കേന്ദ്ര ഭവന, നഗരകാര്യ മന്ത്രാലയം (MoHUA), സ്വച്ഛത സ്റ്റാർട്ടപ്പ് ചലഞ്ചിലെ വിജയികളെ 2022 സെപ്റ്റംബർ 21-ന് ന്യൂ ഡൽഹിയിൽ സംഘടിപ്പിച്ച അവാർഡ് ദാന ചടങ്ങിൽ അനുമോദിച്ചു. ഭവന, നഗരകാര്യ സഹമന്ത്രി ശ്രീ കൗശൽ കിഷോർ, ഇന്ത്യയിലെ ഫ്രഞ്ച് അംബാസഡർ H.E. ഇമ്മാനുവൽ ലെനേൻ, മന്ത്രാലയത്തിലെ മുതിർന്ന ഉദ്യോഗസ്ഥർ, ശുചിത്വ, മാലിന്യ സംസ്കരണ മേഖലയിൽ പ്രവർത്തിക്കുന്ന നിരവധി സ്റ്റാർട്ടപ്പുകളുടെ പ്രതിനിധികൾ എന്നിവർ ചടങ്ങിൽ പങ്കെടുത്തു.

പ്രധാനമന്ത്രി ശ്രീ നരേന്ദ്ര മോദിയുടെ ശുചിത്വ ഇന്ത്യ എന്ന കാഴ്ചപ്പാട് സ്വച്ഛ് ഭാരത് മിഷൻ-അർബൻ (എസ്‌ബി‌എം) ആരംഭിച്ചതോടെ ജന മുന്നേറ്റമായി മാറിയതായി ചടങ്ങിൽ സംസാരിച്ച ശ്രീ കൗശൽ കിഷോർ പറഞ്ഞു. ഈ ദൗത്യത്തിന് കീഴിൽ മാലിന്യങ്ങൾ പുനരുപയോഗം ചെയ്ത് ഉപയോഗപ്രദമായ ഉൽപ്പന്നങ്ങളാക്കി മാറ്റുന്നത് മാലിന്യ രഹിത നഗരങ്ങളെന്ന ലക്ഷ്യത്തിലേക്ക് നീങ്ങാൻ സഹായിക്കുക മാത്രമല്ല, വലിയ തോതിൽ തൊഴിലവസരങ്ങൾ സൃഷ്ടിക്കുന്നതിനും സഹായിക്കും.

സ്വച്ഛത സ്റ്റാർട്ടപ്പ് ചലഞ്ചിന് കീഴിൽ ചുരുക്കപ്പട്ടികയിൽ ഉൾപ്പെട്ട 30 സ്റ്റാർട്ടപ്പുകളിൽ മികച്ച 10 എണ്ണത്തിന് സ്റ്റാർട്ടപ്പുകളെ പ്രോത്സാഹിപ്പിക്കുന്നതിനുള്ള ഫ്രഞ്ച് ഗവൺമെന്റിന്റെ സംരംഭമായ ഫ്രഞ്ച് ടെക്കിൽ നിന്ന് 25 ലക്ഷം രൂപ വീതം സാമ്പത്തിക സഹായം ലഭിക്കുമെന്ന് മന്ത്രി അറിയിച്ചു. ശേഷിക്കുന്ന 20 സ്റ്റാർട്ടപ്പുകളിൽ ഓരോന്നിനും കേന്ദ്ര ഗവൺമെന്റിന്റെ 20 ലക്ഷം രൂപ വീതം സാമ്പത്തിക സഹായം ലഭിക്കുമെന്ന് അദ്ദേഹം പ്രഖ്യാപിച്ചു.

സ്വച്ഛ് ഭാരത് മിഷൻ-അർബന്റെ പരിധിയിൽ, 2022 ജനുവരി മുതൽ, AFD, DPIIT എന്നിവയുടെ പങ്കാളിത്തത്തോടെ കേന്ദ്ര ഭവന നഗരകാര്യ മന്ത്രാലയം സ്വച്ഛത സ്റ്റാർട്ടപ്പ് ചലഞ്ച് ആരംഭിച്ചു. രാജ്യത്തെ  മാലിന്യ സംസ്‌കരണ മേഖലയുടെ സംരംഭകത്വ സാധ്യതകൾ പ്രയോജനപ്പെടുത്തുന്നതിനും വ്യവസായ സംരംഭങ്ങളുടെ വികസനത്തിന് അനുകൂലമായ അന്തരീക്ഷം പ്രോത്സാഹിപ്പിക്കുന്നതിനുമാണ് ചലഞ്ച് ലക്ഷ്യമിടുന്നത്.