রক্ষা মন্ত্রী শ্রী রাজনাথ সিংহনা সেপ্তেম্বর ২৬, ২০২২দা লৈবাক্কী মখোয়গী থৱায় কৎখ্রবা হিমাচল প্রদেসতগী হৌখিবা আর্মদ ফোর্সশিংগী থৌনা ফরবা লান্মীশিংগী ইমুং-মনুংশিংদা ইকায়খুম্নবা উৎখ্রে। ইকায়খুম্নবা উৎপগী থৌরম অদু রাজ্য অসিগী কনগ্রা জিলাগী বদোলিদা পাংথোকখি। রক্ষা মন্ত্রীনা ইকায়খুম্নবা উৎখিবা লান্মীশিং অদুগী মনুংদা অহানবা পরাম বির চক্র ফংখিবা মেজর সোম্নাথ শর্ম্মা(১৯৪৭); ব্রিগেদিয়র সের জুং থাপা, মহা বির চক্র(১৯৪৮); লেপ্তেন্ত কর্নেল ধান সিংহ থাপা, পি.ভি.সি(১৯৬২); কেপ্তেন বিক্রম বাত্রা, পি.ভি.সি(১৯৯৯) অমসুং সুবেদার মেজর সঞ্জয় কুমার, পি.ভি.সি(১৯৯৯) য়াওখি। মখোয়গী থৌনা ফবা অমসুং কৎথোকপগীদমক মখোয়গী মমিংশিং ভারতমচা খুদিংমক্কী থম্মোয়দা হক্তুনা লৈরি।

লান্মীশিংগী ইমুং-মনুংগী মীওইশিং ইকায়খুম্নবা উৎলদুনা শ্রী রাজনাথ সিংহনা হায়খি থৌনা ফরবা লান্মীশিংগী কৎথোকপা অসিদা লৈবাক অসিনা লমন তোল্লে। মখোয়গী থকশিং-খাসি, মথৌদা কৎথোকপা, মরৈবাক নুংশিবা অমসুং কৎথোকপা অসিগীদমক মরুওইনা লৈবাক অসিগী নহারোলশিংদা আর্মদ ফোর্সশিংনা ইথিল পীরি। হৌরকফম, লাইনিং অমসুং ফুরুপ অসি দরকার ওইদে, দরকার ওইরিবা অসিদি ঐখোয়গী নুংশিরবা মচু অহুমগী ফিরাল লেপ্তনা ৱাংনা পাইহনবনি

রক্ষা মন্ত্রীনা হায়খি ভারত অসি মালেম শীনবা থুংনা শান্তিগী পাউজেল পীবা অমতা ঙাইরবা লৈবাকনি অমসুং থৌনা ফবগীদমক লৈবাক অসিগী লান্মী অসি মালেম শীনবা থুংনা ইকায়খুম্নরি। ভারতনা কৈদৌঙৈদা লৈবাক অমতদা খুৎথাদ্রি অমসুং মপান লৈবাক্কী লম ইঞ্জি অমা ফাওবা লৌশিন্দ্রি। করিগুম্বা ভারতকী নুংঙাই-য়াইফবা অসিদা অপনবা পীনবা হোৎনরক্লবদি মতিক চাবা পাউখুম অমা পীগনি। ভারত অসি শান্তি পামজবা লৈবাক অমনি, লৈবাক অসি পাংদবা নত্ত্রগা লান কিবা লৈবাক অমনি হায়না লান্না লৌরোইদবনি। মালেমগা লোয়ন্না ঐখোয়না কোবিদ-১৯ থেংনবা মতমদা, ঐখোয়না অৱাং থংবা ঙমখৈদা চাইনাগা মুক্নখি। গালৱানগী থৌদোক্তা ঐখোয়গী লান্মীশিংগী থৌনা অদুনা, ফনা য়াম্না চাউবা লৈবাক ওইরবশু, ভারতনা কৈদৌঙৈদা তুকথরোই হায়বা উৎলে।

২০১৬গী সর্জিকেল স্ত্রাইকশিং অমসুং ২০১৯গী বালাকোত এয়রস্ত্রাইকশিংগী মতাংদা শ্রী রাজনাথ সিংহনা হায়খি তেরোরিজমগী মায়োক্তা ভারতকী অনৌবা লাল্লোং অসিনা লৈবাক্কী অপুনবা অমসুং ঙমখৈ থুগায়নবা হোৎনরিবশিংগী মমু থুদেক্লে। নিংথিনা থৌরাং তৌরবা থৌশিল অমগী মখাদা পাকিস্থানগী ঙমখৈদগী তেররগী থবকশিং পাংথোকপনি। উরি অমসুং পুলৱামা থৌদোকশিংগী মতুংদা, ২০১৬গী সর্জিকেল স্ত্রাইকশিং অমসুং ২০১৯গী বালাকোত এয়রস্ত্রাইকশিং চৎথদুনা, তেরোরিজম মরু ফংনা মুৎথৎনবা ঐখোয়গী সরকার অমসুং আর্মদ ফোর্সশিংনা পায়খৎলিবা থবকশিং অদু মালেমদা উৎখ্রে। করিগুম্বা দরকার লৈরিবদি ঐখোয়গী ফোর্সশিংনা ঙমখৈগী ৱাংমদা খুৎথাবগী থৌনা লৈরি হায়বা ঐখোয়না উৎলে। ভারতকী শক্তম হোঙলে। হৌজিক লৈবাক অসিগী ৱা মালেমগী লৈবাকশিংনা হকচিন্না তারে।

রক্ষা মন্ত্রীনা হায়খি লৈবাক অসি মপাঙ্গল কন্নবা অমসুং ‘অত্মানির্ভর ভারত’ ওইনবা সরকারনা অকনবা থবক পায়খৎলে অমসুং প্রধান মন্ত্রীগী মঙলান মঙফাওন্নবা থবকশিং পায়খৎপদগী খুমাঙ চাউশিনবা ঙম্লে। মমাঙদা, ভারত মপান লৈবাক্তগী খুৎলায় লৈবগী মমিং চৎলম্মী। ঙসিদা মালেমদা মপান্দা খুৎলায় য়োনবা লৈবাক ২৫গী মনুংদা অমা ওইরে। চহি ৮গী মমাঙদা লুপা কোতি ৯০০গী খুৎলায়শিংদা মপান্দা য়োল্লম্বদগী হৌজিক লুপা কোতি ১৩,০০০ হেন্না থাদোকপা ঙম্লে। ২০২৫দা মপান্দা খুৎলায় য়োনবা লুপা কোতি ৩৫,০০০ য়ৌবা ঙম্লগনি হায়না ঐখোয়না থাজবা থম্লি অমসুং ২০৪৭ ফাওবগী মনুংদা লুপা কোতি লাখ ২.৭গী খুৎলায়শিং মপান্দা য়োন্নবা পান্দম থম্লিবা অসি ফংবা ঙমগনি।

শ্রী রাজনাথ সিংহনা হায়খি চীফ ওফ দিফেন্স স্তাফ হাপ্পা অমসুং মিলিতরি এফেয়ার্স দিপার্তমেন্ত লিংখৎপা অসি লৈবাক্কী ঙাক-শেনগী থবক কনখৎনবা পায়খৎপা মরুওইবা থবক খরনি। নেসনেল দিফেন্স একাদেমীদা নুপীমচাশিং চঙবা য়ারে অমসুং আর্মদ ফোর্সশিংদা নু্পীশিং পর্মিনেন্ত কম্মিসন পীরে। লানগী জহাজশিংদা নুপীশিং থম্নবা ঐখোয়না লম্বী শেম্লে। মরুপ-মপাং ওইরিবা লৈবাকশিংদা সেকুরিতিগী ৱাখল্লোন অমা ফাওহন্নবা সরকারনা অনৌবা ভারত অমা শেমগৎলি অমসুং ফত্তবা ৱাখল খনবা লৈবাকশিং উফুল ওনবা নত্তনা করি অমতা ফংলোই।

রক্ষা মন্ত্রীনা হায়খি ভারতনা য়াংনা চাউখৎপগী লম্বীদা চঙশিল্লিবা অসিগী মরমদি আর্মদ ফোর্সশিংগী অথৌবশিংদগী ইথিল ফংবদগীনি। লানগী উৎখৎনবা লাকপা মতম অমসুং লৈবাক্কী ফিবমদা শিংনরকপা মতমদা, লান্মীশিংনা লান্দাখি অমসুং লৈবাক অসি ঙাকথোকখি। লৈখিদ্রবা অথৌবশিং অদুগী কৎথোকপা অদুনা মীয়াম হিংলিবনি।

শ্রী রাজনাথ সিংহনা হায়খি ঙমখৈদা লৈবা রাজ্য অমা ওইনা হিমচাল প্রদেস অসি য়াম্না মরুওই অমসুং ঙমখৈগী শরুকশিংদা লৈরিবা মীওইশিং অসি মমল য়াম্লবা লনশিংনি। মখোয়গী পুন্সি নুংঙাইনবা হোৎনবা অসি সরকার খুদিংমক্কী থৌদাংনি অমসুং প্রধান মন্ত্রী শ্রী নরেন্দ্র মোদীনা লুচিংবা সরকার অসিনা লৈবাক্কী অসিগী ঙমখৈগী লম্বী-থোঙ অমসুং ইন্তিলিজেন্সকী মচাক-মথুমশিং শেমগৎলে। ঙমখৈগী শরুকশিংদা কিলোমিতর চা কয়াগী লম্বীশিং শেম্লে, থোঙ অমসুং তন্নেলশিং শারে। হিমাচল প্রদেসকী অতল তন্নেল অসিগী অচৌবা প্রোজেকশিংগী মনুংদা অমনি।

রক্ষা মন্ত্রীনা হায়খি এক্স-সর্বিসমেন অসি লৈবাক অসিগী লনশিংনি। ইমা লৈবাক্কীদমক মখোয়গী কৎথোকপা অসি মমল অমতনা লেপ্পা ঙম্লোই। পোথারবা লান্মীশিংগী য়াইফনবা সরকারনা থবক কয়া পায়খৎলি। দিজিতেল ইন্দিয়াগী মখাদা ওনলাইনগী থবক কয়া দিফেন্স মিনিস্ত্রিনা পায়খৎলে। পায়খৎলিবা থবকশিং অদুগী মনুংদা স্মার্দ কান্তিন কার্দ, এক্স-সর্বিসমেন আইদেন্তি কার্দ, কেন্দ্রিয়া সাইনিক বোর্দ অমসুং দাইরেক্তোরেত জেনরেল ওফ রিসেতলমেন্ত সর্বিসেস অমসুং সিস্তেম ফোর পেন্সন এদমিনিস্ত্রেসন(রক্ষা)গী থবকশিং ওনলাইন্দা ফংহনবা য়াওরি।

শ্রী রাজনাথ সিংহনা হায়খি লন-থুম, শক্তি ফংনবা নত্তনা মীওইবা খুন্নাইগী য়াইফনবগীদমক শোক্নখিবা লান অমা ওইনা, ১৯৭১গী লান ভারতনা মাইপাকখিবা অসি পুৱারিদা নিংশিংদুনা লৈহৌরগনি। ভারতকী মাইপাকপা অদু লুচিংখিবা জেনরেল সাম মনেকশো, জনরেল জগজিত সিংহ অরোরা, জনরেল জাকোব, জেনরেল সুজান সিংহ উবান অমসুং জেনরেল ওফিসার ইন কমান্দ এয়র মার্সেল লতিফকী মমিংশিং কৈদৌঙৈদা কাউবা ঙম্লরোই। লান অদুদা ভারতকী লান্মীশিংদা হিন্দুশিং, মুসলিমশিং, পর্সিশিং, সিখশিং অমসুং জিয়ু অমা য়াওখি। ভারতনা সর্ভধর্ম্ম সম্তব(লাইনিং খুদিংমক ইকায়খুম্নবা)দা থম্লিবা থাজবা অদু মসিনা খুদম্নি। থৌনা ফরবা লান্মীশিং অদু তোঙান-তোঙানবা রাজ্যশিংগী তোঙান-তোঙানবা লোন ঙাংবা ঙাক্তনি। ভারতমচা ওইবগী অপুনবা অকনবা লংলা অমনা মখোয় পুনখি।

*****