ପୋଷ୍ଟ କରାଯିବା ଦିନାଙ୍କ:
30 SEP 2022 5:33PM by PIB Bhubaneswar
୭୫ ଦିନ ଧରି ଚାଲିଥିବା କୋଭିଡ ଟିକାକରଣ ଅମୃତ ମହୋତ୍ସବ ଆଜି ଶେଷ ହୋଇଛି । ଏହି ଅଭିଯାନ ଜୁଲାଇ ୧୫, ୨୦୨୨ରେ ମିଶନ ମୋଡରେ ଆରମ୍ଭ ହୋଇଥିଲା । ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକ ସ୍ୱତନ୍ତ୍ର କୋଭିଡ ଟିକାକରଣ ଅଭିଯାନ ମାଧ୍ୟମରେ ଯୋଗ୍ୟ ବୟସ୍କ ଜନସଂଖ୍ୟା (୧୮ ବର୍ଷରୁ ଅଧିକ ଓ ଯେଉଁମାନେ ଦ୍ୱିତୀୟ ଡୋଜ ନେବା ପରେ ୬ ମାସ କିମ୍ବା ୨୬ ସପ୍ତାହ ସଂପୂର୍ଣ୍ଣ କରି ସାରିଥିବା)ଙ୍କ ମଧ୍ୟରେ ପ୍ରତିଷେଧକ ଡୋଜ ବଢାଇଥିଲେ ।
୭୫ ଦିନ ମଧ୍ୟରେ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ବସଷ୍ଟାଣ୍ଡଗୁଡିକରେ ୧୧,୧୦୪, ରେଳ ଷ୍ଟେସନଗୁଡିକରେ ୫୬୬୪, ବିମାନବନ୍ଦରରେ ୫୧୧, ବିଭିନ୍ନ ସ୍କୁଲ ଓ କଲେଜରେ ୧,୫୦,୦୦୪ରୁ ଅଧିକ ଓ ଧାର୍ମିକ ଯାତ୍ରାର ଗନ୍ତବ୍ୟ ପଥଗୁଡିକରେ ୪,୪୫୧ ଓ ବିଭିନ୍ନ ବେସରକାରୀ, ସରକାରୀ କାର୍ଯ୍ୟାଳୟ ଓ ଔଦ୍ୟୋଗିକ ପ୍ରତିଷ୍ଠାନରେ ୧୧,୩୦,୦୪୪ରୁ ଅଧିକ ଶିବିର ଆୟୋଜିତ ହୋଇଥିଲା ।
ଫଳସ୍ୱରୂପ ଏହି ୭୫ ଦିନ ମଧ୍ୟରେ ୭୬.୧୮ ଲକ୍ଷରୁ ଅଧିକ ପ୍ରଥମ ଡୋଜ, ୨.୩୫ କୋଟି ଦ୍ୱିତୀୟ ଡୋଜ ଓ ୧୫.୯୨ କୋଟି ପ୍ରତିଷେଧକ ଡୋଜ ପ୍ରଦାନ କରାଯାଇ ପାରିଥିଲା । ଦୈନିକ ୨୪.୭୩ ଲକ୍ଷ ଡୋଜରୁ ଅଧିକ ଟିକା ଦିଆଯାଇଥିଲା ଏଥିରେ ଦୈନିକ ୨୦.୬୮ ଲକ୍ଷ ପ୍ରତିଷେଧକ ଡୋଜ ସାମିଲ ଥିଲା ।
କୋଭିଡ ଟିକାକରଣ ଅମୃତ ମହୋତ୍ସବ ଅନ୍ତର୍ଗତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକରେ ବ୍ୟାପକ ସଚେତନତା ସୃଷ୍ଟି ପାଇଁ ଶିବିର ସ୍ଥାପନ ମାଧ୍ୟମରେ ଜନ ଅଭିଯାନ ଆରମ୍ଭ ପାଇଁ ଆହ୍ୱାନ ଦିଆଯାଇଥିଲା । ଚାରିଧାମ ଯାତ୍ରା (ଉତ୍ତରାଖଣ୍ଡ), ଅମରନାଥ ଯାତ୍ରା (ଜମ୍ମୁ ଓ କଶ୍ମୀର), କୱଁର ଯାତ୍ରା (ଉତ୍ତର ଭାରତର ସମସ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳ) ସହ ପ୍ରମୁଖ ମେଳା ଓ ସମାବେଶର ଗନ୍ତବ୍ୟରେ ଅନେକ ସ୍ୱତନ୍ତ୍ର ଟିକାକରଣ ଶିବିର ଆୟୋଜିତ ହୋଇଥିଲା । ସେହିପରି କାର୍ଯ୍ୟାଳୟ ପରିସର, ଔଦ୍ୟୋଗିକ ପ୍ରତିଷ୍ଠାନ, ରେଳ ଷ୍ଟେସନ, ଆନ୍ତଃରାଜ୍ୟ ବସଷ୍ଟାଣ୍ଡ, ସ୍କୁଲ ଓ କଲେଜଗୁଡିକରେ ସ୍ୱତନ୍ତ୍ର ଟିକାକରଣ ଶିବିର ଆୟୋଜିତ ହୋଇଥିଲା । ମାଗଣା କୋଭିଡ ଟିକାକରଣ ପାଇଁ ଏଭଳି ସମୁଦାୟ ୧୩,୦୧,୭୭୮ ଶିବିର ଆୟୋଜିତ ହୋଇଥିଲା ।
କୋଭିଡ ଟିକାକରଣ ଅମୃତ ମହୋତ୍ସବ ଜୁଲାଇ ୧୫, ୨୦୨୨ରେ ଆରମ୍ଭ ହେବା ବେଳକୁ ୧୮ ବର୍ଷର ଯୋଗ୍ୟ ହିତାଧିକାରୀଙ୍କ ମଧ୍ୟରୁ ମାତ୍ର ୮ ପ୍ରତିଶତ ପ୍ରତିଷେଧକ ଡୋଜ ନେଇଥିଲେ । ୭୫ ଦିନ ଧରି ମାଗଣା ଟିକାକରଣ ଅଭିଯାନ ଚାଲିବା ଦ୍ୱାରା ୨୭ ପ୍ରତିଶତ ଯୋଗ୍ୟ ହିତାଧିକାରୀ ପ୍ରତିଷେଧକ ଡୋଜ ନେଇ ପାରିଛନ୍ତି ।
କୋଭିଡ- ୧୯ରୁ ହିତାଧିକାରୀମାନଙ୍କୁ ପୂର୍ଣ୍ଣ/ବିସ୍ତୃତ ସୁରକ୍ଷା ପ୍ରଦାନ ପାଇଁ ପ୍ରତିଷେଧକ ଡୋଜ ବେଶ ଗୁରୁତ୍ୱପୂର୍ଣ୍ଣ । ଏହା କୋଭିଡ- ୧୯ରେ ଗୁରୁତର ହେବା, ଡାକ୍ତରଖାନାରେ ଭର୍ତ୍ତି ହେବା ହ୍ରାସ କରିବା ସହ ମୃତ୍ୟୁହାର କମାଇଥାଏ ।
SR