গৃহ অমসুং কোওপরেসনগী কেন্দ্র মন্ত্রী, শ্রী অমিত শাহনা ঙসি অসামগী গুৱাহাতিদা পাঙথোকপা নোর্থ ইস্তর্ন কাউন্সিলগী ৭০শুবা প্লেনরী মীফমদা ময়াই তাংবল লৌখ্রে। থৌরম অদুদা কলচর, তুরিজম অমসুং অৱাং নোংপোক্কী চাউখৎ-থৌরাংগী কেন্দ্র মন্ত্রী, শ্রী জি. কিশন রেদ্দী অমসুং অৱাং নোংপোক্কী চাউখৎ-থৌরাং মন্ত্রালয় অমসুং কো-ওপরেসন মন্ত্রালয়গী কেন্দ্রগী রাজ্য মন্ত্রী শ্রী বি.এল. ভর্মা, অৱাং নোংপোক্কী রাজ্যশিংগী রাজ্যপালশিং অমসুং মুখ্য মন্ত্রীশিং অমসুং কেন্দ্র অমদি অৱাং নোংপোক্কী রাজ্যশিংগী তোঙান-তোঙানবা বিভাগশিংগী মকোক থোংবা ওফিসরশিংনসু শরুক য়াখি।

মহাক্কী ৱারোল পীবদা শ্রী অমিত শাহনা হায়খি মদুদি দিকেদ কয়া অসিদা অৱাং নোংপোক্কী চাউখৎ খোঙচৎতা মরু ওইবা শীংনবা অহুম মায়োক্নদুনা লাকখি – লালহৌলুপশিংনা চত্থবা হিংশা অমসুং তংদু লৈতাহন্দবা, অৱাং নোংপোক্তা রেল, রোদ অমসুং এয়র কন্নেক্তিবিতীদা শোত্থবা অমসুং মমাংগী সরকারশিংনা অৱাং নোংপোক্কী চাউখৎ-থৌরাংদা শাহৌ পীরমদবা। মহাক্না হায় অৱাং নোংপোক্কী চাউখৎ-থৌরাং অসি মমাংগী সরকারশিংনা কৈদৌনুংদা মরু ওইনা লৌরমদে অদুবু প্রধান মন্ত্রী নরেন্দ্র মোদীগী লুচিং মখাদা ভারত সরকারনা হৌখিবা চহি ৮ অসিদা অৱাং নোংপোক্তা শান্তি পুরক্নবা, কন্নেক্তিবিতী পুম্নমক ফগৎহন্নবা অমসুং লমদম অসিগী চাউখৎ-থৌরাংদা মরু ওইবা মীৎয়েং চংনবা খোঙথাং কয়া লৌখৎতুনা লাকখি।

কেন্দ্রগী গৃহ মন্ত্রীনা হায়খি মদুদি ভারত পুম্বনা লৈবাক অসিগী অৱাং নোংপোক্কী লোলশিং, নাৎ, মথেল-লুকোই অমসুং চৎনবীশিং অসিবু ঐখোয়গী হেরিতেজ ওইনা লৌরি অমসুং প্রধান মন্ত্রী নরেন্দ্র মোদীনা লুচিংবা সরকার অসিনা লমদম অসিগী মহৌশানা পীবিরম্বা শক্তম অসি ঙাক-শেন্নবা অমসুং চাউখৎহন্নবা খোঙথাং খুদিংমক লৌখৎলি। মহাক্না হায় হৌখিবা চহি ৮ অসিদা সরকারনা অৱাং নোংপোক্না ময়োক্নরিবা সমস্যা পুম্নমক্কী হৌরকফম অদু থীদোক্তুনা মদু কোকহন্নবা খোঙথাং কয়া লৌখৎখি।

শ্রী অমিত শাহনা অৱাং নোংপোক্কী রাজ্যশিংগী মুখ্য মন্ত্রীশিংদা ঈচাও লাকশিন্নবা, ঈথৈ-লৌখোং, তুরিজম, উমং কনবা অমসুং লৌউ-শিংউগীদমক এন.ই.এস.এ.সি.গী দেতা মপুং ফানা শীজিন্নদুনা মসিগী কান্নবা লৌনবা হায়খ্রে। মহাক্না অৱাং নোংপোক্কী রাজ্যশিংগী মুখ্য মন্ত্রীশিংবু প্লেৎফোর্ম অসি মপুং ফানা অমসুং নীংথীনা শীজিন্ননবা মখোয়গী মশাগী রাজ্যশিংগী এন.ই.এস.এ.সি.গী নোদেল ওফিসর অমা ওইনা খন্নবসু হায়খি।

গৃহ অমসুং কোওপরেসনগী কেন্দ্র মন্ত্রীনা হায়খি মদুদি প্রধান মন্ত্রী নরেন্দ্র মোদীনা লুচিংবা কেন্দ্রগী সরকার অসিনা লৈবাক অসিগী ওল-রাউন্দ দিবেলপমেন্ত অসি লৈবাক অসিগী লোল পুম্নমক পুনশিনবা অমসুং প্রাইমারী এজুকেসন অসি ইমা লোলদা তমহন্নবা অনৌবা নেস্নেল এজুকেসন পোলিসীগী মখাদা প্রোবিজন অমা শেম্লবা মতমদা ওইথোকপা ঙমগনি হায়না থাজবা থম্লি।

শ্রী অমিত শাহনা হায়খি মদুদি ভারতকী শেন্মীৎলোন অসি হৌজিক মালেমগী মঙা শুবা মফম কল্লি অমসুং মালেমগী অনিশুবা মফম কনবা ঙম্নবা অৱাং নোংপোক্কী রাজ্যশিংগী ফাইনান্সিএল দিস্সিপ্লিন্না শরুক তম্বা তঙাই ফদে। মহৌশাগী লৌউ-পথাপ অমসুং দিজিতেল ফার্মিংগী মরু ওইবগী মতাংদা ফোঙদোক্লদুনা শ্রী শাহনা হায়খি মহৌশাগী লৌউ-পথাপ অমসুং দিজিতেল ফার্মিং অসি ভারত সরকারনা মরু ওইনা লৌরিবা হীরম অমনি অমসুং অমুল অমদি অতোপ্পা কোওপরেতিব ৫ মর্জ তৌদুনা নেচরেল প্রদক্তশিংগী সর্তিফিকেসনগীদমক মলতি-স্তেৎ কোওপরেতিব সোসাইতী অমা শেম্বগী থৌওং হৌখ্রে। মহাক্না হায়খি মদুদি প্রদক্তশিং অসিগী সর্তিফিকেসনগী মতুংদা কোওপরেতিব সোসাইতী অসিনা মখোয়গী এক্সপোর্ত তৌহন্নবা হোৎনগনি অমদি মসিগী শেন্দোং অসি লৌমীশিংগী বেঙ্ক একাউন্তশিংদা হকথেংননা চংহনগনি। শ্রী শাহনা হায়খু মদুদি লৈবাক শিনবা থুংবদা লৈরিবা লেবোরেতোরূ ৫০০ হেনবনা লৈবাক লৈহাও অমসুং মহৌশাগী ওইবা পোৎলমশিংগী ক্বালিতী সর্তিফাই তৌগনি।

কেন্দ্রগী গৃহ মন্ত্রীনা প্রধান মন্ত্রী নরেন্দ্র মোদীনা লুচিংবা সরকারগীদমক ফ্লদ-ফ্রী অমসুং দ্রগ-ফ্রী ওইবা অৱাং নোংপোক অমা য়াম্না মরু ওই হায়না ফোঙদোকখি। ঈচাও ঙাকথোক্নবগী থৌশিলশিংগী মতাংদা মীৎয়েং চংলদুনা শ্রী শাহনা হায়খি মদুদি হাইদ্রো পাৱর প্লান্তশিংগী কান্নবা অসি ইনর্জী পুথোকপা খক্তা নত্তে, মসি ঈচাও ঙাকথোকপদসু শীজিন্নবা য়াই। মসিগী মথক্তা ৱেতলেন্দ ২৭১ নীংথিনা শীজিন্নবনা ঈচাও ঙাকথোকপদা মতেং ওইগনি। মহাক্না অৱাং নোংপোক্কী রাজ্যশিংদা অকোইবগী ফীভম ঙাকশেন্নবগীদমক সিঙ্গল য়ুজ প্লাস্তিক শীজিন্নবা থীংনবসু হায়খি।

****