাম সরকারনা মখা তানা মতেং পাংলি। আই.আই.তি গুৱাহাতি অসি অসিগুম্বা থবকশিং পাংথোক্নবা লৈবাক অসিগী অতোপ্পা ইন্সতিতুৎশিংগী খুদম অমা ওইরগনি।

রাস্ত্রপতিনা হায়খি কেন্দ্র সরকার অমসুং রাজ্য সরকারশিংগী তোঙান-তোঙানবা প্রোজেকশিং অমসুং মখা তানা লমদম অসি চাউৎলকপা অসিনা ভারত অসি তেক্লোলোজিগী লমদা চাউখৎলবা লৈবাক অমা অমসুং পুম্নমক চাউখৎমিন্নবা খুন্নাই অমা ওইনবা ভারতকী য়ুম্ফম থোনগনি। ঐখোয়গী সংবিধানগী ৱাল্লোন্দা, লৈবাক অসিগী মীয়ামদা লৌশিং শন্দোক্নবা অমসুং সাইন্তিফিক ওইবা ৱাখল্লোন লৈহন্নবা অৱাং-নোংপোক্না মাঙজিল থাগদবনি।

মসিগী মমাঙদা অয়ুক্তা, রাস্ত্রপতিনা অগরতালা রেলৱে স্তেসন্দগী অগরতালা-খোঙশাং জনসতাব্দি এক্সপ্রেস অমসুং অগরতালা-কোলকাতা এক্সপ্রেস লমথাখি।

***