কম্মর্স অমসুং ইন্দস্ত্রী, কঞ্জ্যুমর এফিয়র্স, ফুদ অমসুং পব্লিক দিস্ত্রিব্যুসন অমসুং তেক্সতাইলগী কেন্দ্র মন্ত্রী, শ্রী পিয়ুশ গোয়লনা ঙসি সান ফ্রান্সিস্কো বে এরিয়াদা ভেঞ্চর কেপিতেলিস্তশিংগা উন্নখ্রে।

“সান ফ্রান্সিস্কো বে এরিয়াদা ঐহাক্না ভেঞ্চর কেপিতেলিস্তশিংগা য়াম্না কান্নবা ৱারী শাখি। মতিক লৈবা ভারতকী স্তার্ত-অপ ইকোসীস্তেমগা তেংবাংনবা হেন্নবা অমসুং হেন্না চাউবা খোঙলোই ওইমিন্ননবা মখোয়বু ঐহাক্না পুক্নিং থৌগৎখি”, হায়না মন্ত্রীনা মীফমগা মরী লৈননা ত্বীত তৌখি। ভারতকী স্তার্ত-অপশিংবু হেন্না পাকথোক চাউথোকহন্নবা অমসুং মায় পাকহন্নবগীদমক্তা অঙনবা মতমদা মখোয়দা লমজিং লমতাকপীনবা খনবীনবগীদমক্তা মন্ত্রীনা মখোয়গী মফমদা পুক্নিং থৌগৎখি।

শ্রী গোয়লনা ঙসি জেতস্কেলরগী সি.ই.ও., শ্রী জয় চৌধুরিগসু ঙসি উন্নখি।

“ভারতনা দিজিতেল স্পেস্তা লেপ্তনা চাউখৎলক্লিবসিগা লোয়ননা, ভারতকী সাইবর সেক্যুরিতীবু হেন্না তেক্ত-কায়দবা অমসুং সেক্যুর ওইহন্নবগীদমক্তা লৈবাক্কী সাইবর সেক্যুরিতী হেন্না পাকথোক চাউথোকহনবা য়াবগী পাম্বৈশিংসু খন্নখি”, হায়না মন্ত্রীনা ত্বীত তৌখি।

শ্রী গোয়লনা সর্ভিসনাওগী সি.ই.ও., শ্রী বিল মেকদর্মোতকসু ৱারী শান্নখি।

“ভারতনা দিজিতেল তেকেদ তরাম্না ওক্লিবা অসিগা লোয়ননা, এ.আই. অমসুং মেছিন লর্নিংনা সোফৱেয়রবু সর্ভিস মার্কেত (এস.এ.এ.এস.) অমা ওইনা খোঙজেল য়াঙনা অওনবা পুরক্তুনা ত্রিলিয়ন ৫গী শেন্মিৎলোন ওইনবা চৎলিবা ভারতকী খোঙচৎকী খোঙজেলবু মতৌ করম্না য়াঙখৎহনবা য়াবগে হায়বগী মতাংদা খন্ন-নৈনখি”, হায়না মন্ত্রীনা ত্বীত তৌখি।

মন্ত্রীনা ঙসিগী অঙনবদা স্তেনফোর্দ গ্রেজুএত স্কুল ওফ ব্যুজিনেসকী ফেকলতী অমসুং মহৈরোইশিংগী মফমদা মহাক্কী ৱাফমসু থমখি। তি.আই.ই. সিলিকোন ভেলী, আই.আই.তি. স্তার্ত-অপ অমসুং ইন্দিয়ন কম্ম্যুনিতী সেন্তরগা খুৎশম্নদুনা কন্স্যুলেতনা শীন-লাঙবা ভারতকী কম্ম্যুনিতীগী থৌরম  অমদসু মহাক্না শরুক য়াখি।

নুমিৎ অসিগী মখা তারকপদা মীদিয়াগী মীওইশিংগা উন্নবদা, শ্রী গোয়লনা বে এরিয়ানা ভারত, ভারতকী কারবার তৌবশিং অমসুং স্তার্ত-অপশিংনা পাংথোকপা ঙম্বা মতিকশিংদা চেৎনা থাজবা থম্লি হায়না ফোংদোকখি। ভারতকী বিলিয়ন ১.৩গী অপুনবা মীশিংগী চাউরবা কৈথেল অসিগী তৌবা ঙম্বগী চাউরবা মতিক অমসু মখোয়না উরি।

সেল্ফ ইমপ্লোয়মেন্ত অমসুং তেলেন্ত য়ুতিলাইজেসন (এস.ই.তি.য়ু.) স্কিম অমসুং মরী লৈনবা অওনবা পুরক্নবা অমসুং অপস্কিল তৌনবা খোঙথাং কয়াগুম্বা মেন্তর্শিপ হেন্না ফগৎহন্নবা সরকারনা পায়খৎপা খোঙথাং কয়াগী মতাংদা মহাক্না শন্দোক্না তাকখি। স্তার্ত-অপ এদভাইজরী কাউন্সিলগী লুচিং মখাদা তাইয়র ২ অমসুং ৩গী শহরশিংদা মেন্তর্শিপ পাংথোকপগী থবকশিংদা অহেনবা মিৎয়েং চঙলি হায়না মন্ত্রীনা ফোংদোকখি।

সাইবর সেক্যুরিতী কম্পেনী, জেতস্কেলরগী সি.ই.ও.গা উন্নখিবগী মতাংদা শ্রী গোয়লনা পল্লদুনা, মালেম্না সাইবর সেক্যুরিতী এরেনাগা মরী লৈনবা শিংনবশিংগা মাইয়োক্ননবা হোৎনরি হায়খি। ভারতকী সাইবর সেক্যুরিতীবু হেন্না মপাঙ্গল লৈহন্নবা সরকারনা মশক থোকপা খোঙথাং কয়া পায়খত্তুনা হোৎনরি হায়না মহাক্না ফোংদোক্লদুনা বে এরিয়াগী সাইবর সেক্যুরিতী কম্পেনীশিংগা খোঙলোই ওইবনা খোঙথাং অসিদা মায় পাকপা পুরকপদা হেন্না খোঙজেল য়াঙগনি হায়না মহাক্না মখা তাখি।

সেমিকন্দক্তর পোলিসীগী মতাংদা হংলকপা ৱাহংগী পাউখুম পীরদুনা, শ্রী গোয়লনা ভারতনা থা কয়াগী মমাঙদা সেমিকন্দক্তর পোলিসী অমা পুথোকখ্রে অমসুং মসিনা ভারত্তা লাক্তুনা প্লান্ত লিংখত্তুনা মেন্যুফেকচর তৌনবা কান্নবা ইন্সেন্তিব কয়াসু পীরি হায়না পাউদমখি। এস.সি. চেনগা মরী লৈনবা দিজাইন অমসুং তোঙানবা ইলিমেন্ত কয়াগী অফবা ইকোসীস্তেম অমা ঐখোয়গী নাক্তা হান্নদগী লৈরে। ঐখোয়না কম্পেনী কয়াগা ৱারী শান্নরি অমসুং মখোয় কয়া অমনা ভারত্তা ইনভেস্ত তৌনীংবগী তসেংবা অপাম্বা কয়াসু উৎলি হায়না মহাক্না মখা তাখি। ভারতনা দোমেস্তিক সেমিকন্দক্তর ইন্দস্ত্রী চাউখৎহন্নবা য়াম্না চেৎনা খোঙফম চেৎলি হায়না শ্রী গোয়লনা থাজবা পীখি।

ৱাহং কয়াগী পাউখুম পীরদুনা, শ্রী গোয়লনা ভারতকী পোত্থোকশিং, অখন্নবা ওইনা, ৱান দিস্ত্রিক্ত ৱান প্রোগ্রাম (ও.দি.ও.পি.)গী খোঙথাংগী মনুংদা লৈবশিংবু মালেম শিনবা থুংবদা খঙহনবগী তঙাই ফদবা লৈ হায়না ফোংদোকখি। ও.দি.ও.পি. পোত্থোকশিংগী পেকেজিং হেন্না ফগৎহন্নবা ঐখোয়না হোৎনরিবশিংগী মতাংদা তম্লদুনা, মরী লৈনবা পেকেজিংগী মওং-মতৌ হেন্না ফজহন্নবগীদমক্তা নেস্নেল ইন্সতিত্যুত ওফ দিজাইন (এন.আই.দি.), নেস্নেল ইন্সতিত্যুত ওফ ফেশন তেক্নোলোজী (এন.আই.এফ.তি.)নচিংবা মমিং লৈবা ইন্সতিত্যুসন কয়াবুসু শিজিন্নরি হায়না মন্ত্রীনা ফোংদোকখি। ও.দি.ও.পি. মেন্যুফেকচররশিংবু জি.ই.এম.দা শেল অমত্তা লৌদনা পথাপ অসিগী মনুং চনহল্লি অমসুং সরকারগী বোদী, কো-ওপরেতিবনচিংবশিংবুসু ও.দি.ও.পি. পোত্থোক, মরু ওইনা খুদোল ওইনা পীনবা পোত্থোকশিংবু শিজিন্নহন্নবা পুক্নিং থৌগৎলি হায়না মহাক্না মখা তাখি।

ও.দি.ও.পি. অমসুং ওপন নেতৱর্ক ফোর দিজিতেল কম্মর্স (ও.এন.দি.সি.)গী মরক্তা মরী লৈনহনবগী ওইথোকপা য়াবশিংগী মতাংদা পল্লদুনা, শ্রী গোয়লনা ও.এন.দি.সি.না বাইয়র-সেল্লর ইকোসীস্তেম্বু দেমোক্রেতাইজ তৌগনি অমসুং ও.দি.ও.পি.গী অকক্নবশিং হেন্না পাকথোক-চাউথোকহনবদা তেংবাংগনি। ও.এন.দি.সি.বু শহর অমা নত্ত্রগা অনিদা শিজিন্নবা হৌনবা য়াম্না কন্না হোৎনরি অমসুং ও.এন.দি.সি.বু মীয়ামদা পীবা অফবা অমসুং চুনবা খুদোল অমা ওইহন্নবগীদমক্তা হোৎনফম থোকপা পুম্নমক হোৎনরি হায়নসু মহাক্না মখা তাখি।

*********