কেন্দ্রগী কম্মর্স অমসুং ইন্দস্ত্রী, কঞ্জুমর এফিয়র্স, ফুদ অমসুং পব্লিক দিস্ত্রিব্যুসন অমসুং তেক্সতাইল মন্ত্রী শ্রী পিয়ুশ গোয়লনা ঙসি হায়খি মদুদি বি.এ.পি.এস. স্বামিনরায়ন লাইশঙ অসিনা মালেম পুম্বদা লৈরিবা খুন্নাইদা অচৌবা সেবা অমা পীরি। মহাক্না লোস এঞ্জিলিস্তা লৈবা শ্রী স্বামিনরায়ন লাইশঙদা চৎলুরবা মতুংদা ইন্দিয়ন কম্ম্যুনিতীদা ৱা ঙাংখি।

মহাক্না লোস এঞ্জিলিস্তা লৈরিবা শ্রী স্বামিনরায়ন লাইশঙগী ফজবশিংদা ঙাওজবশিং ফোংদোক্লদুনা অমসুং মসিনা চহি ১০ মায় পাক্না লৈরকপদা হরাও তয়াম্বা ফোংদোক্লদুনা মন্ত্রীনা হায়খি মদুদি লাইশঙ অমা লৈবা হায়বসি লমদম অসিদা লৈরিবা ভারত মচাশিংগীদমক্তদি অমসুং লোস এঞ্জিলিস্তা লৈরিবা মফম অসিগী চাউখৎনবগীদমক ভারত মচানা লৌরিবা থৌদাং অসি য়াম্না কান্নৈ।

প্রমুখ স্বামি মহারাজগী চহি চাম্মা শুরকপা মপোক কুমোন থৌরমদা মহাক্কী মফমদা ইকাইখুম্নবা উৎলদুনা মহাক্না ফোংদোকখি মদুদি মসি মালেম মফম কয়াদা লৈরিবা মহাক্কী থৌজাল অমসুং অফবা কয়া তমজরিবা ঐখোয়গীদমক্তদি য়াম্না অখন্নবা থৌরম অমনি। মহাক্না তোঙান-তোঙানবা থৌরম কয়াদা চহি কয়া অসিদা প্রমুখ মহারাজ জিগী মফমদগী অখন্নবা মরী অমনা কান্নবা কয়া অমা পীবীরি হায়রদুনা শ্রী গোয়লনা হায়খি মদুদি মুম্বাইদা চহি কয়াগী মমাংদা প্রমুখ স্বামি মহারাজগী ৭৫শুবা এনিভর্সেরিদা শরুক য়াখি হায়খি।

শ্রী গোয়লনা হায়খি মদুদি মহাক্না মতম চুপ্পদা মালেম পুম্বদা লৈরিবা শ্রী স্বামিনরায়ন লাইশঙশিংদা চৎপগী খুদোংচাবা ফংজরকই হায়খি অমসুং মখা তারদুনা হায়খি মদুদি লোস এঞ্জিলিসকী লাইশঙ অসিসু য়াম্না অখন্নবা ওই অমসুং য়াম্না ফজনা পাঙথোক্লি। লাইশঙ অসিদা চঙবা মতমদা ফাওরিবা ইশ্বরগী ওইবা ৱাখল্লোন অসি য়াম্না অঙকপা অমনি হায়না মহাক্না হায়খি।

মন্ত্রীনা পনখি মদুদি বি.এ.পি.এস.না হিন্দুশিংবু অমত্তা ওইনা পুনশিন্নবা হোৎনবদা অমসুং হিদুইজম্বু মালেম পুম্বদা লংনা লৈহন্নবা লৌরিবা থৌদাং অসি য়াম্না চাউই। মহাক্কী মোৎ ফোংদোক্লদুনা হায়খি মদুদি মীয়াম্না ভারত ৱাংমা লান্না চৎপা মতমদা অমসুং পুন্সিগী অরং অরাক্কী সংসার নুংঙাইরকপা মতমদা, মথংগী চারোলনা ইমা লৈবাক্কী নুংশিবসে মাঙবগুম তৌই। অদুবু স্বামিনরায়ন লাইশঙ অসি লাক্তুনা মফম অসিদা স্পিরিচুএল ওইনা ঙান্থোইরি অমসুং মথংগী হৌরক্কদবা চারোলবু ইমা লৈবাক্কা শম্নদুনা থম্বা ঙমহল্লি। মখোয়দা অফবা লমচৎ হাপ্পী। মরম অসিনা ইন্সতিত্যুৎ অসিনা খুন্নাই অসিদা মরুওইনা মালেম পুম্বদা অফবা সেবা অমা পীরি হায়না মহাক্না ফোংদোকখি।

স্বামিনরায়ন ভগবাননা হ্যুমেনিতী অমসুং স্পিরিচুৱেলিতী অমসুং খুনাইগী থবক তৌবদা থাজদুনা লাক্লি হায়বা পল্লদুনা, শ্রী গোয়লনা হায়খি মদুদি মহাক্না তাকপী তম্বীরিবশিং অসি মরু ওইনা মীওইবা খুন্নাইদা ঐখোয়না পীগদবশিং অদুদা মীৎয়েং থম্মী।স্বামিনরায়ননা ঐখোয়দা গ্যান, ভক্তী অমসুং শ্রাদ্ধগী ফজরবা কয়া তাকপীরম্বা অমসুং প্রমুখ স্বামি মহারাজনা শন্দোকপীরম্বা কয়া অসি ঐখোয়গা শাগোন্নদুনা লৈহৌরগনি। মহাক্না তাকপীরম্বা কয়া অসিনা ঐহাকপু পুন্সি চুপ্পা লেপ্তনা পুক্নিং থৌগৎখিগনি অমসুং লমজিংখিগনি হায়না শ্রী গোয়লনা হায়খি।

***************