খুরুমজরি!

ঐহাক্না লৈবাক অসিগী আই.তি.আই. লাখ কয়াগী মহৈরোয়শিংগা ৱারী শাবগী খুদোংচাবা অমা ঐহাক্না ঙসি ফংজরে। স্কিল দিবেলপমেন্তগা মরী লৈনবা তোঙান-তোঙানবা ইন্সতিত্যুসনশিংগী মহৈরোয়শিং, ওজাশিং, এজুকেসনগী লমদগী অতোপ্পা দিগনিতরীশিং, নুপী অমদি নুপাশিং!

ঙসি ২১শুবা চহিচা অসিদা ঐখোয়গী লৈবাক্তা মাংদা চংশিন্দুনা অনৌবা পুৱারী অমা শেমখি। অহানবা ওইনা আই.তি.আই.শিংগী মহৈরোয় লাখ মপাল হেন্না য়াওবা কৌশাল দিক্ষান্ত সমারোহ পাঙথোক্লি। ভর্চুএল মিদিয়মগী খুত্থাংদা ঐখোয়গা লোয়ননা মহৈরোয় লাখ ৪০ হেনবগা কন্নেক্ত তৌরি। কৌশাল দিক্ষান্ত সমারোহগীদমক নুংঙাইবা ফোঙদোকচরি অমসুং ঙসিগী নুমিৎ অসি য়াম্না অফবা থৌরম অমনি। ঙসি অসি ভগৱান বিশ্বকর্মাগী মপোক কুমওনসু তারি। কৌশাল দিক্ষান্ত সমারোহ অসিদা স্কিলশিংগা লোয়ননা ভগৱান বিশ্বকর্মাগী মপোক নুমিৎ অসিদা ইনোভেসনগী লম্বীদা মখোয়গী অহানবা খোঙথাং থাংজিনবা হৌরিবা অসি বিশ্বকর্মা জয়েন্তিগী য়াইফরবা নুমিৎ অসিগা পুন্না তামিন্নবা অসি য়াম্না নুংঙাই! নখোয়গী অহৌবদা নুংঙাইখিবা অদুগুম্না হয়েংগী মাইকৈদা চংশিল্লিবা নখোয়গী খোঙচৎ অসিনা হেন্না ক্রিএতিব ওইগনি হায়না ঐহাক্না থাজবগা লোয়ননা ফোঙদোকপা ঙমগনি।

মরুপশিং,

বিশ্বকর্মা জয়েন্তি হায়বা অসি স্কিলবু ইরাৎপগী কুহ্মৈনি। খুৎহৈবা অমনা হকবা মীতম অসিদা থৱায় হাপত্রিবা ফাওবা মদুবু ঈশ্বরগী মীতমনি হায়না লৌদে। বিশ্বকর্মা জয়েন্তীগী শেংলবা থৌরম অসিদা মহৈরোয়শিংগী স্কিলশিং অসিবু ইকাই খুম্নবীবা অমসুং শকখঙবীবা অসি ঐখোয় পুম্নমক্কী ওইনা য়াম্না চাউথোকচনীংঙাই ওইবা ৱাফম অমনি। বিশ্বকর্মা জয়েন্তী অসি থবক কন্না শুবা মীপুম খুদিংমকপু ইকাই খুম্নবনি, তশেংবদি মসি শিন্মীশিংগী নুমিৎনি। ঐখোয়গী লৈবাক্তা ঐখোয়না শিন্মীশিংগী স্কিলদা ঈশ্বরগী শক্তম উবা ফংই, মখোয়বু বিশ্বকর্মাগী শকলোন্দা উবা ফংই। হায়বদি মখোয়দা লৈরিবা স্কিল অসিদা ঈশ্বরগী ওইবা গুন শরুক খরা য়াওরি। ঐহাক্না খঙই মদুদি থৌরম অসি ভগৱান বিশ্বকর্মাদা থমোয় শেংনা ইকাই খুম্নবা উৎপনি। ‘কৌশালনজলি’ নত্ত্রগা ‘কর্মনজলি’ কৌনীংবা অমা কৌরবসু বিশ্বকর্মাগী মপোক কুমওন অসিদগী হেন্না নুংঙাইবা করি লৈগনি।

মরুপশিং,

হৌখিবা চহি নিপান্দা লৈবাক অসিনা ভগৱান বিশ্বকর্মাদগী ইথিল লৌদুনা অনৌবা স্কিমশিং হৌদোকখি অমসুং ‘শ্রমেব জয়তে’গী চৎনবী অসি অমুক হন্না হিংগৎহন্নবা হোৎনরি। ঙসি লৈবাক অসিনা স্কিল দিবেলোমেন্তদা চপ মান্নবা মীৎয়েং চংদুনা অমুক হন্না ইকাই খুম্নবা উৎখি। চহিচা অসি ভারতকী চহিচা ওইহন্নবগীদমক ভারতকী নহারোলশিংবু এজুকেসন লোয়নন স্কিলদা চপ মান্ননা মীথোই-মীহেন ওইহনবা য়াম্না মরু ওই। মসি খঙনা সরকার অসিনা নহারোলগী স্কিল দিবেলপমেন্তদা অমসুং অনৌবা ইন্সতিত্যুসনশিং হাংদোকপদা মরু ওইবা মীৎয়েং চংলি। ঐখোয়গী লৈবাক্কী অহানবা আই.তি.আই. অসি ১৯৫০দা লিংখৎখি। মথংগী দিকেদ তরেৎ অসিদা আই.তি.আই. লিশিং ১০ লিংখৎখি। হৌখিবা চহি ৮দা ঐখোয়গী সরকারনা লৈবাক অসিদা অনৌবা আই.তি.আই. লিশিং ৫রোম লিংখৎখি। হৌখিবা চহি ৮ অসিদা আই.তি.আই.শিংদা অনৌবা সীত লাখ ৪ হেন্না হাপচিনখি। আই.তি.আই.শিংগী মথক্তা লৈবাক শিনবা থুংবদা নেস্নেল স্কিল ত্রেনিং ইন্সতিত্যুতশিং, ইন্দিয়ন ইন্সতিত্যুত ওফ স্কিলশিং অমসুং স্কিল দিবেলপমেন্ত সেন্তর লিশিং কয়া হাংদোকখি। সরকার অসিনা স্কুলগী থাক্তা স্কিল দিবেলপমেন্ত প্রমোৎ তৌনবা স্কিল হব ৫০০০ হেন্না হাংদোক্লি। অনৌবা নেস্নেল এজুকেসন পোলিসী চৎনহল্লবা মতুংদা এক্সপরিয়েন্স-বেজ লর্নিংসু প্রমোৎ তৌরি অমসুং স্কুলশিংদা স্কিল কোর্সশিং হাংদোক্লি।

সরকারনা আই.তি.আই.শিংগী মহৈরোয় পুম্নমক্কীদমক অতোপ্পা ৱারেপ অমগা লৌখি, মসিনা নখোয় পুম্নমক্তা কান্নবা পীরি। নেস্নেল ওপন স্কুলগী খুত্থাংদা ক্লাস ১০ পাস তৌরগা আই.তি.আই.দা লাকপা মহৈরোয়শিংদা মখোয়গী ১২ লান্থোকপগী সর্তিফিকেৎ লায়না ফংহল্লি। মসিনা নখোয়না মখা তানা মহৈ তম্বদা হেন্না খুদোংচাহল্লগনি। থা খরগী মমাংদা নখোয়গীদমক মরু ওইবা ৱারেপ অমা লৌখি।  আই.তি.আই.শিংদগী তেক্নিকেল ত্রেনিং তৌরকপা নহারোলশিং আর্মীদা চংনবা অখন্নবা প্রোবিজন অমা থম্লি। হায়বদি আই.তি.আই.শিংদগী গ্রেজুএৎ তৌরকপা নহারোলশিংনা হৌজিক আর্মীদা চংনবগী খুদোংচাবসু ফংহল্লগনি।

মরুপশিং,

মরিশুবা ইন্দস্ত্রিএল রিভোল্যুসন ‘ইন্দস্ত্রী ৪.০’গী চহিচাগী মতাংদা ৱা ঙাংলদুনা প্রধান মন্ত্রীনা হায়খি মদুদি ভারতকী মাইপাকপদা ইন্দস্ত্রিএল ত্রেনিং ইন্সতিত্যুতশিংনা মসিদা অচৌবা থৌদাং অমা লৌরগনি। মতমগা ইরোইননা থবক্কী মওং-মতৌদা অহোংবা লাক্লি মরম অসিনা সরকারনা ঐখোয়গী আই.তি.আই.শিংদা তম্লিবা মহৈরোয়শিং অখন্ননা য়েংশিন্দুনা মখোয়দা মোদর্ন কোর্স ফংহন্নবা খুদোংচাবসু পীরি। কোদিং, এ.আই. রোবোতিক্স, ৩দি প্রিন্তিং, দ্রোন তেক্নোলোজী অমসুং তেলিমেদিসিনগা মরী লৈনবা কোর্স কয়া আই.তি.আই.শিংদা হৌদোকখ্রে। ভারতনা রিন্যুএবল ইনর্জী, সোলর পাৱর অমসুং ইলেক্ত্রিক ভেহিকলশিংগী লমদা করম্না ভারতনা মাংজিল থাবগে নখোয়না উবা ফেলি। অসিগুম্বা কোর্সসিং অসি ঐখোয়গী আই.তি.আই. কয়াদা হৌদোকপগা লোয়ননা নখোয়গুম্বা মহৈরোয়শিংগীদমক্তা থবক্কী খুদোংচাবশিং লায়না ফংলগনি।

মরুপশিং,

ঙসি, লৈবাক অসিদা তেক্নোলোজী হেনগৎলকপগা লোয়ননা থবক্কী খুদোংচাবশিং হেনগৎলক্লি। খুদম ওইনা খুঙ্গং খুদিংমক্তা ওপ্তিকেল ফাইবর ফংহন্দুনা কম্মন সর্ভিস সেন্তর লাখ কয়া হাংদোক্লি অমসুং আই.তি.আই.শিংদগী পাস তৌখিবা মহৈরোয়শিংগীদমক খুঙ্গংশিংদা খুদোংচাবশিং হেন্না হেন্না ফংহল্লি। খুঙ্গংদা লৈবা মোবাইল শেম্বগী থবক নত্ত্রআ লৌউ-শিংউদা অনৌবা তেক্নোলোজীগা মরী লৈনবা থবক, দ্রোনশিংগী মতেংগা লোয়ননা হার চাইবা নত্ত্রগা হীদাক-লাংথক্কী সপ্লাই তৌবা, অসিগুম্বা অনৌবা থবকশিং খুঙ্গংগী শেন্মীৎলোন্দা হাপচিল্লি, মসিদা আই.তি.আই.শিংগী থৌদাং অসি য়াম্না মরু ওই, ঐখোয়গী নহারোলশিংনা মসিগী খুদোংচাবশিং অসি য়ারিবা মখৈ লৌহৌগদবনি। সরকারনা ৱাখল্লোন অসি খঙনা আই.তি.আই.শিং অপগ্রেদ তৌনবা অমসুং মতম চানা অহোংবা পুরক্নবা লেপ্পা লৈতনা হোৎন্দুনা লাকখি।

মরুপশিং,

স্কিল দিবেলপমেন্তগা লোয়ননা নহারোলশিংদা সোফ স্কিলশিং ফংহনবা চপ মান্ননা মরু ওই। আই.তি.আই.শিংদা অখন্নবা মীৎয়েং চংলি। বিজিনেস প্লান অমা শেম্বা, বেঙ্কতগী লোন অমা লৌনবগী প্লানশিং, মথৌ তাবা ফোর্মশিং মেনশিনবা অমসুং অনৌবা কম্পনীগী রেজিস্তর তৌবা অসিগুম্বা অসি কোর্সকী শরুকশিংদা য়াওহল্লি। সরকারগী খোঙথাংশিং অসিগী ফল ওইনা ঙসি ভারতনা স্কিল অমসুং দাইভর্সিতীদা ক্বালিতী য়াওরক্লি। হৌখিবা চহি খরা অসিদা ঐখোয়গী আই.তি.আই. পাস-আউতশিংনা ৱর্ল্দ স্কিল্স কম্পিতিসনশিংদা অচৌবা মনা কয়া ফংখি।

মরুপশিং,

খন্নগদবা চপ মান্ননা মরু ওইবা স্কিল দিবেলপমেন্তগা মরী লৈনবা অতোপ্পা হীরম অমসু লৈরি। নহারোল অমদা এজুকেসন লোয়ননা স্কিলগী শক্তি লৈরবা মতমদা মহাক্কী মশাদা মশানা থাজবা থম্বা অদু মশা মথন্তা হেনগৎচরকই। নহারোল অমনা স্কিলশিংগা লোয়ননা এম্পাৱর তৌদুনা থোরকপা মতমদা মহাক্না মহাক্কী মশাগী ভেঞ্চর অমা করম্না হৌদোক্কনি হায়বগী লৌশিং মহাক্কী ৱাখলদা লাকচরকই। মশানা মশাদা থবক পীজবগী ৱাখল্লোন অসি শৌগৎনবা ঙসি গরেন্তী য়াওদনা লোনশিং পীরিবা মুদ্রা য়োজনা, স্তার্তঅপ ইন্দিয়া অমসুং স্তেন্দঅপ ইন্দিয়াগুম্বা স্কিমশিং লৈরি। মাংদা পান্দম অদু লৈরে, নখোয়না মাইকৈ অদুদা চংশিনগদবনি। ঙসি নখোয়না লৈবাক অসিগী খুৎ পাইদুনা চৎলি, হয়েংনা নখোয়না লৈবাক অসিবু মাংদা লমজিংগদবনি। আজাদী কা অমৃত কালদা মীয়ামগী পুক্নিং চীংশিল্লদুনা শ্রী মোদীনা হায় ঐখোয়গী পুন্সিগী মথংগী চহি ২৫ অসি ভারতকী মথংগী চহি ২৫ মরু ওইবগুম্না চপ মান্ননা মরু ওই। নখোয় পুম্নমক্না মেক ইন ইন্দিয়া অমসুং ভোকেল ফোর লোকেল কেম্পেনগী লুচিংবশিংনি। নখোয়না ভারতকী ইন্দস্ত্রীগী য়াংলেন শরূগুম্বনি মরম অসিনা চাউখৎপা আত্মনির্ভর ভারত অমগী ফিরেপ থুংহনবদা নখোয়না অচৌবা থৌদাং অমা লৌগদবনি।

মরুপশিং,

নখোয়না ৱাফম অমগা নীংশিংবা তাই। ঙসি মালেমগী অচৌবা লৈবাক কয়ানা মখোয়গী মঙলানশিং থুংহন্নবা অমসুং খোঙজেল অদু হন্থহন্দনবা স্কিল লৈবা ৱার্কফোর্স অমগী মথৌ তাই। লৈবাক অসিদা লোয়ননা মীরৈবাক্তা খুদোংচাবা কয়ানা ঙাইদুনা লৈরি। মালেমগী হোংলক্লিবা ফীভমশিং অসিদা মালেমনা ভারত্তা থম্লিবা থাজবা অসি লেপ্পা লৈতনা হেনগৎলক্লি। কোরোনাগী মতমদা ফাওবা ভারতনা মাগী স্কিল লৈবা ৱার্কফোর্স অমসুং মাগী নহারোলশিংনা অচৌবা শীংনবশিংগী ৱারোইশিনশিং করম্না পীবা ঙমখিবগে উৎখি। ভারতমচাশিংনা মখোয়গী স্কিল অমসুং তেলেন্তশিং, হেল্থ সর্ভিসশিং নত্ত্রগা হোতেল-হোস্পিতাল মেনেজমেন্ত, দিজিতেল সোল্যুসনশিং নত্ত্রগা দিজাস্তর মেনেজমেন্ত ওইরবসু লৈবাক খুদিংমক্তা ফিদা অমা কনবা ঙম্লি। ভারতকী মীওইশিংনা অখন্নবা দলান অমা শাখি নত্ত্রগা ভারতকী মীওইশিংনা অখন্নবা প্রোজেক্ত অমা পাইখৎখি হায়না ঐহাক্না মীরৈবাক্তা চৎখিবা খোঙচৎশিংদা মরু ওইবা লুচিংবশিংনা ঐঙোন্দা হায়রকখিবা অদু নীংশিংলি। মসিগী থাজবা অসিগী নখোয়না কান্নবশিং মপুং ফানা লৌগদবনি।

মরুপশিং,

ঐহাক্না নখোয়দা ৱাফম অমত্তগী হায়জনীংই। ঙসি নখোয়না তমশিল্লিবা অসিনা নখোয়গী তুংলমচৎকী য়ুম্ফম শোইদনা ওইগনি, মখোয়গী তুংলমচৎশিং ওইগদৌরিবা স্কিলশিং অসি অদুমক অপগ্রেদ তৌবা মথৌ তাই। মরম অসিনা স্কিলশিংগী মতাংদা লাকপদা নখোয়গী মন্ত্র অসি ‘স্কিলিং’, ‘রিস্কিলিং’ অমসুং ‘অপস্কিলিং’ হায়বা অসিনা ওইগদবনি! নখোয়না লৈরিবা লম অদুদা করি অনৌবা থোক্লি হায়বা অসি মতম চুপ্পদা য়েংগদবনি। খুদম ওইনা করিগুম্বা কনাগুম্বা অমনা ওতোমোবাইলদা নোর্মেল কোর্স অমা তম্বা তারবদি মহাক্না ইলেক্ত্রিক ভেহিকলশিংগী দিমান্দগী মতুং ইন্না মশাবু রি-স্কিল তৌবা তাই। মতৌ অসুম্না লম খুদোংমক্তা য়াম্না থুনা অহোংবশিং লাক্লি। মরম অসিনা মতমগী অহোংবগা লোয়ননা নখোয়গী স্কিলশিং অপগ্রেদ তৌবা অমসুং ইনোভেৎ তৌবা মথৌ তাই। অদোমগী গ্রোথ শরুক কয়া হেনগৎহনবা ঙমগদবা অদোমগী লমদা অনৌবা স্কিলশিংগী মরমদা খঙদোকপা য়াম্না মরু ওই। মরম অসিনা নখোয়না অনৌবা স্কিলশিং তমশিনগদবনি অমসুং লৌশিংসু শিয়র তৌগদবনি। খোঙজেল অসিদা অদুমক নখোয়না মাংদা চংশিনগনি অমসুং নখোয়গী স্কিলগা লোয়ননা নখোয়না অনৌবা ভারতকী অফবা তুংলমচৎকী মাইকৈদা লমজিংগনি হায়না ঐহাক্না থাজৈ।

অমসুং মরুপশিং ঐহাক্না ৱাফম অমগা হায়জগে মদুদি নশানা নশাবু কৈদৌনুংদা হন্থনা খনগনু। ভারতকী অফবা তুংলমচৎকীদমক নখোয়গী স্কিল, কেপাবিলিতী, রিজোল্যুসন অমসুং দেদিকেসন অসিনা খ্বাইদগী চাউবা লনশিংনি। বিশ্বকর্মা জয়েন্তি অসিদা তেলেন্ত, স্কিল অমসুং অচৌবা মঙলানশিং লৈবা নখোয়গুম্বা নহা ওইরিবা মীওইশিংগা লোয়ননা ৱারী শানবগী খুদোংচাবা অমা ঐহাক্না ঙসি ফংজবা অসি য়াম্না নুংঙাই। ভগৱান বিশ্বকর্মা জয়েন্তিগী থৌজালশিং নখোয়দা মখা তানা পীনবীবা ওইরসনু, নখোয়গী স্কিলশিং মখা তানা হেনগৎপা ওইরসনু হায়বা ৱাখল্লোন অসিগা লোয়ননা ঐহাক্না ময়ামদা য়াইফ-মঙ্গোল পীজরি!

হন্না-হন্না থাগৎচরি!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংনা ৱারোলদি হিন্দীদা পীখিবনি।

****